ಹಮಾಸ್ ಮತ್ತು ಇಸ್ರೇಲ್ ನಡುವೆ ನಡೆಯುತ್ತಿರುವ ಸಂಘರ್ಷದಲ್ಲಿ ಇಸ್ರೇಲ್‌ಗೆ ಎಲ್ಲ ರೀತಿಯ ನೆರವನ್ನು ಅಮೆರಿಕ ನೀಡುತ್ತಿದೆ. ಹೀಗಾಗಿ, ಈ ಸಂಘರ್ಷ ನಿಲ್ಲಿಸುವಂತೆ ಅಮೆರಿಕದಲ್ಲಿ ಪ್ರತಿಭಟನೆಗಳು ಜೋರಾಗುತ್ತಲೇ ಇದೆ.
ಈ ನಡುವೆ ಇಸ್ರೇಲ್‌ಗೆ ನೆರವನ್ನು ನೀಡುವ ಉದ್ದೇಶದಿಂದ ಶಸ್ತ್ರಾಸ್ತ್ರ ಮತ್ತು ಇತರೆ ಸಾಮಗ್ರಿಗಳನ್ನು ತುಂಬಿಕೊಂಡು ಹೊರಡಲು ಸಿದ್ಧವಾಗಿದ್ದ ಅಮೆರಿಕ ಹಡಗು, ಇಸ್ರೇಲ್‌ಗೆ ತೆರಳದಂತೆ ತಡೆದಿರುವ ಯುದ್ಧ ವಿರೋಧಿ ಪ್ರತಿಭಟನಾಕಾರರು, ಹಡಗಿನಲ್ಲಿ ನೇತಾಡುವ ಮೂಲಕ ಪ್ರತಿಭಟನೆ ನಡೆಸಿದರು.
ಅಮೆರಿಕದ ಕ್ಯಾಲಿಫೋರ್ನಿಯಾದ ಓಕ್‌ಲ್ಯಾಂಡ್ ಬಂದರಿನಲ್ಲಿ ಯುದ್ಧ ಸಾಮಗ್ರಿಯೊಂದಿಗೆ ಇಸ್ರೇಲ್‌ಗೆ ತೆರಳಲು ಸಿದ್ಧವಾಗಿದ್ದ ಅಮೆರಿಕ ಸೇನೆಯ ‘ಎಂವಿ ಕೇಪ್ ಓರ್‌ಲ್ಯಾಂಡೋ’ ಹಡಗನ್ನು ತಡೆದ ಪ್ರತಿಭಟನಾಕಾರರು, ಅಮೆರಿಕವು ಗಾಝಾದ ಅಮಾಯಕರನ್ನು ಕೊಲ್ಲಲು ಇಸ್ರೇಲ್‌ಗೆ ನೆರವು ನೀಡುತ್ತಿದೆ. ಹಾಗಾಗಿ, ಇಸ್ರೇಲ್‌ಗೆ ಈ ನೆರವು ಸಿಗಬಾರದು. ಸಂಘರ್ಷ ನಿಲ್ಲಿಸಲು ಅಮೆರಿಕವು ಮುಂದಾಗಬೇಕು’ ಎಂದು ಆಗ್ರಹಿಸಿದರು.
ಮೂವರು ಪ್ಯಾಲೆಸ್ತೀನಿಯನ್ ಪರ ಬೆಂಬಲಿಗರು ಹಡಗಿನ ಹಗ್ಗದ ಏಣಿಯನ್ನು ಹಿಡಿದು, ಮಿಲಿಟರಿ ಹಡಗಿನ ಬಾಗಿಲು ಮುಚ್ಚಲು ಕಾರ್ಮಿಕರಿಗೆ ಅವಕಾಶ ನೀಡಲಿಲ್ಲ. ಅಲ್ಲೇ ಸುಮಾರು ಒಂಭತ್ತು ಗಂಟೆಗಳ ಕಾಲ ನಿಂತು ಪ್ರತಿಭಟನೆ ನಡೆಸಿದರು. ಕೆಲವು ಯಹೂದಿ ಯುವಕರು ಕೂಡ ಯುದ್ಧ ನಿಲ್ಲಿಸುವಂತೆ ಆಗ್ರಹಿಸಿ ಪ್ರತಿಭಟನೆಯಲ್ಲಿ ಪಾಲ್ಗೊಂಡರು.
Watch these protesters try to block a U.S. military cargo ship from heading to Israel. @Dena reports. pic.twitter.com/uXQ4b4deYT
— AJ+ (@ajplus) November 4, 2023
ಕೋಸ್ಟ್ ಗಾರ್ಡ್ ಸಮಾಲೋಚಕರು ಹಡಗಿನಿಂದ ಹೊರಬರಲು ಪ್ರತಿಭಟನಾಕಾರರನ್ನು ಮನವೊಲಿಸಲು ಪ್ರಯತ್ನಿಸಿದರು. ಆದರೆ ಪ್ರತಿಭಟನಾಕಾರರು ನಿರಾಕರಿಸಿದರು.
ಸ್ಯಾನ್ ಫ್ರಾನ್ಸಿಸ್ಕೋ ಮೂಲದ ಅರಬ್ ರಿಸೋರ್ಸ್ ಆರ್ಗನೈಸಿಂಗ್ ಸೆಂಟರ್ ಈ ಪ್ರತಿಭಟನೆಯನ್ನು ಆಯೋಜಿಸಿತ್ತು. ಈಸ್ಟ್ ಬೇ ಮೂಲದ ಝಿಯೋನಿಸ್ಟ್ ವಿರೋಧಿ ಗುಂಪು ‘ಯಹೂದಿ ವಾಯ್ಸ್ ಫಾರ್ ಪೀಸ್’ ಸಂಘಟನೆಯ ಸದಸ್ಯರು ಕೂಡ ಬೆಂಬಲ ನೀಡಿ, ಈ ಪ್ರತಿಭಟನೆಯಲ್ಲಿ ಕಾಣಿಸಿಕೊಂಡರು. ಸುಮಾರು 200 ಜನರು ಪ್ರತಿಭಟನೆಯ ಸ್ಥಳದಲ್ಲಿ ಭಾಗವಹಿಸಿದ್ದರು. ಹಲವರು ಪ್ಯಾಲೆಸ್ತೀನ್‌ನ ಧ್ವಜಗಳನ್ನು ