ಕರಾವಳಿ ಜಿಲ್ಲೆಗಳಲ್ಲಿ ನೈರುತ್ಯ ಮಾನ್ಸೂನ್ ಮುಂಗಾರಿನ ಅಬ್ಬರ ಜೋರಾಗಿದ್ದು, ಉತ್ತರ ಕನ್ನಡದ ಸಮುದ್ರ ತೀರದ ಜನರ ಬದುಕು ಕಡಲ ಕೊರೆತಕ್ಕೆ ಸಿಲುಕಿ ತತ್ತರಿಸಿದೆ. ಸಮುದ್ರ ತಟದ ಮನೆಗಳಿಗೆ ನೀರು ನುಗ್ಗಿದ ಪರಿಣಾಮ ಜನರು ಮನೆ ತೊರೆದಿದ್ದು, ಸುಮಾರು 15 ಹಳ್ಳಿಗಳು ಕಡಲಾವೃತವಾಗಿವೆ.
ಅಂಕೋಲಾ ತಾಲೂಕಿನ ಹರವಾಡ ಗ್ರಾಮದಲ್ಲಿ 2.2 ಕಿ.ಮೀ ವಸತಿ ಪ್ರದೇಶವನ್ನು ಸಮುದ್ರದ ಅಲೆಗಳು ಆಪೋಷಿಸಿವೆ. ಅಧಿಕೃತ ದತ್ತಾಂಶದ ಪ್ರಕಾರ 11.3 ಕಿ.ಮೀ ಕರಾವಳಿ ತೀರ ಪ್ರದೇಶ ಕಡಲ ಕೊರೆತಕ್ಕೆ ಒಳಗಾಗಿದೆ. ಹಲವು ಮನೆಗಳು ಪೂರ್ತಿಯಾಗಿ ಹಾನಿಗೊಳಗಾದರೆ, ಕೆಲವು ಭಾಗಶಃ ಕುಸಿದು ಬಿದ್ದಿವೆ. ಅಂಕೋಲದ ಬೆಳಂಬಾರ ಗ್ರಾಮದಲ್ಲಿ 60ಕ್ಕೂ ಹೆಚ್ಚು ಮನೆಗಳು ಕುಸಿಯುವ ಸ್ಥಿತಿಯಲ್ಲಿವೆ.
ಜಿಲ್ಲಾಡಳಿತವು ರಾಜ್ಯ ಕಂದಾಯ ಇಲಾಖೆಗೆ ಸಲ್ಲಿಸಿದ 2025ರ ವರದಿಯ ಪ್ರಕಾರ, ಮಾಜಾಳಿ ಮತ್ತು ದೇವಬಾಗ್ (ಕಾರವಾರ ತಾಲೂಕು) ಸೇರಿವೆ; ಹರವಾಡ, ಬೆಳಂಬಾರ ಮತ್ತು ಗೋಕರ್ಣದ ಭಾಗಗಳು (ಅಂಕೋಲಾ ತಾಲೂಕು); ಬೇಲಿಕಾನ, ಅಳ್ವೆಕೋಡಿ, ದಾರೇಶ್ವರ, ರಾಮನಗಿಂಡಿ ಮತ್ತು ಕಡ್ಲೆ (ಕುಮಟಾ ತಾಲೂಕು); ತೊಪ್ಪಲಕೇರಿ (ಹೊನ್ನಾವರ ತಾಲೂಕು) ಮತ್ತು ಮುರುಡೇಶ್ವರ, ಬೆಳಕೆ, ಶಾಂಬವಿ, ಮಾವಳ್ಳಿ, ತೂದಳ್ಳಿ ಮತ್ತು ಬೆದ್ರಕೇರಿ (ಭಟ್ಕಳ ತಾಲೂಕು) ಗ್ರಾಮಗಳು ತೀವ್ರ ಹಾನಿಗೆ ಒಳಗಾಗಿವೆ.
ಜಿಲ್ಲಾಡಳಿತ ಕ್ರಿಯಾ ಯೋಜನೆ ಸಿದ್ಧಪಡಿಸಿ ಜಾರಿಗೆ ತರದೆ ಸುಮ್ಮನಾಗಿದ್ದು, ಜಿಲ್ಲಾಡಳಿತದ ತಡೆಗೋಡೆ ನಿರ್ಮಾಣದ ಭರವಸೆ, ಭರವಸೆಯಾಗಿಯೇ ಉಳಿದಿದೆ.
ಉತ್ತರ ಕನ್ನಡ ಜಿಲ್ಲಾಧಿಕಾರಿ ಲಕ್ಷ್ಮೀಪ್ರಿಯಾ ಮಾಧ್ಯಮದವರೊಂದಿಗೆ ಮಾತನಾಡಿ, “ಪ್ರಸ್ತಾವಿತ ಕ್ರಿಯಾ ಯೋಜನೆಗೆ ರಾಜ್ಯ ಸರ್ಕಾರ 70 ಕೋಟಿ ರೂ.ಗಳನ್ನು ನೀಡುವುದಾಗಿ ಭರವಸೆ ನೀಡಿದೆ. ಹಣ ಬಿಡುಗಡೆ ಮಾಡುವವರೆಗೆ ಸವೆತವನ್ನು ತಡೆಯಲು ತುರ್ತು ಕ್ರಮಗಳನ್ನು ಕೈಗೊಳ್ಳುವಂತೆ ಬಂದರು ಇಲಾಖೆಗೆ ನಿರ್ದೇಶನ ನೀಡಿದ್ದೇವೆ” ಎಂದು ಹೇಳಿದ್ದಾರೆ.
