ಶಿವಮೊಗ್ಗ: ಮೈಸೂರು ದಸರಾ ಉದ್ಘಾಟನೆ ವಿಚಾರದಲ್ಲಿ ಬಿಜೆಪಿಯವರು ಜಾತಿ, ಧರ್ಮ ನೋಡಬಾರದು. ಇದು ನಾಡಹಬ್ಬ. ಎಲ್ಲರೂ ಸೇರಿ ಆಚರಿಸಬೇಕು. ಆದರೆ ಉದ್ಘಾಟನೆಯ ವಿಷಯದಲ್ಲಿ ಕ್ಷುಲ್ಲಕ ರಾಜಕಾರಣ ಮಾಡುತ್ತಿದೆ ಎಂದು ಕಾಂಗ್ರೆಸ್ ಮುಖಂಡ ಹೆಚ್ ಸಿ ಯೋಗೀಶ್ ದೂರಿದ್ದಾರೆ.
ಮಂಗಳವಾರ ಸುದ್ದಿಗೋಷ್ಠ್ಠಿಯಲ್ಲಿ ಮಾತನಾಡಿದ ಅವರು, ಮೈಸೂರಿನಲ್ಲಿ ನಡೆಯುವ ನಾಡಹಬ್ಬ ಆಚರಣೆಯಲ್ಲಿ ಸಿಎಂ ಸಿದ್ದರಾಮಯ್ಯನವರಿಗೆ ಜವಾಬ್ದಾರಿ ನೀಡಲಾಗಿದೆ.
ಬೂಕರ್ ಪ್ರಶಸ್ತಿ ಪುರಸ್ಕೃತೆ ಬಾನು ಮುಷ್ತಾಕ್ ಅವರನ್ನು ಉದ್ಘಾಟನೆಗೆ ಸೂಕ್ತ ವ್ಯಕ್ತಿ ಎಂದು ಆಯ್ಕೆ ಮಾಡಿದಾಗ ಬಿಜೆಪಿ ಟ್ವೀಟ್ ಮತ್ತು ಸುದ್ದಿಗೋಷ್ಠಿಯ ಮೂಲಕ ವಿರೋಧಿಸಿದ್ದಾರೆ. ಬಾನು ಸಾಹಿತ್ಯದಲ್ಲಿ ಬೂಕರ್ ಪ್ರಶಸ್ತಿ ಪಡೆದಿದ್ದಾರೆ. ಇದು ಕನ್ನಡಿಗರ ಹೆಮ್ಮೆಯಾಗಿದೆ ಎಂದರು.
ಇನ್ಫೋಸಿಸ್ ನಾರಾಯಣಮೂರ್ತಿ ಅವರ ಅಳಿಯ ನಮ್ಮವರು ಎನ್ನುವ ಬಿಜೆಪಿಗೆ ಬಾನು ಮುಷ್ತಾಕ್ ನಮ್ಮ ರಾಜ್ಯದವರೇ ಎನ್ನುವುದು ಮರೆತಂತಿದೆ. ಅವರ ವಿಚಾರದಲ್ಲಿ ಡಬ್ಬಲ್ ಸ್ಟ್ಯಾಂಡರ್ಡ್ ತೋರುತ್ತಾರೆ.
ಶಿವಮೊಗ್ಗದಲ್ಲಿಯೂ ಚಾಮುಂಡಿ ಬೆಳ್ಳಿ ವಿಗ್ರಹದ ಮೆರವಣಿಗೆ ಆರಂಭಿಸಿದ್ದು ಸಿಎಂ ಸಿದ್ದರಾಮಯ್ಯ. ಅಂಬೇಡ್ಕರ್ ಮತ್ತು ಬೆಳ್ಳಿ ಮೂರ್ತಿಯ ಚಾಮುಂಡಿಯನ್ನು ೨೦೧೭ ರಲ್ಲಿ ಸಿಎಂ ಸಿದ್ದರಾಮಯ್ಯ ಉದ್ಘಾಟಿಸಿದ್ದಾರೆ. ಆಗ ಮಹಾನಗರ ಪಾಲಿಕೆಗೆ ಖುರ್ಷಿದಾನು ಮೇಯರ್ ಆಗಿದ್ದರು. ಸಾಹಿತಿ ನಾ.ಡಿಸೋಜಾ, ನಿಸಾರ್ ಅಹಮದ್ ಸಹ ದಸರಾ ಉದ್ಘಾಟಿಸಿದ್ದಾರೆ. ಇದರಲ್ಲೆಲ್ಲ ರಾಜಕೀಯವನ್ನು ಬಿಜೆಪಿಯರು ಕೈ ಬಿಟ್ಟು ಜನ ಮೆಚ್ಚುವಂತೆ ಸಲಹೆ ಕೊಡಲಿ ಎಂದು ಸಲಹೆ ನೀಡಿದರು.
ಶಿವಮೊಗ್ಗಕ್ಕೆ ದಸರಾಕ್ಕೆ ಬರುವ ಆನೆಗೆ ಮಾವುತರು ಮುಸ್ಲೀಂ ಆಗಿರುತ್ತಾರೆ. ದೇವರ ವಿಗ್ರಹವನ್ನು ಆನೆಯ ಮೇಲೆ ಇಡುವರು, ಇಳಿಸುವವರು ಅವರೇ ಆಗಿದ್ದಾರೆ. ದಸರಾದಲ್ಲಿ ಅಂಬು ಕಡಿಯುವುದು ತಹಶೀಲ್ದಾರ್. ತಹಸೀಲ್ದಾರ್ ಒಂದು ವೇಳೆ ಮುಸ್ಲೀಂ ಆಗಿದ್ದರೆ ಅದನ್ನೂ ಬಿಜೆಪಿಯವರು ವಿರೋಧಿಸುತ್ತಿದ್ದರು.
ಇವರನ್ನು ಬೇಡ ಎನ್ನಲಾಗುತ್ತದೆಯೇ ಎಂದು ಪ್ರಶ್ನಿಸಿದ ಅವರು, ದಸರಾ ಉದ್ಘಾಟನೆಯ ವಿಚಾರದಲ್ಲಿ ಶಿವಮೊಗ್ಗದ ಶಾಸಕರು ಎಚ್ಚರಿಕೆ ಗಂಟೆ ನೀಡಿದ್ದಾರೆ. ನಾಡಹಬ್ಬಕ್ಕೆ ಶಾಸಕರು ಎಚ್ಚರಿಕೆ ನೀಡುವುದು ಎಷ್ಟು ಸಮಂಜಸ ಎಂದು ಪ್ರಶ್ನಿಸಿದರು.
