ಮೋದಿ ಅವರು ಏಷ್ಯಾ ಕಪ್ ಫೈನಲ್ ಗೆಲುವನ್ನು 'ಆಪರೇಷನ್ ಸಿಂಧೂರ್'ಗೆ ಹೋಲಿಸಿದ್ದಾರೆ. ಸೇನೆ ನಡೆಸಿದ ಭಯೋತ್ಪಾದಕ ವಿರೋಧಿ ಕಾರ್ಯಾಚರಣೆ, ಹುತಾತ್ಮರಾದ ಯೋಧರು ಹಾಗೂ ಕ್ರಿಕೆಟ್ ಪಂದ್ಯ– ಇವೆಲ್ಲವನ್ನೂ ಒಂದೇ ತಕ್ಕಡಿಯಲ್ಲಿ ತೂಗುವುದು ಅಸಹ್ಯ, ಅಸಂಗತ ಮತ್ತು ಅವಮಾನಕರ...
ಪ್ರಧಾನಿ ನರೇಂದ್ರ ಮೋದಿ ಅವರು ಏಷ್ಯಾ ಕಪ್ ಫೈನಲ್‌ನಲ್ಲಿ ಭಾರತದ ಜಯವನ್ನು ‘ಆಪರೇಷನ್ ಸಿಂಧೂರ್’ಗೆ ಹೋಲಿಸಿ, “ಆಟದ ಮೈದಾನದಲ್ಲಿ ಆಪರೇಷನ್ ಸಿಂಧೂರ್. ಫಲಿತಾಂಶ ಅದೇ- ಭಾರತ ಗೆಲ್ಲುತ್ತದೆ! ನಮ್ಮ ಕ್ರಿಕೆಟಿಗರಿಗೆ ಅಭಿನಂದನೆಗಳು” ಎಂದು ಸಾಮಾಜಿಕ ಮಾಧ್ಯಮದಲ್ಲಿ ಪೋಸ್ಟ್ ಮಾಡಿದ್ದರು. ಇದು ಕ್ರೀಡೆಯನ್ನು ಕ್ರೀಡೆಯನ್ನಾಗಿ ನೋಡುವ ಕ್ರೀಡಾ ಪ್ರೇಮಿಗಳ ಆಕ್ರೋಶಕ್ಕೆ ಕಾರಣವಾಗಿದೆ. ಪಹಲ್ಗಾಮ್ ಭಯೋತ್ಪಾದಕ ದಾಳಿಯ ನಂತರ ಭಾರತೀಯ ಸೇನೆ ನಡೆಸಿದ ಕಾರ್ಯಾಚರಣೆಯನ್ನು ‘ಆಪರೇಷನ್ ಸಿಂಧೂರ್’ ಎಂದು ಹೆಸರಿಸಲಾಗಿತ್ತು. ಇದನ್ನು ಕ್ರಿಕೆಟ್ ಪಂದ್ಯಕ್ಕೆ ಹೋಲಿಸುವುದು ಕ್ರೀಡೆಯ ಶುದ್ಧತೆಗೆ ಅವಮಾನವಾಗಿದೆ. ಕ್ರೀಡೆಗಳು ರಾಷ್ಟ್ರಗಳ ನಡುವೆ ಸೌಹಾರ್ದತೆಯ ಸೇತುವೆಯಾಗಬೇಕು, ಆದರೆ ಇಲ್ಲಿ ದ್ವೇಷ ಮತ್ತು ರಾಜಕೀಯವನ್ನು ಸೇರಿಸಿ ಕ್ರೀಡೆಯನ್ನು ಕುಲಗೆಡಿಸಲಾಗುತ್ತಿದೆ.
