ಒಡಿಶಾದ ಪುರಿಯಲ್ಲಿ ಶುಕ್ರವಾರ ನಡೆದ ಭಗವಾನ್ ಜಗನ್ನಾಥನ ‘ಬಹುದಾ ಯಾತ್ರೆ’ಯಲ್ಲಿ (ರಥ ಹಿಂದಿರುಗುವ ಮೆರವಣಿಗೆ) ಉಂಟಾದ ಭಾರಿ ಜನಸಂದಣಿಯ ನಡುವೆ ಉಸಿರುಗಟ್ಟಿ ಭಕ್ತರೊಬ್ಬರು ಸಾವನ್ನಪ್ಪಿ, ನೂರಕ್ಕೂ ಹೆಚ್ಚು ಮಂದಿ ಅಸ್ವಸ್ಥಗೊಂಡ ಘಟನೆ ವರದಿಯಾಗಿದೆ.
ಶುಕ್ರವಾರ ಬಹುದಾ ಯಾತ್ರೆಯ ವೇಳೆ ಉಂಟಾದ ಭಾರಿ ಜನದಟ್ಟಣೆ ಹಾಗೂ ಸೆಖೆಯ ವಾತಾವರಣದಿಂದಾಗಿ ನೂರಕ್ಕೂ ಹೆಚ್ಚು ಮಂದಿ ಅಸ್ವಸ್ಥರಾಗಿದ್ದರು. ಪ್ರಾಥಮಿಕ ಚಿಕಿತ್ಸೆಯ ನಂತರ ಹೆಚ್ಚಿನವರನ್ನು ಆಸ್ಪತ್ರೆಯಿಂದ ಡಿಸ್ಚಾರ್ಜ್ ಮಾಡಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಜುಲೈ 16ರಂದು ನಡೆದ ಗುಂಡಿಚಾ ಯಾತ್ರೆಯ ವೇಳೆಯೂ ಉಂಟಾದ ಭಾರಿ ಜನಸಂದಣಿಯಿಂದಾಗಿ ಇಬ್ಬರು ಭಕ್ತರು ಸಾವನ್ನಪ್ಪಿದ್ದರು. ಆ ಮೃತರ ಕುಟುಂಬಗಳಿಗೆ ರಾಜ್ಯ ಸರ್ಕಾರವು ತಲಾ 10 ಲಕ್ಷ ರೂ. ಪರಿಹಾರವನ್ನು ಈಗಾಗಲೇ ಘೋಷಿಸಿದೆ.
ದೇವತೆಗಳಾದ ಜಗನ್ನಾಥ, ಬಲಭದ್ರ ಮತ್ತು ಸುಭದ್ರಾ ದೇವಿಯು ತಮ್ಮ ಜನ್ಮಸ್ಥಳವಾದ ಗುಂಡಿಚಾ ದೇವಸ್ಥಾನದಲ್ಲಿ ಒಂಬತ್ತು ದಿನಗಳ ಕಾಲ ನೆಲೆಸಿದ ನಂತರ, ಬಹುದಾ ಯಾತ್ರೆಯ ಮೂಲಕ 12ನೇ ಶತಮಾನದ ಪುರಿ ದೇವಾಲಯಕ್ಕೆ ಮರಳುತ್ತಾರೆ ಎಂಬುದು ಭಕ್ತರ ನಂಬಿಕೆಯಾಗಿದೆ.
ರಾಜ್ಯ ಸರ್ಕಾರ ಸೂಕ್ತ ಮುನ್ನೆಚ್ಚರಿಕೆ ಕ್ರಮಗಳನ್ನು ಕೈಗೊಳ್ಳದ ಕಾರಣ ನೂಕುನುಗ್ಗಲಿನಂತಹ ಪರಿಸ್ಥಿತಿ ನಿರ್ಮಾಣವಾಗಿ ಭಕ್ತರು ಸಾವನ್ನಪ್ಪಿದ್ದಾರೆ ಎಂದು ವಿರೋಧ ಪಕ್ಷವಾದ ಬಿಜು ಜನತಾ ದಳ ಆರೋಪಿಸಿದೆ. ಅಧಿಕಾರಿಗಳ ಅವ್ಯವಸ್ಥೆಯಿಂದಾಗಿ 25ಕ್ಕೂ ಹೆಚ್ಚು ಗಾಯಾಳುಗಳು ಪುರಿ ಆಸ್ಪತ್ರೆಯ ಟ್ರಾಮಾ ಕೇರ್ ಸೆಂಟರ್‌ನಲ್ಲಿ ದಾಖಲಾಗಿದ್ದಾರೆ ಎಂದು ಹಿರಿಯ ಬಿಜೆಡಿ ನಾಯಕ ಸಂಜಯ್ ದಾಸ್ ಬರ್ಮಾ ದೂರಿದ್ದಾರೆ.
ಶನಿವಾರ ನಡೆಯಲಿರುವ ‘ಸುನಾ ಬೇಶ’ (ಚಿನ್ನದ ಅಲಂಕಾರ) ವಿಧಿವಿಧಾನಗಳಿಗಾಗಿ ರಾಜ್ಯ ಸರ್ಕಾರ ವಿಶೇಷ ಸಂಚಾರ ನಿಯಂತ್ರಣ ಮತ್ತು ಜನಸಂದಣಿ ನಿರ್ವಹಣಾ ಯೋಜನೆಗಳನ್ನು ರೂಪಿಸಿದೆ. ಈ ಕುರಿತು ಮಾಹಿತಿ ನೀಡಿರುವ ಎಡಿಜಿ ಸೌಮೇಂದ್ರ ಪ್ರಿಯದರ್ಶಿ, “ಶನಿವಾರ ಸಂಜೆ ದೇವತೆಗಳ ‘ಸುನಾ ಬೇಶ’ ಕಣ್ತುಂಬಿಕೊಳ್ಳಲು ಸುಮಾರು 10 ಲಕ್ಷ ಭಕ್ತರು ಪುರಿಗೆ ಆಗಮಿಸುವ ನಿರೀಕ್ಷೆಯಿದೆ. ಈ ವೇಳೆ ಜನಸಂದಣಿಯನ್ನು ನಿರ್ವಹಿಸುವುದು ಒಂದು ದೊಡ್ಡ ಸವಾಲಾಗಿದೆ” ಎಂದು ಹೇಳಿದ್ದಾರೆ.
