ಪೋಷಕರು ಅಥವಾ ಅತ್ತೆ ಮಾವನೊಂದಿಗೆ ಸಮಯ ಕಳೆಯಲು ಅಸ್ಸಾಂ ಸರ್ಕಾರವು ಸರ್ಕಾರಿ ಉದ್ಯೋಗಿಗಳಿಗೆ ವಿಶೇಷ ರಜೆಯನ್ನು ಘೋಷಣೆ ಮಾಡಿದೆ.
ಅಸ್ಸಾಂ ಸರ್ಕಾರಿ ನೌಕರರಿಗೆ ನವೆಂಬರ್‌ನಲ್ಲಿ ಎರಡು ದಿನಗಳ ವಿಶೇಷ ಕ್ಯಾಶುಯಲ್ ರಜೆಯನ್ನು ಘೋಷಿಸಲಾಗಿದೆ ಎಂದು ಅಸ್ಸಾಂ ಮುಖ್ಯಮಂತ್ರಿ ಕಚೇರಿ (ಸಿಎಂಒ) ಇಂದು (ಜುಲೈ 11) ಎಕ್ಸ್ ಪೋಸ್ಟ್ ಮೂಲಕ ತಿಳಿಸಿದೆ.
ಈ ವಿಶೇಷ ರಜೆಗಳನ್ನು ಇತರೆ ವೈಯಕ್ತಿಕ ಕಾರ್ಯಗಳಿಗಾಗಿ ಬಳಸಲು ಅವಕಾಶವಿಲ್ಲ. ಪೋಷಕರು, ಅತ್ತೆ ಮಾವನೊಂದಿಗೆ ಸಮಯ ಕಳೆಯಲು ಮಾತ್ರ ಬಳಸಬಹುದಾಗಿದೆ. ಹಾಗೆಯೇ ಪೋಷಕರು ಅಥವಾ ಅತ್ತೆ- ಮಾವಂದಿರಿಲ್ಲದವರು ಈ ರಜೆಗೆ ಅರ್ಹರಾಗಿರುವುದಿಲ್ಲ ಎಂದು ಅಸ್ಸಾಂ ಮುಖ್ಯಮಂತ್ರಿ ಕಚೇರಿ ಹೇಳಿದೆ.
ಇದನ್ನು ಓದಿದ್ದೀರಾ? ಸಾಲು ಸಾಲು ರಜೆ | ಕೆಎಸ್‌ಆರ್‌ಟಿಸಿಯಿಂದ 1,500 ವಿಶೇಷ ಬಸ್‌ ಸಂಚಾರ
“ಮುಖ್ಯಮಂತ್ರಿ ಹಿಮಂತ ಬಿಸ್ವಾ ಅವರ ನೇತೃತ್ವದಲ್ಲಿ ಅಸ್ಸಾಂ ಸರ್ಕಾರವು ನವೆಂಬರ್ 6 ಮತ್ತು 8ರಂದು ರಾಜ್ಯ ಸರ್ಕಾರಿ ನೌಕರರಿಗೆ ಅವರ ಪೋಷಕರು ಅಥವಾ ಮಾವಂದಿರೊಂದಿಗೆ ಸಮಯ ಕಳೆಯಲು ವಿಶೇಷ ಕ್ಯಾಶುಯಲ್ ರಜೆಯನ್ನು ಘೋಷಿಸಿದೆ” ಎಂದು ಅಸ್ಸಾಂ ಸಿಎಂಒ ಎಕ್ಸ್ ಪೋಸ್ಟ್‌ನಲ್ಲಿ ಬರೆಯಲಾಗಿದೆ.
ನವೆಂಬರ್ 7ರಂದು ಛತ್ ಪೂಜೆ, ನವೆಂಬರ್ 9ರಂದು ಎರಡನೇ ಶನಿವಾರದ ರಜೆ ಮತ್ತು ನವೆಂಬರ್ 10ರಂದು ಭಾನುವಾರದ ರಜೆಯಿದ್ದು ಈ ನಡುವೆ ಬರುವ ನವೆಂಬರ್ 6 ಮತ್ತು 8ರ ವಿಶೇಷ ರಜೆಯನ್ನು ಸೇರಿಸಿ ತೆಗೆದುಕೊಳ್ಳಬಹುದು ಎಂದು ಸಿಎಂಒ ತಿಳಿಸಿದೆ.
ಅಂದರೆ ಜೊತೆಯಾಗಿ ಐದು ದಿನ ರಜೆ ತೆಗೆದುಕೊಳ್ಳಬಹುದಾಗಿದೆ. ವಿಶೇಷ ಸೇವೆಯಲ್ಲಿರುವ ನೌಕರರು ಈ ರಜೆಯನ್ನು ಬೇರೆ ಸಮಯದಲ್ಲಿ ಪಡೆಯಬಹುದು.
2021ರಲ್ಲಿ ಅಧಿಕಾರ ವಹಿಸಿಕೊಂಡ ನಂತರ ಮುಖ್ಯಮಂತ್ರಿ ಹಿಮಂತ ಬಿಸ್ವ ಶರ್ಮಾ ಅವರು ತಮ್ಮ ಮೊದಲ ಸ್ವಾತಂತ್ರ್ಯ ದಿನದ ಭಾಷಣದಲ್ಲಿ ಸರ್ಕಾರಿ ನೌಕರರಿಗೆ ಪೋಷಕರು ಮತ್ತು ಮಾವಂದಿರೊಂದಿಗೆ ಸಮಯ ಕಳೆಯಲು ಎರಡು ವಿಶೇಷ ಕ್ಯಾಶುಯಲ್ ರಜೆಗಳನ್ನು ಘೋಷಿಸಿದ್ದರು.
The Assam Government, under the leadership of HCM Dr. @himantabiswa, has declared special casual leave for State Government employees on November 6 and 8, 2024, to spend time with their parents or parents-in-law.
This leave must be used solely for spending time with aging… pic.twitter.com/jZa6ZHPPCq
— Chief Minister Assam (@CMOfficeAssam) July 11, 2024
