ಅಮೆರಿಕ ಮತ್ತು ಇರಾನ್ ನಡುವಿನ ಯುದ್ಧ ತೀವ್ರ ಸ್ವರೂಪ ಪಡೆದುಕೊಂಡಿದ್ದು, ಇರಾನ್ ಬೇಷರತ್ತಾಗಿ ಶರಣಾಗುವವರೆಗೆ ಅವರೊಂದಿಗೆ ಯಾವುದೇ ಒಪ್ಪಂದದ ಪ್ರಶ್ನೆಯೇ ಇಲ್ಲ ಎಂದು ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಸ್ಪಷ್ಟಪಡಿಸಿದ್ದಾರೆ. ಮತ್ತೊಂದೆಡೆ, ಮಧ್ಯಪ್ರಾಚ್ಯದ ಬಿಕ್ಕಟ್ಟಿನಿಂದಾಗಿ ಜಾಗತಿಕ ಇಂಧನ ಮಾರುಕಟ್ಟೆಯಲ್ಲಿ ಅಲ್ಲೋಲ-ಕಲ್ಲೋಲ ಸೃಷ್ಟಿಯಾಗಿದ್ದು, ಕಚ್ಚಾ ತೈಲದ ಬೆಲೆಗಳು ಬ್ಯಾರೆಲ್‌ಗೆ 90 ಡಾಲರ್ ಸನಿಹಕ್ಕೆ ಜಿಗಿದಿವೆ.
“ಇರಾನ್ ಬೇಷರತ್ತಾಗಿ ಶರಣಾಗುವ ಹೊರತು ಅವರೊಂದಿಗೆ ಯಾವುದೇ ಒಪ್ಪಂದ ಮಾಡಿಕೊಳ್ಳುವುದಿಲ್ಲ! ಆ ಬಳಿಕ, ಅತ್ಯುತ್ತಮ ಹಾಗೂ ಸ್ವೀಕಾರಾರ್ಹ ನಾಯಕರ ಆಯ್ಕೆಯ ನಂತರ, ನಾವು ಸೇರಿದಂತೆ ನಮ್ಮೆಲ್ಲಾ ಅದ್ಭುತ ಹಾಗೂ ಕೆಚ್ಚೆದೆಯ ಮಿತ್ರರಾಷ್ಟ್ರಗಳು ಇರಾನ್‌ಅನ್ನು ವಿನಾಶದ ಅಂಚಿನಿಂದ ಮರಳಿ ತರಲು ಶ್ರಮಿಸುತ್ತೇವೆ. ಆರ್ಥಿಕವಾಗಿ ಅವರನ್ನು ಹಿಂದೆಂದಿಗಿಂತಲೂ ಹೆಚ್ಚು ಸದೃಢ ಮತ್ತು ಬಲಿಷ್ಠರನ್ನಾಗಿಸುತ್ತೇವೆ. ಇರಾನ್‌ಗೆ ಅತ್ಯುತ್ತಮ ಭವಿಷ್ಯವಿದೆ” ಎಂದು ಡೊನಾಲ್ಡ್ ಟ್ರಂಪ್ ತಮ್ಮ ‘ಟ್ರುತ್ ಸೋಶಿಯಲ್‌’ ಜಾಲತಾಣದಲ್ಲಿ ಪೋಸ್ಟ್ ಮಾಡಿದ್ದಾರೆ.
