ಪವಿತ್ರ ರಮ್ಝಾನ್ ಮಾಸದಲ್ಲಿ ಉತ್ತರಾಖಂಡದ ಬಿಜೆಪಿ ಸರ್ಕಾರ ಹಲವಾರು ಅಕ್ರಮಗಳ ನೆಪವೊಡ್ಡಿ ರಾಜ್ಯಾದ್ಯಂತ 136 ಮದರಸಾಗಳಿಗೆ ಬೀಗ ಹಾಕಿದೆ. ಈ ಕ್ರಮವನ್ನು ‘ಮುಸ್ಲಿಮ್ ಧರ್ಮ ವಿರೋಧಿ’ ಎಂದು ಇಸ್ಲಾಮ್ ಧರ್ಮಗುರುಗಳು ಖಂಡಿಸಿದ್ದಾರೆ. ಮದರಸಾ ಮಂಡಳಿಯಿಂದ ಅನುಮತಿ ಪಡೆದಿಲ್ಲವೆಂದು ಹರಿದ್ವಾರದ ಎರಡು ಮದರಸಾಗಳಿಗೆ ಬೀಗಮುದ್ರೆ ಹಾಕಲಾಗಿದೆ. ಸ್ಥಳೀಯ ಅಭಿವೃದ್ಧಿ ಪ್ರಾಧಿಕಾರದಿಂದ ಅನುಮತಿ ಪಡೆದಿಲ್ಲವೆಂದು ಡೆಹರಾದೂನ್ ನ ಮದರಸಾವೊಂದರ ಮೊದಲ ಅಂತಸ್ತನ್ನು ಮುಚ್ಚಲಾಗಿದೆ. ಮೊದಲ ಅಂತಸ್ತು ಮಾತ್ರವಲ್ಲ, ಇಡೀ ಮದರಾಸವನ್ನು ಮುಚ್ಚುವ ಉದ್ದೇಶದಿಂದ ಬಂದಿದ್ದರು ಅಧಿಕಾರಿಗಳು. ಆದರೆ ನಾವು ಪ್ರತಿಭಟಿಸಿದೆವು. ಮದರಸಾದ ನಿವೇಶನ ಮತ್ತು ಕಟ್ಟಡಕ್ಕೆ ಸಂಬಂಧಿಸಿದ ಕಾಗದಪತ್ರಗಳನ್ನು ತೋರಿಸಿದೆವು. ಅಂತಿಮವಾಗಿ ಮೊದಲ ಅಂತಸ್ತಿಗೆ ಮಾತ್ರವೇ ಬೀಗಮುದ್ರೆ ಹಾಕಿದರು ಎಂದ ಮದರಸಾ ಸದಸ್ಯರೊಬ್ಬರು ತಿಳಿಸಿದ್ದಾರೆ.
ಈ ಕಟ್ಟಡ 1972ರಿಂದ ಇಲ್ಲಿದೆ. ಎಂಟನೆಯ ತರಗತಿಯವರೆಗೆ ಶಿಕ್ಷಣ ನೀಡಲಾಗುತ್ತಿದೆ. ಇಷ್ಟು ಕಾಲ ಈ ಅಧಿಕಾರಿಗಳು ಯಾಕೆ ಬಂದಿರಲಿಲ್ಲ ಎಂಬುದು ಅವರ ಪ್ರಶ್ನೆಯಾಗಿತ್ತು. ಹಲ್ದ್ವಾನಿ, ನೈನಿತಾಲ್ ನ ಮೂರು ಮದರಸಾಗಳನ್ನು ಕಳೆದ ಸೋಮವಾರ ಮುಚ್ಚಿಸಲಾಗಿದೆ. ಈ ಮದರಸಾಗಳು ಕೂಡ ಮದರಸಾ ಮಂಡಳಿಯ ಮಾನ್ಯತೆ ಪಡೆದಿರಲಿಲ್ಲವೆಂಬ ಕಾರಣ ನೀಡಲಾಗಿದೆ.
ಮದರಸಾಗಳ ಮೇಲಿನ ಈ ದಾಳಿಯ ಉಸ್ತುವಾರಿಯನ್ನು ಖುದ್ದು ಮುಖ್ಯಮಂತ್ರಿ ಪುಷ್ಕರ್ ಸಿಂಗ್ ಧಾಮಿ ಅವರೇ ವಹಿಸಿದ್ದಾರೆ. ‘ಅಕ್ರಮ ಹಣದಿಂದ ಅಕ್ರಮ ಕಟ್ಟಡಗಳಲ್ಲಿ ನಡೆಯುವ ಯಾವುದೇ ಸಂಸ್ಥೆಗಳಿಗೆ ಉತ್ತರಾಖಂಡದಲ್ಲಿ ಅವಕಾಶವಿಲ್ಲ. ರಾಜ್ಯದಲ್ಲಿ 500 ಅಕ್ರಮ ಮದರಸಾಗಳಿವೆ’ ಎಂಬುದು ಅವರ ಹೇಳಿಕೆ.
