ಚಿತ್ರದುರ್ಗ ವಿಧಾನಸಭಾಕ್ಷೇತ್ರ

ರಾಜಕೀಯ ಇತಿಹಾಸ

ಕೌಟುಂಬಿಕ ರಾಜಕೀಯದ ಹಿನ್ನೆಲೆ, ಹಣಬಲ, ತೋಳ್ಬಲಗಳು ಚಿತ್ರದುರ್ಗ ವಿಧಾನಸಭಾ ಕ್ಷೇತ್ರಕ್ಕೆ ಅನ್ವಯಿಸುವುದಿಲ್ಲ. ಇಲ್ಲೇನಿದ್ದರೂ ಅಭ್ಯರ್ಥಿಯ ಸ್ವಂತ ಪ್ರತಿಷ್ಠೆ ಹಾಗೂ ಅಲ್ಪಪ್ರಮಾಣದಲ್ಲಿ ರಾಜಕೀಯ ಪಕ್ಷಗಳ ಅಲೆಗಳು ಕೆಲಸ ಮಾಡಿವೆ. 

ಚಿತ್ರದುರ್ಗ ಕ್ಷೇತ್ರದಲ್ಲಿ 1952ರ ಮೊದಲ ಚುನಾವಣೆಯಲ್ಲಿ ಶಾಸಕರಾದವರು ಪ್ರಜಾ ಸೋಷಿಯಲಿಸ್ಟ್ ಪಕ್ಷದ ಮುಲ್ಕಾ ಗೋವಿಂದರೆಡ್ಡಿ. 1957ರಲ್ಲಿ ಕಾಂಗ್ರೆಸ್‌ನ ಶಿವಪ್ಪ ಶಾಸಕರಾದರು. ಕ್ಷೇತ್ರದಲ್ಲಿ ಲಿಂಗಾಯತ, ಮುಸ್ಲಿಮ್, ನಾಯಕ, ದಲಿತ ಹಾಗೂ ಹಿಂದುಳಿದ ವರ್ಗದ ಮತದಾರರು ಹೆಚ್ಚಾಗಿದೆ. 

1972 ರಲ್ಲಿ ಕಾಂಗ್ರೆಸ್‌ನ ಸಿ ಅರ್ ಮೊಹಮ್ಮದ್ ಸೈಫುದ್ದೀನ್ ಅವರನ್ನು ಮತದಾರರು ಬೆಂಬಲಿಸಿ ಶಾಸಕರನ್ನಾಗಿಸಿದರು. 1978ರಲ್ಲಿ ಹಿರಿಯ ಮತ್ಸದ್ದಿ ವಿ ಮಸಿಯಪ್ಪನವರನ್ನುಆಯ್ಕೆ ಮಾಡಿದ್ದರು. 1983ರಲ್ಲಿ ದೇಶದಲ್ಲಿ ಜನತಾ ಪರಿವಾರದ ಅಲೆಯಲ್ಲಿ ರಾಜ್ಯದ ಹಿರಿಯ ರಾಜಕಾರಣಿ ಬಿ ಎಲ್ ಗೌಡ ಇಲ್ಲಿಂದ ಆಯ್ಕೆಯಾಗಿದ್ದರು. 

1985 ಮತ್ತು 1989ರಲ್ಲಿ ಜನತಾ ಪಕ್ಷ ಮತ್ತು ಜನತಾ ದಳದಿಂದ ಎಚ್ ಏಕಾಂತಯ್ಯನವರು ಆಯ್ಕೆಯಾಗುತ್ತಾರೆ. ಮುಂದೆ ನಡೆಯುವ ಎರಡು ಚುನಾವಣೆಯಲ್ಲಿ ಒಮ್ಮೆ ಜನತಾ ದಳ ಹಾಗೂ ಮತ್ತೊಮ್ಮೆ ಪಕ್ಷೇತರರಾಗಿ ಸ್ಪರ್ಧಿಸಿ, ಜಿ ಹೆಚ್ ತಿಪ್ಪಾರೆಡ್ಡಿಯವರ ಮುಂದೆ ಸೋಲುತ್ತಾರೆ.

1994ರ ಚುನಾವಣೆ ವೇಳೆಗೆ ಕ್ಷೇತ್ರದಲ್ಲಿ ತಮ್ಮದೇ ಆದ ಪ್ರಭಾವ ಹೊಂದಿದ್ದ ಜಿ ಹೆಚ್ ತಿಪ್ಪಾರೆಡ್ಡಿ ಸ್ವತಂತ್ರವಾಗಿ ನಿಂತು ಗೆಲ್ಲುತ್ತಾರೆ. ಅವರು ಸತತ ಮೂರು ಚುನಾವಣೆಯಲ್ಲಿಯೂ ( 1994, 1999, 2004) ಗೆಲ್ಲುತ್ತಾರೆ. 1994, 199ರಲ್ಲಿ ಪಕ್ಷೇತರರಾಗಿದ್ದ ತಿಪ್ಪಾರೆಡ್ಡಿ, 2004ರಲ್ಲಿ ಕಾಂಗ್ರೆಸ್ ಅಭ್ಯರ್ಥಿಯಾಗಿ ಗೆಲುವು ಸಾಧಿಸಿದ್ದರು.

ಇವರ ನಾಗಾಲೋಟಕ್ಕೆ ಮುರುಘಾಮಠದ ಆಡಳಿತಾಧಿಕಾರಿಯಾಗಿದ್ದ ಎಸ್ ಕೆ ಬಸವರಾಜನ್ ಬ್ರೇಕ್ ಹಾಕಿ, 2008ರ ಚುನಾವಣೆಯಲ್ಲಿ ಬಾರಿ ಅಂತರದಿಂದ ಗೆಲುವು ಸಾಧಿಸುತ್ತಾರೆ. ಸೋತ ನಂತರ ಬಿಜೆಪಿ ಸೇರಿದ ತಿಪ್ಪಾರೆಡ್ಡಿ ಚಿತ್ರದುರ್ಗ ದಾವಣಗೆರೆ ಸ್ಥಳೀಯ ಸಂಸ್ಥೆಗಳಿಂದ ವಿಧಾನ ಪರಿಷತ್‌ಗೆ ನಡೆದ ಚುನಾವಣೆಯಲ್ಲಿ ಸ್ಪರ್ಧಿಸಿ ಗೆದ್ದೂ ಬಿಟ್ಟರು.