ಮಂಗಳೂರು ದಸರಾದಲ್ಲಿ ಟೇಸ್ ನೃತ್ಯದ ಲಯವು ಒಂದು ಕಾಲದಲ್ಲಿ ಪುರುಷರದ್ದೇ ಆಗಿತ್ತು. ಆದರೆ ಇಂದು, ನಗರದ ಭವ್ಯ ದಸರಾ ಆಚರಣೆಗಳಲ್ಲಿ ಟೇಸ್ ನೃತ್ಯದ ರೋಮಾಂಚಕ ಹೆಜ್ಜೆಗಳು ಮೊಳಗುತ್ತಿದ್ದಂತೆ, ಮಹಿಳೆಯರು ಇನ್ನು ಮುಂದೆ ಕೇವಲ ಪ್ರೇಕ್ಷಕರಲ್ಲ, ಅವರೂ ಕೂಡ ಚೆಲುವು, ಧೈರ್ಯ ಮತ್ತು ಹೆಮ್ಮೆಯೊಂದಿಗೆ ನೃತ್ಯ ಪ್ರದೇಶಕ್ಕೆ ಸೇರುತ್ತಿದ್ದಾರೆ.
ಸಾಮಾಜಿಕ ಮಾಧ್ಯಮದ ಪ್ರವೃತ್ತಿಗಳು ಮಹಿಳೆಯರಲ್ಲಿ ಹೆಚ್ಚುತ್ತಿರುವ ಆಸಕ್ತಿಯನ್ನು ಹೆಚ್ಚಿಸಿವೆ. ಪ್ರಸಿದ್ಧ ಹುಲಿ ವೇಷ ಪ್ರದರ್ಶಕರ ಹೆಣ್ಣುಮಕ್ಕಳು ಈಗ ಹೆಜ್ಜೆ ಹಾಕುತ್ತಿದ್ದಾರೆ. ಒಂದು ಕಾಲದಲ್ಲಿ ತಂದೆಯಿಂದ ಮಗನಿಗೆ ಮಾತ್ರ ರವಾನೆಯಾಗುತ್ತಿದ್ದ ಪರಂಪರೆಯನ್ನು ಈಗ ಹೆಣ್ಣುಮಕ್ಕಳು ಮುಂದುವರೆಸುತ್ತಿದ್ದಾರೆ.
ಜಾನಪದ ಸಾಹಿತಿ ಮತ್ತು ಪಿಲಿ ವೇಷ(ಹುಲಿ ವೇಷ) ತೀರ್ಪುಗಾರರ ಸದಸ್ಯೆ ಕದ್ರಿ ನವನೀತ್ ಶೆಟ್ಟಿ ಅವರು ಈ ಹಂತದಿಂದ ಮಹಿಳೆಯರು ಗೈರುಹಾಜರಾಗಿದ್ದ ಸಮಯವನ್ನು ನೆನಪಿಸಿಕೊಳ್ಳುತ್ತ, “ಈಗ, ಗರೋಡಿಯ ಬೇಬಿ ರಾಜ್ ಮತ್ತು ಉಡುಪಿಯ ಕಡಬೆಟ್ಟು ಅಶೋಕ್ ರಾಜ್ ಅವರಂತಹ ದಂತಕಥೆಗಳ ಹೆಣ್ಣುಮಕ್ಕಳು ತಮ್ಮ ಕುಟುಂಬಗಳಿಂದ ಸಂಪೂರ್ಣ ಬೆಂಬಲದೊಂದಿಗೆ ತಂಡಗಳನ್ನು ಮುನ್ನಡೆಸುತ್ತಿದ್ದಾರೆ. ಆ ರೀತಿಯ ಪ್ರೋತ್ಸಾಹ ಹಿಂದೆ ವಿರಳವಾಗಿತ್ತು. ಬದಲಾವಣೆಯು ಪೀಳಿಗೆಯಿಂದ ಬಂದದ್ದಾಗಿದೆ” ಎಂದು ಶೆಟ್ಟಿ ಎಂದು ಅಭಿಪ್ರಾಯ ಹಂಚಿಕೊಂಡರು.
