ಅರುಣಾಚಲ ಪ್ರದೇಶದ ಗಡಿಯಲ್ಲಿ ಚೀನಾ ಸೇನೆಯೊಂದಿಗೆ ಮುಖಾಮುಖಿ ಸಂಘರ್ಷ ಮುಂದುವರಿದಿದೆ ಎಂದು ಇಂಡೋ-ಟಿಬೆಟನ್ ಬಾರ್ಡರ್ ಪೊಲೀಸ್ (ITBP) ಮಹಾನಿರ್ದೇಶಕರು ಅಧಿಕೃತವಾಗಿ ದೃಢಪಡಿಸಿರುವ ಬೆನ್ನಲ್ಲೇ, ಗಡಿಯ ಯಥಾಸ್ಥಿತಿ ಮತ್ತು ಚೀನಾದೊಂದಿಗೆ ಹೆಚ್ಚುತ್ತಿರುವ ದಾಖಲೆಯ ವ್ಯಾಪಾರ ಕೊರತೆಯನ್ನು ಮುನ್ನೆಲೆಗೆ ತಂದು ಕಾಂಗ್ರೆಸ್ ಹಿರಿಯ ನಾಯಕ ಜೈರಾಮ್ ರಮೇಶ್ ಅವರು ಕೇಂದ್ರ ಸರ್ಕಾರದ ವಿರುದ್ಧ ತೀವ್ರ ವಾಗ್ದಾಳಿ ನಡೆಸಿದ್ದಾರೆ. ಪ್ರಧಾನಿ ನರೇಂದ್ರ ಮೋದಿ ನೇತೃತ್ವದ ಸರ್ಕಾರದ ಈ ಕುರಿತ ಮೌನವನ್ನು ಅವರು ಕಟುವಾಗಿ ಪ್ರಶ್ನಿಸಿದ್ದಾರೆ.
ಈ ಕುರಿತು ತಮ್ಮ ಎಕ್ಸ್ ಖಾತೆಯಲ್ಲಿ, ಗಡಿಯ ಯಥಾಸ್ಥಿತಿ ಮತ್ತು ಆರ್ಥಿಕ ಅವಲಂಬನೆಯ ವಿಚಾರದಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರ ಮೌನವನ್ನು ಅವರು ಕಟುವಾಗಿ ಟೀಕಿಸಿದ್ದಾರೆ. ಚೀನಾ ವಿಚಾರದಲ್ಲಿ ಸರ್ಕಾರದ ನಿಲುವು, ಗಡಿ ಭದ್ರತೆ ಮತ್ತು ಆರ್ಥಿಕ ಅವಲಂಬನೆ ಕುರಿತು ಪ್ರಶ್ನಿಸಿರುವ ಅವರು, ರಾಷ್ಟ್ರೀಯ ಭದ್ರತೆಯ ವಿಚಾರದಲ್ಲಿ ದೇಶಕ್ಕೆ ಸ್ಪಷ್ಟ ಉತ್ತರ ನೀಡಬೇಕೆಂದು ಎಂದು ಆಗ್ರಹಿಸಿದ್ದಾರೆ.
ಅರುಣಾಚಲ ಪ್ರದೇಶದ ಗಡಿಯಲ್ಲಿ ಚೀನಾದ ಪೀಪಲ್ಸ್ ಲಿಬರೇಶನ್ ಆರ್ಮಿ (PLA) ಜೊತೆಗಿನ ಸಂಘರ್ಷ ಮುಂದುವರಿದಿದೆ ಎಂದು ITBP ಮಹಾನಿರ್ದೇಶಕ (DG) ಶತ್ರುಜೀತ್ ಕಪೂರ್ ಸ್ಪಷ್ಟಪಡಿಸಿದ್ದಾರೆ. ಈ ವರ್ಷದ ಜುಲೈನಿಂದಲೇ ಈ ಮುಖಾಮುಖಿಗಳು ನಡೆಯುತ್ತಿದ್ದು, ತಕಾಸಿಂಗ್ ಪ್ರದೇಶದ ಎಲ್‌ಎಸಿ (LAC) ಬಳಿ ಭಾರತೀಯ ಪಡೆಗಳಿಗೆ ಪ್ರಮುಖ ಗಸ್ತು ತಿರುಗುವ ಸ್ಥಳಗಳಿಗೆ ಪ್ರವೇಶ ನಿರಾಕರಿಸಲಾಗಿದೆ ಎಂಬ ವರದಿಗಳ ಹಿನ್ನೆಲೆಯಲ್ಲಿ ಇದು