ಕಲೆಗಳು ಉಳಿದರೆ ನಾಡು ಉಳಿಯುತ್ತದೆ, ಸಂಸ್ಕೃತಿ ಉಳಿಯುತ್ತದೆ. ಕಲಾವಿದರು ಬೆಳೆಯುತ್ತಾರೆ. ಕಲಾ ಪೋಷಕರು ಕಲಾವಿದರಿಗೆ ತಮ್ಮ ತನು, ಮನ, ಧನದಿಂದ ಸಹಾಯ ಮಾಡಬೇಕು ಎಂದು ಕರ್ನಾಟಕ ಇತಿಹಾಸ ಅಕಾಡೆಮಿಯ ಬಳ್ಳಾರಿ ಜಿಲ್ಲಾಧ್ಯಕ್ಷ ಟಿ ಹೆಚ್ ಎಂ ಬಸವರಾಜ್ ತಿಳಿಸಿದರು.
ನಗರದ ಬ್ಯಾಂಕ್ ಕಾಲೋನಿ ಉದ್ಯಾನವನ ಬಯಲು ವೇದಿಕೆಯಲ್ಲಿ ಟಿ ಶಕುಂತಲಮ್ಮ, ಬಸವರಾಜ್ ಕಲಾ ಸಮಾಜ ಸೇವಾ ಟ್ರಸ್ಟ್ ಹಾಗೂ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಬಳ್ಳಾರಿ ಇವರ ಪ್ರಾಯೋಜನೆ ಅಡಿಯಲ್ಲಿ ʼಸಾಂಸ್ಕೃತಿಕ ಸಂಭ್ರಮʼ ಕಾರ್ಯಕ್ರಮವನ್ನು ಉದ್ಘಾಟಿಸಿ ಅವರು ಮಾತನಾಡಿದರು.
“ತೊಗಲು ಗೊಂಬೆ ಪ್ರದರ್ಶನ ಒಂದು ಪ್ರಾಚೀನ ಕಲೆ. ಸಾವಿರಾರು ವರ್ಷಗಳ ಹಿಂದೆ ರಾಮಾಯಣ ಮಹಾಭಾರತವನ್ನು ಮಾತನಾಡುವ ಚಿತ್ರಗಳ ಮೂಲಕ ಜನರಿಗೆ ಅರ್ಥ ಮಾಡಿಸುತ್ತಿದ್ದುದ್ದರಿಂದ ಈ ಕಲೆ ಜೀವಂತವಾಗಿದೆ. ಬಳ್ಳಾರಿ ಜಿಲ್ಲೆಯಲ್ಲಿ ಈ ಕಲೆ ಹುಟ್ಟಿದೆ ಎಂದು ಹೇಳಿದರೆ ತಪ್ಪಾಗಲಿಕ್ಕಿಲ್ಲ. ದೇಶ ವಿದೇಶಗಳಲ್ಲಿ ಈ ಕಲೆಯನ್ನು ಬೆಳಗಲ್ ಈರಣ್ಣನವರು ಆಡಿಸಿ ಬಂದಿದ್ದಾರೆ. ಈಗಲೂ ಅವರ ಮನೆತನದವರು ತಮ್ಮ ಸೂಕ್ಷ್ಮ ಕುಸುರಿ ಕೆಲಸದಿಂದ ಗೊಂಬೆಗಳನ್ನು ತಯಾರಿ ಮಾಡಿ, ಅನೇಕ ಕಥೆಗಳಿಗೆ ಜೀವ ಕೊಟ್ಟು ಪ್ರದರ್ಶಿಸಿದ್ದಾರೆ. ಇಂದಿಗೂ ರಾಮಾಯಣದ ಕುರುಹುಗಳು ಆನೆಗೊಂದಿ ಹಾಗೂ ಹಂಪಿಯಲ್ಲಿ ಕಾಣಬಹುದು. ಮಕ್ಕಳಿಗೆ ಪಾಠ ಹೇಳಿ ಕೊಡುವುದರಿಂದ ಚಿತ್ರಗಳ ಮೂಲಕ ತೋರಿಸುವುದರಿಂದ ಬಹುಬೇಗ ಅರ್ಥವಾಗುತ್ತದೆ. ಸುಬ್ಬಣ್ಣ ಮತ್ತು ತಂಡದವರು ಈಗ ವಾಲಿ ಒದೆ ಎಂಬ ತಗಲುಗೊಂಬೆ ಪ್ರದರ್ಶನವನ್ನು ಬಹಳ ಶ್ರಮಪಟ್ಟು ನಿಮಗೆಲ್ಲಾ ತೋರಿಸುತ್ತಿದ್ದಾರೆ” ಎಂದು ಪ್ರಶಂಸಿಸಿದರು.
