ಏಪ್ರಿಲ್ ತಿಂಗಳಲ್ಲಿ ಜಿಲ್ಲೆಯ ವಿವಿಧ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ಕಾನೂನು ಬಾಹಿರವಾಗಿ ನಡೆದ ಜೂಜಾಟ, ಮಟ್ಕಾ, ಕ್ರಿಕೆಟ್ ಬೆಟ್ಟಿಂಗ್, ಗಾಂಜಾ, ಪಡಿತರ ಅಕ್ಕಿ ಅಕ್ರಮ ಸಂಗ್ರಹ, ಅಕ್ರಮ ಮದ್ಯ ಮಾರಾಟ, ನಕಲಿ ನೋಟು ಸಂಬಂಧ 184 ಪ್ರಕರಣಗಳನ್ನು ದಾಖಲಿಸಿ ಒಟ್ಟು 355 ಜನ ಆರೋಪಿಗಳ ವಿರುದ್ಧ ಕಾನೂನು ಕ್ರಮ ಜರುಗಿಸಲಾಗಿದೆ ಎಂದು ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಪ್ರದೀಪ ಗುಂಟಿ ತಿಳಿಸಿದ್ದಾರೆ.
ಬಂಧಿತರಿಂದ ₹30.32 ಲಕ್ಷ ಮೌಲ್ಯದ ವಸ್ತುಗಳನ್ನು ಜಪ್ತಿ ಮಾಡಿಕೊಂಡು ಆರೋಪಿತರನ್ನು ನ್ಯಾಯಾಲಯದ ವಶಕ್ಕೆ ಒಪ್ಪಿಸಲಾಗಿದೆ ಎಂದು ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.
ಪ್ರಕರಣಗಳ ವಿವರ ಹೀಗಿದೆ:
26 ಜೂಜಾಟ ಪ್ರಕರಣಗಳಲ್ಲಿ 156 ಆರೋಪಿತರಿಂದ ₹1.24 ಲಕ್ಷ, 20 ಕ್ರಿಕೆಟ್ ಬೆಟ್ಟಿಂಗ್ ಪ್ರಕರಣಗಳಲ್ಲಿ 34 ಆರೋಪಿಗಳ ಬಳಿಯಿಂದ ₹67,350 ಸಾವಿರ, 48 ಮಟ್ಕಾ ಪ್ರಕರಣಗಳಲ್ಲಿ 56 ಆರೋಪಿತರಿಂದ ₹58,356, ಪಡಿತರ ಅಕ್ಕಿ ಅಕ್ರಮ ಸಂಗ್ರಹ 2 ಪ್ರಕರಣಗಳಲ್ಲಿ 3 ಆರೋಪಿತರಿಂದ ₹26,800 , ಡ್ರಗ್ಸ್ 2 ಪ್ರಕರಣಗಳಲ್ಲಿ 5 ಆರೋಪಿತರಿಂದ 26.30 ಲಕ್ಷ, ಹಾಗೂ 85 ಅಬಕಾರಿ ಪ್ರಕರಣಗಳಲ್ಲಿ 97 ಆರೋಪಿಗಳ ಬಳಿಯಿಂದ ₹1.11 ಲಕ್ಷ ಹಾಗೂ 1 ನಕಲಿ ನೋಟು ಪ್ರಕರಣದಲ್ಲಿ 4 ಆರೋಪಿಗಳ ಬಳಿ 14,700ಮೌಲ್ಯದ ವಸ್ತುಗಳನ್ನು ಜಪ್ತಿ ಮಾಡಲಾಗಿದೆ.
‘ಆರೋಪಿಗಳು ಪದೇ ಪದೇ ಕಾನೂನು ವಿರುದ್ದ ಚಟುವಟಿಕೆಗಳಲ್ಲಿ ತೊಡಗಿದರೆ ಅಂತಹ ಆರೋಪಿಗಳ ವಿರುದ್ಧ ಕಾನೂನು ಕ್ರಮ ಜರುಗಿಸಿ ಗಡಿಪಾರು ಮಾಡಲಾಗುವುದುʼ ಎಂದು ಎಸ್ಪಿ ಪ್ರದೀಪ ಗುಂಟಿ ಎಚ್ಚರಿಕೆ ನೀಡಿದ್ದಾರೆ.
