ಅಂಡರ್-19 ವಿಶ್ವಕಪ್‌ನಲ್ಲಿ ಟೀಂ ಇಂಡಿಯಾ ತನ್ನ ಅಭಿಯಾನವನ್ನು ಭರ್ಜರಿಯಾಗಿಯೇ ಆರಂಭಿಸಿದೆ. ಅಮೆರಿಕ ವಿರುದ್ಧದ ಮೊದಲ ಪಂದ್ಯದಲ್ಲಿ 6 ವಿಕೆಟ್‌ಗಳ ಜಯ ಸಾಧಿಸುವ ಮೂಲಕ, ಆಯುಷ್ ಮಾತ್ರೆ ನೇತೃತ್ವದ ಭಾರತದ ಕಿರಿಯರ ಪಡೆ ಆರನೇ ವಿಶ್ವಕಪ್ ಟ್ರೋಫಿಯ ಮೇಲೆ ಕಣ್ಣಿಟ್ಟಿದೆ. ಆದರೆ, ಈ ಪಂದ್ಯದ ಸೋಲು-ಗೆಲುವಿನ ಲೆಕ್ಕಾಚಾರಕ್ಕಿಂತ ಹೆಚ್ಚಾಗಿ, ಮೈದಾನಕ್ಕಿಳಿಯುವ ಮುನ್ನವೇ 14 ವರ್ಷದ ಪೋರನೊಬ್ಬ ಬರೆದ ದಾಖಲೆ ಈಗ ಕ್ರಿಕೆಟ್ ಜಗತ್ತಿನ ಹುಬ್ಬೇರಿಸಿದೆ. ಅವರೇ ವೈಭವ್ ಸೂರ್ಯವಂಶಿ.
ಕೇವಲ 14ನೇ ವಯಸ್ಸಿನಲ್ಲಿ ವಿಶ್ವಕಪ್ ಅಖಾಡಕ್ಕಿಳಿದ ವೈಭವ್, ಇತಿಹಾಸದ ಪುಟ ಸೇರಿದರಾದರೂ, ಅವರ ಬ್ಯಾಟಿಂಗ್ ಪ್ರದರ್ಶನ (2 ರನ್) ಹೇಳಿಕೊಳ್ಳುವಂತಿರಲಿಲ್ಲ. ಆದರೆ, ಕಿರಿಯ ವಯಸ್ಸಿನಲ್ಲಿಯೇ ಇಷ್ಟೆಲ್ಲಾ ಸಾಧನೆ ಮಾಡಿದ್ದರೂ, ಅವರು ಭಾರತದ ಹಿರಿಯರ ರಾಷ್ಟ್ರೀಯ ತಂಡಕ್ಕೆ ಆಯ್ಕೆಯಾಗಲು ತಾಂತ್ರಿಕ ಅಡ್ಡಿಯೊಂದಿದೆ.
ಏನದು ದಾಖಲೆ?
ಅಮೆರಿಕ ವಿರುದ್ಧ ಕಣಕ್ಕಿಳಿಯುವ ಮೂಲಕ ವೈಭವ್ ಸೂರ್ಯವಂಶಿ, ಅಂಡರ್-19 ವಿಶ್ವಕಪ್ ಆಡಿದ ‘ಅತ್ಯಂತ ಕಿರಿಯ ಭಾರತೀಯ’ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. ಪದಾರ್ಪಣೆ ವೇಳೆ ಅವರಿಗೆ 14 ವರ್ಷ, 294 ದಿನಗಳು. ಈ ಹಿಂದೆ 2020ರ ಆವೃತ್ತಿಯಲ್ಲಿ ಕುಮಾರ್ ಕುಶಾಗ್ರ ಅವರು 15 ವರ್ಷ, 88 ದಿನಗಳಿದ್ದಾಗ ಶ್ರೀಲಂಕಾ ವಿರುದ್ಧ ಆಡಿದ್ದು ದಾಖಲೆಯಾಗಿತ್ತು. 15 ವರ್ಷ ತುಂಬುವ ಮುನ್ನವೇ ವಿಶ್ವಕಪ್ ಆಡಿದ ಮೊದಲ ಭಾರತೀಯ ಎಂಬ ಕೀರ್ತಿ ಈಗ ವೈಭವ್ ಪಾಲಾಗಿದೆ.
ಟೀಂ ಇಂಡಿಯಾಗೆ ಆಯ್ಕೆಯಾಗಲು ‘ವಯಸ್ಸು’ ಅಡ್ಡಿ!
ದೇಶೀಯ ಕ್ರಿಕೆಟ್‌ನಲ್ಲಿ ಮತ್ತು ಐಪಿಎಲ್ ಹರಾಜಿನಲ್ಲಿ ಸಂಚಲನ ಮೂಡಿಸಿರುವ ವೈಭವ್, ಸಚಿನ್ ತೆಂಡೂಲ್ಕರ್ ಅವರ ಹಾದಿಯಲ್ಲಿದ್ದಾರೆ ಎಂಬ ಮಾತುಗಳು ಕೇಳಿಬರುತ್ತಿವೆ. ಸಚಿನ್ 16ನೇ ವಯಸ್ಸಿನಲ್ಲಿಯೇ ಅಂತರರಾಷ್ಟ್ರೀಯ ಕ್ರಿಕೆಟ್‌ಗೆ ಪದಾರ್ಪಣೆ ಮಾಡಿದ್ದರು. ಆದರೆ, ವೈಭವ್ ಸೂರ್ಯವಂಶಿ ಎಷ್ಟೇ ಪ್ರತಿಭಾವಂತರಾಗಿದ್ದರೂ, ಸದ್ಯಕ್ಕೆ ಭಾರತದ ಹಿರಿಯರ ತಂಡವನ್ನು ಸೇರುವಂತಿಲ್ಲ.
