ಮಾವು ಕೇವಲ ಒಂದು ಹಣ್ಣಲ್ಲ, ಇದು ಭಾರತ, ಪಾಕಿಸ್ತಾನ, ಫಿಲಿಪೈನ್ಸ್ ಮತ್ತು ಬಾಂಗ್ಲಾದೇಶದಂತಹ ದೇಶಗಳಲ್ಲಿ ಸಾಂಸ್ಕೃತಿಕ ಮತ್ತು ಧಾರ್ಮಿಕ ಮೌಲ್ಯವನ್ನು ಹೊಂದಿದೆ. ಭಾರತದಲ್ಲಿ, ಮಾವು ಪ್ರೀತಿ, ಸಮೃದ್ಧಿ ಮತ್ತು ಫಲವತ್ತತೆಯ ಸಂಕೇತವಾಗಿದೆ.
ಪ್ರತಿ ವರ್ಷ ಜುಲೈ 22ರಂದು ಆಚರಿಸಲಾಗುವ ರಾಷ್ಟ್ರೀಯ ಮಾವು ದಿನ(ನ್ಯಾಷನಲ್ ಮ್ಯಾಂಗೋ ಡೇ) ಒಂದು ಸಂತೋಷದಾಯಕ ಸಂದರ್ಭವಾಗಿದೆ. ಮಾವು ಜಗತ್ತಿನಾದ್ಯಂತ ಪ್ರೀತಿಪಾತ್ರವಾದ ಉಷ್ಣವಲಯದ ಹಣ್ಣಾಗಿದ್ದು, ಇದರ ಸ್ವಾದ, ಸಾಂಸ್ಕೃತಿಕ ಮಹತ್ವ ಮತ್ತು ಆರೋಗ್ಯ ಪ್ರಯೋಜನಗಳು ಅನನ್ಯವಾಗಿವೆ. ಭಾರತದಲ್ಲಿ ಉಗಮವಾದ ಮಾವು, ‘ಹಣ್ಣುಗಳ ರಾಜ’ ಎಂದೇ ಗುರುತಿಸಿಕೊಂಡಿದೆ. ಮಾವಿನ ಹಣ್ಣು, ತನ್ನ ಸಿಹಿ-ಕಹಿ ಮತ್ತು ಹುಳಿಭರಿತ ರುಚಿಯಿಂದ ಮಾತ್ರವಲ್ಲ, ಐದು ಸಾವಿರ ವರ್ಷಗಳಿಗಿಂತಲೂ ಹೆಚ್ಚಿನ ಸಾಂಸ್ಕೃತಿಕ, ಧಾರ್ಮಿಕ ಮತ್ತು ಆರ್ಥಿಕ ಪರಂಪರೆಯಿಂದ ಜಗತ್ತಿನ ಗಮನವನ್ನು ಸೆಳೆದಿದೆ.
ಭಾರತದ ರಾಷ್ಟ್ರೀಯ ತೋಟಗಾರಿಕೆ ಮಂಡಳಿ(National Horticulture Board of India)ಯಿಂದ 1987ರಲ್ಲಿ ಆರಂಭವಾದ ‘ನ್ಯಾಷನಲ್ ಮ್ಯಾಂಗೋ ಡೇ’ ಅಂತಾರಾಷ್ಟ್ರೀಯ ಮಾವಿನ ಉತ್ಸವ(International Mango Festival)ಕ್ಕೆ ಕಾರಣವಾಗಿದೆ. ಈ ಉತ್ಸವದಲ್ಲಿ ಭಾರತದ ರಾಷ್ಟ್ರೀಯ ಹಣ್ಣಾದ ಮಾವಿನ ರುಚಿ, ವೈವಿಧ್ಯತೆ ಮತ್ತು ಸಾಂಸ್ಕೃತಿಕ ಮೌಲ್ಯಕ್ಕೆ ಹೇರಳವಾದ ಗೌರವ ದೊರೆಯಲು ಆರಂಭವಾಯಿತು. ದೆಹಲಿಯಲ್ಲಿ ನಡೆಯುವ ಈ ಉತ್ಸವವು ಮಾವಿನ ರೈತರು, ಆಹಾರ ಪ್ರಿಯರು ಮತ್ತು ತಜ್ಞರನ್ನು ಒಟ್ಟುಗೂಡಿಸುವ ವೇದಿಕೆಯಾಯಿತು. ಕಾಲಾನಂತರದಲ್ಲಿ, ಈ ಉತ್ಸವದಿಂದ ಪ್ರೇರಿತವಾಗಿ, ಜುಲೈ 22ರಂದು ಜಾಗತಿಕವಾಗಿ ‘ನ್ಯಾಷನಲ್ ಮ್ಯಾಂಗೋ ಡೇ’ ಆಚರಣೆಗೆ ಒಡಗೂಡಿತು, ಇದು ಭಾರತದ ಈ ಹಣ್ಣಿನ ಜಾಗತಿಕ ಜನಪ್ರಿಯತೆಯನ್ನು ಎತ್ತಿ ತೋರಿತು.
