ಅವಧಿ ಮೀರಿದ, ಹಾಳಾದ ಹಾಗೂ ಗ್ರಾಹಕರು ತಿರಸ್ಕರಿಸಿದ ಆಹಾರ ಪದಾರ್ಥಗಳನ್ನು ನಾಶಪಡಿಸುವ ಬದಲು ಮತ್ತೆ ಮಾರುಕಟ್ಟೆಗೆ ತಲುಪಿಸಿದ ಆರೋಪದ ಕುರಿತು ಮಹಾರಾಷ್ಟ್ರ ಆಹಾರ ಮತ್ತು ಔಷಧ ಆಡಳಿತ (ಎಫ್‌ಡಿಎ) ತನಿಖೆ ಕೈಗೊಂಡಿದೆ. ರಿಲಯನ್ಸ್‌ ಕನ್ಸ್ಯೂಮರ್‌ ಪ್ರಾಡಕ್ಟ್ಸ್‌, ರಿಲಯನ್ಸ್‌ ರಿಟೇಲ್‌, ಬ್ಲಿಂಕಿಟ್‌ ಹಾಗೂ ಜೊಮ್ಯಾಟೊ ಹೈಪರ್‌ಪ್ಯೂರ್‌ಗೆ ಸಂಬಂಧಿಸಿದ ಅಧಿಕಾರಿಗಳು ಸೇರಿದಂತೆ 10 ಮಂದಿ ವಿರುದ್ಧ ಎಫ್‌ಐಆರ್‌ ದಾಖಲಾಗಿದೆ.
ಠಾಣೆ ಮತ್ತು ಪುಣೆ ಜಿಲ್ಲೆಗಳಲ್ಲಿ ಅಕ್ಟೋಬರ್‌ 14 ಹಾಗೂ 15ರಂದು ಏಳು ತಂಡಗಳು ಏಕಕಾಲದಲ್ಲಿ ತಪಾಸಣೆ ನಡೆಸಿವೆ. ಗೋದಾಮುಗಳು, ವಿಲೇವಾರಿ ಕೇಂದ್ರಗಳು ಹಾಗೂ ಚಿಲ್ಲರೆ ಅಂಗಡಿಗಳಲ್ಲಿ ಪರಿಶೀಲನೆ ನಡೆಸಲಾಗಿತ್ತು. ಒಟ್ಟು ₹48,09,924 ಮೌಲ್ಯದ ಆಹಾರ ದಾಸ್ತಾನು ಜಪ್ತಿಯಾಗಿದೆ. ಇದರಲ್ಲಿ ಭಿವಂಡಿಯ ವಿಲೇವಾರಿ ಕೇಂದ್ರದಿಂದ ₹24 ಲಕ್ಷಕ್ಕೂ ಹೆಚ್ಚು, ವಡಪೆಯ ರಿಲಯನ್ಸ್‌ ಘಟಕದಿಂದ ಸುಮಾರು ₹4.92 ಲಕ್ಷ ಹಾಗೂ ಉಸತಾನೆಯ ಹೈಪರ್‌ಪ್ಯೂರ್‌ ಘಟಕದಿಂದ ₹7.81 ಲಕ್ಷದ ಸರಕು ಸೇರಿದೆ.
ಎಫ್‌ಡಿಎ ಪ್ರಾಥಮಿಕ ತನಿಖೆಯ ಪ್ರಕಾರ, ನಾಶಪಡಿಸಬೇಕಿದ್ದ ಉತ್ಪನ್ನಗಳನ್ನು ವಿಲೇವಾರಿ ಗುತ್ತಿಗೆದಾರರಿಗೆ ಒಪ್ಪಿಸಲಾಗುತ್ತಿತ್ತು. ಅಲ್ಲಿಂದ ಅವು ಪರವಾನಗಿಯಿಲ್ಲದ ವಿಂಗಡಣಾ ಕೇಂದ್ರಗಳಿಗೆ ತಲುಪುತ್ತಿದ್ದವು ಎಂಬ ಆರೋಪವಿದೆ. ಹೊರನೋಟಕ್ಕೆ ಮಾರಾಟಯೋಗ್ಯವಾಗಿ ಕಾಣುವ ಪ್ಯಾಕೆಟ್‌ಗಳನ್ನು ಪ್ರತ್ಯೇಕಿಸಿ, ಮಧ್ಯವರ್ತಿಗಳು ಮತ್ತು ಪೂರೈಕೆದಾರರ ಮೂಲಕ ಚಿಲ್ಲರೆ ಅಂಗಡಿಗಳಿಗೆ ಕಳುಹಿಸಲಾಗುತ್ತಿತ್ತು ಎಂದು ತನಿಖಾ ದಾಖಲೆಗಳು ತಿಳಿಸಿವೆ. ಉತ್ಪನ್ನಗಳ ನೈಜ ನಾಶದ ಕುರಿತು ಪರಿಶೀಲಿಸಬಹುದಾದ ಪುರಾವೆಗಳು ಲಭ್ಯವಾಗಿರಲಿಲ್ಲ ಎಂದು ಅಧಿಕಾರಿಗಳು ಹೇಳಿದ್ದಾರೆ.
