ಇತ್ತೀಚೆಗೆ ಬಂಧನಗೊಂಡಿದ್ದ ನೋಯ್ಡಾ ಕಾರ್ಮಿಕರ ಮೇಲೆ ಪೊಲೀಸ್ ಕಸ್ಟಡಿಯಲ್ಲಿ ಹಲ್ಲೆ ನಡೆದಿದೆ ಎಂದು ಸಿಪಿಐಎಂ ಆರೋಪಿಸಿದೆ. ಬಂಧನದ ಒಂದು ತಿಂಗಳ ನಂತರ ಇತ್ತೀಚೆಗೆ ಜಾಮೀನು ಪಡೆದ ನೋಯ್ಡಾ ಕಾರ್ಮಿಕರನ್ನು ಸಿಪಿಐಎಂ ಪ್ರಧಾನ ಕಾರ್ಯದರ್ಶಿ ಎಂಎ ಬೇಬಿ ನೇತೃತ್ವದ ನಿಯೋಗ ಭೇಟಿ ಮಾಡಿದೆ.
ಸಿಪಿಐಎಂ ಪಾಲಿಟ್ ಬ್ಯೂರೋ ಸದಸ್ಯರಾದ ಆರ್ ಅರುಣ್ ಕುಮಾರ್ ಮತ್ತು ತಪನ್ ಸೇನ್, ರಾಜ್ಯಸಭಾ ಸದಸ್ಯ ವಿ ಶಿವದಾಸನ್ ಮತ್ತು ಇತರ ಪಕ್ಷದ ನಾಯಕರು ಸೇರಿದಂತೆ ನಿಯೋಗಕ್ಕೆ ಕಾರ್ಮಿಕರು ತಮ್ಮ ಅನುಭವಗಳನ್ನು ವಿವರಿಸಿದ್ದಾರೆ.
ಇದನ್ನು ಓದಿದ್ದೀರಾ? ಪರ್ಯಾಯ ರಾಜಕಾರಣಕ್ಕೆ ನೀತಿಗಳು ಬದಲಾಗಬೇಕೇ ಹೊರತು ಸರ್ಕಾರ ಬದಲಾವಣೆಯಲ್ಲ: ಸಿಪಿಐಎಂ ಕೆ ಪ್ರಕಾಶ್
ಈ ಕಾರ್ಮಿಕರಿಗೆ ಪೊಲೀಸ್ ಕಸ್ಟಡಿಯಲ್ಲಿ ದೈಹಿಕವಾಗಿ ಕಿರುಕುಳ ನೀಡಲಾಗಿದೆ. ಸುಳ್ಳು ಸಾಕ್ಷ್ಯಗಳನ್ನು ಇಟ್ಟುಕೊಂಡು ಸುಳ್ಳು ಆರೋಪಗಳನ್ನು ಮಾಡಲಾಗಿದೆ. ವಿವಿಧ ಆರೋಪಗಳ ಅಡಿಯಲ್ಲಿ ಪ್ರಕರಣ ದಾಖಲಿಸಲಾಗಿದೆ ಎಂದು ಕಾರ್ಮಿಕರು ತಮಗೆ ಮಾಹಿತಿ ನೀಡಿದ್ದಾರೆ ಎಂದು ನಿಯೋಗ ಆರೋಪಿಸಿದೆ. ಜತೆಗೆ ಪ್ರತಿಭಟನೆಗಳಲ್ಲಿ ಭಾಗವಹಿಸಿದ್ದಕ್ಕಾಗಿ ಕೆಲಸದಿಂದ ವಜಾಗೊಂಡ ಕಾರ್ಮಿಕರನ್ನು ಸಹ ನಿಯೋಗ ಭೇಟಿ ಮಾಡಿದೆ.
ಏನಿದು ಘಟನೆ, ಕಾರ್ಮಿಕರ ಬಂಧನವೇಕೆ?
ಉತ್ತರ ಪ್ರದೇಶದ ನೋಯ್ಡಾದ ಕೈಗಾರಿಕಾ ಪ್ರದೇಶಗಳಲ್ಲಿ ಜೀವನ ವೆಚ್ಚ ಮತ್ತು ಹಣದುಬ್ಬರ ಹೆಚ್ಚಾದ ಹಿನ್ನೆಲೆಯಲ್ಲಿ ಕನಿಷ್ಠ ವೇತನವನ್ನು ಹೆಚ್ಚಿಸುವಂತೆ ಆಗ್ರಹಿಸಿ ಸಾವಿರಾರು ಕಾರ್ಮಿಕರು ಪ್ರತಿಭಟನೆ ನಡೆಸಿದ್ದರು. ಪ್ರತಿಭಟನೆಯು ಕೆಲವು ಕಡೆ ಹಿಂಸಾಚಾರಕ್ಕೆ ತಿರುಗಿದಾಗ, ಪೊಲೀಸರು ಸುಮಾರು 300ಕ್ಕೂ ಹೆಚ್ಚು ಜನರನ್ನು ಬಂಧಿಸಿ 7ಕ್ಕೂ ಹೆಚ್ಚು ಎಫ್‌ಐಆರ್‌ಗಳನ್ನು ದಾಖಲಿಸಿದ್ದರು.
