ಕೊಳ್ಳೇಗಾಲ ವಿಧಾನಸಭಾ ಕ್ಷೇತ್ರ

ಎಸ್ಸಿ ಮೀಸಲಾತಿ ಹೊಂದಿರುವ ಕೊಳ್ಳೇಗಾಲ ಕ್ಷೇತ್ರದಲ್ಲಿ ಒಂಬತ್ತು ಬಾರಿ ಕಾಂಗ್ರೆಸ್, ತಲಾ ಎರಡು ಬಾರಿ ಜನತಾ ಪಾರ್ಟಿ, ಜೆಡಿಎಸ್, ಬಿಜೆಪಿ ಹಾಗೂ ಸ್ವತಂತ್ರ ಅಭ್ಯರ್ಥಿ ಒಮ್ಮೆ ಗೆಲುವು ಸಾಧಿಸಿದ್ದಾರೆ. 

1957ರಲ್ಲಿ ನಡೆದ ಮೊದಲ ಚುನಾವಣೆಯಲ್ಲಿ ಕಾಂಗ್ರೆಸ್ನ ಟಿ.ಪಿ ಬೋರಯ್ಯ ಗೆಲುವು ಸಾಧಿಸಿ, ವಿಧಾನಸಭೆಯಲ್ಲಿ ಮೊದಲ ಬಾರಿಗೆ ಕೊಳ್ಳೇಗಾಲವನ್ನು ಪ್ರತಿನಿಧಿಸಿದ್ದರು. ಬಳಿಕ, 1962 ಮತ್ತು 1967ರಲ್ಲಿ ಅದೇ ಪಕ್ಷದ ಬಿ ಬಸವಯ್ಯ ಗೆಲುವು ಸಾಧಿಸಿದ್ದರು. 1972ರ ಚುನಾವಣೆಯಲ್ಲೂ ಕಾಂಗ್ರೆಸ್ನ ಎಂ ಸಿದ್ದರಾಮಯ್ಯ ಗೆದ್ದು ಬೀಗಿದ್ದರು.

ಆದರೆ, 1978ರ ಚುನಾವಣೆ ವೇಳಗೆ ಬದಲಾದ ರಾಜಕೀಯ ಸನ್ನಿವೇಶದಲ್ಲಿ (ತುರ್ತು ಪರಿಸ್ಥಿತಿ) ಜೆಪಿ ಚಳುವಳಿಯ ಮೂಲಕ ಜನತಾ ಪಕ್ಷ (ಜೆಎನ್ಪಿ) ರೂಪು ತಾಳಿತ್ತು. ಒಡೆದ ಕಾಂಗ್ರೆಸ್ ಮತ್ತು ಜೆಎನ್ಪಿ ಪ್ರಭಾವದಿಂದ ಕೊಳ್ಳೇಗಾಲದಲ್ಲಿ ಮೊದಲ ಬಾರಿಗೆ ಕಾಂಗ್ರೆಸ್ ಪಕ್ಷವನ್ನು ಹಣಿದು ಜೆಎನ್ಪಿಯ ಅರಕೇರಿ ಸಿದ್ಧಾರ್ಥ್ ಸಂಗಪ್ಪ ಗೆಲುವು ಸಾಧಿಸಿದ್ದರು. ಕಾಂಗ್ರೆಸ್ನ ಬಿ ಬಸವಯ್ಯ 1983ರ ಚುನಾವಣೆ ವೇಳಗೆ ಜನತಾ ಪಕ್ಷ ಸೇರಿದ್ದರು. 1983ಮತ್ತು 85ರಲ್ಲಿ ನಡೆದ ಚುನಾವಣೆಯಲ್ಲಿ ಬಿ ಬಸವಯ್ಯ ಜನತಾ ಪಕ್ಷದಿಂದ ವಿಧಾನಸಭೆಗೆ ಆಯ್ಕೆಯಾಗಿದ್ದರು.

1989ರ ಚುನಾವಣೆಯಲ್ಲಿ ಬಸವಯ್ಯ ಅವರನ್ನು ಮಣಿಸಿ ಎಂ ಸಿದ್ದರಾಮಯ್ಯ ಗೆದ್ದರು. ಕ್ಷೇತ್ರವನ್ನು ಕಾಂಗ್ರೆಸ್ ಮತ್ತೆ ತನ್ನ ತೆಕ್ಕೆಗೆ ತೆಗೆದುಕೊಂಡಿತು. ಬಳಿಕ, 1994ರಲ್ಲಿ ಜನತಾ ದಳದಿಂದ ಎಸ್. ̤ಜಯಣ್ಣ, 1999ರಲ್ಲಿ ಕಾಂಗ್ರೆಸ್ನಿಂದ ಜಿ ಎನ್ ನಂಜುಂಡಸ್ವಾಮಿ, 2004ರಲ್ಲಿ ಪಕ್ಷೇತರ ಅಭ್ಯರ್ಥಿ ಬಾಲರಾಜ್,  2008ರಲ್ಲಿ ಕಾಂಗ್ರೆಸ್ನ ಆರ್ ಧ್ರುವನಾರಾಯಣ್ ಗೆದ್ದಿದ್ದರು. ಅವರು 2009ರಲ್ಲಿ ನಡೆದ ಲೋಕಸಭಾ ಚುನಾವಣೆಯಲ್ಲಿ ಚಾಮರಾಜನಗರ ಕ್ಷೇತ್ರದಿಂದ ಆಯ್ಕೆಯಾದ ಹಿನ್ನೆಲೆಯಲ್ಲಿ ಶಾಸಕ ಸ್ಥಾನಕ್ಕೆ ರಾಜೀನಾಮೆ ನೀಡಿದ್ದರು. ಆಗ ನಡೆದ ಉಪಚುನಾವಣೆಯಲ್ಲಿ ಬಿಜೆಪಿ ತನ್ನ ಖಾತೆ ತೆರೆಯಿತು. ಜೆ.ಎನ್.ಎನ್ ಸ್ವಾಮಿ ಬಿಜೆಪಿಯಿಂದ ಗೆಲುವು ಸಾಧಿಸಿದ್ದರು. 2013ರಲ್ಲಿ ಕಾಂಗ್ರೆಸ್ನ ಎಸ್ ಜಯಣ್ಣ ವಿಜೇತರಾಗಿದ್ದರು. 2018ರ ಚುನಾವಣೆಯಲ್ಲಿ ಗೆದ್ದಿರುವ ಎನ್ ಮಹೇಶ್ ಕ್ಷೇತ್ರವನ್ನು ಪ್ರತಿನಿಧಿಸುತ್ತಿದ್ದಾರೆ. ಬಹುಜನ ಸಮಾಜವಾದಿ ಪಕ್ಷದ ಖಾತೆ ತೆರೆದಿದ್ದ ಮಹೇಶ್, ನಂತರ ಬಿಜೆಪಿ ಸೇರಿದರು.