ತಮಿಳುನಾಡು ಮುಖ್ಯಮಂತ್ರಿ, ತಮಿಳು ಚಿತ್ರರಂಗದ ದಳಪತಿ ವಿಜಯ್ ಅವರ ಅಭಿನಯದ ಕೊನೆಯ ಚಿತ್ರ ‘ಜನ ನಾಯಗನ್’ ಬಾಕ್ಸ್ ಆಫೀಸ್‌ನಲ್ಲಿ ಮೊದಲ ದಿನ ಭರ್ಜರಿ ಶುರುವಾತು ಪಡೆದುಕೊಂಡಿತ್ತಾದರೂ, ಎರಡನೇ ದಿನ ಗಳಿಕೆಯಲ್ಲಿ ಗಮನಾರ್ಹ ಕುಸಿತ ಕಂಡಿದೆ. ಶುಕ್ರವಾರ ಒಟ್ಟು ₹21.15 ಕೋಟಿ ನಿವ್ವಳ (Net) ಗಳಿಕೆ ಪಡೆದ ಈ ಸಿನಿಮಾದ ಎರಡು ದಿನಗಳ ದೇಶಿಯ ಒಟ್ಟು ಗಳಿಕೆ ₹63.85 ಕೋಟಿಗೆ ತಲುಪಿದೆ ಎಂದು ಚಿತ್ರರಂಗದ ಟ್ರ್ಯಾಕರ್ ‘ಸ್ಯಾಕ್ನಿಲ್ಕ್’ (Sacnilk) ವರದಿ ಮಾಡಿದೆ. ಈ ನಡುವೆ ವಿಜಯ್ ಸಿನಿಮಾಗೆ ಹಿನ್ನಡೆ ಎದುರಾಗಿದಾ ಎಂಬ ಚರ್ಚೆ ಹರಿದಾಡುತ್ತಿದೆ.
ಎಚ್. ವಿನೋತ್ ನಿರ್ದೇಶನದ ಜನ ನಾಯಗನ್ ಸಿನಿಮಾವು ಗುರುವಾರ ತೆರೆಕಂಡಿದೆ. ಮೊದಲ ದಿನವೇ ₹42.70 ಕೋಟಿ ನಿವ್ವಳ ಗಳಿಕೆ ಮಾಡಿತ್ತು. ಆದರೆ ಎರಡನೇ ದಿನದ ಗಳಿಕೆಯಲ್ಲಿ ಬರೋಬ್ಬರಿ 50.5% ರಷ್ಟು ಇಳಿಕೆ ಕಂಡುಬಂದಿದೆ. ಸದ್ಯ ದೇಶದಲ್ಲಿ ಚಿತ್ರದ ಒಟ್ಟು ಗಳಿಕೆ ₹75 ಕೋಟಿ ತಲುಪಿದ್ದು, ವಿಶ್ವಾದ್ಯಂತ ಒಟ್ಟು ₹112.50 ಕೋಟಿ ಗಳಿಸಿದೆ.
