ಭಟ್ಕಳ: ರಾಜ್ಯ ಸರ್ಕಾರವು ಭಟ್ಕಳವನ್ನು ಅಧಿಕೃತವಾಗಿ ಪುರುಸಭೆಯಿಂದ ‘ನಗರಸಭೆ’ ದರ್ಜೆಗೆ ಮೇಲ್ದರ್ಜೆಗೇರಿಸಿ ಅಂತಿಮ ಅಧಿಸೂಚನೆಯನ್ನು ಪ್ರಕಟಿಸಿದೆ. ಹೊಸ ನಗರಸಭೆ ವ್ಯಾಪ್ತಿಯಲ್ಲಿ ಭಟ್ಕಳ ಪುರಸಭೆ, ಜಾಲಿ ಪಟ್ಟಣ ಪಂಚಾಯಿತಿ ಹಾಗೂ ಹೆಬಳೆ ಗ್ರಾಮ ಪಂಚಾಯಿತಿ ಸೇರಿ ಒಟ್ಟು 22.67 ಚದರ ಕಿಲೋಮೀಟರ್ ಪ್ರದೇಶ ನಿಗದಿಯಾಗಿದೆ.
ನಗರಸಭೆ ರಚನೆ ಪ್ರಕ್ರಿಯೆಯಲ್ಲಿ, “ಮುಸ್ಲಿಂ ಬಾಹುಳ್ಯ ಪ್ರದೇಶಗಳನ್ನು ಮಾತ್ರ ಸೇರಿಸಲಾಗಿದೆ” ಎಂಬ ಆಪಾದನೆಗಳನ್ನು ಮಾಡುತ್ತಿದ್ದ ಬಿಜೆಪಿ ಸ್ಥಳೀಯ ಮುಖಂಡರು, ಆಗಸ್ಟ್ 25ರಂದು ಪ್ರಕಟವಾದ ಕರಡು ಅಧಿಸೂಚನೆಗೆ ಯಾವುದೇ ಅಧಿಕೃತ ಆಕ್ಷೇಪಣೆ ಸಲ್ಲಿಸದೇ ಇರುವುದೇ ಇದೀಗ ಬಹಿರಂಗವಾಗಿದೆ. ಒಂದು ತಿಂಗಳ ಕಾಲ ಅವಕಾಶ ನೀಡಿದ್ದರೂ ಯಾವುದೇ ಆಕ್ಷೇಪಣೆ ದಾಖಲಾಗದ ಕಾರಣ, ಕರಡು ಅಧಿಸೂಚನೆಯಲ್ಲಿದ್ದದ್ದೇ ಗಡಿಯನ್ನು ಅಂತಿಮಗೊಳಿಸಲಾಗಿದೆ ಎಂದು ನಗರಾಭಿವೃದ್ಧಿ ಇಲಾಖೆ ತಿಳಿಸಿದೆ.
2015ರಿಂದಲೇ ಭಟ್ಕಳವನ್ನು ನಗರಸಭೆ ಮಾಡುವ ಪ್ರಕ್ರಿಯೆ ಆರಂಭವಾಗಿತ್ತು. 2025ರ ಜನವರಿ 12ರಂದು ನಗರಾಭಿವೃದ್ಧಿ ಸಚಿವರಿಗೆ ಬರೆದ ಪತ್ರದಲ್ಲಿ ಜಿಲ್ಲಾ ಉಸ್ತುವಾರಿ ಸಚಿವ ಮಂಕಾಳ ವೈದ್ಯರು, “2011ರ ಜನಗಣತಿ ಪ್ರಕಾರ ಭಟ್ಕಳದಲ್ಲಿ 32 ಸಾವಿರ, ಜಾಲಿ ಪಟ್ಟಣ ಪಂಚಾಯಿತಿ ವ್ಯಾಪ್ತಿಯಲ್ಲಿ 19 ಸಾವಿರ ಮತ್ತು ಹೆಬಳೆ ಗ್ರಾಮ ಪಂಚಾಯಿತಿ ವ್ಯಾಪ್ತಿಯಲ್ಲಿ ಸುಮಾರು 19 ಸಾವಿರ ಜನಸಂಖ್ಯೆ ಇತ್ತು. ಈಗ ಈ ಮೂರು ಪ್ರದೇಶಗಳು ಸೇರಿ 75 ಸಾವಿರಕ್ಕೂ ಹೆಚ್ಚು ಜನಸಂಖ್ಯೆ ಆಗಲಿದ್ದು, ಭಟ್ಕಳದಲ್ಲಿ ನಗರಸಭೆ ರಚನೆ ಅಗತ್ಯ” ಎಂದು ಸರ್ಕಾರಕ್ಕೆ ಒತ್ತಾಯಿಸಿದ್ದರು.
ಭಟ್ಕಳ ನಗರಸಭೆ ರಚನೆಗೆ ನಮ್ಮ ಕಡೆಯಿಂದ ಯಾವುದೇ ವಿರೋಧ ಇಲ್ಲ, ಭಟ್ಕಳ ಪುರಸಭೆ ಗಡಿಗೆ ಹೊಂದಿಕೊಂಡಿರುವ ಶಿರಾಲಿ, ಯಲ್ಪಡಿಕವೂರು, ಮಾವಿನಕುರ್ವಾ, ಮುಟ್ಟಳ್ಳಿ, ಮುಂಡಳ್ಳಿ ಪ್ರದೇಶಗಳನ್ನೂ ಭಟ್ಟಕಳಕ್ಕೆ ಸೇರಿಸಿ ನಗರಸಭೆಯನ್ನಾಗಿಸಿ ಎಂದು ಬಿಜೆಪಿ ಮುಖಂಡರು ಆಗಾಗ ಹೇಳುತ್ತಿದ್ದರು. ಆದರೆ, ಕರಡು ಅಧಿಸೂಚನೆಯ ಸಂದರ್ಭದಲ್ಲಿ ಈ ವಿಷಯವಾಗಿ ಸ್ಥಳೀಯ ಬಿಜೆಪಿ ಮುಖಂಡರು ಯಾವುದೇ ರೀತಿಯ ಅಧಿಕೃತ ಆಕ್ಷೇಪಣೆ ಸಲ್ಲಿಸದಿರುವುದು ಗಮನಾರ್ಹವಾಗಿದೆ.
ಈ ಸುದ್ದಿ ಓದಿದ್ದೀರಾ? ಮುಂಡಗೋಡ | ʼನಮ್ಮದೇ ಜಮೀನಿಗೆ ಕಾಲಿಟ್ಟರೆ ಕಳ್ಳತನದ ಕೇಸ್ ಹಾಕ್ತಾರೆʼ: ದಲಿತ ಮಹಿಳೆಯರ ಆರೋಪ
ನಗರಸಭೆಯ ಗಡಿ ವಿವರ: ಅಂತಿಮ ಅಧಿಸೂಚನೆಯ ಪ್ರಕಾರ, ಗಡಿ ಜಾಲಿ ಗ್ರಾಮದ ಸರ್ವೆ ನಂ. 251ರ ವಾಯುವ್ಯ ತುದಿಯಿಂದ ಆರಂಭವಾಗಿ,ವೆಂಕಾಪುರಹೊಳೆ ಭಾಗ → ಸೂಸಗಡಿ ಗ್ರಾಮ → ಪಟ್ಟದ ಹೊಳೆ → ಪುರವರ್ಗ–ಸೊಸಗಡಿ ಗಡಿಯ ಸಂಗಮ → ಸರಾಬಿಹೂಳೆ ಹೊಳೆಯ ಬಲದಂಡ → ಭಟ್ಕಳ–ಗೊರಟೆ ಸಂಪರ್ಕ ರಸ್ತೆ → ಪುರವರ್ಗ ಗ್ರಾಮದ ಭಾಗ → ಮುಂಡಳ್ಳಿಗಿಂದ ಬರುವ ರಸ್ತೆ → ಚೌಥನಿ ಗ್ರಾಮದ ಗಡಿ → ಸರಾಬಿ ಹೊಳೆಯ ಎಡದಂಡ → ಮತ್ತೆ ಸೂಸಗಡಿ ಗ್ರಾಮದ ಭಾಗ → ಅಂತಿಮವಾಗಿ ಜಾಲಿ ಗ್ರಾಮದ ಗಡಿಯನ್ನು ಸೇರಿಕೊಳ್ಳುತ್ತದೆ.