ಮಾವಿನ ಇತಿಹಾಸವು 4ರಿಂದ 5 ಸಾವಿರ ವರ್ಷಗಳಿಗಿಂತಲೂ ಹಿಂದಿನದು. ಇದು ಈಶಾನ್ಯ ಭಾರತ, ಬಾಂಗ್ಲಾದೇಶ ಮತ್ತು ವಾಯವ್ಯ ಮಯಾನ್ಮಾರ್‌ನ ಗಡಿಭಾಗದಲ್ಲಿ ಉಗಮವಾಯಿತು. 2019ರ ಒಂದು ಅಧ್ಯಯನವು ಮಾವಿನ ತಳಿಯ ವೈವಿಧ್ಯತೆಯು ಆಗ್ನೇಯ ಏಷ್ಯಾದಲ್ಲಿ ಹೆಚ್ಚಾಗಿರುವುದನ್ನು ತಿಳಿಸಿತು. ಇದರಿಂದ ಆಗ್ನೇಯ ಏಷ್ಯಾದಲ್ಲಿ ಮಾವಿನ ತಳಿಯ ಉಗಮವಾಗಿರಬಹುದು ಎಂಬುದನ್ನು ಸೂಚಿಸುತ್ತದೆ. ಭಾರತದಲ್ಲಿ ವ್ಯಾಪಕವಾಗಿ ಕಂಡುಬರುವ ಮಾವಿನ ಕೃಷಿಯಿಂದ ಜಗತ್ತಿನಾದ್ಯಂತ ಈ ಹಣ್ಣುಗಳು ಹರಡಿದವು.
300-400 AD(3-4ನೇ ಶತಮಾನ)ಯಿಂದ ಮಾನವರು ಮಾವಿನ ಬೀಜಗಳನ್ನು ಏಷ್ಯಾದಿಂದ ಮಧ್ಯಪ್ರಾಚ್ಯ, ಪೂರ್ವ ಆಫ್ರಿಕಾ ಮತ್ತು ದಕ್ಷಿಣ ಅಮೆರಿಕಕ್ಕೆ ಸಾಗಿಸಿದರು. ಇದು ಮಾವಿನ ಹಣ್ಣಿನ ವ್ಯಾಪಾರ ಮತ್ತು ಕೃಷಿಯ ವಿಸ್ತರಣೆಗೆ ಕಾರಣವಾಯಿತು. ವಾಣಿಜ್ಯ ಮಾರ್ಗಗಳು ಮತ್ತು ಸಾಂಸ್ಕೃತಿಕ ವಿನಿಮಯದ ಮೂಲಕ ಮಾವು ಸಾಗಾಟ ಸಂಭವಿಸಿತು. ವಿಶೇಷವಾಗಿ ವ್ಯಾಪಾರಿಗಳು ಮತ್ತು ಪ್ರಯಾಣಿಕರು ಭಾರತದಿಂದ ಮಾವಿನ ಬೀಜಗಳನ್ನು ತೆಗೆದುಕೊಂಡು ಹೋದರು. ಇದರಿಂದಾಗಿ ಮಾವು ಈ ಪ್ರದೇಶಗಳಲ್ಲಿ ಪ್ರಮುಖ ಬೆಳೆಯಾಗಿ ಬೆಳೆಯಿತು. 16ನೇ ಶತಮಾನದಲ್ಲಿ ಪೋರ್ಚುಗೀಸ್ ವ್ಯಾಪಾರಿಗಳು ಮಾವಿನ ಹಣ್ಣನ್ನು ಪಶ್ಚಿಮ ಗೋಳಾರ್ಧಕ್ಕೆ ತಂದರು, 1833ರಲ್ಲಿ ಫ್ಲೋರಿಡಾದಲ್ಲಿ ಮಾವಿನ ಕೃಷಿಯ ಮೊದಲ ಪ್ರಯತ್ನ ನಡೆಯಿತು.
