ಅಮೆರಿಕದ ಕರಾವಳಿ ರಕ್ಷಣಾ ಪಡೆ (US Coast Guard) ಉತ್ತರ ಅಟ್ಲಾಂಟಿಕ್ ಸಾಗರದಲ್ಲಿ ರಷ್ಯಾ ಧ್ವಜ ಹೊಂದಿದ್ದ ‘ಮರಿನೇರಾ’ (ಹಳೆಯ ಹೆಸರು: ಬೆಲ್ಲಾ-1) ಎಂಬ ತೈಲ ನೌಕೆಯನ್ನು ವಶಪಡಿಸಿಕೊಂಡಿದೆ. ಎರಡು ವಾರಗಳಿಗೂ ಹೆಚ್ಚು ಕಾಲ ಹಡಗನ್ನು ಅಮೆರಿಕ ಬೆನ್ನಟ್ಟಿದ್ದು, ಬುಧವಾರ ವಶಪಡಿಸಿಕೊಂಡಿದೆ ಎಂದು ವರದಿಯಾಗಿದೆ.
ಈ ಬಗ್ಗೆ ಯುಎಸ್ ಮಿಲಿಟರಿಯ ಯುರೋಪಿಯನ್ ಕಮಾಂಡ್ ಎಕ್ಸ್‌ನಲ್ಲಿ ಪೋಸ್ಟ್ ಮಾಡಿದ್ದು, “ಅಮೆರಿಕ ಗೃಹ ಭದ್ರತಾ ಇಲಾಖೆ ಮತ್ತು ಯುಎಸ್ ಮಿಲಿಟರಿ ಸಮನ್ವಯದೊಂದಿಗೆ ಇಂದು ಅಮೆರಿಕದ ನಿರ್ಬಂಧಗಳ ಉಲ್ಲಂಘನೆ ಮಾಡಿದ ಬೆಲ್ಲಾ-1 ಅನ್ನು ವಶಪಡಿಸಿಕೊಳ್ಳಲಾಗಿದೆ. ಯುಎಸ್ ಫೆಡರಲ್ ನ್ಯಾಯಾಲಯವು ಹೊರಡಿಸಿದ ವಾರಂಟ್‌ ಆಧಾರದಲ್ಲಿ ಈ ಹಡಗನ್ನು ಉತ್ತರ ಅಟ್ಲಾಂಟಿಕ್‌ನಲ್ಲಿ ವಶಪಡಿಸಿಕೊಳ್ಳಲಾಗಿದೆ” ಎಂದು ತಿಳಿಸಿದೆ.
ಇದನ್ನು ಓದಿದ್ದೀರಾ? ಅಮೆರಿಕದ ಅಡಿಯಲ್ಲೇ ವೆನೆಜುವೆಲಾ ಇರುತ್ತದೆ: ಟ್ರಂಪ್
ಮರಿನೇರಾ ಎಂಬ ಹಡಗಿನ ಹಳೆಯ ಹೆಸರು ‘ಬೆಲ್ಲಾ-1’ ಆಗಿದ್ದು, ಇದು ತೈಲ ನೌಕೆಯಾಗಿದೆ. ಈ ಹಡಗು ಅಮೆರಿಕದ ನಿರ್ಬಂಧಗಳನ್ನು ಉಲ್ಲಂಘಿಸಿ ವೆನೆಜುವೆಲಾ ಮತ್ತು ಇರಾನ್‌ನಿಂದ ತೈಲ ಸಾಗಣೆ ಮಾಡುತ್ತಿತ್ತು ಎಂದು ಆರೋಪಿಸಲಾಗಿದೆ. ಈ ಹಿಂದೆ ಪನಾಮ ಮತ್ತು ಗಯಾನಾ ಧ್ವಜಗಳಡಿ ಸಂಚರಿಸುತ್ತಿದ್ದ ಈ ಹಡಗು, ಅಮೆರಿಕದ ಕಣ್ಗಾವಲಿನಿಂದ ತಪ್ಪಿಸಿಕೊಳ್ಳಲು ಇತ್ತೀಚೆಗಷ್ಟೇ ರಷ್ಯಾ ಧ್ವಜ ಬಳಸಿಕೊಳ್ಳುತ್ತಿದೆ ಮತ್ತು ‘ಮರಿನೇರಾ’ ಎಂದು ಹೆಸರು ಬದಲಿಸಿಕೊಂಡಿದೆ ಎಂದು ದೂರಲಾಗಿದೆ.
ಇನ್ನು ಈ ಕಾರ್ಯಾಚರಣೆಯ ಸಮಯದಲ್ಲಿ ರಷ್ಯಾದ ಜಲಂತರ್ಗಾಮಿ ಮತ್ತು ಯುದ್ಧನೌಕೆಗಳು ಹತ್ತಿರದಲ್ಲೇ ಇದ್ದವು ಎಂದು ವರದಿಯಾಗಿದೆ.
ಈಗಾಗಲೇ ಅಮೆರಿಕ ವೆನೆಜುವೆಲಾ ಅಧ್ಯಕ್ಷ ನಿಕೊಲಾಸ್‌ ಮಡುರೊ ಅವರನ್ನು ಕುಟುಂಬ ಸಹಿತವಾಗಿ ಬಂಧಿಸಿದೆ. ಅದಾದ ಬಳಿಕ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ವೆನೆಜುವೆಲಾ ತೈಲ ನಿಕ್ಷೇಪವನ್ನು ಅಮೆರಿಕವೇ ಬೃಹತ್ ತೈಲ ನಿಕ್ಷೇಪಗಳನ್ನು ಬಳಸಿಕೊಳ್ಳಲಿದೆ ಎಂದು ಘೋಷಣೆ ಮಾಡಿದ್ದಾರೆ. ಇದೀಗ ಅಮೆರಿಕ ವೆನೆಜುವೆಲಾಗೆ ಸಂಬಂಧಿಸಿದ ತೈಲ ಸಾಗಣೆಯನ್ನು ಅಡ್ಡಿಪಡಿಸುವ ಪ್ರಯತ್ನಗಳನ್ನು ತೀವ್ರಗೊಳಿಸುತ್ತಿದೆ.