“ಕಿನ್ನಿ ಪಿಲಿ(ಟೈಗರ್ ಮರಿ) ಸ್ಪರ್ಧೆಗಳ ಸಮಯದಲ್ಲಿಯೂ ಕೂಡ, ಪೋಷಕರು ತಮ್ಮ ಮಕ್ಕಳು ಭಾಗವಹಿಸುವುದನ್ನು ನೋಡಲು ಉತ್ಸುಕರಾಗಿರುತ್ತಾರೆ. ಹಿಂದೆ, ಒಂದು ಇಚ್ಛೆಯ ಮಗುವನ್ನು ಕಂಡುಹಿಡಿಯುವುದೂ ಕೂಡ ಸಾಹಸವಾಗಿತ್ತು. ಈಗ, ಪೋಷಕರೇ ಅವರನ್ನು ಮುನ್ನಲೆಗೆ ತರುತ್ತಿದ್ದಾರೆ” ಎಂದು ಹರ್ಷ ವ್ಯಕ್ತಪಡಿಸಿದರು.
ಯಕ್ಷಗಾನ ಮತ್ತು ಕೃಷ್ಣವೇಷದಂತಹ ಪುರುಷ ಪ್ರಧಾನ ಕಲಾ ಪ್ರಕಾರಗಳಲ್ಲಿ ಮಹಿಳೆಯರು ಹೇಗೆ ತಮ್ಮ ಛಾಪು ಮೂಡಿಸುತ್ತಿದ್ದಾರೆ ಎಂಬುದನ್ನು ಶೆಟ್ಟಿ ಎತ್ತಿ ತೋರಿಸಿದರು.
“ಸಂಪ್ರದಾಯವು ಮಹಿಳೆಯರನ್ನು ಎಂದಿಗೂ ತಡೆಯಲಿಲ್ಲ, ಆದರೆ ಹಿಂಜರಿಕೆ ಅಡ್ಡಿಪಡಿಸಿತು. ಇಂದು, ಮಹಿಳೆಯರು ಭಾಗವಹಿಸುವುದು ಮಾತ್ರವಲ್ಲ ಅವರು ಪ್ರಾಬಲ್ಯ ಹೊಂದಿದ್ದಾರೆ. ಕೇರಳ ಮತ್ತು ತಮಿಳುನಾಡಿನಲ್ಲಿ ಮಹಿಳೆಯರು ಆತ್ಮವಿಶ್ವಾಸದಿಂದ ಹುಲಿ ವೇಷ ಪ್ರದರ್ಶಿಸುವ ವೀಡಿಯೊಗಳಿಂದ ಸಾಮಾಜಿಕ ಮಾಧ್ಯಮ ತುಂಬಿಹೋಗಿದೆ” ಎಂದು ಹೇಳಿದರು.
“ಉಚ್ಚಿಲದಲ್ಲಿ ನಡೆದಂತಹ ಮಹಿಳಾ ಪಿಲಿ ವೇಷ ಕಲಾವಿದರಿಗಾಗಿ ಮೀಸಲಾದ ಸ್ಪರ್ಧೆಗಳು ಮತ್ತಷ್ಟು ವೇಗವನ್ನು ನೀಡಿವೆ. ಒಂದು ಕಾಲದಲ್ಲಿ ಅಪರೂಪದ ದೃಶ್ಯವಾಗಿದ್ದದ್ದನ್ನು ಈಗ ಆಚರಿಸಲಾಗುತ್ತಿದೆ. ಹಿಂದೆ, ಕುಟುಂಬ ಸಮಾರಂಭಗಳಲ್ಲಿ ನೃತ್ಯವು ಯಾವುದೇ ಪಾತ್ರವನ್ನು ಹೊಂದಿರಲಿಲ್ಲ. ಈಗ ಅದು ಹಳದಿ ಶಾಸ್ತ್ರ ಸಮಾರಂಭಗಳಿಂದ ಸಂಗೀತದವರೆಗೆ ಆಚರಣೆಗಳ ಭಾಗವಾಗಿದೆ. ನೃತ್ಯವು ಒಂದು ಪ್ರವೃತ್ತಿಯಾಗಿದ್ದು, ಮಹಿಳೆಯರೇ ಅದನ್ನು ಮುನ್ನಡೆಸುತ್ತಿದ್ದಾರೆ” ಎಂದು ಶೆಟ್ಟಿ ಶ್ಲಾಘಿಸಿದರು.
ಈ ಸುದ್ದಿ ಓದಿದ್ದೀರಾ? ಕೊಡಗು | ಜನಪರ ಸೇವೆಗೆ ಒತ್ತು ನೀಡಲಾಗುವುದು : ಶಾಸಕ ಎ ಎಸ್ ಪೊನ್ನಣ್ಣ
ಸಂಶೋಧಕ ಮತ್ತು ತೀರ್ಪುಗಾರರ ಸದಸ್ಯ ಕೆ ಕೆ ಪೇಜಾವರ್ ಅವರು ಪಿಲಿ ವೇಷವನ್ನು ವಿಕಸನಗೊಳ್ಳುತ್ತಿರುವ ಸಾಂಪ್ರದಾಯಿಕ ನೃತ್ಯವೆಂದು ಗಮನಸೆಳೆದಿದ್ದು, “ಕೆಲವು ಸ್ಥಳಗಳಲ್ಲಿ, ಮಹಿಳೆಯರ ಭಾಗವಹಿಸುವಿಕೆ ಇನ್ನೂ ಸೀಮಿತವಾಗಿದೆ. ಆದರೆ ಇತರ ಹಲವು ಸ್ಥಳಗಳಲ್ಲಿ, ಅವರು ಸಕ್ರಿಯವಾಗಿ ತೊಡಗಿಸಿಕೊಂಡಿದ್ದಾರೆ. ಸಂಪ್ರದಾಯವನ್ನು ಗೌರವಿಸುವಾಗ ಹೊಂದಿಕೊಳ್ಳುತ್ತಾರೆ” ಎಂದು ಹೇಳಿದರು.
“ಕುತೂಹಲಕಾರಿಯಾಗಿ, ಎಲ್ಲ ಮಹಿಳಾ ತಂಡಗಳು ಪೂರ್ಣ ಹುಲಿ ವೇಷಭೂಷಣವನ್ನು ಧರಿಸುವುದಿಲ್ಲ. ಆದರೂ ಅವರ ಉತ್ಸಾಹ ಇನ್ನೂ ಹೆಚ್ಚಾಗಿದೆ. ಆನ್‌ಲೈನ್ ವಿಡಿಯೊಗಳ ಮೂಲಕ ಮಾತ್ರ ಕಲೆಯನ್ನು ಕಲಿತ ದುಬೈನ ಪ್ರತಿಭಾನ್ವಿತ ಮಹಿಳಾ ತಂಡವನ್ನು ನಾನು ಭೇಟಿಯಾದೆ. ಪಿಲಿ ವೇಷದ ಪ್ರಭಾವವು ಈಗ ಸ್ಪರ್ಧೆಗಳನ್ನು ಮೀರಿ ಸಾಗಿದೆ. ಮೆಹಂದಿ ಕಾರ್ಯಕ್ರಮಗಳು ಮತ್ತು ಇತರ ಆಚರಣೆಗಳ ಸಮಯದಲ್ಲಿ ಟೇಸ್ ಬೀಟ್‌ಗಳನ್ನು ಕೇಳುವುದು ಸಾಮಾನ್ಯವಾಗಿದೆ. ಲಯ ಪ್ರಾರಂಭವಾದ ಕ್ಷಣ, ಮಹಿಳೆಯರು ಸಹಜವಾಗಿಯೇ ನೃತ್ಯ ಮಾಡಲು ಪ್ರಾರಂಭಿಸುತ್ತಾರೆ” ಎಂದು ಅವರು ಹೇಳಿದರು.
