ಭಾರತವನ್ನು ‘ವಿಶ್ವಗುರು’ ಎಂದು ಕರೆಯುವ ಅಸಂಬದ್ಧ ಪ್ರಲಾಪವನ್ನು ಮೊದಲು ನಿಲ್ಲಿಸಿ, ಇದನ್ನು ಕೇಳಿ ಕೇಳಿ ಭ್ರಮನಿರಸನವಾಗಿದೆ ಎಂದು ಖ್ಯಾತ ಹಿನ್ನೆಲೆ ಗಾಯಕಿ, ಪದ್ಮಶ್ರೀ ಪುರಸ್ಕೃತ ಅನುರಾಧಾ ಪೌದ್ವಾಲ್ ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ದೇಶದಲ್ಲಿ ಸಾವಿರಾರು ಶಾಲೆಗಳು ಮುಚ್ಚಲ್ಪಟ್ಟಿರುವಾಗ ‘ವಿಶ್ವಗುರು’ ಎಂಬ ಬಿರುದು ಅರ್ಥಹೀನ ಎಂದು ಟೀಕಿಸಿದ್ದಾರೆ.
ಏನಿದು ಘಟನೆ?
ಶುಭಂಕರ್ ಮಿಶ್ರಾ ಅವರ ಪಾಡ್‌ಕಾಸ್ಟ್‌ನಲ್ಲಿ ಮಾತನಾಡಿರುವ ಅನುರಾಧಾ, ದೇಶದ ಶಿಕ್ಷಣ ವ್ಯವಸ್ಥೆಯ ಕುರಿತು ಗಂಭೀರ ಪ್ರಶ್ನೆಗಳನ್ನು ಎತ್ತಿದ್ದಾರೆ. “ಕೆಲವು ವರ್ಷಗಳ ಹಿಂದೆ ನಾನೂ ಕೂಡ ಭಾರತ ವಿಶ್ವಗುರು ಆಗುತ್ತದೆ ಎಂದು ನಂಬಿದ್ದೆ. ಆದರೆ, ಈಗ ನಡೆಯುತ್ತಿರುವ ವಿದ್ಯಮಾನಗಳು ಇದಕ್ಕೆ ವಿರುದ್ಧವಾಗಿವೆ. ದೇಶದಲ್ಲಿ 93 ಸಾವಿರ ಶಾಲೆಗಳು ಮುಚ್ಚಲ್ಪಟ್ಟಿವೆ. ಇಂತಹ ಸ್ಥಿತಿಯಲ್ಲಿ ನಾವು ಹೇಗೆ ವಿಶ್ವಗುರುವಾಗಲು ಸಾಧ್ಯ? ಒಂದೋ ನಾವು ವಿಶ್ವಗುರು ಎಂಬ ಘೋಷಣೆಯನ್ನು ನಿಲ್ಲಿಸಬೇಕು ಅಥವಾ ನಡೆಯುತ್ತಿರುವ ಇಂತಹ ಮೂರ್ಖತನದ ಕೆಲಸಗಳನ್ನು ನಿಲ್ಲಿಸಬೇಕು” ಎಂದಿದ್ದಾರೆ.
“ನಾವು ಶಿಕ್ಷಿತರಾಗಲು ಬಯಸುತ್ತಿದ್ದೇವೆಯೇ ಅಥವಾ ಇಲ್ಲವೇ ಎಂಬುದು ತಿಳಿಯುತ್ತಿಲ್ಲ. ಕನಸು ಕಾಣುವುದರಿಂದ ಮಾತ್ರ ದೇಶ ಮುನ್ನಡೆಯಲು ಸಾಧ್ಯವಿಲ್ಲ, ಅದಕ್ಕಾಗಿ ವಾಸ್ತವದಲ್ಲಿ ಕೆಲಸ ಮಾಡಬೇಕು. ಇನ್ನು ರಾಮರಾಜ್ಯದ ಬಗ್ಗೆ ಮಾತನಾಡುತ್ತಾರೆ, ಆದರೆ ದೇವಾಲಯಗಳಲ್ಲೇ ದರೋಡೆ ನಡೆಯುತ್ತಿದೆ. ನಾನು ವಿಶ್ವಗುರು ಎನ್ನುವ ಪರಿಕಲ್ಪನೆಯ ವಿರೋಧಿಯಲ್ಲ, ಆದರೆ ಆ ಗುರಿ ತಲುಪಲು ಸರ್ಕಾರ ಪಾಲಿಸುತ್ತಿರುವ ಮಾನದಂಡಗಳ ಪಟ್ಟಿ ಕೊಡಿ, ಅದರಂತೆ ನಾವು ನಡೆಯೋಣ” ಎಂದು ಅವರು ಸರ್ಕಾರಕ್ಕೆ ಸವಾಲು ಹಾಕಿದ್ದಾರೆ.
ಇದನ್ನೂ ಓದಿ: ವಾಂಗ್ಚುಕ್ ಉಪವಾಸ ಬೆಂಬಲಿಸಿ ಜುಲೈ 20ಕ್ಕೆ ಸಂಸತ್ ಚಲೋ: CJP ಕರೆ
ಇದೇ ರೀತಿ ಸರ್ಕಾರದ ಪರ-ವಿರೋಧ ಹೇಳಿಕೆಗಳಿಂದ ಕೆಲ ಸೆಲೆಬ್ರಿಟಿಗಳು ದನಿ ಎತ್ತುತ್ತಿದ್ದಾರೆ. ನಟ ಅನುಪಮ್ ಖೇರ್, ಇತ್ತೀಚೆಗೆ ‘ಇಂಡಿಯಾ ಟುಡೇ’ಗೆ ನೀಡಿದ ಸಂದರ್ಶನದಲ್ಲಿ ರಾಮಮಂದಿರದ ದೇಣಿಗೆ ಕಳುವಾದ ವಿಷಯವನ್ನು ಪ್ರಸ್ತಾಪಿಸಿ, ಅದನ್ನು ಸಮರ್ಥಿಸಿಕೊಳ್ಳುವಂತಹ ಹೇಳಿಕೆ ನೀಡಿದ್ದರು. “ಮುಘಲರು ನಮ್ಮ ದೇವಾಲಯಗಳನ್ನು ನಾಶಪಡಿಸಿದಾಗ ನಿಜವಾದ ಲೂಟಿ ನಡೆದಿತ್ತು. ಅಂದು ಮುಘಲರು ಬ್ರಾಹ್ಮಣರನ್ನು ಕೊಂದು ಅವರ ಜನಿವಾರಗಳನ್ನು ಸಂಗ್ರಹಿಸಿ ತೂಕ ಹಾಕುತ್ತಿದ್ದರು, ಅಂದು ನಡೆದಿದ್ದು ಅಸಲಿ ಲೂಟಿ” ಎಂದು ಅವರು ವಾದಿಸಿದ್ದರು. ಈ ಹೇಳಿಕೆ ಸಾರ್ವಜನಿಕ ವಲಯದಲ್ಲಿ ತೀವ್ರ ಟೀಕೆಗೆ ಗುರಿಯಾಗಿದೆ.
ಪ್ರಸಿದ್ಧ ಯೂಟ್ಯೂಬರ್ ಸೌರವ್ ಜೋಶಿ ಅವರು ಇತ್ತೀಚೆಗೆ ಒಂದು ವಿಡಿಯೋ ಪೋಸ್ಟ್ ಮಾಡಿ, ತಮ್ಮ ಮರ್ಸಿಡಿಸ್ ಕಾರಿನಲ್ಲಿ ಎಥೆನಾಲ್ ಮಿಶ್ರಿತ ಇಂಧನ ಬಳಸಿದ ನಂತರ ಮೈಲೇಜ್ 15 ರಿಂದ 5ಕ್ಕೆ ಇಳಿದಿದೆ ಎಂದು ದೂರಿದ್ದರು.