ಇದನ್ನು ಓದಿದ್ದೀರಾ? ವಿಶ್ವವಿಜೇತನ ಟ್ರೋಫಿಗಳೆಲ್ಲ ಅಮ್ಮನ ಕಪಾಟಿನಲ್ಲಿ ಭದ್ರ: ಕೊಹ್ಲಿ ಯಶಸ್ಸಿನ ಹಿಂದಿನ ‘ಸರೋಜ’ ವಾತ್ಸಲ್ಯ
ಇದಕ್ಕೆ ಕಾರಣ 2020ರಲ್ಲಿ ಅಂತಾರಾಷ್ಟ್ರೀಯ ಕ್ರಿಕೆಟ್ ಮಂಡಳಿ (ICC) ಜಾರಿಗೆ ತಂದಿರುವ ಹೊಸ ನಿಯಮ. ಈ ನಿಯಮದ ಪ್ರಕಾರ, ಯಾವುದೇ ಆಟಗಾರ ಅಂತಾರಾಷ್ಟ್ರೀಯ ಕ್ರಿಕೆಟ್ (ಪುರುಷರ, ಮಹಿಳೆಯರ ಅಥವಾ ಅಂಡರ್-19 ಅಂತಾರಾಷ್ಟ್ರೀಯ ಪಂದ್ಯಗಳನ್ನು ಹೊರತುಪಡಿಸಿ ಹಿರಿಯರ ತಂಡಕ್ಕೆ) ಆಡಲು ಕನಿಷ್ಠ 15 ವರ್ಷ ವಯಸ್ಸಾಗಿರಬೇಕು. ಆಟಗಾರರ ಸುರಕ್ಷತೆ ಮತ್ತು ಮಾನಸಿಕ ಬೆಳವಣಿಗೆಯ ದೃಷ್ಟಿಯಿಂದ ಈ ನಿಯಮವನ್ನು ಜಾರಿಗೊಳಿಸಲಾಗಿದೆ.
ವೈಭವ್ ಅವರಿಗೆ 15 ವರ್ಷ ತುಂಬಲು ಇನ್ನು ಕೇವಲ ಎರಡು ತಿಂಗಳು ಬಾಕಿ ಇದೆ. ಹೀಗಾಗಿ, ಅವರು 15 ವರ್ಷ ಪೂರೈಸಿದ ನಂತರವಷ್ಟೇ ಟೀಂ ಇಂಡಿಯಾದ ಆಯ್ಕೆ ಪ್ರಕ್ರಿಯೆಗೆ ಅರ್ಹತೆ ಪಡೆಯಲಿದ್ದಾರೆ.
ಭವಿಷ್ಯದ ತಾರೆಗೆ ಸರಿಯಾದ ಹಾದಿ
ರಣಜಿ ಟ್ರೋಫಿಯಲ್ಲಿ ಅತೀ ಕಿರಿಯ ವಯಸ್ಸಿನಲ್ಲಿ ಶತಕ ಸಿಡಿಸಿದ ಮತ್ತು ಐಪಿಎಲ್ ಹರಾಜಿನಲ್ಲಿ ಗಮನ ಸೆಳೆದ ವೈಭವ್ ಅವರ ಪ್ರತಿಭೆ ಅನನ್ಯ. 2000ರಲ್ಲಿ ಯುವರಾಜ್ ಸಿಂಗ್, 2008ರಲ್ಲಿ ವಿರಾಟ್ ಕೊಹ್ಲಿ ಮತ್ತು 2018ರಲ್ಲಿ ಶುಭಮನ್ ಗಿಲ್ ಅವರಂತಹ ತಾರೆಯರು ಅಂಡರ್-19 ವಿಶ್ವಕಪ್ ಮೂಲಕವೇ ತಮ್ಮ ಛಾಪು ಮೂಡಿಸಿ ಹಿರಿಯರ ತಂಡಕ್ಕೆ ಲಗ್ಗೆ ಇಟ್ಟಿದ್ದರು.
ಈಗ ವೈಭವ್ ಸರದಿ. ಒಂದು ವೇಳೆ ಈ ಬಾರಿ ಭಾರತ ಕಪ್ ಗೆದ್ದರೆ, ಅದು ವೈಭವ್ ಅವರ ವೃತ್ತಿಜೀವನಕ್ಕೆ ದೊಡ್ಡ ಮೆಟ್ಟಿಲಾಗಲಿದೆ. ವಯಸ್ಸಿನ ನಿಯಮದ ಅಡ್ಡಿ ಸರಿದ ನಂತರ, ಇದೇ ವರ್ಷದ ಅಂತ್ಯದ ವೇಳೆಗೆ ಅಥವಾ ಮುಂದಿನ ದಿನಗಳಲ್ಲಿ ಈ ಬಾಲ ಪ್ರತಿಭೆ ಟೀಂ ಇಂಡಿಯಾ ಜೆರ್ಸಿಯಲ್ಲಿ ಕಣಕ್ಕಿಳಿದರೂ ಅಚ್ಚರಿಯಿಲ್ಲ.