ಮಧ್ಯಪ್ರಾಚ್ಯದಲ್ಲಿ ತೈಲ ಪೂರೈಕೆ ವ್ಯತ್ಯಯ ಹಾಗೂ ಹಾರ್ಮುಜ್ ಜಲಸಂಧಿಯ ಮೂಲಕ ಸಾಗುವ ಟ್ಯಾಂಕರ್ ಸಂಚಾರಕ್ಕೆ ಅಡ್ಡಿಯಾಗಿರುವ ಕಾರಣ, ಶುಕ್ರವಾರದ ವಹಿವಾಟಿನಲ್ಲಿ ಕಚ್ಚಾ ತೈಲ ಬೆಲೆಯಲ್ಲಿ ಭಾರಿ ಏರಿಕೆ ಕಂಡಿದೆ. ಇದು ಕಳೆದ ನಾಲ್ಕು ವರ್ಷಗಳಲ್ಲೇ ಕಂಡ ಅತಿ ದೊಡ್ಡ ಸಾಪ್ತಾಹಿಕ ಏರಿಕೆಯಾಗಿದೆ. ಬೆಲೆಯಲ್ಲಿ ಶೇ 4ರಷ್ಟು ಹೆಚ್ಚಳವಾಗಿದ್ದು, ಬ್ಯಾರೆಲ್‌ಗೆ 88 ಡಾಲರ್ ಗಡಿ ದಾಟಿದೆ.
ಇದನ್ನು ಓದಿದ್ದೀರಾ? ಪಶ್ಚಿಮ ಏಷ್ಯಾದಲ್ಲಿ ಅಮೆರಿಕದ ವಿನಾಶಕಾರಿ ನೀತಿ, ಭಾರತೀಯ ವಿಮಾನಯಾನಕ್ಕೆ ದುಃಸ್ವಪ್ನ
ಅಮೆರಿಕದ ಮಾನದಂಡವಾಗಿರುವ ಡಬ್ಲ್ಯುಟಿಐ ಕಚ್ಚಾ ತೈಲದ ಬೆಲೆ 4.80 ಡಾಲರ್‌ನಷ್ಟು ಜಿಗಿದು 85.90 ಡಾಲರ್‌ಗೆ ತಲುಪಿದೆ. ಮಧ್ಯಪ್ರಾಚ್ಯದ ಪ್ರಮುಖ ಮಾನದಂಡವಾದ ಮರ್ಬನ್ ಕಚ್ಚಾ ತೈಲದ ಬೆಲೆ ಬ್ಯಾರೆಲ್‌ಗೆ 99.60 ಡಾಲರ್‌ಗೆ ತಲುಪುವ ಮೂಲಕ 100 ಡಾಲರ್ ಗಡಿಯತ್ತ ಮುನ್ನುಗ್ಗುತ್ತಿದೆ.
ವಿಶ್ವದ ಒಟ್ಟು ವಹಿವಾಟಾಗುವ ಕಚ್ಚಾ ತೈಲದಲ್ಲಿ ಐದನೇ ಒಂದು ಭಾಗ (ಶೇ 20ರಷ್ಟು) ಹಾರ್ಮುಜ್ ಜಲಸಂಧಿಯ ಮೂಲಕವೇ ಸಾಗಣೆಯಾಗುತ್ತದೆ. ಜಾಗತಿಕ ತೈಲ ವ್ಯವಸ್ಥೆಯಲ್ಲಿ ಅತ್ಯಂತ ನಿರ್ಣಾಯಕವಾಗಿರುವ ಈ ಜಲಮಾರ್ಗದಲ್ಲಿನ ಸಣ್ಣ ಅಡಚಣೆ ಅಥವಾ ಆತಂಕವೂ ಸಹ ಪೂರೈಕೆಯ ಅನಿಶ್ಚಿತತೆಗೆ ಕಾರಣವಾಗಿ ಬೆಲೆಗಳ ತ್ವರಿತ ಏರಿಕೆಗೆ ದಾರಿ ಮಾಡಿಕೊಡುತ್ತದೆ. ಪರ್ಷಿಯನ್ ಕೊಲ್ಲಿಯಿಂದ ರಫ್ತು ಕಾರ್ಯಾಚರಣೆಗೆ ಮತ್ತಷ್ಟು ಸವಾಲುಗಳು ಎದುರಾಗುವ ಸಾಧ್ಯತೆಗಳನ್ನು ಮಾರುಕಟ್ಟೆಗಳು ಲೆಕ್ಕಾಚಾರ ಹಾಕುತ್ತಿವೆ.