ಪ್ರಸ್ತುತ ವರ್ಷದಲ್ಲಿ ಮಾವಿನ ಹಂಗಾಮಿನ ಆರಂಭದಲ್ಲಿಯೇ ಈ ಬಾರಿ ಬೆಲೆಯಲ್ಲಿ ಇಳಿಕೆಯಾಗಿದ್ದರಿಂದ ರೈತರು ತೀವ್ರ ನಷ್ಟ ಅನುಭವಿಸಿದರು. ಅಲ್ಲದೆ ಬೆಂಬಲ ಬೆಲೆ ಘೋಷಿಸುವಂತೆ ಆಗ್ರಹಿಸಿ ಮಾವಿನ ಹಣ್ಣುಗಳನ್ನು ರಸ್ತೆಗೆ ಸುರಿದು ಪ್ರತಿಭಟನೆ ನಡೆಸಿದರು. ಆಂಧ್ರಪ್ರದೇಶದ ಮಾದರಿಯಲ್ಲಿ ರಾಜ್ಯ ಸರ್ಕಾರ ಈ ಕೂಡಲೇ ಬೆಂಬಲ ಬೆಲೆ ಘೋಷಿಸಬೇಕೆಂದು ಆಗ್ರಹಿಸಿದರೂ ಯಾವುದೇ ಪ್ರಯೋಜನವಾಗಲಿಲ್ಲ. ಈ ಬಾರಿ ಒಂದು ಟನ್‌ ಮಾವಿನ ಹಣ್ಣು ಕೇವಲ 3000 – 4000 ರೂಪಾಯಿಗೆ ಬಿಕರಿಯಾಯಿತು. ಬಹುತೇಕ ರೈತರು ಹಣ್ಣುಗಳನ್ನು ಕೀಳಲು ಹಿಂಜರಿಯುತ್ತಿದ್ದು, ಮರದಲ್ಲಿಯೇ ಬಿಟ್ಟಿದ್ದಾರೆ. ಯಾಕೆಂದರೆ ಹಣ್ಣುಗಳನ್ನು ಕಿತ್ತು ಮಾರುಕಟ್ಟೆಗೆ ತಂದರೆ ಅದರ ವೆಚ್ಚವೂ ಸಿಗುವುದಿಲ್ಲವೆಂದು ರೈತರು ಬೇಸರ ವ್ಯಕ್ತಪಡಿಸಿದ್ದಾರೆ.
ಮಾವಿನ ಸಾಂಸ್ಕೃತಿಕ ಮಹತ್ವ
ಮಾವು ಕೇವಲ ಒಂದು ಹಣ್ಣಲ್ಲ, ಇದು ಭಾರತ, ಪಾಕಿಸ್ತಾನ, ಫಿಲಿಪೈನ್ಸ್ ಮತ್ತು ಬಾಂಗ್ಲಾದೇಶದಂತಹ ದೇಶಗಳಲ್ಲಿ ಸಾಂಸ್ಕೃತಿಕ ಮತ್ತು ಧಾರ್ಮಿಕ ಮೌಲ್ಯವನ್ನು ಹೊಂದಿದೆ. ಭಾರತದಲ್ಲಿ, ಮಾವು ಪ್ರೀತಿ, ಸಮೃದ್ಧಿ ಮತ್ತು ಫಲವತ್ತತೆಯ ಸಂಕೇತವಾಗಿದೆ. ಮಾವಿನ ಎಲೆಗಳನ್ನು ವಿವಾಹಗಳು ಮತ್ತು ಧಾರ್ಮಿಕ ಸಮಾರಂಭಗಳಲ್ಲಿ ‘ತೋರಣ’ ರೂಪದಲ್ಲಿ ಬಾಗಿಲ ಬಳಿ ತೂಗುಹಾಕಲಾಗುತ್ತದೆ. ಇದು ಶುಭ ಮತ್ತು ಸಮೃದ್ಧಿಯನ್ನು ಸೂಚಿಸುತ್ತದೆ.
