ಮಂಡ್ಯ ಜಿಲ್ಲೆಯ ಶ್ರೀರಂಗಪಟ್ಟಣದ ಶೇಷಾದ್ರಿಪುರ ಎಂಜಿನಿಯರಿಂಗ್ ಕಾಲೇಜಿನ ಎನ್ಎಸ್ಎಸ್ ಘಟಕದಿಂದ ನಿರಾಶ್ರಿತರಿಗೆ ಕಂಬಳಿ ಹಾಗೂ ಉಣ್ಣೆ ಬಟ್ಟೆಯನ್ನು ವಿತರಣೆ ಮಾಡುವಂತಹ ಕಾಯಕ ನಡೆಯಿತು. ಪಟ್ಟಣದ ಪಾದಚಾರಿ ಮಾರ್ಗವನ್ನೇ ಆಶ್ರಯ ಮಾಡಿಕೊಂಡು ಬದುಕುತ್ತಿರುವವರಿಗೆ ಹಾಗೂ ನಿರಾಶ್ರಿತರಿಗೆ ಚಳಿಗಾಲದಲ್ಲಿ ತಮ್ಮನ್ನು ತಾವು ರಕ್ಷಿಸಿಕೊಳ್ಳಬೇಕೆಂಬ ಉದ್ದೇಶದಿಂದ ಉಣ್ಣೆ ಬಟ್ಟೆ ಹಾಗೂ ಕಂಬಳಿಯನ್ನು ವಿತರಿಸಲಾಯಿತು.
ಎನ್ಎಸ್ಎಸ್ ಅಧಿಕಾರಿ ಡಾ ರಾಘವೇಂದ್ರ ಮಾತನಾಡಿ, “ಸಾಮಾನ್ಯವಾಗಿ ಚಳಿಯಿಂದ ಸಾವಿರಾರು ಮಂದಿ ಸಾಯುತ್ತಾರೆ. ಉಣ್ಣೆಯ ಬಟ್ಟೆ ಮತ್ತು ಹೊದಿಕೆಗಳ ಕೊರತೆಯಿಂದ ಅವರು ಸಾಯುತ್ತಾರೆ. ಬಡವರು ಮತ್ತು ಅಸಹಾಯಕ ಜನರು ರಸ್ತೆಬದಿಯಲ್ಲಿ ಚಿಂದಿ ಬಟ್ಟೆಯಲ್ಲಿ ಮಲಗುತ್ತಾರೆ ಹಾಗೂ ರಾತ್ರಿಯಿಡೀ ತಣ್ಣನೆಯ ಗಾಳಿಯಿಂದಾಗಿ ಅವರು ನಡುಗುತ್ತಾರೆ. ಕೆಲ ವೃದ್ಧರು ಈ ಚಳಿಗಾಲದಲ್ಲಿ ಚಳಿಯನ್ನು ತಡೆದುಕೊಳ್ಳಲಾರದೆ ಸಾಯುತ್ತಾರೆ” ಎಂದರು.
“ಭಾರತದಲ್ಲಿ ಬಡವರು ಮತ್ತು ಹಿಂದುಳಿದವರಲ್ಲಿ ಅನೇಕರು ಸಾಕಷ್ಟು ಬಟ್ಟೆಯ ಕೊರತೆಯನ್ನು ಹೊಂದಿದ್ದಾರೆ. ಬಟ್ಟೆ ದಾನವು ಹಿಂದುಳಿದವರ ಜೀವನವನ್ನು ಉತ್ತಮಗೊಳಿಸುವುದಲ್ಲದೆ, ಮರುಬಳಕೆಯ ಪರಿಸರ ಸ್ನೇಹಿ ಪರಿಕಲ್ಪನೆಯನ್ನು ಉತ್ತೇಜಿಸುತ್ತದೆ. ನಮ್ಮ ನಗರಗಳ ಮನೆಗಳಲ್ಲಿ, ಇನ್ಮುಂದೆ ನಮಗೆ ಸರಿಹೊಂದದ ಬಟ್ಟೆಗಳನ್ನು ನಾವು ದಾನ ಮಾಡುವ ಮನಸ್ಸು ಮಾಡಬೇಕು” ಎಂದರು.
ಇದನ್ನು ಓದಿದ್ದೀರಾ? ಮಂಡ್ಯ | ಒಂದು ಟ್ವೀಟ್‌ನಿಂದ ಏನಾಗುತ್ತದೆ ಎಂದು ಪ್ರಶ್ನಿಸುವವರಿಗೆ ಇಲ್ಲಿದೆ ಉತ್ತರ!
“ಮಕ್ಕಳು ಬೆಳೆದಂತೆ, ಅವರು ಪ್ರತಿ ವರ್ಷ ತಮ್ಮ ಬಟ್ಟೆಗಳನ್ನು ಮೀರಿಸುತ್ತಾರೆ. ಆದ್ದರಿಂದ ಹಳೆಯ ಬಟ್ಟೆಗಳನ್ನು ಸಂಗ್ರಹಿಸುವ ಇಲ್ಲವೇ ಅವುಗಳನ್ನು ಎಸೆಯುವ ಬದಲು, ಬಳಸಿದ ಬಟ್ಟೆಗಳನ್ನು ದಾನ ಮಾಡಿ. ಏಕೆಂದರೆ ನಿಮಗೆ ವ್ಯರ್ಥವಾದವುಗಳು ಇಲ್ಲದವರಿಗೆ ಸಂಪನ್ಮೂಲವಾಗಬಹುದು. ದಯಮಾಡಿ ನೀವು ಇರುವಂತಹ ಸ್ಥಳದಲ್ಲಿ ಯಾರಾದರೂ ನಿರಾಶ್ರಿತರು ಕಂಡುಬಂದರೆ ದಯಮಾಡಿ ಅವರಿಗೆ ಈ ಚಳಿಗಾಲದಲ್ಲಿ ಅವರಿಗೆ ಸಹಾಯವನ್ನು ಮಾಡಬೇಕು” ಎಂದು ವಿನಂತಿಸಿಕೊಂಡರು.