ದುಬೈನಲ್ಲಿ ನಡೆದ ಫೈನಲ್ ಪಂದ್ಯದಲ್ಲಿ ಭಾರತ ತಂಡ ಪಾಕಿಸ್ತಾನವನ್ನು 5 ವಿಕೆಟ್‌ಗಳಿಂದ ಸೋಲಿಸಿ ಏಷ್ಯಾ ಕಪ್ ಗೆದ್ದಿತು. ಆದರೆ ಟ್ರೋಫಿ ವಿತರಣೆ ಸಮಾರಂಭದಲ್ಲಿ ಭಾರತ ತಂಡ ಟ್ರೋಫಿಯನ್ನು ಸ್ವೀಕರಿಸಲು ನಿರಾಕರಿಸಿತು. ಇದಕ್ಕೆ ಕಾರಣ ಟ್ರೋಫಿ ನೀಡಬೇಕಾದ ಏಷ್ಯನ್ ಕ್ರಿಕೆಟ್ ಕೌನ್ಸಿಲ್(ಎಸಿಸಿ) ಅಧ್ಯಕ್ಷರಾದ ಮೊಹ್ಸಿನ್ ನಕ್ವಿ ಅವರು ಪಾಕಿಸ್ತಾನ ಕ್ರಿಕೆಟ್ ಮಂಡಳಿ(ಪಿಸಿಬಿ) ಅಧ್ಯಕ್ಷ ಹಾಗೂ ಪಾಕಿಸ್ತಾನದ ಆಂತರಿಕ ಸಚಿವರಾಗಿರುವುದು. ಈ ಸಂದರ್ಭದಲ್ಲಿ ನಾಟಕೀಯ ಬೆಳವಣಿಗೆಗಳು ನಡೆದವು. ಟ್ರೋಫಿ ವಿತರಣಾ ಸಮಾರಂಭ ಒಂದು ಗಂಟೆಗಿಂತ ಹೆಚ್ಚು ತಡವಾಗಿ ಆರಂಭವಾಯಿತಾದರೂ ಅಂತಿಮವಾಗಿ ಟ್ರೋಫಿಯನ್ನು ಮೈದಾನದಿಂದ ತೆಗೆದುಕೊಂಡು ಹೋಗಲಾಯಿತು. ಈ ಸಂದರ್ಭದಲ್ಲಿ ಭಾರತೀಯ ಆಟಗಾರರು ಕಲ್ಪಿತ ಟ್ರೋಫಿಯನ್ನು ಎತ್ತಿ ಹಿಡಿದರು.
ಈ ಘಟನೆಯ ಹಿನ್ನೆಲೆಯಲ್ಲಿ ಹಿಂದಿನ ವಿವಾದಗಳನ್ನು ನೆನಪಿಸಿಕೊಳ್ಳಬೇಕು. ಟೂರ್ನಮೆಂಟ್‌ನಲ್ಲಿ ಭಾರತ ಮತ್ತು ಪಾಕಿಸ್ತಾನ ನಡುವೆ ಮೂರು ಪಂದ್ಯಗಳು ನಡೆದವು. ಪ್ರತಿ ಬಾರಿಯೂ ಟಾಸ್ ಸಮಯದಲ್ಲಿ ಅಥವಾ ಪಂದ್ಯದ ನಂತರ ಹಸ್ತಲಾಘವ ಮಾಡಲು ಭಾರತ ತಂಡ ನಿರಾಕರಿಸಿತು. ಸೂಪರ್ ಫೋರ್ ಹಂತದ ಎರಡನೇ ಪಂದ್ಯದಲ್ಲಿ ಉಭಯ ತಂಡಗಳ ನಡುವೆ ಮೌಖಿಕ ಕಲಹಗಳು ನಡೆದವು. ಭಾರತ ತಂಡದ ನಾಯಕ ಸೂರ್ಯಕುಮಾರ್ ಯಾದವ್ ಮತ್ತು ಪಾಕಿಸ್ತಾನದ ಹ್ಯಾರಿಸ್ ರೌಫ್ ಅವರಿಗೆ ದಂಡ ವಿಧಿಸಲಾಯಿತು. ಪಾಕಿಸ್ತಾನ ತಂಡದ ನಾಯಕ ಸಲ್ಮಾನ್ ಅಘಾ ಅವರು ಈ ವರ್ತನೆಯನ್ನು “ಕ್ರಿಕೆಟ್‌ಗೆ ಅಗೌರವ” ಎಂದು ಟೀಕಿಸಿದರು. ಭಾರತ ತಂಡ ನಮ್ಮೊಂದಿಗೆ ಹಸ್ತಲಾಘವ ಮಾಡದಿರುವುದು ನಮಗಲ್ಲ, ಕ್ರಿಕೆಟ್‌ಗೆ ಅಗೌರವ. ಮೊಹ್ಸಿನ್ ನಕ್ವಿ ಸೂರ್ಯಕುಮಾರ್ ಅವರೊಂದಿಗೆ ಖಾಸಗಿಯಾಗಿ ಹಸ್ತಲಾಘವ ಮಾಡುತ್ತಾರೆ. ಆದರೆ ಕ್ಯಾಮೆರಾ ಮುಂದೆ ಅವರು ಸರ್ಕಾರದ ಸೂಚನೆಗಳನ್ನು ಪಾಲಿಸುತ್ತಾರೆ” ಎಂದು ನೇರವಾಗಿ ಆರೋಪಿಸಿದರು. ಇದಕ್ಕೆ ವಿಪಕ್ಷ ನಾಯಕರೂ ಕೂಡ ಸಾಕ್ಷಿ ಸಮೇತ ಧನಿಗೂಡಿಸಿದ್ದಾರೆ.
