ನಿತಿನ್‌ ನಬಿನ್‌ ಅವರನ್ನು ಬಿಜೆಪಿ ನೂತನ ರಾಷ್ಟ್ರೀಯ ಅಧ್ಯಕ್ಷರನ್ನಾಗಿ ಮಂಗಳವಾರ ಅಧಿಕೃತವಾಗಿ ಘೋಷಿಸಿದ ಬೆನ್ನಲ್ಲೇ, ಕಾಂಗ್ರೆಸ್ ಕೇಸರಿ ಪಕ್ಷದ ವಿರುದ್ಧ ತೀವ್ರ ವಾಗ್ದಾಳಿ ನಡೆಸಿದೆ. “ಬಿಜೆಪಿಯು ಮೊದಲು ಅಧ್ಯಕ್ಷರ ಹೆಸರನ್ನು ಘೋಷಣೆ ಮಾಡುತ್ತದೆ, ಆಮೇಲೆ ಚುನಾವಣೆ ನಡೆಯಲಿದೆ ಎನ್ನುತ್ತದೆ, ಆದರೆ ವಾಸ್ತವದಲ್ಲಿ ಅಲ್ಲಿ ಯಾವುದೇ ಚುನಾವಣೆ ನಡೆಯುವುದೇ ಇಲ್ಲ,” ಎಂದು ಕಾಂಗ್ರೆಸ್ ವ್ಯಂಗ್ಯವಾಡಿದೆ.
ಇದೇ ವೇಳೆ, ಈ ಪ್ರಕ್ರಿಯೆಯಲ್ಲಿ ‘ತಿರುಚಲು’ ಏನೂ ಸಿಗದ ಕಾರಣ ಮುಖ್ಯ ಚುನಾವಣಾ ಆಯುಕ್ತ (ಸಿಇಸಿ) ಜ್ಞಾನೇಶ್‌ ಕುಮಾರ್‌ ಅವರು ಅಸಮಾಧಾನಗೊಂಡಿದ್ದಾರೆ ಎಂದು ಹೇಳುವ ಮೂಲಕ, ಚುನಾವಣಾ ಆಯೋಗದ ವಿರುದ್ಧವೂ ವಿರೋಧ ಪಕ್ಷ ಪರೋಕ್ಷವಾಗಿ ಹರಿಹಾಯ್ದಿದೆ.
’ಚುನಾವಣಾ ಆಯುಕ್ತರಿಗೆ ಕೆಲಸವೇ ಇಲ್ಲ’
ಕಾಂಗ್ರೆಸ್‌ನ ಮಾಧ್ಯಮ ಮತ್ತು ಪ್ರಚಾರ ವಿಭಾಗದ ಮುಖ್ಯಸ್ಥ ಪವನ್‌ ಖೇರಾ ಅವರು ಸುದ್ದಿಗೋಷ್ಠಿಯಲ್ಲಿ ಮಾತನಾಡಿ, “ಸಿಇಸಿ ಜ್ಞಾನೇಶ್‌ ಕುಮಾರ್‌ ಅವರಿಗೆ ಇಲ್ಲಿ ಯಾವುದೇ ಪಾತ್ರವಿಲ್ಲ. ಅವರು ಇಲ್ಲಿ ಪ್ರಭಾವ ಬೀರಲು ಅಥವಾ ಏನನ್ನೂ ತಿರುಚಲು ಸಾಧ್ಯವಾಗದ ಕಾರಣ, ಪ್ರತಿಭಟನಾರ್ಥವಾಗಿ ರಾಜೀನಾಮೆ ನೀಡಲು ಬಯಸುತ್ತಿದ್ದಾರೆ,” ಎಂದು ಕುಟುಕಿದರು.
ಚುನಾವಣಾ ಅಕ್ರಮಗಳ ಕುರಿತು ಪ್ರತಿಪಕ್ಷಗಳು ನಿರಂತರವಾಗಿ ಆಯೋಗವನ್ನು ಟೀಕಿಸುತ್ತಿರುವ ಹಿನ್ನೆಲೆಯಲ್ಲಿ ಖೇರಾ ಅವರ ಈ ಹೇಳಿಕೆ ಮಹತ್ವ ಪಡೆದುಕೊಂಡಿದೆ.
