ಕಸವನ್ನು ಅವೈಜ್ಞಾನಿಕವಾಗಿ ವಿಲೇವಾರಿ ಮಾಡುವುದರಿಂದ ನಮ್ಮ ಆರೋಗ್ಯ ಮತ್ತು ಪರಿಸರದ ಮೇಲೆ ತೀರಾ ಕೆಟ್ಟ ಪರಿಣಾಮವನ್ನು ಉಂಟುಮಾಡುತ್ತದೆ. ಪ್ರತಿ ದಿನ ನಾವು ಹೊರಗೆ ಎಸೆಯುವ ಹಲವು ಬಗೆಯ ಅನುಪಯುಕ್ತ ವಸ್ತುವೇ ಕಸ. ನಾವು ವರ್ಷದಿಂದ ವರ್ಷಕ್ಕೆ ಜಿದ್ದಿಗೆ ಬಿದ್ದವರಂತೆ ಹೆಚ್ಚೆಚ್ಚು ಕಸವನ್ನು ಉತ್ಪತ್ತಿ ಮಾಡುತ್ತಲೇ ಇದ್ದೇವೆ. ಹಾಗಾಗಿ ಅದರಿಂದಾಗುವ ದುಷ್ಪರಿಣಾಮಗಳು ಹೆಚ್ಚಾಗುತ್ತಲೇ ಇವೆ. ಕಸ ಎಸೆದ ಕೂಡಲೆ ತಾನಾಗಿಯೇ ಎಂದಿಗೂ ಮಾಯವಾಗುವುದಿಲ್ಲ ಎಂಬ ಸಂಗತಿಯನ್ನು ನಾವೆಂದಿಗೂ ಮರೆಯಬಾರದು.
ಕೆಲವೊಂದು ವಸ್ತುಗಳು ಕೆಲ ಸಂದರ್ಭಗಳಲ್ಲಿ ಕೊಳೆಯುತ್ತವೆ. ಆದರೆ, ಪ್ಲಾಸ್ಟಿಕ್ನಂತಹ ಸಾಮಗ್ರಿಗಳು ಜೈವಿಕವಾಗಿ ಕೊಳೆಯುವುದೇ ಇಲ್ಲ. ಅದು ಪರಿಸರದಲ್ಲಿ ಶಾಶ್ವತವಾಗಿ ಹಾಗೆಯೇ ಉಳಿದು ಬಿಡುತ್ತದೆ. ಆದ್ದರಿಂದ ನಾವು ಇನ್ನಾದರೂ ಪ್ಲಾಸ್ಟಿಕ್ ಬಳಕೆಯನ್ನು ಆದಷ್ಟೂ ಕಡಿಮೆ ಮಾಡಬೇಕಾಗಿರುವುದು ಅನಿವಾರ್ಯವಾಗಿದೆ.
ಒಂದು ಪ್ಲಾಸ್ಟಿಕ್ ಬ್ಯಾಗ್ ಕೊಳೆಯುವುದಕ್ಕೆ 15-1000 ವರ್ಷಗಳ ಕಾಲ ತೆಗೆದುಕೊಳುತ್ತದೆ. ವೃದ್ಧರು, ಮಕ್ಕಳಿಗೆ ಹಾಕುವಂತಹ ಡೈಪರ್, ಮಹಿಳೆಯರು ಬಳಸುವಂತಹ ಸ್ಯಾನಿಟರಿ ನ್ಯಾಪ್ಕಿನ್ಗಳು ಕರಗುವುದಕ್ಕೆ 500ರಿಂದ 800 ವರ್ಷಗಳಾಗುತ್ತದೆ. ಜೊತೆಗೆ 500 ವರ್ಷಗಳವರೆಗೆ ಹಾಗೆಯೇ ಇರುತ್ತವೆ.
ಪ್ಲಾಸ್ಟಿಕ್ ಬಾಟಲ್ಗಳಂತೂ ಭೂಮಿಯಲ್ಲಿ ಕರಗುವುದೇ ಇಲ್ಲ. ಕಸವನ್ನು ಎಲ್ಲೆಂದರಲ್ಲಿ ಎಸೆಯಬೇಡಿ. ನಾವು ಎಲ್ಲೆಂದರಲ್ಲಿ ಎಸೆಯುವಂತಹ ಚಿಕ್ಕ ಕಸವೂ ಕೂಡ ಬ್ಲಾಕ್ ಸ್ಪಾಟ್ ಆಗುತ್ತದೆ. ಆದ್ದರಿಂದ ಇನ್ನಾದರೂ ಪ್ಲಾಸ್ಟಿಕ್ ಪರಿಣಾಮಗಳ ಕುರಿತು ಎಚ್ಚೆತ್ತುಕೊಳ್ಳಬೇಕಾಗಿದೆ.
ಈ ಸುದ್ದಿ ಓದಿದ್ದೀರಾ? ಗದಗ | ಸಾರ್ವಜನಿಕರಲ್ಲಿ ಮತದಾನ ಜಾಗೃತಿ ಮೂಡಿಸಿದ ಮಾಲಿಪಾಟೀಲ್ ಫೌಂಡೇಶನ್
ಹಸು, ನಾಯಿ, ಹಕ್ಕಿ ಸೇರಿದಂತೆ ಬಹುತೇಕ ಪ್ರಾಣಿ-ಪಕ್ಷಿಗಳು ಕಸವನ್ನು ತಿಂದ ಬಳಿಕ, ಆ ವಸ್ತುಗಳು ರಾಸಾಯನಿಕ ಹಾಗೂ ಸಾಮಗ್ರಿಗಳಾಗಿ ಅವುಗಳ ಹೊಟ್ಟೆಯನ್ನು ಸೇರುತ್ತವೆ. ಈ ಪ್ರಾಣಿಗಳು ಸೇವಿಸಿದ ಪ್ಲಾಸ್ಟಿಕ್ಗಳು ಜೀರ್ಣವಾಗುವುದೇ ಇಲ್ಲ. ಹಾಗಾಗಿ ಕರುಳಿನಲ್ಲಿ ಹಾಗೆಯೇ ಉಳಿದು ಅವುಗಳ ಮುಂದಿನ ಆಹಾರ ಸೇವನೆಗೆ ತುಂಬಾ ದೊಡ್ಡಮಟ್ಟದಲ್ಲಿ ನರಳಾಟ ಅನುಭವಿಸುತ್ತವೆ.
ಪ್ರತಿಯೊಬ್ಬರು ತಮ್ಮ ಮನೆಯನ್ನು ಹೇಗೆ ಸ್ವಚ್ಛವಾಗಿ ಇಡುತ್ತೇವೆಯೋ, ಹಾಗೆಯೇ ತಮ್ಮ ತಮ್ಮ ರಸ್ತೆ, ಬೀದಿ, ನಗರ ಮತ್ತು ಇಡೀ ಭೂ-ಮಂಡಲವನ್ನು ಸ್ವಚ್ಛವಾಗಿಡಲು ಶ್ರಮಿಸೋಣ.
- ಡಿ. ಬಾಲಾಜಿ, ಹಟ್ಟಿ ಚಿನ್ನದ ಗಣಿ ತ್ಯಾಜ್ಯ ಪೂರೈಕೆ ಸರಪಳಿ ನಿರ್ವಹಣೆ ರಾಯಚೂರು