ಇದನ್ನೂ ಓದಿ: ಆನ್ ಲೈನ್‌ನಲ್ಲಿ ‘ಜನನಾಯಗನ್ʼ ಸಿನೆಮಾದ ತುಣುಕುಗಳ ಸೋರಿಕೆ : ಆರು ಮಂದಿ ಬಂಧನ
ಶುಕ್ರವಾರ ಜನ ನಾಯಗನ್ ಚಿತ್ರಕ್ಕೆ ಒಟ್ಟಾರೆಯಾಗಿ ಶೇ. 44.33ರಷ್ಟು ಆಸನ ಭರ್ತಿ ದಾಖಲಾಗಿದೆ. ಬೆಳಗಿನ ಪ್ರದರ್ಶನಗಳಲ್ಲಿ ಶೇ. 32.77 ಹಾಗೂ ಮಧ್ಯಾಹ್ನ ಶೇ. 37.23 ರಷ್ಟಿದ್ದ ಪ್ರೇಕ್ಷಕರ ಸಂಖ್ಯೆಯು ಸಂಜೆ ಮತ್ತು ರಾತ್ರಿಯ ವೇಳೆಗೆ ಅನುಕ್ರಮವಾಗಿ ಶೇ. 47 ಹಾಗೂ ಶೇ. 60.31ಕ್ಕೆ ಏರಿಕೆಯಾಗಿದೆ. ಭಾಷಾವಾರು ಗಳಿಕೆಯನ್ನು ನೋಡಿದಾಗ ತಮಿಳು ಆವೃತ್ತಿಯು ಸಿಂಹಪಾಲು ಪಡೆದುಕೊಂಡಿದೆ. 2ನೇ ದಿನ ₹17.95 ಕೋಟಿ ಗಳಿಸಿದೆ. ಹಿಂದಿ ಆವೃತ್ತಿ ₹1.85 ಕೋಟಿ ಹಾಗೂ ತೆಲುಗು ಆವೃತ್ತಿ ₹1.35 ಕೋಟಿ ಸಂಗ್ರಹಿಸಿವೆ.
ಇನ್ನು ಚಿತ್ರಕ್ಕೆ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿರುವ ಬೆನ್ನಲ್ಲೇ ಮಾಧ್ಯಮಗಳೊಂದಿಗೆ ಮಾತನಾಡಿದ ನಿರ್ದೇಶಕ ಎಚ್. ವಿನೋತ್, “ಸಾಮಾನ್ಯವಾಗಿ ವಿಜಯ್ ಸರ್ ಸಿನಿಮಾ ಬಿಡುಗಡೆಯಾದಾಗ ಮೊದಲ ಒಂದು ವಾರ ಪ್ರೇಕ್ಷಕರು ‘ಇದು ಚೆನ್ನಾಗಿದೆ, ಅದು ಸರಿಯಿಲ್ಲ, ಇದು ವರ್ಕ್ ಆಗಲ್ಲ’ ಎಂದೆಲ್ಲಾ ಚರ್ಚಿಸುತ್ತಾರೆ. ನಂತರದ ದಿನಗಳಲ್ಲಿ ‘ಅಷ್ಟೇನು ಚೆನ್ನಾಗಿಲ್ಲ’ ಎನ್ನಲು ಶುರುಮಾಡುತ್ತಾರೆ. ಆದರೆ, ಆರು ತಿಂಗಳ ನಂತರ ಅದೇ ಸಿನಿಮಾ ಸಮಾಜದಲ್ಲಿ ದೊಡ್ಡ ಹಿಟ್ ಆಗಿ ಹೊರಹೊಮ್ಮುತ್ತದೆ!” ಎಂದು ಹೇಳಿದ್ದಾರೆ.
ಮುಂದುವರಿದು, “ತಮಿಳುನಾಡು ಚಿತ್ರರಂಗದಲ್ಲಿ ಇದೊಂದು ಅತ್ಯಂತ ಪ್ರಮುಖ ಸಿನಿಮಾ. ನನಗೆ ಇದು ಎರಡು ಬೇರೆ ಬೇರೆ ಪ್ರಪಂಚಗಳ ಮಧ್ಯೆ ಇರುವಂತ ನಿಜವಾದ ಕನಸಿನ ಅನುಭವ,” ಎಂದು ಅಭಿಪ್ರಾಯಪಟ್ಟಿದ್ದಾರೆ.