ಅತ್ಯಂತ ಮಹತ್ವದ ಅಧಿಕೃತ ದೃಢೀಕರಣವಾಗಿದೆ. ನವದೆಹಲಿಯಲ್ಲಿ ಚೀನಾ ಅಧ್ಯಕ್ಷ ಷಿ ಜಿನ್‌ಪಿಂಗ್ ಭಾಗವಹಿಸಿದ್ದ ಬ್ರಿಕ್ಸ್ ಶೃಂಗಸಭೆಯ (BRICS Summit) ಸಂದರ್ಭದಲ್ಲೂ ಈ ಮಿಲಿಟರಿ ಘರ್ಷಣೆಗಳು ಮುಂದುವರಿದಿದ್ದವು ಎಂಬುದು ಗಮನಾರ್ಹ. ಆದಾಗ್ಯೂ, ಈ ಸಂಘರ್ಷದ ವೇಳೆ ನೂತನವಾಗಿ ರಚಿಸಲಾದ ಮತ್ತು ಉನ್ನತ ಪರ್ವತ ಯುದ್ಧಗಳಲ್ಲಿ ವಿಶೇಷ ನೈಪುಣ್ಯತೆ ಹೊಂದಿರುವ ‘ಶೌರ್ಯ ಕಮಾಂಡೋಗಳು’ ಅತ್ಯಂತ ಅಸಾಧಾರಣ ಹಾಗೂ ಮಾದರಿ ಕಾರ್ಯಕ್ಷಮತೆಯನ್ನು ತೋರಿದ್ದಾರೆ ಎಂದು ಡಿಜಿ ಶತ್ರುಜೀತ್ ಕಪೂರ್ ಪ್ರಶಂಸಿಸಿದ್ದಾರೆ. ಚೀನಾವೇ ಅತ್ಯಂತ ಕಷ್ಟಕರವಾದ ಮುಂಭಾಗದ ಗಡಿಯಾಗಿದ್ದು, ಗಾಲ್ವಾನ್ ಮಾದರಿಯ ಪರಿಸ್ಥಿತಿಗಳನ್ನು ಸಮರ್ಥವಾಗಿ ಎದುರಿಸಲು ಎಲ್ಲಾ ಗಡಿ ಘಟಕಗಳಲ್ಲಿ ಡ್ರೋನ್ platoons ಗಳನ್ನು ಸಿದ್ಧಪಡಿಸಲಾಗಿದೆ ಹಾಗೂ ಭೂಗತ ಮೂಲಭೂತ ಸೌಕರ್ಯಗಳನ್ನು (Underground infrastructure) ಅಭಿವೃದ್ಧಿಪಡಿಸಲಾಗುತ್ತಿದೆ ಎಂದು ಅವರು ತಿಳಿಸಿದ್ದಾರೆ.
ಪ್ರಧಾನಿ ಮೋದಿ ಮತ್ತು ಅವರ ಆಡಳಿತವು ಚೀನಾ ವಿಷಯದಲ್ಲಿ ಸಂಪೂರ್ಣ “ಕಿವುಡು ಮೌನ” ವಹಿಸಿದೆ ಎಂದು ಅವರು ಟೀಕಿಸಿದ್ದಾರೆ. ಶಾಂತಿ ಕಾಪಾಡುವ ಉದ್ದೇಶದಿಂದ ಸೆಪ್ಟೆಂಬರ್‌ನಲ್ಲಿ ನಡೆದ ಕಾರ್ಪ್ಸ್ ಕಮಾಂಡರ್ ಮಟ್ಟದ ಉನ್ನತ ಸಭೆಗಳ ಫಲಿತಾಂಶವೇನು ಎಂದು ಪ್ರಶ್ನಿಸಿರುವ ಅವರು, ಚೀನಾ ನಮ್ಮ ಅರುಣಾಚಲದ ಪಟ್ಟಣಗಳಿಗೆ ನಿರಂತರವಾಗಿ ಮರುನಾಮಕರಣ ಮಾಡುತ್ತಿರುವುದಲ್ಲದೆ, 60,000 ಮೆಗಾವ್ಯಾಟ್ ಸಾಮರ್ಥ್ಯದ ಬೃಹತ್ ಅಣೆಕಟ್ಟು ನಿರ್ಮಿಸುತ್ತಿರುವುದು ಭಾರತದ ಪರಿಸರ ಸಮತೋಲನ ಮತ್ತು ಜಲಸುರಕ್ಷತೆಗೆ ಭಾರಿ ಗಂಡಾಂತರ ತಂದೊಡ್ಡಿದೆ ಎಂದು ಎಚ್ಚರಿಸಿದ್ದಾರೆ.
