ಭಾರತೀಯ ಮಹಿಳೆಯರಲ್ಲಿ ಸ್ತನ ಕ್ಯಾನ್ಸರ್ ಅತ್ಯಂತ ಸಾಮಾನ್ಯವಾದ ಕ್ಯಾನ್ಸರ್ ಆಗಿದೆ ಮತ್ತು ಸ್ತನ ಕ್ಯಾನ್ಸರ್ ಹಿಂದೆಂದಿಗಿಂತಲೂ ಅಧಿಕವಾಗಿ ಹೆಚ್ಚುತ್ತಿವೆ ಎಂಬುದನ್ನು ಗ್ಲೋಬೊಕಾನ್ 2020ರ ವರದಿ ಹೇಳಿದೆ. ಗ್ಲೋಬೊಕಾನ್ ದತ್ತಾಂಶದ ಪ್ರಕಾರ, ಭಾರತದಲ್ಲಿ ಪ್ರತಿ ನಾಲ್ಕು ನಿಮಿಷಕ್ಕೆ ಒಬ್ಬ ಮಹಿಳೆ ಸ್ತನ ಕ್ಯಾನ್ಸರ್‌ನಿಂದ ಬಳಲುತ್ತಿದ್ದು, ಪ್ರತಿ ಎಂಟು ನಿಮಿಷಕ್ಕೆ ಒಬ್ಬ ಮಹಿಳೆ ಸ್ತನ ಕ್ಯಾನ್ಸರ್‌ಗೆ ಬಲಿಯಾಗುತ್ತಿದ್ದಾಳೆ.
“ಪ್ರತಿ ವರ್ಷ ಸುಮಾರು 1.78 ಲಕ್ಷ ಹೊಸ ಸ್ತನ ಕ್ಯಾನ್ಸರ್ ಪ್ರಕರಣಗಳು ಕಂಡುಬರುತ್ತಿವೆ. ಇದೇ ರೀತಿ ಮುಂದುವರೆದರೆ 2030ರ ವೇಳೆಗೆ ಈ ಸಂಖ್ಯೆ ಎರಡು ಲಕ್ಷ ದಾಟುವ ಸಾಧ್ಯತೆಯಿದೆ. ಇನ್ನೂ ಹೆಚ್ಚು ಕಳವಳಕಾರಿ ಸಂಗತಿಯೆಂದರೆ, ಪಾಶ್ಚಿಮಾತ್ಯ ದೇಶಗಳಲ್ಲಿನ ಮಹಿಳೆಯರಿಗಿಂತ ಸುಮಾರು ಒಂದು ದಶಕ ಮುನ್ನ ಅನೇಕ ಭಾರತೀಯ ಮಹಿಳೆಯರು ಸ್ತನ ಕ್ಯಾನ್ಸರ್‌ಗೆ ತುತ್ತಾಗುತ್ತಿದ್ದಾರೆ” ಎಂದು ಸ್ತ್ರೀರೋಗತಜ್ಞೆ, ಐವಿಎಫ್ ತಜ್ಞೆ ಮತ್ತು ವಿಶ್ವಸಂಸ್ಥೆಯ ಸಲಹೆಗಾರ್ತಿ, ಜಾಗತಿಕ ಆರೋಗ್ಯ ತಂತ್ರಜ್ಞೆ ಡಾ. ಸಬೀನ್ ಕಪಾಸಿ ಹೇಳಿದ್ದಾರೆ.
