ಕಾಂಗ್ರೆಸ್ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ ಅವರು ಮಂಗಳವಾರ ಮಾತನಾಡುತ್ತಾ, ಚುನಾವಣಾ ಪಟ್ಟಿಯಲ್ಲಿ ವಿಶೇಷ ತೀವ್ರ ಪರಿಷ್ಕರಣೆ (SIR), ಕ್ಷೇತ್ರ ಪುನರ್ವಿಂಗಡಣೆ ಹಾಗೂ ಮಹಿಳಾ ಮೀಸಲಾತಿ ಕುರಿತು ತಮಗಿರುವ ಆತಂಕಗಳನ್ನು ಅಕ್ಟೋಬರ್ 21 ರಂದು ಪ್ರಧಾನಿ ನರೇಂದ್ರ ಮೋದಿ ಅವರಿಗೆ ವಿವರಿಸುವುದಾಗಿ ತಿಳಿಸಿದರು.
ಮಂಗಳವಾರ ರಾಜಕೀಯ ಮಾತನಾಡಲು ಇಷ್ಟಪಡುವುದಿಲ್ಲ ಎಂದು ಹೇಳಿದ ಖರ್ಗೆ, ತಾವು ವೈಯಕ್ತಿಕವಾಗಿ ಪ್ರಧಾನಿಗೆ ಎರಡು ಪತ್ರಗಳನ್ನು ಬರೆದಿರುವುದಾಗಿ ತಿಳಿಸಿದರು. “ನಾಳೆ ಅವರಿಗೆ ಎಲ್ಲವನ್ನೂ ವಿವರಿಸುತ್ತೇನೆ, ಚುನಾವಣಾ ಪಟ್ಟಿಯಲ್ಲಿ ವಿಶೇಷ ತೀವ್ರ ಪರಿಷ್ಕರಣೆ (SIR) ಯಿಂದ ಆಗುವ ಅನಾಹುತ, ಅವರು ಮಾಡುತ್ತಿರುವ ಕ್ಷೇತ್ರ ಪುನರ್ವಿಂಗಡಣೆಯ ಪರಿಣಾಮಗಳು ಹಾಗೂ ಮಹಿಳಾ ಮೀಸಲಾತಿ ವಿಷಯಗಳನ್ನು ವಿವರಿಸುತ್ತೇನೆ” ಎಂದು ಪತ್ರಕರ್ತರಿಗೆ ಖರ್ಗೆ ತಿಳಿಸಿದರು. “ಅವರು ಏಕೆ ಇದನ್ನು ಜಾರಿಗೆ ತರುತ್ತಿಲ್ಲ? ಈ ಎಲ್ಲಾ ವಿಷಯಗಳನ್ನು ನಾನು ನಾಳೆ ವಿವರಿಸುತ್ತೇನೆ” ಎಂದು ಅವರು ಹೇಳಿದರು. ಕೇಂದ್ರ ಸಂಸದೀಯ ವ್ಯವಹಾರಗಳ ಸಚಿವ ಕಿರಣ್ ರಿಜಿಜು ಅವರ ಪತ್ರಕ್ಕೆ ಪ್ರತಿಕ್ರಿಯೆ ಕೇಳಿದ ಪತ್ರಕರ್ತರಿಗೆ ಖರ್ಗೆ ಈ ಮಾತು ಹೇಳಿದರು.