ಆರ್ಥಿಕ ರಂಗದಲ್ಲೂ ಚೀನಾದ ಮೇಲಿನ ಅವಲಂಬನೆ ಹೆಚ್ಚುತ್ತಿರುವುದನ್ನು ಪ್ರಸ್ತಾಪಿಸಿರುವ ಅವರು, 2025–26ನೇ ಹಣಕಾಸು ವರ್ಷದಲ್ಲಿ ಚೀನಾದೊಂದಿಗಿನ ಭಾರತದ ವ್ಯಾಪಾರ ಕೊರತೆಯು ಬರೋಬ್ಬರಿ 112 ಬಿಲಿಯನ್ ಡಾಲರ್‌ಗೆ ಏರಿಕೆಯಾಗಿದೆ (ಹಿಂದಿನ ವರ್ಷ ಇದು 99 ಬಿಲಿಯನ್ ಡಾಲರ್ ಇತ್ತು). ಚೀನಾದಿಂದ ಹೆಚ್ಚುತ್ತಿರುವ ಸಗಟು ಆಮದುಗಳು ದೇಶದ ಸೂಕ್ಷ್ಮ, ಸಣ್ಣ ಮತ್ತು ಮಧ್ಯಮ ಉದ್ಯಮಗಳ (MSME) ಮೇಲೆ ಗಂಭೀರ ಪರಿಣಾಮ ಬೀರುತ್ತಿದ್ದು, ಸರ್ಕಾರದ ‘ಮೇಕ್ ಇನ್ ಇಂಡಿಯಾ’ ಅಭಿಯಾನವು ಪ್ರಾಯೋಗಿಕವಾಗಿ ‘ಚೀನಾದಿಂದ ಆಮದು’ (Import from China) ಎಂಬ ಸ್ಥಿತಿಗೆ ತಲುಪಿದೆ ಎಂದು ಅವರು ವ್ಯಂಗ್ಯವಾಡಿದ್ದಾರೆ. ಇದು ದೇಶದ ಆರ್ಥಿಕ ಭದ್ರತೆಗೂ ಮಾರಕವಾಗಿದೆ ಎಂದು ಎಚ್ಚರಿಸಿದ್ದಾರೆ.
ಜೊತೆಗೆ, 2020ರ ಗಲ್ವಾನ್ ಸಂಘರ್ಷದ ಬಳಿಕ ಪ್ರಧಾನಿ ಮೋದಿ ನೀಡಿದ್ದ ಹೇಳಿಕೆಗಳು, ಮಾಜಿ ಸೇನಾ ಮುಖ್ಯಸ್ಥ ಜನರಲ್ ಮನೋಜ್ ಮುಕುಂದ್ ನರವಣೆ ಅವರ ಒಳನುಸುಳುವಿಕೆ ಕುರಿತ ಹಿಂದಿನ ಇಕ್ಕಟ್ಟಿನ ಸೂಚನೆಗಳ ವಿಚಾರ ಹಾಗೂ ‘ಆಪರೇಷನ್ ಸಿಂಧೂರ್’ ಸಂದರ್ಭದಲ್ಲಿ ಸೇನಾಧಿಕಾರಿಗಳ ಹೇಳಿಕೆಗಳ ವಿವಾದವನ್ನು ಮುನ್ನೆಲೆಗೆ ತಂದಿರುವ ಜೈರಾಮ್ ರಮೇಶ್, ರಾಷ್ಟ್ರೀಯ ಭದ್ರತೆ ಮತ್ತು ಗಡಿ ನಿಯಂತ್ರಣದ ಪ್ರಶ್ನೆ ಬಂದಾಗ ಕೇಂದ್ರ ಸರ್ಕಾರವು ಮೌನ ಮುರಿದು ದೇಶಕ್ಕೆ ಸ್ಪಷ್ಟ ಉತ್ತರ ನೀಡಬೇಕು ಎಂದು ಆಗ್ರಹಿಸಿದ್ದಾರೆ.
ಇದನ್ನೂ ಓದಿ: ಪ್ರೀಮಿಯಂ ಲೇಖನ | ಗ್ರೇಟ್ ನಿಕೋಬಾರ್: ಜಿಯೋ ಪಾಲಿಟಿಕ್ಸ್‌ಗೆ ಮಣಿಯಿತೇ ಹಸಿರು ನ್ಯಾಯಮಂಡಳಿ?