‘ನಮ್ಮ ಸಂಸ್ಥೆಗಳ ಮೇಲೆ ರಾಜ್ಯ ಸರ್ಕಾರದ ಕಾನೂನುಬಾಹಿರ ಕ್ರಮದ ವಿರುದ್ಧ ಸುಪ್ರೀಮ್ ಕೋರ್ಟಿನಲ್ಲಿ ಅರ್ಜಿ ಸಲ್ಲಿಸಿದ್ದೇವೆ’ ಎಂದು ಜಮಾಯತ್ ಉಲೇಮಾ ಹಿಂದ್ ನ ಪ್ರಧಾನಕಾರ್ಯದರ್ಶಿ ಮತ್ತು ಇಸ್ಲಾಮಿಕ್ ವಿದ್ವಾಂಸರೂ ಆದ ಅಬ್ದುಲ್ ರಝಾಕ್ ಹೇಳಿದ್ದಾರೆ.
‘ಉತ್ತರಪ್ರದೇಶದಲ್ಲಿಯೂ ಹಲವು ಮದರಸಾಗಳಿಗೆ ಸರ್ಕಾರ ನೋಟಿಸುಗಳನ್ನು ನೀಡಿದೆ. ಸುಪ್ರೀಮ್ ಕೋರ್ಟಿಗೆ ಅರ್ಜಿ ಹಾಕಿ ತಡೆಯಾಜ್ಞೆ ತಂದಿದ್ದೆವು. ಉತ್ತರಾಖಂಡದ ಕ್ರಮಕ್ಕೂ ತಡೆಯಾಜ್ಞೆ ತರಲಿದ್ದೇವೆ. ಸರ್ಕಾರ ನಮ್ಮ ಶಿಕ್ಷಣ ಕೇಂದ್ರಗಳು ಮತ್ತು ಧಾರ್ಮಿಕ ಕೇಂದ್ರಗಳ ವಿರುದ್ಧ ಯಾವುದೇ ಪುರಾವೆಯಿಲ್ಲದೆ ಪಿತೂರಿ ನಡೆಸಿದೆ. ವಕ್ಫ್ ಮಂಡಳಿಯಲ್ಲಿ ನೋಂದಣಿ ಮಾಡಿದ ಯಾವುದೇ ಸರ್ಕಾರಿ ಸಂಸ್ಥೆಯಲ್ಲಿ ಮದರಸಾವನ್ನು ನೋಂದಣಿ ಮಾಡಿಕೊಳ್ಳಬಹುದಾದ ಅವಕಾಶವಿದೆ’ ಎಂದಿದ್ದಾರೆ.
‘ಮದರಸಾಗಳಿಗೆ ಎಲ್ಲಿಂದ ಹಣ ಬರುತ್ತದೆಂಬ ಎಲ್ಲ ಮಾಹಿತಿಯೂ ಸರ್ಕಾರದ ಬಳಿ ಇದೆ. ಎಲ್ಲ ಹಣವೂ ಸರ್ಕಾರಿ ಅನುಮೋದನೆಯೊಂದಿಗೆ ಕಾಯಿದೆ ಕಾನೂನು ಪ್ರಕಾರವೇ ಬರುತ್ತಿದೆ. ಆದರೆ ಬಿಜೆಪಿ ಸರ್ಕಾರ ನಮ್ಮ ವಿರುದ್ಧ ಸಾರ್ವಜನಿಕ ಅಭಿಪ್ರಾಯ ರೂಪಿಸಲು ಮುಂದಾಗಿದೆ’ ಎಂದು ಅವರು ದೂರಿದ್ದಾರೆ. ಯಾವುದೇ ನೋಟಿಸು ನೀಡದೆ ಮದರಾಸಗಳ ಮೇಲೆ ಕ್ರಮ ಜರುಗಿಸಲಾಗುತ್ತಿದೆ. ಪವಿತ್ರ ರಮ್ಝಾನ್ ಮಾಸದಲ್ಲಿ ನಮ್ಮನ್ನು ನೋಯಿಸುವ ಕ್ರಮವಿದು ಎಂದು ಮುಸ್ಲಿಮ್ ಸೇವಾ ಸಂಘಟನೆಯ ಅಧ್ಯಕ್ಷ ನಯೀಂ ಖುರೇಶಿ ಹೇಳಿದ್ದಾರೆ.