ಇದನ್ನು ಓದಿದ್ದೀರಾ? ಈ ದಿನ ಸಂಪಾದಕೀಯ | ಬಿಜೆಪಿ ದ್ವೇಷ ರಾಜಕಾರಣವನ್ನು ಸದೆಬಡಿಯದಿದ್ದರೆ ಉಳಿಗಾಲವಿಲ್ಲ
ಪ್ರಧಾನಿ ನರೇಂದ್ರ ಮೋದಿ ಅವರು ಏಷ್ಯಾ ಕಪ್ ಫೈನಲ್ ಗೆಲುವನ್ನು “ಆಪರೇಷನ್ ಸಿಂಧೂರ್”ಗೆ ಹೋಲಿಸಿದ ಹೇಳಿಕೆ ಕ್ರೀಡಾ ಪ್ರೇಮಿಗಳ ಹೃದಯಕ್ಕೆ ನೋವುಂಟುಮಾಡಿದೆ. ಸೇನೆ ನಡೆಸಿದ ಭಯೋತ್ಪಾದಕ ವಿರೋಧಿ ಕಾರ್ಯಾಚರಣೆ, ಅಲ್ಲಿ ಹುತಾತ್ಮರಾದ ಯೋಧರ ತ್ಯಾಗ ಹಾಗೂ ಕ್ರೀಡಾ ಮೈದಾನದಲ್ಲಿ ನಡೆಯುವ ಪಂದ್ಯ– ಇವೆಲ್ಲವನ್ನೂ ಒಂದೇ ತೂಕದಲ್ಲಿ ತೂಗುವುದು ಎಷ್ಟು ಸರಿ? ಕ್ರೀಡೆ ಎಂಬುದು ಶಾಂತಿ, ಸ್ನೇಹ ಮತ್ತು ಸಹಬಾಳ್ವೆಯ ಸಂಕೇತ. ಅದನ್ನು ಯುದ್ಧದ ಭಾಷೆಯಲ್ಲಿಯೇ ವ್ಯಾಖ್ಯಾನಿಸುವುದು ಪ್ರಧಾನಿ ಸ್ಥಾನಕ್ಕೇ ತಕ್ಕದ್ದಲ್ಲ. ಮೋದಿ ಅವರ ಹೇಳಿಕೆ ಕೇವಲ ಕ್ರಿಕೆಟ್ ಪ್ರೇಮಿಗಳಿಗೆ ಮಾತ್ರವಲ್ಲ, ದೇಶದ ಯುವ ಕ್ರೀಡಾಪಟುಗಳಿಗೂ ತಪ್ಪು ಸಂದೇಶ ರವಾನಿಸಿದೆ.