ಕವಿ ಕಾಳಿದಾಸನಂತಹ ಸಾಹಿತಿಗಳು ಮಾವಿನ ಸೌಂದರ್ಯವನ್ನು ಕಾವ್ಯದಲ್ಲಿ ವರ್ಣಿಸಿದ್ದಾರೆ. ಗೌತಮ ಬುದ್ಧನಿಗೆ ವಿಶ್ರಾಂತಿಗಾಗಿ ಮಾವಿನ ತೋಪನ್ನು ನಿರ್ಮಿಸಲಾಗಿತ್ತು ಎಂಬ ದಂತಕಥೆಗಳಿವೆ. ಮೊಘಲ್ ಚಕ್ರವರ್ತಿಗಳಾದ ಅಕ್ಬರ್ ಮತ್ತು ಬಾಬರ್ ಮಾವಿನ ಮೇಲಿನ ತಮ್ಮ ಪ್ರೀತಿಯಿಂದಾಗಿ ಲಕ್ಷಾಂತರ ಮಾವಿನ ಮರಗಳನ್ನು ನೆಟ್ಟರು. ಉದಾಹರಣೆಗೆ, ಅಕ್ಬರ್ ಬಿಹಾರದ ದರ್ಭಾಂಗದಲ್ಲಿ 1,00,000 ಮಾವಿನ ಮರಗಳನ್ನು ನೆಟ್ಟಿದ್ದನ್ನು ಕಾಣಬಹುದು.
ಭಾರತದಲ್ಲಿ, ಮಾವಿನ ತೋಪು ಸ್ನೇಹ ಮತ್ತು ಪ್ರೀತಿಯ ಗಾಢವಾದ ಭಾವವನ್ನು ವ್ಯಕ್ತಪಡಿಸುತ್ತದೆ. ಇದೇ ರೀತಿ, ಫಿಲಿಪೈನ್ಸ್‌ನ ಗುಯಿಮಾರಸ್‌ನಲ್ಲಿ ಪ್ರತಿ ವರ್ಷ ‘ಮಂಗ್ಗಹನ್ ಫೆಸ್ಟಿವಲ್'(ಮಾವಿನ ಹಣ್ಣಿನ ಹಬ್ಬ) ಎಂಬ ಉತ್ಸವವನ್ನು ಆಚರಿಸುತ್ತಾರೆ. ಈ ಮೂಲಕ ಮಾವಿನ ಸಿಹಿಯಾದ ಸ್ವಾದವನ್ನು ಅನುಭವಿಸುತ್ತಾರೆ.
ಭಾರತದಲ್ಲಿ ಅಂದಾಜು ಒಂದು ಸಾವಿರ ಮಾವಿನ ವಿಧಗಳು ಇವೆ. ಪ್ರತೀ ವಿಧದ ಮಾವು ಕೂಡ ತನ್ನದೇ ಆದ ರುಚಿ ಹೊಂದಿದೆ. ಲಂಗ್ರಾ, ಕೇಸರ್, ಆಲ್ಫನ್ಸೊ, ರಸಪುರಿ, ಹಿಮಸಾಗರ್, ಬಾದಾಮಿ, ಮಲ್ಲಿಕಾ, ಆಪೂಸ್‌, ಮಲ್‌ಗೋವಾ, ಬಂಗನಪಲ್ಲಿ ಮತ್ತು ತೋತಾಪುರಿ ದೇಶದಲ್ಲಿ ಜನಪ್ರಿಯವಾಗಿರುವ ಕೆಲವು ವಿಧಗಳು.
ಸದಾ ಹಸಿರೆಲೆಗಳಿಂದ ಕೂಡಿರುವ ಮಾವಿನ ಮರ ಅಂದಾಜು 15 ಮೀಟರ್‌ಗಳಷ್ಟು ಎತ್ತರ ಬೆಳೆಯುತ್ತದೆ. ಮಾವಿನ ಹಣ್ಣಿನಲ್ಲಿ ಪೊಟ್ಯಾಸಿಯಂ, ಕ್ಯಾಲ್ಷಿಯಂ, ಫಾಸ್ಪರಸ್ ಮತ್ತು ಕಾರ್ಬೊಹೈಡ್ರೇಟ್‌ಗಳು ಸೇರಿದಂತೆ ದೇಹಕ್ಕೆ ಅಗತ್ಯವಾಗಿ ಬೇಕಾಗಿರುವ ಪೌಷ್ಟಿಕಾಂಶಗಳು ಸಿಗುತ್ತವೆ.
