ರಾಷ್ಟ್ರೀಯ ಹೆದ್ದಾರಿ-766ರಲ್ಲಿ ಎಂಟು ಅಪಘಾತ ವಲಯಗಳನ್ನು ಗುರುತಿಸಿ ₹127 ಕೋಟಿ ವೆಚ್ಚದಲ್ಲಿ ಮೇಲ್ಸೇತುವೆಗಳು, ಕೆಳಸೇತುವೆಗಳು ಮತ್ತು ಸೇವಾ ರಸ್ತೆಗಳನ್ನು ನವೀಕರಿಸುವ ಮೂಲಕ ರಸ್ತೆ ಅಪಘಾತ ಮುಕ್ತ ಕಾರಿಡಾರ್ ಆಗಿ ಪರಿವರ್ತಿಸಲು ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರ ಸಜ್ಜಾಗಿದೆ.
ಮೈಸೂರು ನಗರದಿಂದ ನಂಜನಗೂಡಿಗೆ ಸಂಪರ್ಕ ಕಲ್ಪಿಸುವ ರಸ್ತೆಯನ್ನು ಅಪಘಾತ ಮುಕ್ತವಾಗಿಸಲು ಸಿದ್ಧತೆ ಮಾಡಿಕೊಳ್ಳಲಾಗಿತ್ತು. ಈ ಮಾರ್ಗವು ನೆರೆಯ ಚಾಮರಾಜನಗರ ಜಿಲ್ಲೆಯ ಗುಂಡ್ಲುಪೇಟೆ ಮೂಲಕ ಕೇರಳ ಮತ್ತು ತಮಿಳುನಾಡು ಅಂತಾರಾಜ್ಯಗಳಿಗೆ ಸಂಪರ್ಕ ಕಲ್ಪಿಸುತ್ತದೆ. ಕಳೆದ ಕೆಲವು ವರ್ಷಗಳಿಂದ ಈ ಮಾರ್ಗದಲ್ಲಿ ಅಂತಾರಾಜ್ಯ ವಾಹನ ಸಂಚಾರ ದಾಖಲೆಯ ಮಟ್ಟದಲ್ಲಿ ಹೆಚ್ಚಾಗಿದೆ. ಏಕೆಂದರೆ ಈ ಮಾರ್ಗವು ದೇವಾಲಯ ಪಟ್ಟಣ ನಂಜನಗೂಡು, ಬಂಡೀಪುರ, ಊಟಿ, ಚಾಮರಾಜನಗರ ಮತ್ತು ಕೇರಳದ ವಯನಾಡ್‌ನಂತಹ ಪ್ರಮುಖ ಪ್ರವಾಸಿ ತಾಣಗಳನ್ನು ಸಂಪರ್ಕಿಸುತ್ತದೆ. ಈ ಹಿನ್ನೆಲೆಯಲ್ಲಿ ಸಂಚಾರ ದಟ್ಟಣೆ ಉಂಟಾಗುತ್ತಿದೆ.
ವಾಹನಗಳ ಚಲನೆಯ ಹೆಚ್ಚಳದಿಂದಾಗಿ, ವಾಹನ ಸವಾರರ ವೇಗ, ನಿರ್ಲಕ್ಷ್ಯ ಮತ್ತು ಅತಿವೇಗದ ಚಾಲನೆ ರಸ್ತೆ ಅಪಘಾತಗಳಿಗೆ ಕಾರಣವಾಗಿದೆ. ಕಳೆದ ಮೂರು ವರ್ಷಗಳಲ್ಲಿ ಈ ಮಾರ್ಗದಲ್ಲಿ ವರದಿಯಾದ ಅಪಘಾತಗಳ ಆಧಾರದ ಮೇಲೆ ಎನ್ಎಚ್ಎಐ ಎಂಟು ಅಪಘಾತ ವಲಯಗಳನ್ನು ಗುರುತಿಸಿದೆ.