ಇದನ್ನು ಓದಿದ್ದೀರಾ? ಈ ದಿನ ಸಂಪಾದಕೀಯ | ಕೇಂದ್ರದ ತಾರತಮ್ಯ ನೀತಿಯನ್ನು ಪ್ರಶ್ನಿಸುವುದು ತಪ್ಪಲ್ಲ
‘ಬಾಸ್-ಬಾಸ್’ ಆಟ ಮತ್ತು ಸ್ವಾಮೀಜಿಗಳ ಕಣ್ಣೀರು
ಪಕ್ಷದ ವಿಚಾರದಲ್ಲಿ ನಿತಿನ್‌ ನಬಿನ್‌ ಅವರು ತಮ್ಮ ‘ಬಾಸ್’ ಎಂದು ಪ್ರಧಾನಿ ನರೇಂದ್ರ ಮೋದಿ ಹೇಳಿಕೆ ನೀಡಿದ್ದರು. ಇದಕ್ಕೆ ತೀಕ್ಷ್ಣವಾಗಿ ಪ್ರತಿಕ್ರಿಯಿಸಿದ ಖೇರಾ, “ಅವರು ತಮ್ಮೊಳಗೆ ಆಟ ಆಡುತ್ತಿರಲಿ. ಕೆಲವೊಮ್ಮೆ ಮೋಹನ್ ಭಾಗವತ್ ಬಾಸ್ ಆದರೆ, ಇನ್ನು ಕೆಲವೊಮ್ಮೆ ಮೋದಿ ಬಾಸ್ ಆಗುತ್ತಾರೆ. ಆದರೆ ಇತ್ತೀಚೆಗೆ ಪ್ರಯಾಗರಾಜ್‌ನಲ್ಲಿ ಸ್ವಾಮಿ ಅವಿಮುಕ್ತೇಶ್ವರಾನಂದ ಸರಸ್ವತಿ ಅವರಿಗೆ ಗಂಗಾ ಸ್ನಾನಕ್ಕೆ ಅಡ್ಡಿಪಡಿಸಿದ ಘಟನೆಯಿಂದ ಹಿಂದೂ ಧರ್ಮದ ಶ್ರೇಷ್ಠ ಸ್ವಾಮೀಜಿಗಳು ಕಣ್ಣೀರು ಹಾಕುತ್ತಿದ್ದಾರೆ. ಆದರೆ ಇವರೆಲ್ಲರೂ ‘ಬಾಸ್-ಬಾಸ್’ ಆಟದಲ್ಲಿ ಮುಳುಗಿದ್ದಾರೆ,” ಎಂದರು.
”ಇಲ್ಲಿ ಬಿಗ್‌ ಬಾಸ್ ಆಟ ನಡೆಯುತ್ತಿದೆಯೇ? ಇದೇನು? ಹಿಂದೂ ಧರ್ಮದ ಅತ್ಯುನ್ನತ ಸ್ಥಾನದಲ್ಲಿರುವವರು ಕಣ್ಣೀರು ಹಾಕುತ್ತಿದ್ದರೆ, ಬಿಜೆಪಿ ನಾಯಕರು ಬಿಗ್‌ ಬಾಸ್ ಆಡುವುದರಲ್ಲಿ ವ್ಯಸ್ತರಾಗಿದ್ದಾರೆ,” ಎಂದು ಖೇರಾ ಆಕ್ರೋಶ ವ್ಯಕ್ತಪಡಿಸಿದರು.
ಅತ್ಯಂತ ಕಿರಿಯ ಅಧ್ಯಕ್ಷ
ಜೆ.ಪಿ. ನಡ್ಡಾ ಅವರ ಉತ್ತರಾಧಿಕಾರಿಯಾಗಿ 45 ವರ್ಷದ ನಿತಿನ್‌ ನಬಿನ್‌ ಅವರನ್ನು ಮಂಗಳವಾರ ಔಪಚಾರಿಕವಾಗಿ ಘೋಷಿಸಲಾಯಿತು. ಬಿಜೆಪಿ ಸಾಂಸ್ಥಿಕ ಚುನಾವಣೆಯ ಚುನಾವಣಾ ಅಧಿಕಾರಿ ಕೆ.ಲಕ್ಷ್ಮಣ್‌ ಅವರು ಫಲಿತಾಂಶ ಪ್ರಕಟಿಸಿ, ನಬಿನ್‌ ಅವರಿಗೆ ಪ್ರಮಾಣಪತ್ರ ಹಸ್ತಾಂತರಿಸಿದರು. ಇದರೊಂದಿಗೆ ನಬಿನ್‌ ಅವರು ಈ ಉನ್ನತ ಹುದ್ದೆಗೇರಿದ ಅತ್ಯಂತ ಕಿರಿಯ ವ್ಯಕ್ತಿ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.
ಬಿಜೆಪಿ ಸ್ಥಾಪನೆಯಾದ (1980) ವರ್ಷವೇ ಜನಿಸಿದ ನಬಿನ್‌, ಪಕ್ಷದ 12ನೇ ಅಧ್ಯಕ್ಷರಾಗಿದ್ದಾರೆ. ಬಿಹಾರ ಸರ್ಕಾರದಲ್ಲಿ ಕಾನೂನು, ನಗರಾಭಿವೃದ್ಧಿ ಮತ್ತು ವಸತಿ ಸಚಿವರಾಗಿದ್ದ ಇವರು, ಕಳೆದ ಡಿಸೆಂಬರ್‌ 14ರಂದು ಬಿಜೆಪಿಯ ಕಾರ್ಯಾಧ್ಯಕ್ಷರಾಗಿ ನೇಮಕಗೊಂಡ ಬಳಿಕ ಸಚಿವ ಸ್ಥಾನಕ್ಕೆ ರಾಜೀನಾಮೆ ನೀಡಿದ್ದರು.
