ದೆಹಲಿ ವಿಶ್ವವಿದ್ಯಾಲಯದ ವಿದ್ಯಾರ್ಥಿನಿಯ ಮೇಲೆ ವಿವೇಚನಾರಹಿತವಾಗಿ ‘ರಾಷ್ಟ್ರೀಯ ಭದ್ರತಾ ಕಾಯ್ದೆ’ (ಎನ್ಎಸ್ಎ) ವಿಧಿಸಿದ್ದ ನೋಯ್ಡಾ ಜಿಲ್ಲಾಧಿಕಾರಿ (ಡಿಎಂ) ಮೇಧಾ ರೂಪಂ ವಿರುದ್ಧ ಅಲಹಾಬಾದ್ ಹೈಕೋರ್ಟ್ ಇತ್ತೀಚೆಗೆ ನೀಡಿದ್ದ ಕಟು ತೀರ್ಪನ್ನು ಸುಪ್ರೀಂ ಕೋರ್ಟ್‌ನಲ್ಲಿ ಪ್ರಶ್ನಿಸುವುದಾಗಿ ಕೇಂದ್ರ ಸರ್ಕಾರ ಸ್ಪಷ್ಟಪಡಿಸಿದೆ. ಸಾಲಿಸಿಟರ್ ಜನರಲ್ ತುಷಾರ್ ಮೆಹ್ತಾ ಅವರು ಸುಪ್ರೀಂ ಕೋರ್ಟ್ ಪೀಠಕ್ಕೆ ಬುಧವಾರ ಈ ಮಾಹಿತಿ ನೀಡಿದ್ದಾರೆ.
ನೋಯ್ಡಾ ಕಾರ್ಮಿಕರ ಪ್ರತಿಭಟನೆಗೆ ಸಂಬಂಧಿಸಿದಂತೆ ವಿದ್ಯಾರ್ಥಿನಿ ಆಕೃತಿ ಚೌಧರಿ ವಿರುದ್ಧ ಡಿಎಂ ಮೇಧಾ ರೂಪಂ ಅವರು ಹೊರಡಿಸಿದ್ದ ಎನ್ಎಸ್ಎ ಬಂಧನ ಆದೇಶವನ್ನು ಹೈಕೋರ್ಟ್ ಸೆಪ್ಟೆಂಬರ್ 2ರಂದು ರದ್ದುಗೊಳಿಸಿತ್ತು. ಅಕ್ರಮ ಬಂಧನಕ್ಕಾಗಿ ವಿದ್ಯಾರ್ಥಿನಿಗೆ 5 ಲಕ್ಷ ರೂ. ಪರಿಹಾರ ನೀಡುವಂತೆ ಹಾಗೂ ಆ ಮೊತ್ತವನ್ನು ಜಿಲ್ಲಾಧಿಕಾರಿ ಮೇಧಾ ರೂಪಂ ಅವರ ವೈಯಕ್ತಿಕ ವೇತನದಿಂದಲೇ ವಸೂಲಿ ಮಾಡುವಂತೆ ಹೈಕೋರ್ಟ್ ಆದೇಶಿಸಿತ್ತು. ಮೋದಿ ಸರ್ಕಾರದ ಪರವಾಗಿ ಎಸ್ ಜಿ ಮೆಹ್ತಾ ಅವರು ಇದೇ ತೀರ್ಪನ್ನು ಇದೀಗ ಸುಪ್ರೀಂನಲ್ಲಿ ಪ್ರಶ್ನಿಸಲಿದ್ದಾರೆ.
ಎನ್ಎಸ್ಎ ಹೇರಿದ್ದ ಡಿಎಂ ಕ್ರಮವನ್ನು ಹೈಕೋರ್ಟ್ ತೀವ್ರವಾಗಿ ಟೀಕಿಸಿತ್ತು. “ಅಧಿಕಾರಿಗಳ ನಿಷ್ಠೆ ಸಂವಿಧಾನಕ್ಕಿರಬೇಕೇ ಹೊರತು ರಾಜಕೀಯ ಕಾರ್ಯಾಂಗಕ್ಕಲ್ಲ. ಅಧಿಕಾರಿಗಳು ತಮ್ಮ ಸಾಂವಿಧಾನಿಕ ಹೊಣೆಗಾರಿಕೆ ಮರೆತರೆ ಉತ್ತರ ಪ್ರದೇಶವು ದಬ್ಬಾಳಿಕೆಯ ರಾಜ್ಯವಾಗಲಿದೆ (Orwellian Dystopia)” ಎಂದು ಎಚ್ಚರಿಸಿತ್ತು. ವಿವೇಚನೆ ಇಲ್ಲದೆ ಕಠಿಣ ಕಾಯ್ದೆ ಹೇರಿರುವ ಡಿಎಂ ನಡವಳಿಕೆ ‘ಹಾಸ್ಯಾಸ್ಪದ’ ಎಂದು ನ್ಯಾಯಮೂರ್ತಿಗಳಾದ ಅತುಲ್ ಶ್ರೀಧರನ್ ಮತ್ತು ಅಚಲ್ ಸಚ್‌ದೇವ್ ಅವರಿದ್ದ ಪೀಠ ಕಟುವಾಗಿ ನುಡಿದಿತ್ತು.