ಮಾವಿನ ಆರೋಗ್ಯ ಪ್ರಯೋಜನಗಳು
ಮಾವು ಕೇವಲ ರುಚಿಕರವಾದ ಹಣ್ಣು ಮಾತ್ರವಲ್ಲ, ಇದು ಆರೋಗ್ಯಕ್ಕೆ ಅತ್ಯಂತ ಲಾಭದಾಯಕವಾಗಿದೆ. ಒಂದು ಕಪ್ (3/4 ಕಪ್) ಕತ್ತರಿಸಿದ ಮಾವಿನಲ್ಲಿ ಕೇವಲ 70 ಕ್ಯಾಲೊರಿಗಳಿರುತ್ತವೆ. ಇದು ಕೊಲೆಸ್ಟರಾಲ್, ಸೋಡಿಯಂ ಮತ್ತು ಕೊಬ್ಬು-ಮುಕ್ತವಾಗಿದೆ.
ಮಾವಿನ ಹಣ್ಣು ವಿಟಮಿನ್‌ಗಳಾದ A, C ಮತ್ತು E, B-ಕಾಂಪ್ಲೆಕ್ಸ್, ಫೈಬರ್ ವಿಟಮಿನ್‌ಗಳ ಜತೆಗೆ ಆಂಟಿಆಕ್ಸಿಡೆಂಟ್‌ಗಳನ್ನೂ ಒಳಗೊಂಡಿದೆ. ಇದರಲ್ಲಿ ಪೊಟ್ಯಾಸಿಯಮ್, ಮೆಗ್ನೀಶಿಯಂ ಮತ್ತು ಕಬ್ಬಿಣದಂತಹ ಖನಿಜಗಳಿವೆ. ಆಂಟಿಆಕ್ಸಿಡೆಂಟ್‌ಗಳಾದ ಕ್ವೆರ್ಸೆಟಿನ್, ಆಸ್ಟ್ರಾಗಲಿನ್ ಮತ್ತು ಗ್ಯಾಲಿಕ್ ಆಮ್ಲವು ದೇಹವನ್ನು ರಕ್ಷಿಸುತ್ತದೆ.
ವಿಟಮಿನ್ Cಯ ಸಮೃದ್ಧಿಯಿಂದಾಗಿ, ಮಾವು ರೋಗನಿರೋಧಕ ಶಕ್ತಿಯನ್ನು ಬಲಗೊಳಿಸುತ್ತದೆ. ಶೀತ, ಕೆಮ್ಮು ಮತ್ತು ಸೋಂಕುಗಳನ್ನು ತಡೆಯಲು ಸಹಾಯ ಮಾಡುತ್ತದೆ. ವಿಟಮಿನ್ A ಮತ್ತು ಬೀಟಾ-ಕ್ಯಾರೋಟಿನ್‌ನಿಂದ ಕಣ್ಣಿನ ದೃಷ್ಟಿ ಸುಧಾರಿಸುತ್ತದೆ. ಅಲ್ಲದೆ ಕಣ್ಣಿನ ಸಮಸ್ಯೆಗಳಾದ ಇರುಳು ಕುರುಡು ನಿವಾರಣೆಯಾಗುತ್ತದೆ.
ಮಾವಿನಲ್ಲಿರುವ ಎಂಜೈಮ್‌ಗಳಾದ ಅಮಿಲೇಸ್ ಮತ್ತು ಡಯಾಸ್ಟೇಸ್ ಜೀರ್ಣಕ್ರಿಯೆಗೆ ಸಹಾಯ ಮಾಡುತ್ತವೆ. ಫೈಬರ್‌ನಿಂದ ಕರುಳಿನ ಆರೋಗ್ಯವನ್ನು ಕಾಪಾಡುತ್ತದೆ ಮತ್ತು ಮಲಬದ್ಧತೆಯನ್ನು ತಡೆಯುತ್ತದೆ. ವಿಟಮಿನ್ C ಮತ್ತು E ಚರ್ಮದ ಆರೋಗ್ಯವನ್ನು ಕಾಪಾಡುತ್ತದಲ್ಲದೆ, ವಯಸ್ಸಾದಂತೆ ಕಾಣುವ ಲಕ್ಷಣಗಳನ್ನು ಕಡಿಮೆ ಮಾಡುತ್ತದೆ. ಕೂದಲಿನ ಬೆಳವಣಿಗೆಗೆ ಮತ್ತು ಚರ್ಮದ ಕಾಂತಿಯನ್ನು ಕಾಪಿಡುತ್ತದೆ.