ಇನ್ನು ಈ ಹಿಂಸಾಚಾರದ ಹಿಂದೆ ಸಂಘಟಿತ ಪಿತೂರಿ ಇದೆ ಎಂದು ಗೌತಮ್ ಬುದ್ಧ ನಗರದ ಪೊಲೀಸ್ ಕಮಿಷನರ್ ಲಕ್ಷ್ಮಿ ಸಿಂಗ್ ದೂರಿದ್ದರು. ಬಂಧಿತರಲ್ಲಿ ಹಲವರು ಕಾರ್ಮಿಕರಲ್ಲ, ಬದಲಿಗೆ ಹೊರಗಿನಿಂದ ಬಂದು ಗಲಭೆ ಸೃಷ್ಟಿಸಿದ ಸಮಾಜವಿರೋಧಿ ಶಕ್ತಿಗಳು ಎಂದು ಉತ್ತರ ಪ್ರದೇಶ ಸರ್ಕಾರ ಹೇಳಿಕೊಂಡಿತ್ತು. ಇವೆಲ್ಲ ಬೆಳವಣಿಗೆ ನಡುವೆ ಇತ್ತೀಚೆಗೆ ಜಾಮೀನು ಪಡೆದ ನೋಯ್ಡಾ ಕಾರ್ಮಿಕರನ್ನು ಸಿಪಿಐಎಂ ನಿಯೋಗ ಭೇಟಿ ಮಾಡಿದೆ.
ಇದನ್ನು ಓದಿದ್ದೀರಾ? ವಿ.ಬಿ.ಜಿ ರಾಮ್ ಜಿ ಯೋಜನೆ ಗ್ರಾಮೀಣ ಪ್ರದೇಶದ ಕೂಲಿ ಕಾರ್ಮಿಕರ ಪಾಲಿಗೆ ಮರಣ ಶಾಸನ : ಡಾ.ಅನಿಲ್ ಕುಮಾರ್
ಇನ್ನು, “ಕಳೆದ ಕೆಲವು ದಿನಗಳಿಂದ, ಜೈಲಿನಲ್ಲಿರುವ ಕಾರ್ಮಿಕರನ್ನು ಭೇಟಿ ಮಾಡಲು ನಮ್ಮ ಸಂಸತ್ ಸದಸ್ಯ ವಿ ಶಿವದಾಸನ್ ಮೂಲಕ ಅನುಮತಿ ಪಡೆಯಲು ನಾವು ಪ್ರಯತ್ನಿಸುತ್ತಿದ್ದೇವೆ. ಆದರೆ ಉನ್ನತ ಅಧಿಕಾರಿಗಳು ವಿನಂತಿಯನ್ನು ತಿರಸ್ಕರಿಸಿದ್ದರು” ಎಂದು ಸಿಪಿಐಎಂ ನಾಯಕ ಬೇಬಿ ಹೇಳಿದ್ದಾರೆ.
“ಜೈಲಿನಲ್ಲಿರುವ ಕೆಲವು ಕಾರ್ಮಿಕರು ಜಾಮೀನು ಅರ್ಜಿಗಳನ್ನು ಹಾಕಲು ಮತ್ತು ಸಾಕಷ್ಟು ಕಾನೂನು ನೆರವು ಪಡೆಯಲು ಸಾಧ್ಯವಾಗುತ್ತಿಲ್ಲ. ಇದು ಅವರ ಮೂಲಭೂತ ಹಕ್ಕುಗಳ ನಿರಾಕರಣೆಗೆ ಸಮಾನವಾಗಿದೆ. ಸಿಪಿಐಎಂ ಕಾರ್ಮಿಕರಿಗೆ ಕಾನೂನು ನೆರವು ಮತ್ತು ರಾಜಕೀಯ ಬೆಂಬಲವನ್ನು ನೀಡುವುದನ್ನು ಮುಂದುವರಿಸುತ್ತದೆ” ಎಂದು ತಿಳಿಸಿದ್ದಾರೆ.