ಆಹಾರ ನಾಶಪಡಿಸಿರುವುದಾಗಿ ನೀಡಲಾಗಿದ್ದ ಪ್ರಮಾಣಪತ್ರಗಳು ಮತ್ತು ವಿಲೇವಾರಿ ದಾಖಲೆಗಳಲ್ಲಿಯೂ ವ್ಯತ್ಯಾಸಗಳು ಕಂಡುಬಂದಿವೆ. ಸರಕುಗಳ ಪ್ರಮಾಣ ಹಾಗೂ ಕಳುಹಿಸಿದವರು, ಸ್ವೀಕರಿಸಿದವರ ವಿವರಗಳು ಹೊಂದಿಕೆಯಾಗಿರಲಿಲ್ಲ. ಭಿವಂಡಿಯ ಗುಲ್ಜಾರ್‌ನಗರದ ಅಂಗಡಿಯಲ್ಲಿ ಅವಧಿ ಮೀರಿದ ಮತ್ತು ಸೋರಿಕೆಯಾಗುತ್ತಿದ್ದ ಉತ್ಪನ್ನಗಳನ್ನು ಮಾರಾಟಕ್ಕಿಟ್ಟಿರುವುದು ಪತ್ತೆಯಾಗಿದೆ. ಆ ಅಂಗಡಿಗೆ ಪರವಾನಗಿ ಅಥವಾ ಖರೀದಿ ಬಿಲ್‌ಗಳಿರಲಿಲ್ಲ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಅಕ್ಟೋಬರ್‌ 15ರ ವಿಚಾರಣೆಯ ಬಳಿಕ ಐದು ಘಟಕಗಳ ಪರವಾನಗಿಗಳನ್ನು ಅಮಾನತುಗೊಳಿಸಲಾಗಿದೆ. ಅವುಗಳಲ್ಲಿ ರಿಲಯನ್ಸ್‌ಗೆ ಸಂಬಂಧಿಸಿದ ಮೂರು ಹಾಗೂ ಎಟರ್ನಲ್‌ ಸಮೂಹಕ್ಕೆ ಸಂಬಂಧಿಸಿದ ಎರಡು ಘಟಕಗಳಿವೆ. ಎಟರ್ನಲ್‌ ಸಮೂಹವು ಬ್ಲಿಂಕಿಟ್‌ ಮತ್ತು ಜೊಮ್ಯಾಟೊ ವ್ಯವಹಾರಗಳನ್ನು ನಡೆಸುತ್ತದೆ. ಪರವಾನಗಿಯಿಲ್ಲದ ನಾಲ್ಕು ಕೇಂದ್ರಗಳ ವಹಿವಾಟನ್ನೂ ಸ್ಥಗಿತಗೊಳಿಸಲಾಗಿದೆ. ಠಾಣೆಯ ಶಾಂತಿನಗರ ಠಾಣೆಯಲ್ಲಿ ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಕಾಯ್ದೆ ಹಾಗೂ ಭಾರತೀಯ ನ್ಯಾಯ ಸಂಹಿತೆಯಡಿ ಪ್ರಕರಣ ದಾಖಲಾಗಿದೆ.
ನಾಶಪಡಿಸಬೇಕಾದ ಆಹಾರವನ್ನು ಮಾರುಕಟ್ಟೆಗೆ ಮರಳಿಸುವುದು ಗಂಭೀರ ವಿಚಾರ; ಯಾವುದೇ ಕಂಪನಿಯೂ ಕಾನೂನಿಗಿಂತ ಮೇಲಲ್ಲ ಎಂದು ಎಫ್‌ಡಿಎ ಆಯುಕ್ತ ತುಕಾರಾಮ್‌ ಮುಂಢೆ ಹೇಳಿದ್ದಾರೆ. ರಿಲಯನ್ಸ್‌ ಮತ್ತು ಬ್ಲಿಂಕಿಟ್‌ನ ಪ್ರತಿಕ್ರಿಯೆ ತಕ್ಷಣ ಲಭ್ಯವಾಗಿಲ್ಲ. ಅಧಿಕಾರಿಗಳು ಮಾದರಿಗಳನ್ನು ಸಂಗ್ರಹಿಸಿ, ಹೇಳಿಕೆಗಳನ್ನು ದಾಖಲಿಸಿದ್ದಾರೆ. ಜಪ್ತಿಯಾದ ಸರಕುಗಳ ಸಾಗಣೆ, ಮಾರಾಟ ಮತ್ತು ನಾಶಕ್ಕೆ ನಿರ್ಬಂಧ ವಿಧಿಸಲಾಗಿದೆ. ಆರೋಪಗಳ ಕುರಿತು ತನಿಖೆ ಮುಂದುವರಿದಿದೆ.