ಪೂರ್ಣಪ್ರಮಾಣದಲ್ಲಿ ರಾಜಕೀಯ ಜೀವನಕ್ಕೆ ಕಾಲಿಡುವ ಮುನ್ನ ನಟಿಸಿದ ವಿಜಯ್ ಅವರ ಕೊನೆಯ ಸಿನಿಮಾ ಇದಾಗಿರುವ ಕಾರಣ ತಮಿಳುನಾಡಿನಾದ್ಯಂತ ಅಭಿಮಾನಿಗಳು ಹಬ್ಬದ ವಾತಾವರಣ ನಿರ್ಮಿಸಿದ್ದರು. ಚೆನ್ನೈನ ವುಡ್‌ಲ್ಯಾಂಡ್ಸ್ ಮತ್ತು ಕ್ಯಾಸಿನೊ ಚಿತ್ರಮಂದಿರಗಳ ಬಳಿ ವಿಶೇಷ ಸಾಂಸ್ಕೃತಿಕ ಕಾರ್ಯಕ್ರಮಗಳು ಮತ್ತು ಲೇಸರ್ ಶೋಗಳನ್ನು ಆಯೋಜಿಸಲಾಗಿತ್ತು. ಮೊದಲ ದಿನದ ಮೊದಲ ಪ್ರದರ್ಶನದ ವೇಳೆ ಚಿತ್ರಮಂದಿರಗಳ ಒಳಗಡೆ ಅಭಿಮಾನಿಗಳು ಕುಣಿದು ಕುಪ್ಪಳಿಸಿದರು. ನಟ ರವಿ ಮೋಹನ್ ಕೂಡ ಅಭಿಮಾನಿಗಳೊಂದಿಗೆ ಸೇರಿ ಸಂಭ್ರಮ ಆಚರಿಸಿದರು.
ಎಚ್. ವಿನೋತ್ ನಿರ್ದೇಶನದ ಈ ಚಿತ್ರದಲ್ಲಿ ವಿಜಯ್, ‘ವೆಟ್ರಿ’ ಎಂಬ ಖೈದಿಯ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಜೈಲು ಅಧಿಕಾರಿಯ ಮಗಳು ವಿಜಿಯೊಂದಿಗೆ ಆತ್ಮೀತ ಬೆಳೆಸಿಕೊಳ್ಳುವ ವೆಟ್ರಿ, ಆಕೆಗೆ ಭಾರತೀಯ ಸೇನೆಗೆ ಸೇರುವ ಕನಸನ್ನು ನನಸು ಮಾಡಲು ನೆರವಾಗುತ್ತಾನೆ. ಈ ಹಂತದಲ್ಲಿ ಆತನ ಹಳೆಯ ಶತ್ರು ‘ಜಾನ್ ಹಿಮ್ಲರ್’ (ಬಾಬಿ ಡಿಯೋಲ್) ಎಂಟ್ರಿ ನೀಡಿದಾಗ ಕಥೆ ರೋಚಕ ತಿರುವು ಪಡೆದುಕೊಳ್ಳುತ್ತದೆ.
ಚಿತ್ರದಲ್ಲಿ ಪೂಜಾ ಹೆಗ್ಡೆ, ಬಾಬಿ ಡಿಯೋಲ್, ಮಮಿತಾ ಬೈಜು, ಪ್ರಿಯಾಮಣಿ, ಗೌತಮ್ ವಾಸುದೇವ್ ಮೆನನ್ ಮತ್ತು ಪ್ರಕಾಶ್ ರಾಜ್ ಪ್ರಮುಖ ಪಾತ್ರಗಳಲ್ಲಿದ್ದು, ಅನಿರುದ್ಧ್ ರವಿಚಂದರ್ ಸಂಗೀತ ಸಂಯೋಜಿಸಿದ್ದಾರೆ. ಜುಲೈ 23 ರಂದು ಬಿಡುಗಡೆಯಾದ ಈ ಚಿತ್ರವು ವಿಜಯ್ ಅವರ ಮೂರು ದಶಕಗಳ, 60ಕ್ಕೂ ಹೆಚ್ಚು ಸಿನಿಮಾಗಳ ನಟನಾ ಪಯಣಕ್ಕೆ ತೆರೆ ಎಳೆದಿದೆ.