ಹೈಮಾಸ್ಟ್ ದೀಪಗಳು, ಸ್ಪೀಡ್ ಬ್ರೇಕರ್‌ಗಳು, ಹಂಪ್ಡ್ ಜೀಬ್ರಾ ಕ್ರಾಸಿಂಗ್, ಜೀಬ್ರಾ ಲೈನ್ ಹಂಪ್ ಚಿಹ್ನೆಗಳು, ಸುಧಾರಿತ ಜಂಕ್ಷನ್‌ಗಳು, ರಸ್ತೆ ಗುರುತುಗಳು ಮತ್ತು ಸಿಗ್ನಲ್‌ಗಳು, ಚೌಕಗಳು, ರಸ್ತೆ ಅಗಲೀಕರಣ ಸೇರಿದಂತೆ ಇತರ ಮೂಲಸೌಕರ್ಯ ಬದಲಾವಣೆಗಳನ್ನು ಸ್ಥಾಪಿಸಲು ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರವು ಯೋಜಿಸಿದ್ದು, ಪೊಲೀಸರ ನಿರ್ದೇಶನದ ಮೇರೆಗೆ ಎಂಟು ಅಪಘಾತ ವಲಯಗಳಲ್ಲಿ ಇತರೆ ಪರಿಹಾರ ಕ್ರಮಗಳನ್ನು ಪ್ರಾರಂಭಿಸಿದರು. ರಸ್ತೆ ಸುಧಾರಣಾ ಕಾರ್ಯಗಳನ್ನು ಆರಂಭಿಸುವ ಮೂಲಕ ರಸ್ತೆಯ ಉದ್ದಕ್ಕೂ ವಾಹನಗಳು ಸ್ಕಿಡ್‌ ಆಗುವುದನ್ನು ತಡೆಯುವ ಗುರಿಯನ್ನು ಹೊಂದಿವೆ.
ನಂಜನಗೂಡು ತಾಲೂಕಿನ ಯಲಚಗೇರಿಯಲ್ಲಿ ಮೇಲ್ಸೇತುವೆ, ಕಳಲೆ ಗೇಟ್ ಬಳಿ ಅಂಡರ್ ಪಾಸ್ ಮತ್ತು ಹೊಸಹಳ್ಳಿ ಬಳಿ ಅಂಡರ್ ಪಾಸ್ ನಿರ್ಮಿಸಲು ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರ ಪ್ರಸ್ತಾಪಿಸಿದೆ. ಕಡಕೋಳ ಬಳಿ ಪಾದಚಾರಿಗಳು ಮತ್ತು ಲಘು ವಾಹನಗಳ ಸಂಚಾರಕ್ಕೆ ಪ್ರತ್ಯೇಕ ಅಂಡರ್ ಪಾಸ್, ಬಂಡಿಪಾಳ್ಯ ಎಪಿಎಂಸಿ ಬಳಿ ಎರಡು ಅಂಡರ್ ಪಾಸ್‌ಗಳು, ಗಣಪತಿ ಸಚ್ಚಿದಾನಂದ ಆಶ್ರಮದ ಬಳಿ ಮತ್ತೊಂದು ಅಂಡರ್ ಪಾಸ್, ಕೆಂಪಯ್ಯಹುಂಡಿ ಬಳಿ ಮತ್ತು ಬನ್ನಿಕುಪ್ಪೆ ಬಳಿ ಪ್ರತ್ಯೇಕ ಅಂಡರ್ ಪಾಸ್ ನಿರ್ಮಿಸಲು ಯೋಜಿಸಲಾಗಿದೆ.
ಈ ಸುದ್ದಿ ಓದಿದ್ದೀರಾ? ಉಡುಪಿ | ಮರಕ್ಕೆ ಡಿಕ್ಕಿ ಹೊಡೆದ ಕಾರು, ಮಹಿಳೆ ಸಾವು, ನಾಲ್ವರ ಸ್ಥಿತಿ ಗಂಭೀರ
“ರಾಷ್ಟ್ರೀಯ ಹೆದ್ದಾರಿ-766ರ ರಸ್ತೆಯುದ್ದಕ್ಕೂ ಅಂಡರ್ ಪಾಸ್‌ಗಳು ಮತ್ತು ಮೇಲ್ಸೇತುವೆ ಕಾಮಗಾರಿಗಳ ಆರಂಭಿಕ ಹಂತ ಪ್ರಾರಂಭವಾಗಿದೆ. ಗುತ್ತಿಗೆದಾರರಿಗೆ ನಿಯೋಜಿಸಲಾದ ಎಲ್ಲ ಕೆಲಸಗಳನ್ನು ಹಂತ ಹಂತವಾಗಿ ಪೂರ್ಣಗೊಳಿಸಲಾಗುವುದು” ಎಂದು ಬೆಂಗಳೂರಿನ ಎನ್ಎಚ್ಎಐನ ಮುಖ್ಯ ಎಂಜಿನಿಯರ್ ರಾಹುಲ್ ಕುಮಾರ್ ಗುಪ್ತಾ ತಿಳಿಸಿದ್ದಾರೆ.