ಆಂಟಿಆಕ್ಸಿಡೆಂಟ್‌ಗಳು ಮತ್ತು ಪಾಲಿಫಿನಾಲ್‌ಗಳು ಕ್ಯಾನ್ಸರ್ ಕೋಶಗಳ ಬೆಳವಣಿಗೆಯನ್ನು ತಡೆಗಟ್ಟಲು ಸಹಾಯ ಮಾಡುತ್ತವೆ, ವಿಶೇಷವಾಗಿ ಸ್ತನ ಕ್ಯಾನ್ಸರ್ ಮತ್ತು ಕೊಲೊನ್ ಕ್ಯಾನ್ಸರ್ ತಡೆಗಟ್ಟುವ ಸಾಮರ್ಥ್ಯವಿದೆ.
ಪೊಟ್ಯಾಸಿಯಮ್ ಮತ್ತು ಮೆಗ್ನೀಶಿಯಂ ರಕ್ತದೊತ್ತಡವನ್ನು ನಿಯಂತ್ರಿಸುತ್ತದೆ. ಫೈಬರ್ ಕೊಲೆಸ್ಟ್ರಾಲ್‌ ಮಟ್ಟವನ್ನು ಕಡಿಮೆ ಮಾಡುವ ಮೂಲಕ ಹೃದಯದ ಆರೋಗ್ಯವನ್ನು ಕಾಪಾಡುತ್ತದೆ. ಕಬ್ಬಿಣ ಮತ್ತು ಫೋಲಿಕ್ ಆಮ್ಲವು ರಕ್ತಹೀನತೆಯನ್ನು ತಡೆಗಟ್ಟಲು ಸಹಾಯ ಮಾಡುತ್ತದೆ, ವಿಶೇಷವಾಗಿ ಗರ್ಭಿಣಿಯರಿಗೆ ಇದು ತುಂಬಾ ಉಪಯುಕ್ತವಾಗಿದೆ.
ಇದನ್ನೂ ಓದಿದ್ದೀರಾ? ಸರ್ಕಾರಿ ಶಾಲೆಗಳಲ್ಲಿ ದಾಖಲಾತಿ ಕುಸಿತವೇ ಅಥವಾ ಶಿಕ್ಷಣದ ಗುಣಮಟ್ಟವೇ?
ಕಡಿಮೆ ಕ್ಯಾಲೊರಿ ಮತ್ತು ಹೆಚ್ಚಿನ ಫೈಬರ್ ಅಂಶಗಳನ್ನು ಮಾವು ಹೊಂದಿರುವ ಕಾರಣ ಇದು ತೂಕ ನಿಯಂತ್ರಣಕ್ಕೆ ಸಹಾಯಕವಾಗಿದೆ. ವಿಟಮಿನ್ B6 ಮತ್ತು ಇತರ ಪೋಷಕಾಂಶಗಳು ಮೆದುಳಿನ ಆರೋಗ್ಯವನ್ನು ಕಾಪಾಡುತ್ತವೆ. ಮಾನಸಿಕ ಒತ್ತಡವನ್ನು ಕಡಿಮೆ ಮಾಡುತ್ತವೆ. ಮಾವಿನ ಹಣ್ಣನ್ನು ತಾಜಾವಾಗಿ, ಜ್ಯೂಸ್, ಸಲಾಡ್, ಸ್ಮೂಥಿಗಳು ಅಥವಾ ಒಣಗಿದ ರೂಪದಲ್ಲಿಯೂ ಸೇವಿಸಬಹುದು. ಇದು ಆರೋಗ್ಯಕ್ಕೆ ಮಾತ್ರವಲ್ಲ, ರುಚಿಗೂ ಉತ್ತಮವಾಗಿದೆ.
ಆದರೂ ಗಮನಿಸಬೇಕಾದ ವಿಷಯವೇನೆಂದರೆ ಮಾವಿನ ಹಣ್ಣನ್ನು ಮಿತವಾಗಿ ಸೇವಿಸಬೇಕು, ಏಕೆಂದರೆ ಇದರಲ್ಲಿ ಸಕ್ಕರೆಯ ಅಂಶ ಹೆಚ್ಚಿರುತ್ತದೆ, ಸಕ್ಕರೆ ಕಾಯಿಲೆ ಇರುವವರು ಎಚ್ಚರಿಕೆಯಿಂದ ಸೇವಿಸಬೇಕಾಗುತ್ತದೆ. ಅತಿಯಾಗಿ ತಿನ್ನುವುದರಿಂದ ಕೆಲವರಿಗೆ ಅಲರ್ಜಿ ಅಥವಾ ಜೀರ್ಣಕ್ರಿಯೆಯ ಸಮಸ್ಯೆ ಉಂಟಾಗಬಹುದು.