ಇದನ್ನು ಓದಿದ್ದೀರಾ? ಹಾಸನ | ಗರ್ಭ ಕೊರಳ, ಸ್ತನ ಕ್ಯಾನ್ಸರ್ ಬಗ್ಗೆ ಜಾಗೃತಿ ಜಾಥಾ
30 ಮತ್ತು 40ರ ಹರೆಯದ ಮಹಿಳೆಯರು ನಿಯಮಿತವಾಗಿ ತಪಾಸಣೆಗೆ ಒಳಗಾಗಬೇಕು. ಆರಂಭಿಕ ಚಿಹ್ನೆಗಳನ್ನು ತಿಳಿದುಕೊಳ್ಳುವುದು ಅಗತ್ಯ. ಚಿಕಿತ್ಸೆಗಳು ಸುಧಾರಿಸುತ್ತಿದ್ದರೂ, ಕ್ಯಾನ್ಸರ್ ಇರುವುದು ತಡವಾಗಿ ಪತ್ತೆಯಾಗುವುದರಿಂದ ಭಾರತದಲ್ಲಿ ಇತರೆ ದೇಶಗಳಿಗೆ ಹೋಲಿಸಿದರೆ ಸಾವಿನ ಪ್ರಮಾಣ ಹೆಚ್ಚಾಗುತ್ತಿದೆ. ಭಾರತದಲ್ಲಿ ಹತ್ತು ಸ್ತನ ಕ್ಯಾನ್ಸರ್ ಪ್ರಕರಣಗಳಲ್ಲಿ ಸುಮಾರು ಆರು ಪ್ರಕರಣಗಳಲ್ಲಿ ಕ್ಯಾನ್ಸರ್ ಮೂರು ಅಥವಾ ನಾಲ್ಕನೇ ಹಂತವನ್ನು ತಲುಪಿದಾಗ ಪತ್ತೆಯಾಗುತ್ತವೆ. ಇದರಿಂದಾಗಿ ಚಿಕಿತ್ಸೆ ಸಂಕೀರ್ಣಗೊಳ್ಳುತ್ತಿದೆ ಎಂದು ವರದಿ ಹೇಳಿದೆ.
“ಆರಂಭಿಕವಾಗಿ ಕಾಣುವ ಚಿಹ್ನೆಗಳನ್ನು ಮಹಿಳೆಯರು ನಿರ್ಲಕ್ಷಿಸುತ್ತಾರೆ. ಅನೇಕ ಮಹಿಳೆಯರು ವೈದ್ಯರ ಬಳಿಗೆ ಹೋಗುವುದನ್ನು ವಿಳಂಬ ಮಾಡುತ್ತಾರೆ. ಗಡ್ಡೆ ದೊಡ್ಡದಾಗುವವರೆಗೂ ತಪಾಸಣೆ ಮಾಡಿಸಿಕೊಂಡಿರುವುದಿಲ್ಲ. ಕೆಲವರು ರೋಗದ ಬಗ್ಗೆ ಭಯಪಡುತ್ತಾರೆ. ಹಲವರಿಗೆ ತಪಾಸಣೆಗೆ ಬೇಕಾದಷ್ಟು ಹಣ ಇರುವುದಿಲ್ಲ, ಆಸ್ಪತ್ರೆಗಳು ದೂರವಿರುತ್ತದೆ. ಇನ್ನು ಕೆಲವರು ಸ್ತನ ತಪಾಸಣೆಗೆ ಒಳಪಡಲು ಹಿಂಜರಿಯುತ್ತಾರೆ” ಎಂದು ಡಾ. ಕಪಾಸಿ ಹೇಳಿದ್ದಾರೆ.
ಸ್ತನದಲ್ಲಿ ನೋವುರಹಿತ ಗಡ್ಡೆ, ಕಂಕುಳಿನಲ್ಲಿ ಉಬ್ಬು, ಸ್ತನದ ಚರ್ಮದಲ್ಲಿ ಬದಲಾವಣೆ, ಸ್ತನತೊಟ್ಟುಗಳು ಒಳಮುಖವಾಗಿರುವುದು, ಸ್ತನತೊಟ್ಟಿನಲ್ಲಿ ಅಸಾಮಾನ್ಯ ಸ್ರಾವಗಳು ಸ್ತನ ಕ್ಯಾನ್ಸರ್‌ನ ಆರಂಭಿಕ ಲಕ್ಷಣಗಳಾಗಿವೆ. ಇವುಗಳು ಕ್ಯಾನ್ಸರ್ ಅಲ್ಲದಿದ್ದರೂ ಸಹ, ವೈದ್ಯರನ್ನು ಸಂಪರ್ಕಿಸಿ ಪರೀಕ್ಷೆಗೆ ಒಳಪಡುವುದು ಉತ್ತಮ ಎನ್ನುತ್ತಾರೆ ವೈದ್ಯರು.
