ಬಿಹಾರದಲ್ಲಿ ಅಕ್ರಮ ಮತದಾರರ ಮಾಹಿತಿ ಬಹಿರಂಗಗೊಂಡಿದ್ದು, ಒಂದೇ ವಿಧಾನಸಭಾ ಕ್ಷೇತ್ರದೊಳಗೆ ಒಂದೇ ಹೆಸರು ಮತ್ತು ಸಂಬಂಧಿಕರ ಹೆಸರು ಹೊಂದಿರುವ ಜನರು ಎರಡು ಬಾರಿ ಮತದಾರರ ಪಟ್ಟಿಗಳಲ್ಲಿ ದಾಖಲಾಗಿದ್ದಾರೆ.
ಒಟ್ಟು 1,87,643 ಪ್ರಕರಣಗಳು ಬಿಹಾರದ 39 ವಿಧಾನಸಭಾ ಕ್ಷೇತ್ರಗಳಲ್ಲಿ ಕಂಡುಬಂದಿವೆ. ಈ ಪೈಕಿ1.02ಲಕ್ಷ ಪ್ರಕರಣಗಳಲ್ಲಿ ಎರಡು ಮತದಾರರ ಗುರುತಿನ ಚೀಟಿಗಳು ಒಂದೇ ಹೆಸರು ಹೊಂದಿವೆ. ಕೇವಲ ಐದು ವರ್ಷಗಳವರೆಗಿನ ವಯಸ್ಸಿನ ವ್ಯತ್ಯಾಸವನ್ನು ದಾಖಲಿಸಿದೆ.
25,862ಪ್ರಕರಣಗಳಲ್ಲಿ ಜನರು ಎರಡು ಸಲ ಮತ ಚಲಾಯಿಸಲು ನೋಂದಾಯಿಸಿಕೊಂಡಿದ್ದು, ಅವರ ಹೆಸರುಗಳು, ಸಂಬಂಧಿಕರ ಹೆಸರುಗಳು ಮತ್ತು ವಯಸ್ಸಿನ ಪುರಾವೆಗಳು ತಾಳೆಯಾಗುತ್ತವೆ ಎಂದು reporters-collective.in ವರದಿ ಮಾಡಿದೆ.
39 ಕ್ಷೇತ್ರಗಳಲ್ಲಿ ಈ ಸಂಶಯಾಸ್ಪದ ಪ್ರಕರಣಗಳ ಒಟ್ಟು ಮತಗಳು 3.76 ಲಕ್ಷ ಇದ್ದು, ಈ ಮತಗಳಲ್ಲಿ ನಿಜಕ್ಕೂ ನಕಲಿಯಾಗಿದ್ದರೆ, ಅವು ಕ್ಷೇತ್ರಗಳಲ್ಲಿ ಚುನಾವಣಾ ಫಲಿತಾಂಶದ ಮೇಲೆ ಪರಿಣಾಮ ಬೀರುವ ಸಾಧ್ಯತೆ ಹೆಚ್ಚಿದೆ.
ಬಿಹಾರದಲ್ಲಿ ನಡೆದ ಮೂವತ್ತು ದಿನಗಳ ವಿಶೇಷ ಪರಿಷ್ಕರಣೆ ನಂತರ ಬಿಹಾರದ ಕರಡು ಮತದಾನ ಪಟ್ಟಿಯಲ್ಲಿ ಈ ಸಂಶಯಾಸ್ಪದ ಪ್ರಕರಣಗಳು ದಾಖಲಾಗಿವೆ. ಕರಡು ಪಟ್ಟಿಯನ್ನು ಪ್ರಕಟಿಸುವ ಮೊದಲು ಬಿಹಾರದಲ್ಲಿ ಏಳು ಲಕ್ಷಕ್ಕೂ ಹೆಚ್ಚು ನಕಲಿ ಮತದಾರರು ಅಥವಾ 0.89 ಪ್ರತಿಶತ ಮತದಾರರನ್ನು ತೆಗೆದುಹಾಕಲಾಗಿದೆ ಎಂದು ಚುನಾವಣೆ ಆಯೋಗ ಹೇಳಿಕೊಂಡಿತ್ತು. ಈ ಸಂಶಯಾಸ್ಪದ ಮತದಾರರು ಇನ್ನೂ ಕರಡು ಪಟ್ಟಿಯಲ್ಲಿ ಉಳಿದಿದ್ದಾರೆ.