ಭಾರತ ಮತ್ತು ಚೀನಾ ನಡುವಿನ ದ್ವಿಪಕ್ಷೀಯ ವ್ಯಾಪಾರದಲ್ಲಿ ಭಾರತವು ಸದಾ ಚೀನಾದ ಮೇಲೆ ಹೆಚ್ಚು ಅವಲಂಬಿತವಾಗಿದೆ. ರಫ್ತಿಗಿಂತ ಆಮದು ಪ್ರಮಾಣವೇ ವಿಪರೀತ ಹೆಚ್ಚಿರುವುದರಿಂದ ಈ ವ್ಯಾಪಾರ ಕೊರತೆ ಉಂಟಾಗಿದೆ. ಎಲೆಕ್ಟ್ರಾನಿಕ್ಸ್, ಸೋಲಾರ್ ಉಪಕರಣಗಳು, ಆಟಿಕೆಗಳು, ರಾಸಾಯನಿಕಗಳು ಮತ್ತು ಕೈಗಾರಿಕಾ ಯಂತ್ರೋಪಕರಣಗಳಿಗೆ ಭಾರತವು ಚೀನಾವನ್ನೇ ನೆಚ್ಚಿಕೊಂಡಿದೆ. ಇದರಿಂದ ಭಾರತದ ಸ್ಥಳೀಯ ಸಣ್ಣ ಮತ್ತು ಮಧ್ಯಮ ಕೈಗಾರಿಕೆಗಳು (MSMEs) ಕಡಿಮೆ ಬೆಲೆಯ ಚೀನೀ ಉತ್ಪನ್ನಗಳೊಂದಿಗೆ ಸ್ಪರ್ಧಿಸಲಾಗದೆ ನಷ್ಟ ಅನುಭವಿಸುತ್ತಿವೆ ಅಥವಾ ಮುಚ್ಚುವಂತಾಗಿದೆ.
ಗಲ್ವಾನ್ ಸಂಘರ್ಷದ ಬಳಿಕ ಲಡಾಖ್ ಗಡಿಯಲ್ಲಿ ಉದ್ವಿಗ್ನತೆ ಮುಂದುವರಿದಿರುವ ಬೆನ್ನಲ್ಲೇ, ಈಗ ಅರುಣಾಚಲ ಪ್ರದೇಶದ ಮೇಲೆಯೂ ಚೀನಾ ತನ್ನ ಕಣ್ಣಿಟ್ಟಿದೆ. ಭಾರತದ ಗಸ್ತು ಪ್ರದೇಶಗಳಿಗೆ ಭಾರತೀಯ ಸೈನಿಕರಿಗೆ ಪ್ರವೇಶ ಸಿಗುತ್ತಿಲ್ಲ ಎಂಬ ವಿರೋಧ ಪಕ್ಷಗಳ ಆರೋಪವು ದೇಶದ ಪ್ರಾದೇಶಿಕ ಸಮಗ್ರತೆಯ ಕುರಿತ ಗಂಭೀರ ಕಳವಳವನ್ನು ಹುಟ್ಟುಹಾಕಿದೆ. ಅರುಣಾಚಲ ಪ್ರದೇಶದ (ಚೀನಾ ಇದನ್ನು ‘ಝಂಗ್ನಾನ್’ ಎಂದು ಕರೆಯುತ್ತದೆ) ಹಲವು ಸ್ಥಳಗಳಿಗೆ ಚೀನಾ ತನ್ನದೇ ಆದ ಮ್ಯಾಂಡರಿನ್ ಭಾಷೆಯ ಹೆಸರುಗಳನ್ನು ಇಟ್ಟು ಅಧಿಕೃತ ನಕ್ಷೆ ಬಿಡುಗಡೆ ಮಾಡುತ್ತಿದ್ದು, ಭಾರತದ ಸಾರ್ವಭೌಮತೆಗೆ ಸವಾಲು ಹಾಕುತ್ತಿದೆ.
ಇಷ್ಟೆಲ್ಲಾ ಗಂಭೀರ ವಿದ್ಯಮಾನಗಳು ಮತ್ತು ಸವಾಲುಗಳಿದ್ದರೂ ಸಹ, ಚೀನಾದ ಕುರಿತು ಪ್ರಧಾನಿ ನರೇಂದ್ರ ಮೋದಿ ಅವರು ಒಂದೇ ಒಂದು ಪ್ರತಿಕ್ರಿಯೆಯನ್ನು ಅಥವಾ ಸ್ಪಷ್ಟನೆಯನ್ನು ನೀಡುತ್ತಿಲ್ಲ ಎಂದು ಅವರು ಆಕ್ಷೇಪಿಸಿದ್ದಾರೆ.