ಬ್ಯಾಂಕ್ ಅಧಿಕಾರಿ ಗಣಕೆಹಾಳ್ ಶಾಂತಪ್ಪ ಮಾತನಾಡಿ, “ನಮ್ಮ ಜಿಲ್ಲೆಯಲ್ಲಿ ಇಂತಹ ಕಲಾ ಪ್ರಕಾರಗಳು ಇರುವುದು ಅತ್ಯಂತ ಹೆಮ್ಮೆಯ ವಿಷಯ” ಎಂದರು.
ಇದನ್ನೂ ಓದಿ: ಬಳ್ಳಾರಿ | ಮಾನಸಿಕ ಒತ್ತಡ ನಿವಾರಿಸಲು ಸಾಮಾಜಿಕ ಸಂವಹನ ಬೆಳಿಸಿಕೊಳ್ಳಿ: ನ್ಯಾ. ರಾಜೇಶ್ ಹೊಸಮನೆ
ಅಧ್ಯಕ್ಷತೆ ವಹಿಸಿದ್ದ ಪ್ರಥಮ ದರ್ಜೆ ಗುತ್ತಿಗೆದಾರ ಮಸೀದಿಪುರ ಚಂದ್ರಶೇಖರಗೌಡ ಮಾತನಾಡಿ, “ರಾಮಾಯಣದಲ್ಲಿ ಬರುವ ಸನ್ನಿವೇಶಗಳನ್ನು ಅತ್ಯಂತ ಸೂಕ್ಷ್ಮವಾಗಿ ಎಲ್ಲರ ಮನಮುಟ್ಟುವಂತೆ ಕಥೆಯನ್ನು ನಿರ್ದೇಶಿಸಿರುವುದು ಸುಬ್ಬಣ್ಣ ಮತ್ತು ತಂಡದವರನ್ನು ಅಭಿನಂದಿಸುತ್ತೇನೆ” ಎಂದು ಹೇಳಿದರು.
ಕಾರ್ಯಕ್ರಮದಲ್ಲಿ ಪ್ರಥಮ ದರ್ಜೆ ಗುತ್ತಿಗೆದಾರ ಕೊರಳುಗುಂದಿ ಬಸವನಗೌಡ ಟ್ರಸ್ಟ್ ಅಧ್ಯಕ್ಷ ಟಿ ಸುನಿಲ್ ಕುಮಾರ್, ಆರ್ಯ ಈಡಿಗ ಮಹಾಸಭದ ಸದಸ್ಯ ಭೀಮ ಲಿಂಗ, ಜ್ಯೋತಿ ಎಲ್ಲನಗೌಡ, ಶಶಿಕಲಾ, ಮಹಾಂತಯ್ಯ ಸ್ವಾಮಿ, ಬೆಳಗಲ್ ಈರಣ್ಣನವರ, ಪುತ್ರ ರಮಣಪ್ಪ ಭಜಂತ್ರಿ, ತುಳಸಿ ಸುಬ್ಬಣ್ಣ ಮಾಸ್ಟರ್ ಮುದ್ದಾಟನೂರ್ ತಿಪ್ಪೇಸ್ವಾಮಿ ಹಾಗೂ ಇತರರು ಇದ್ದರು.