ಸಂಸತ್ತಿನಲ್ಲಿ ಕ್ಷೇತ್ರ ಪುನರ್ವಿಂಗಡಣೆಯ ಕುರಿತು ಪ್ರಸ್ತಾಪಿತ ಸಂವಿಧಾನ ತಿದ್ದುಪಡಿಯನ್ನು ಪರಿಗಣಿಸುವ ಮುನ್ನ ಸರ್ವಪಕ್ಷ ಸಭೆ ಕರೆಯುವಂತೆ ಆಗ್ರಹಿಸಿ ಖರ್ಗೆ ಅವರು ಅಕ್ಟೋಬರ್ 16 ರಂದು ಬರೆದಿದ್ದ ಪತ್ರಕ್ಕೆ ಪ್ರತಿಕ್ರಿಯೆಯಾಗಿ ರಿಜಿಜು ಅವರು ಈ ಪತ್ರ ಬರೆದಿದ್ದರು. ರಿಜಿಜು ಅವರು ತಮ್ಮ ಪತ್ರದಲ್ಲಿ, ಮಾರ್ಚ್ ಮತ್ತು ಏಪ್ರಿಲ್ ನಲ್ಲಿ ಲಿಖಿತ ಸಂಪರ್ಕಗಳ ಮೂಲಕ ಹಾಗೂ ಖರ್ಗೆ ಮತ್ತು ಲೋಕಸಭೆಯ ವಿಪಕ್ಷ ನಾಯಕ ರಾಹುಲ್ ಗಾಂಧಿ ಅವರ ಜೊತೆ ಚರ್ಚಿಸಿದ ನಂತರ ಸರಕಾರವು ಈ ಕಾನೂನಿನ ಕುರಿತು ಕಾಂಗ್ರೆಸ್ ಪಕ್ಷದ ಸಹಕಾರ ಕೇಳಿತ್ತು ಎಂದು ಹೇಳಿದರು. ಆದರೆ, ಕಾಂಗ್ರೆಸ್ ಚರ್ಚೆಗೆ ದಿನಾಂಕಗಳನ್ನು ನೀಡಲು ವಿಫಲವಾಗಿತ್ತು ಎಂದು ರಿಜಿಜು ದೂರಿ ದರು.
ಈ ಕಾರಣದಿಂದ ಸರಕಾರವು ಡಿಎಂಕೆ, ಸಮಾಜವಾದಿ ಪಾರ್ಟಿ, ವೈಎಸ್‌ಆರ್‌ಸಿಪಿ, ಎನ್‌ಸಿಪಿ, ಶಿವಸೇನಾ (ಯುಬಿಟಿ), ಎಐಎಂಐಎಂ ಮತ್ತು ಬಿಜೆಡಿ ಸೇರಿದಂತೆ ಇತರ ಪಕ್ಷಗಳನ್ನು ಸಂಪರ್ಕಿಸಬೇಕಾಯಿತು ಎಂದು ರಿಜಿಜು ತಿಳಿಸಿದರು. ಆಗಸ್ಟ್ 13 ರಂದು ಮುಂಗಾರು ಅಧಿವೇಶನ ಮುಗಿದ ನಂತರ ಸಂಸತ್ತನ್ನು ಮುಂದೂಡದಿರುವ (prorogue) ಕುರಿತು ಎದ್ದ ಆತಂಕಗಳನ್ನು ರಿಜಿಜು ತಳ್ಳಿಹಾಕಿದರು, ಹಾಗೂ ಸಂವಿಧಾನವು ಅಧಿವೇಶನವನ್ನು ಮುಂದೂಡಲು ಯಾವುದೇ ನಿರ್ದಿಷ್ಟ ಕಾಲಮಿತಿಯನ್ನು ನಿಶ್ಚಯಿಸಿಲ್ಲ ಎಂದು ಹೇಳಿದರು. ಸರಕಾರದ ಜೊತೆ ರಚನಾತ್ಮಕವಾಗಿ ತೊಡಗಿಸಿಕೊಳ್ಳಬೇಕು ಮತ್ತು ಮುಖ್ಯ ಕಾನೂನುಗಳಿಗೆ ಅಡ್ಡಿ ಪಡಿಸುವುದನ್ನು ತಪ್ಪಿಸಬೇಕು ಎಂದು ಸಚಿವರು ಕಾಂಗ್ರೆಸ್ ಪಕ್ಷವನ್ನು ಒತ್ತಾಯಿಸಿದರು.