ಹೆಚ್ಚಿನ ವೇತನಕ್ಕೆ ಆಗ್ರಹಿಸಿ ಏಪ್ರಿಲ್ 2026ರಲ್ಲಿ ನೋಯ್ಡಾದಲ್ಲಿ ನಡೆದಿದ್ದ ಕಾರ್ಮಿಕರ ಪ್ರತಿಭಟನೆಗೆ ಸಂಬಂಧಿಸಿದಂತೆ 24 ವರ್ಷದ ಇತಿಹಾಸ ವಿದ್ಯಾರ್ಥಿನಿ ಆಕೃತಿ ಮತ್ತು ಪತ್ರಕರ್ತ ಸತ್ಯ ವರ್ಮಾ ಅವರನ್ನು ಬಂಧಿಸಲಾಗಿತ್ತು. ಕೇವಲ ಪೊಲೀಸ್ ಆರೋಪಗಳ ಆಧಾರದ ಮೇಲೆ, ದಾಖಲೆಗಳನ್ನು ಕೂಲಂಕಷವಾಗಿ ಪರಿಶೀಲಿಸದೆ ಮೇ 13ರಂದು ಇವರ ಮೇಲೆ ಎನ್ಎಸ್ಎ ಹೇರಿದ್ದ ಅಧಿಕಾರಿಗಳ ನಡೆಯನ್ನು ಹೈಕೋರ್ಟ್ ಖಂಡಿಸಿತ್ತು.
ಈ ನಡುವೆ, ಸಿಜೆಪಿ ಪ್ರತಿಭಟನೆಯಲ್ಲಿ ಪಾಲ್ಗೊಂಡಿದ್ದ ಗೌತಮ್ ಬುದ್ಧ ವಿಶ್ವವಿದ್ಯಾಲಯದ ಕಾನೂನು ವಿದ್ಯಾರ್ಥಿಗೆ ಗ್ರೇಟರ್‌ ನೋಯ್ಡಾ ಡಿಎಂ ನೋಟಿಸ್ ನೀಡಿದ್ದನ್ನು ಮುಖ್ಯ ನ್ಯಾಯಮೂರ್ತಿ ಸೂರ್ಯಕಾಂತ್ ನೇತೃತ್ವದ ಪೀಠ ಇಂದು ತೀವ್ರವಾಗಿ ಖಂಡಿಸಿತು. “ವಿದ್ಯಾರ್ಥಿಗಳ ವಿರುದ್ಧ ಬಲವಂತದ ಕ್ರಮ ಕೈಗೊಳ್ಳಬಾರದು ಎಂದು ಸೆಪ್ಟೆಂಬರ್ 1ರಂದು ನಾವು ಸ್ಪಷ್ಟ ಆದೇಶ ನೀಡಿದ್ದರೂ, ನೋಟಿಸ್ ಜಾರಿ ಮಾಡುವ ಧೈರ್ಯ ಮ್ಯಾಜಿಸ್ಟ್ರೇಟ್‌ಗೆ ಹೇಗೆ ಬಂತು? ಯಾವೊಬ್ಬ ಮ್ಯಾಜಿಸ್ಟ್ರೇಟ್ ಕೂಡ ನಮ್ಮ ಆದೇಶ ಉಲ್ಲಂಘಿಸುವಂತಿಲ್ಲ” ಎಂದು ಅಧಿಕಾರಿಗಳ ನಡೆಗೆ ಸುಪ್ರೀಂ ಕೋರ್ಟ್ ತೀವ್ರ ಛೀಮಾರಿ ಹಾಕಿದೆ.
