ತಮಿಳುನಾಡು ಮುಖ್ಯಮಂತ್ರಿ ಹಾಗೂ ‘ತಮಿಳಗ ವೆಟ್ರಿ ಕಳಗಂ’ (ಟಿವಿಕೆ) ಪಕ್ಷದ ನಾಯಕ ಸಿ. ಜೋಸೆಫ್ ವಿಜಯ್ ಅವರು ತಮಿಳುನಾಡು ವಿಧಾನಸಭೆಯಲ್ಲಿ ಮಾಡಿದ ‘ಗಲ್ಲದ ಸನ್ನೆ’ ಭಾರಿ ರಾಜಕೀಯ ವಿವಾದಕ್ಕೆ ಕಾರಣವಾಗಿದೆ. ತಮಿಳುನಾಡಿನ ರಾಜಕೀಯ ವಲಯದಲ್ಲಿ ಮುಖ್ಯಮಂತ್ರಿ ಸಿ. ಜೋಸೆಫ್ ವಿಜಯ್ ಮತ್ತು ಎಂ.ಕೆ. ಸ್ಟ್ಯಾಲಿನ್ ನಡುವಿನ ಜಟಾಪಟಿ ತೀವ್ರಗೊಂಡಿದೆ.
ತಮಿಳುನಾಡು ವಿಧಾನಸಭೆಯಲ್ಲಿ ಪೋಲಿಸ್ ಅನುದಾನ ಕುರಿತ ಚರ್ಚೆಯ ಸಂದರ್ಭದಲ್ಲಿ, ಮುಖ್ಯಮಂತ್ರಿ ವಿಜಯ್ ತಮ್ಮ ಗಲ್ಲಕ್ಕೆ (Jaw) ಕೈಯಿಟ್ಟು ಮಾಡಿದ ಭಂಗಿಯು ಕಾಯ್ದೆಯಡಿ (MISA) ಜೈಲು ಶಿಕ್ಷೆ ಅನುಭವಿಸಿದ್ದ ಡಿಎಂಕೆ ಮುಖ್ಯಸ್ಥ ಎಂ.ಕೆ. ಸ್ಟ್ಯಾಲಿನ್ ಅವರನ್ನು ಹೀಯಾಳಿಸುವ ಅಥವಾ ‘ಬಾಡಿ ಶೇಮಿಂಗ್’ ಮಾಡುವಂತಿದೆ ಎಂಬ ಆರೋಪಗಳು ವ್ಯಕ್ತವಾಗಿದೆ.
ಇದನ್ನೂ ಓದಿ: ಡಿಎಂಕೆ ಬೆನ್ನಿಗೆ ಇರಿದ ಕಾಂಗ್ರೆಸ್ ಜಿಗಣೆ, ಇನ್ನೆಂದೂ ನಂಬಲ್ಲ: ಉದಯನಿಧಿ ಸ್ಟ್ಯಾಲಿನ್
ಈ ವಿವಾದಕ್ಕೆ ಪ್ರತಿಕ್ರಿಯಿಸಿರುವ ಡಿಎಂಕೆ ಅಧ್ಯಕ್ಷ ಎಂ.ಕೆ. ಸ್ಟ್ಯಾಲಿನ್, “ಸಹೋದರ ವಿಜಯ್, ನೀವು ಹೇಳಿದ್ದು ನಿಜ. 1976ರ ತುರ್ತು ಪರಿಸ್ಥಿತಿಯ ಸಮಯದಲ್ಲಿ ಎಂಐಎಸ್‌ಎ ಕಾಯ್ದೆಯಡಿ ಬಂಧನಕ್ಕೊಳಗಾಗಿದ್ದಾಗ ನಾನು ಅನುಭವಿಸಿದ ಲಾಠಿ ಏಟುಗಳಿಂದ ನನ್ನ ದವಡೆ ಮೂಳೆ ಮುರಿದಿತ್ತು. ಇಂದು ಕೂಡ ನನ್ನ ದೇಹದ ಮೇಲೆ ಆ ಹೊಡೆತಗಳ ಗಾಯದ ಕಲೆಗಳಿವೆ. ಅದನ್ನು ನಾನು ನಿರಾಕರಿಸುವುದಿಲ್ಲ” ಎಂದು ತಿರುಗೇಟು ನೀಡಿದ್ದಾರೆ.
ಅಲ್ಲದೆ, ಮುಖ್ಯಮಂತ್ರಿಯ ಸ್ಥಾನದಲ್ಲಿದ್ದುಕೊಂಡು ಮಾತನಾಡುವಾಗ ಶಾಸನಸಭೆಯ ಘನತೆ ಹಾಗೂ ರಾಜಕೀಯ ಸೌಜನ್ಯವನ್ನು ಕಾಯ್ದುಕೊಳ್ಳಬೇಕು ಎಂದು ವಿಜಯ್ ಅವರಿಗೆ ಸಲಹೆ ನೀಡಿದ್ದಾರೆ.
ಅತ್ತ, ವಿಧಾನಸಭೆಯಲ್ಲಿ ತಮ್ಮ ಹಾವಭಾವದ ಸುತ್ತ ಎದ್ದಿರುವ ವಿವಾದಕ್ಕೆ ಸ್ಪಷ್ಟನೆ ನೀಡಿರುವ ಸಿಎಂ ವಿಜಯ್, “ನನ್ನ ಶರೀರ ಭಾಷೆ ಅಥವಾ ಗಲ್ಲದ ಮೇಲಿನ ಕೈಸನ್ನೆ ಸಂಪೂರ್ಣವಾಗಿ ಆಕಸ್ಮಿಕವಾಗಿದ್ದು, ಯಾರ ವೈಯಕ್ತಿಕ ಭಾವನೆಗಳಿಗೂ ನೋವುಂಟುಮಾಡುವ ಉದ್ದೇಶ ಹೊಂದಿರಲಿಲ್ಲ. ಇದನ್ನು ರಾಜಕೀಯವಾಗಿ ಯಾರ ವಿರುದ್ಧದ ನಿಂದನೆ ಎಂದು ಅರ್ಥೈಸಬಾರದು” ಎಂದು ಎಕ್ಸ್ (X) ಪೋಸ್ಟ್ ಮೂಲಕ ತಿಳಿಸಿದ್ದಾರೆ.
ಆದರೆ, ಎಡಪಕ್ಷಗಳು ಮತ್ತು ಡಿಎಂಕೆ ನಾಯಕರು ಈ ಭಂಗಿಯನ್ನು ತೀವ್ರವಾಗಿ ಖಂಡಿಸಿದ್ದು, ಸದನವನ್ನು ವೈಯಕ್ತಿಕ ವಿಡಿಯೋ ರೀಲ್ಸ್ ಸೆಟ್‌ನಂತೆ ಬಳಸಬಾರದು ಎಂದು ಆಕ್ಷೇಪಿಸಿದ್ದಾರೆ.
