ಹಿರಿಯ ನಟಿ ಕಾಮಿನಿ ಕೌಶಲ್ ಶುಕ್ರವಾರ ನಿಧನರಾಗಿದ್ದಾರೆ. ಅವರಿಗೆ 98 ವರ್ಷ ವಯಸ್ಸಾಗಿತ್ತು. “ಗುರುವಾರ ತಡರಾತ್ರಿ ಕಾಮಿನಿ ಅವರು ತಮ್ಮ ಮುಂಬೈನ ಮನೆಯಲ್ಲಿ ನಿಧನರಾದರು. ಫೆಬ್ರವರಿಯಲ್ಲಿ ಅವರಿಗೆ 99 ವರ್ಷ ವಯಸ್ಸಾಗುತ್ತಿತ್ತು” ಎಂದು ಅವರ ಕುಟುಂಬದ ಆಪ್ತ ಸ್ನೇಹಿತ ಸಜನ್ ನರೈನ್ ತಿಳಿಸಿದ್ದಾರೆ.
ಸುಮಾರು ಏಳು ದಶಕಗಳ ಕಾಲ ಸಿನಿಮಾ ಕ್ಷೇತ್ರದಲ್ಲಿ ಕಾರ್ಯನಿರ್ವಹಿಸಿದ್ದ ಕಾಮಿನಿ ಕೌಶಲ್ ಅವರು, ರಲ್ಲಿ ಒಬ್ಬರಾಗಿದ್ದಾರೆ. 1940ರಿಂದ 2010ರವರೆಗೆ ಸಿನಿಮಾ ಮತ್ತು ಟಿವಿ ಕಾರ್ಯಕ್ರಮ- ಎರಡರಲ್ಲೂ ಕಾಣಿಸಿಕೊಂಡಿದ್ದಾರೆ.
ಇದನ್ನು ಓದಿದ್ದೀರಾ? ಬಾಲಿವುಡ್‌ನ ಹಿರಿಯ ನಟ ಗೋವರ್ಧನ ಅಸ್ರಾನಿ ನಿಧನ
ಕೇನ್ಸ್ ಚಲನಚಿತ್ರೋತ್ಸವದಲ್ಲಿ ಪಾಲ್ಮೆ ಡಿ ಓರ್ ಪ್ರಶಸ್ತಿ ಪಡೆದ ‘ನೀಚಾ ನಗರ್’ (1946) ಸಿನಿಮಾದ ಮೂಲಕ ವೃತ್ತಿಜೀವನ ಆರಂಭಿಸಿದ ಕೌಶಲ್ ಅವರ ಬಿರಾಜ್ ಬಹು ಸಿನಿಮಾದ ಪಾತ್ರಕ್ಕಾಗಿ 1956ರಲ್ಲಿ ಫಿಲ್ಮ್‌ಫೇರ್ ಪ್ರಶಸ್ತಿ ಲಭಿಸಿದೆ. ಪರಾಸ್ (1949), ಅರ್ಜೂ (1950), ಜೈಲರ್ (1958), ಮತ್ತು ಗೋದಾನ್ (1963) ಸೇರಿದಂತೆ ಹಲವು ಪ್ರಸಿದ್ಧ ಹಿಂದಿ ಸಿನಿಮಾಗಳಲ್ಲಿ ಕಾಣಿಸಿಕೊಂಡಿದ್ದಾರೆ. ಶಹೀದ್, ಉಪಕರ್, ಮತ್ತು ಪುರಬ್ ಔರ್ ಪಶ್ಚಿಮ್‌ನಂತಹ ನಂತಹ ಮನೋಜ್ ಕುಮಾರ್ ಅವರ ಅನೇಕ ಚಿತ್ರಗಳಲ್ಲಿ ನಟಿಸಿದ್ದಾರೆ.
ಚೆನ್ನೈ ಎಕ್ಸ್‌ಪ್ರೆಸ್ (2013) ಮತ್ತು ಕಬೀರ್ ಸಿಂಗ್ (2019) ನಂತಹ ಪ್ರಮುಖ ವಾಣಿಜ್ಯ ಚಿತ್ರಗಳಲ್ಲೂ ಬಣ್ಣ ಹಚ್ಚಿದ್ದಾರೆ. ಕಬೀರ್ ಸಿಂಗ್ ಸಿನಿಮಾದಲ್ಲಿ ಕಾಮಿನಿ ನಟನೆಗೆ ಅತ್ಯುತ್ತಮ ಪೋಷಕ ನಟಿ ಪ್ರಶಸ್ತಿ ಲಭಿಸಿದೆ. 2015ರಲ್ಲಿ ಅವರಿಗೆ ಫಿಲ್ಮ್‌ಫೇರ್ ಜೀವಮಾನ ಸಾಧನೆ ಪ್ರಶಸ್ತಿಯನ್ನು ನೀಡಿ ಗೌರವಿಸಲಾಗಿದೆ. 2022ರಲ್ಲಿ ಆಮಿರ್ ಖಾನ್ ಮತ್ತು ಕರೀನಾ ಕಪೂರ್ ನಟನೆಯ ಲಾಲ್ ಸಿಂಗ್ ಚಡ್ಡಾ ಚಿತ್ರದಲ್ಲಿ ಕಾಮಿನಿ ಕಾಣಿಸಿಕೊಂಡಿದ್ದು, ಅದು ಅವರ ಕೊನೆಯ ಸಿನಿಮಾವಾಗಿದೆ. ಕಾಮಿನಿ ಕೌಶಲ್ ಅವರು ತಮ್ಮ ಪುತ್ರರಾದ ಶ್ರವಣ್, ವಿದುರ್ ಮತ್ತು ರಾಹುಲ್ ಸೂದ್ ಅವರನ್ನು ಅಗಲಿದ್ದಾರೆ.