ಮೋದಿ ಸರ್ಕಾರ ಕ್ರಿಕೆಟ್ ಮೈದಾನವನ್ನೇ ರಾಜಕೀಯ ಪ್ರಚಾರದ ವೇದಿಕೆಯನ್ನಾಗಿ ಮಾಡಿಕೊಳ್ಳುತ್ತಿದೆ. ಟ್ರೋಫಿ ಸ್ವೀಕಾರವನ್ನು ನಿರಾಕರಿಸಿದ ಭಾರತೀಯ ತಂಡದ ಹಿಂದಿನ ನಿರ್ಧಾರವೂ ಕೂಡ ಕೇಂದ್ರ ಸರ್ಕಾರದ ನೇರ ರಾಜಕೀಯ ಒತ್ತಡದಿಂದಲೇ ಆಗಿದೆ ಎಂಬುದು ಬಹಿರಂಗವಾಗುತ್ತಿದೆ. ಬಿಸಿಸಿಐ ತಟಸ್ಥವಾಗಿರಬೇಕಾದರೂ, ಅದು ಕೂಡ ಸರ್ಕಾರದ ಬೊಂಬೆಯಂತಾಗಿದೆ. ಕ್ರೀಡೆಗೆ ರಾಜಕೀಯದ ಕಹಿ ಬೆರೆಸುವುದರಿಂದ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಭಾರತದ ಗೌರವ ಕುಸಿಯುತ್ತಿದೆ. ಮೋದಿ ಅವರು ಕ್ರಿಕೆಟ್ ಎಂಬ ಸಮರಸದ ಆಟವನ್ನೇ ದ್ವೇಷ ಮತ್ತು ರಾಷ್ಟ್ರಭಕ್ತಿ ಎಂಬ ಹೆಸರಿನಲ್ಲಿ ವಿಭಜನೆಯ ಸಾಧನವಾಗಿ ಬಳಸುತ್ತಿದ್ದಾರೆ. ಇದು ಕೇವಲ ಕ್ರಿಕೆಟ್ ಪ್ರೇಮಿಗಳ ವಿರೋಧವನ್ನೇ ಅಲ್ಲ, ಕ್ರೀಡೆಯ ಭವಿಷ್ಯವನ್ನೂ ಅಪಾಯಕ್ಕೆ ಒಳಪಡಿಸುತ್ತಿದೆ. ಕೇಂದ್ರ ಸರ್ಕಾರದ ರಾಜಕೀಯ ಒತ್ತಡದಿಂದಾಗಿ ಬಿಸಿಸಿಐ ಇಂತಹ ನಿರ್ಧಾರಗಳನ್ನು ತೆಗೆದುಕೊಳ್ಳುತ್ತಿದೆ. ಸೈನ್ಯದ ಕಾರ್ಯಾಚರಣೆಯನ್ನು ಕ್ರಿಕೆಟ್ ಗೆಲುವಿಗೆ ಹೋಲಿಸುವುದು ರಾಷ್ಟ್ರೀಯತೆಯ ಹೆಸರಿನಲ್ಲಿ ದ್ವೇಷವನ್ನು ಹರಡುವಂತಿದೆ.
ಕ್ರಿಕೆಟ್ ಎಂಬುದು ಕೇವಲ ಆಟವಲ್ಲ, ಅದು ಜನರನ್ನು ಒಗ್ಗೂಡಿಸುವ ಸಾಧನ. ಭಾರತ ಮತ್ತು ಪಾಕಿಸ್ತಾನ ನಡುವಿನ ಪಂದ್ಯಗಳು ಯಾವಾಗಲೂ ಭಾವನಾತ್ಮಕವಾಗಿರುತ್ತವೆ, ಆದರೆ ದ್ವೇಷವನ್ನು ಸೇರಿಸುವುದು ಸರಿಯಲ್ಲ. ಆಘಾ ಅವರು ಹೇಳಿದಂತೆ, ಇದು ಜನರಿಗೆ ತಪ್ಪು ಸಂದೇಶ ನೀಡುತ್ತದೆ. ನಾವು ರೋಲ್ ಮಾಡಲ್‌ಗಳು, ಆದರೆ ಈ ವರ್ತನೆಯಿಂದ ನಡವಳಿಕೆ ಕಠೋರವಾಗಿದೆ. ಕ್ರಿಕೆಟ್‌ನಲ್ಲಿ ರಾಜಕೀಯ ಮತ್ತು ದ್ವೇಷವನ್ನು ಸೇರಿಸಬಾರದು ಎಂಬುದು ಸ್ಪಷ್ಟ. ಬಿಸಿಸಿಐ ಮತ್ತು ಕೇಂದ್ರ ಸರ್ಕಾರ ತಮ್ಮ ರಾಜಕೀಯ ಧೋರಣೆಯನ್ನು ಕ್ರೀಡೆಗೆ ಹೇರದೆ ಇದ್ದರೆ ಮಾತ್ರ ಕ್ರಿಕೆಟ್ ಶುದ್ಧವಾಗಿ ಉಳಿಯುತ್ತದೆ.
ಈ ಘಟನೆಗಳು ಕ್ರಿಕೆಟ್‌ನ ಭವಿಷ್ಯಕ್ಕೆ ಕಪ್ಪುಮೋಡ ಕವಿದಂತಿವೆ. ಭಾರತ ತಂಡದ ಆಟಗಾರರು ಟ್ರೋಫಿ ಇಲ್ಲದೆ ಸಂಭ್ರಮ ಆಚರಿಸಿದ್ದು ಹಾಸ್ಯಾಸ್ಪದವಾಗಿದೆ. ಸೂರ್ಯಕುಮಾರ್ ಅವರು “ನನ್ನ ನಿಜವಾದ ಟ್ರೋಫಿಗಳು ಡ್ರೆಸಿಂಗ್ ರೂಮ್‌ನಲ್ಲಿರುವ ನನ್ನ ತಂಡದ ಸದಸ್ಯರು” ಎಂದು ಹೇಳಿದರು. ಆದರೆ ಇದು ತಂಡದ ಗೆಲುವನ್ನು ಅಪಹಾಸ್ಯ ಮಾಡಿದಂತಿದೆ. ಕ್ರಿಕೆಟ್ ಪ್ರೇಮಿಗಳು ಇಂತಹ ರಾಜಕೀಯ ಹಸ್ತಕ್ಷೇಪವನ್ನು ವಿರೋಧಿಸಬೇಕು. ಕ್ರೀಡೆಯನ್ನು ಶುದ್ಧವಾಗಿ ಉಳಿಸಿ, ದ್ವೇಷವನ್ನು ಹೊರಗಿಡಬೇಕು. ಇದು, ಕ್ರೀಡಾ ವೇದಿಕೆ ರಾಜಕೀಯದಿಂದ ಮುಕ್ತವಾಗಿರಬೇಕೇ ಎಂಬ ಪ್ರಶ್ನೆಯನ್ನು ಮತ್ತೊಮ್ಮೆ ಮುನ್ನಲೆಗೆ ತಂದಿದೆ. ಕ್ರೀಡೆ ಎಂದರೆ ಸ್ನೇಹ, ಸ್ಪರ್ಧೆ ಮತ್ತು ಗೌರವದ ಸಂಕೇತ. ಆದರೆ ಈ ಬಾರಿ ಆಟದ ಹಬ್ಬವಾಗಬೇಕಾದ ಸಮಾರಂಭವು ರಾಜಕೀಯ ಮತ್ತು ಭಿನ್ನಾಭಿಪ್ರಾಯಗಳ ನೆರಳಲ್ಲಿ ಮುಚ್ಚಿಹೋಗಿದೆ. ಅಸಹ್ಯಗಳಲ್ಲಿ ಅದ್ದಿಹೋಗಿದೆ. ಭಾರತ ತಂಡವು ತಮ್ಮ ತೀರ್ಮಾನದಲ್ಲಿ ಏಕತೆ ತೋರಿಸಿ, ತಮ್ಮ ಆಟದ ಮೂಲಕವೇ ಜಯವನ್ನು ಸಾರಿದೆ. ಅಭಿಮಾನಿಗಳ ಹೃದಯದಲ್ಲಿ ಜಯದ ಉತ್ಸಾಹ ಉಳಿದಿದ್ದರೂ, ಟ್ರೋಫಿ ಸ್ವೀಕಾರದ ಅಸಮಾಧಾನವನ್ನೂ ಇತಿಹಾಸದಲ್ಲಿ ನೆನಪಾಗುವಂತೆ ಬಿಟ್ಟಿದೆ.
