ಕೇರಳದ ಶಿಶು ಮರಣ ಪ್ರಮಾಣದಲ್ಲಿ ಇಳಿಕೆ ಕಂಡುಬಂದಿದ್ದು, ಅಮೆರಿಕಕ್ಕಿಂತ ಕಡಿಮೆ ಪ್ರಮಾಣದಲ್ಲಿ ಶಿಶುಗಳ ಸಾವುಗಳ ವರದಿಯಾಗುತ್ತಿವೆ. ಕೇರಳದಲ್ಲಿ ಪ್ರತಿ 1,000 ಜೀವಂತ ಜನನಗಳಲ್ಲಿ 5 ಮಕ್ಕಳು ಸಾವನ್ನಪ್ಪುತ್ತಿದ್ದಾರೆ ಎಂದು ‘ಮಾದರಿ ನೋಂದಣಿ ವ್ಯವಸ್ಥೆ’ (SRS) ಅಂಕಿಅಂಶಗಳ ವರದಿ-2023 ತಿಳಿಸಿದೆ.
ಸೆಪ್ಟೆಂಬರ್ 1 (ಸೋಮವಾರ) ಬಿಡುಗಡೆಯಾದ ರಾಷ್ಟ್ರೀಯ ಶಿಶು ಮರಣ ದರ ವರದಿಯು, ದೇಶದಲ್ಲಿ ಶಿಶುಗಳ ಮರಣ ಪ್ರಮಾಣವು 25 ಇದೆ. ಅಂದರೆ, ಜನಿಸುವ ಪ್ರತಿ 1,000 ಜೀವಂತ ಶುಶುಗಳಲ್ಲಿ 25 ಮಗುಗಳು ಸಾವನ್ನಪ್ಪುತ್ತಿವೆ ಎಂದು ಹೇಳಿದೆ. ಈ ಸರಾಸರಿಗೆ ಹೋಲಿಸಿದರೆ, ಕೇರಳದಲ್ಲಿ ಶಿಶು ಮರಣ ಪ್ರಮಾಣವು ಐದು ಪಟ್ಟು ಕಡಿಮೆ ಇದೆ.
ವರದಿಯನ್ನು ಉಲ್ಲೇಖಿಸಿರುವ ಕೇರಳ ಆರೋಗ್ಯ ಸಚಿವೆ ವೀಣಾ ಜಾರ್ಜ್, “ಕೇರಳದ ಶಿಶು ಮರಣ ಪ್ರಮಾಣವು ದೇಶದಲ್ಲೇ ಅತ್ಯಂತ ಕಡಿಮೆ. ಮಾತ್ರವಲ್ಲ, ಅಮೆರಿಕಕ್ಕಿಂತಲೂ ಕಡಿಮೆಯಾಗಿದೆ. ಕೇರಳದಲ್ಲಿನ ಶಿಶು ಮರಣ ಪ್ರಮಾಣವು 2022ರಲ್ಲಿ 1000ಕ್ಕೆ 5.6 ಇತ್ತು. ಈಗ, 5ಕ್ಕೆ ಇಳಿದಿದೆ” ಎಂದಿದ್ದಾರೆ.
“ದೇಶದಲ್ಲಿ ಗ್ರಾಮೀಣ ಮತ್ತು ನಗರ ಪ್ರದೇಶಗಳ ನಡುವಿನ ಶಿಶು ಮರಣ ಪ್ರಮಾಣದಲ್ಲಿ ಭಾರೀ ಅಂತರವಿದೆ. ಗ್ರಾಮೀಣ ಪ್ರದೇಶಗಳಲ್ಲಿ ಈ ಪ್ರಮಾಣ 28 ಆಗಿದ್ದರೆ, ನಗರ ಪ್ರದೇಶಗಳಲ್ಲಿ 19 ರಷ್ಟಿದೆ. ಆದರೆ, ಕೇರಳದಲ್ಲಿ, ಶಿಶು ಮರಣ ಪ್ರಮಾಣದಲ್ಲಿ ನಗರ-ಗ್ರಾಮೀಣ ವ್ಯತ್ಯಾಸವಿಲ್ಲ. ಇದು ಕೇರಳದ ಜನರು ಯಾವುದೇ ನಗರ-ಗ್ರಾಮೀಣ ಅಂತರವಿಲ್ಲದೆ ಆರೋಗ್ಯ ಸೇವೆಗಳನ್ನು ಪಡೆಯಬಹುದು ಎಂಬುದನ್ನು ತೋರಿಸುತ್ತದೆ” ಎಂದು ಹೇಳಿದ್ದಾರೆ.
ರಾಜ್ಯ ಆರ್ಥಿಕ ಮತ್ತು ಅಂಕಿಅಂಶ ಇಲಾಖೆಯ ಪ್ರಕಾರ, ಕೇರಳದ ಶಿಶು ಮರಣ ಪ್ರಮಾಣ 2010ರಲ್ಲಿ 7.42 ರಷ್ಟಿತ್ತು. 2012 ರಲ್ಲಿ ಈ ಅಂಕಿ ಅಂಶವು 8.2ಕ್ಕೆ ಏರಿತ್ತು. ಅಂದಿನಿಂದ, ಆರೋಗ್ಯ ಕ್ಷೇತ್ರದಲ್ಲಿ ತೆಗೆದುಕೊಳ್ಳಲಾದ ಅಗತ್ಯ ಕ್ರಮಗಳಿಂದಾಗಿ, ಈಗ ಶಿಶು ಮರಣ ಪ್ರಮಾಣವು ಕಡಿಮೆಯಾಗಿದೆ.
