ಬಿಹಾರ ಬಂದ್ ಪ್ರತಿಭಟನೆ ವೇಳೆ ಬಂಧಿತರಾಗಿರುವ ತಮ್ಮ ಸಹೋದರ, ಮಾಜಿ ಸಚಿವ ತೇಜ್ ಪ್ರತಾಪ್ ಯಾದವ್ ಹಾಗೂ ಇತರ ವಿದ್ಯಾರ್ಥಿ ನಾಯಕರನ್ನು ಮುಂದಿನ 24 ಗಂಟೆಗಳ ಒಳಗಾಗಿ ಬೇಷರತ್ತಾಗಿ ಬಿಡುಗಡೆ ಮಾಡಬೇಕು. ಇಲ್ಲವಾದಲ್ಲಿ ರಾಜ್ಯಾದ್ಯಂತ ಬೃಹತ್ ಚಳವಳಿ ಎದುರಿಸಬೇಕಾಗುತ್ತದೆ ಎಂದು ಬಿಹಾರ ಮಾಜಿ ಉಪಮುಖ್ಯಮಂತ್ರಿ ಹಾಗೂ ವಿರೋಧ ಪಕ್ಷದ ನಾಯಕ ತೇಜಸ್ವಿ ಯಾದವ್ ಮುಖ್ಯಮಂತ್ರಿ ಸಾಮ್ರಾಟ್ ಚೌಧರಿ ಅವರಿಗೆ ಎಚ್ಚರಿಕೆ ನೀಡಿದ್ದಾರೆ.
“ಕೇಂದ್ರ ಸರ್ಕಾರವು ಆಂದೋಲನ ನಿರತ ವಿದ್ಯಾರ್ಥಿಗಳು ಮತ್ತು ಯುವಕರ ಮೇಲಿನ ಎಲ್ಲಾ ಪ್ರಕರಣಗಳನ್ನು ಹಿಂಪಡೆಯಲು ನಿರ್ಧರಿಸಿದೆ. ಬಿಹಾರ ಸರ್ಕಾರವೂ ಇದೇ ಹಾದಿಯನ್ನು ತುಳಿಯಬೇಕು. ಸಾಮ್ರಾಟ್ ಚೌಧರಿ ಅವರಿಗೆ ನಾನು 24 ಗಂಟೆಗಳ ಗಡುವು ನೀಡುತ್ತಿದ್ದೇನೆ. ಸೋಮವಾರ ಸಂಜೆಯೊಳಗೆ ತೇಜ್ ಪ್ರತಾಪ್ ಸೇರಿದಂತೆ ಬಂಧಿತ ಎಲ್ಲರನ್ನೂ ಬಿಡುಗಡೆ ಮಾಡಬೇಕು. ಇಲ್ಲವಾದರೆ ನಾವು ಇನ್ನಷ್ಟು ತೀವ್ರವಾಗಿ ರಸ್ತೆಗಿಳಿದು ಹೋರಾಟ ನಡೆಸಲಿದ್ದೇವೆ” ಎಂದು ಹೇಳಿದ್ದಾರೆ.
ಇದನ್ನೂ ಓದಿ: ಸೋಲಿನ ಭ್ರಮೆ ಬಿಡಿ, ಒಟ್ಟಾಗಿದ್ದರೆ ಗೆಲುವು ನಿಶ್ಚಿತ: ‘INDIA’ ಮೈತ್ರಿಕೂಟದಲ್ಲಿ ರಾಹುಲ್ ರಣಕಹಳೆ
ಶನಿವಾರ ಬಿಹಾರ ಬಂದ್ ಸಂದರ್ಭದಲ್ಲಿ ಸರ್ಕಾರಿ ಅಧಿಕಾರಿಗಳ ಕೆಲಸಕ್ಕೆ ಅಡ್ಡಿಪಡಿಸಿದ ಹಾಗೂ ಕೊಲೆ ಯತ್ನ ಸೇರಿದಂತೆ ಜಾಮೀನು ರಹಿತ ಗಂಭೀರ ಸೆಕ್ಷನ್‌ಗಳ ಅಡಿಯಲ್ಲಿ ತೇಜ್ ಪ್ರತಾಪ್ ಯಾದವ್ ಅವರನ್ನು ಪೊಲೀಸರು ಬಂಧಿಸಿದ್ದಾರೆ. ಶನಿವಾರ ತಡರಾತ್ರಿ ಜಡ್ಜ್ ಮುಂದೆ ಹಾಜರುಪಡಿಸಲಾಗಿದ್ದು, ನ್ಯಾಯಾಂಗ ಮ್ಯಾಜಿಸ್ಟ್ರೇಟ್ ಅವರು ತೇಜ್ ಪ್ರತಾಪ್‌ಗೆ 14 ದಿನಗಳ ನ್ಯಾಯಾಂಗ ಬಂಧನ ವಿಧಿಸಿದ್ದಾರೆ. ಪ್ರಸ್ತುತ ಅವರನ್ನು ಪಟನಾದ ಬೇವೂರ್ ಜೈಲಿಗೆ ರವಾನಿಸಲಾಗಿದೆ.
ತೇಜ್ ಪ್ರತಾಪ್ ಅವರ ಹಸ್ತಕ್ಷೇಪದಿಂದಾಗಿ ವಿದ್ಯಾರ್ಥಿಗಳ ಪ್ರತಿಭಟನೆ ಹತೋಟಿ ಮೀರಿತು ಎಂಬುದು ಪೊಲೀಸರ ವಾದವಾಗಿದೆ. ಆದರೆ, ತೇಜ್ ಪ್ರತಾಪ್ ಪರ ವಕೀಲ ಜಗನ್ನಾಥ್ ಸಿಂಗ್ ಅವರು ಸೋಮವಾರವೇ ಜಾಮೀನಿಗಾಗಿ ನ್ಯಾಯಾಲಯಕ್ಕೆ ಅರ್ಜಿ ಸಲ್ಲಿಸುವುದಾಗಿ ತಿಳಿಸಿದ್ದಾರೆ.
ಈ ಮಧ್ಯೆ ತೇಜ್ ಪ್ರತಾಪ್ ಬಂಧನವನ್ನು ಜನ್ ಸುರಾಜ್ ಸಂಸ್ಥಾಪಕ ಪ್ರಶಾಂತ್ ಕಿಶೋರ್ ತೀವ್ರವಾಗಿ ಖಂಡಿಸಿದ್ದಾರೆ. “ತೇಜ್ ಪ್ರತಾಪ್ ಅವರು ಬಂಕಿಪುರ ಉಪಚುನಾವಣೆಯಲ್ಲಿ ನನಗೆ ಬೆಂಬಲ ಸೂಚಿಸಿದ ಒಂದೇ ಕಾರಣಕ್ಕೆ ಸರ್ಕಾರ ಅವರ ಮೇಲೆ ಹಗೆತನ ಸಾಧಿಸುತ್ತಿದೆ ಮತ್ತು ಕಿರುಕುಳ ನೀಡುತ್ತಿದೆ,” ಎಂದು ಆರೋಪಿಸಿದ್ದಾರೆ.
ಸರ್ಕಾರದ ನಡೆಯನ್ನು ಸರ್ವಾಧಿಕಾರಿ ಧೋರಣೆ ಎಂದು ಕರೆದಿರುವ ತೇಜಸ್ವಿ ಯಾದವ್, ಕೊಲೆ ಆರೋಪ ಎದುರಿಸುತ್ತಿರುವವರೇ ಇಂದು ರಾಜ್ಯ ಆಳುತ್ತಿದ್ದು, ಸತ್ಯಕ್ಕಾಗಿ ಹೋರಾಡುತ್ತಿರುವ ವಿದ್ಯಾರ್ಥಿಗಳು ಮತ್ತು ನಾಯಕರನ್ನು ಜೈಲಿಗಟ್ಟುತ್ತಿದ್ದಾರೆ ಎಂದು ರಾಜ್ಯ ಸರ್ಕಾರದ ವಿರುದ್ಧ ಹರಿಹಾಯ್ದಿದ್ದಾರೆ. ಸೋಮವಾರ ಸಂಜೆಯ ನಂತರ ಬಿಹಾರ ರಾಜಕೀಯದಲ್ಲಿ ಹೋರಾಟ ಮತ್ತಷ್ಟು ಕಾವು ಪಡೆದುಕೊಳ್ಳುವ ಮುನ್ಸೂಚನೆಯಿದೆ.
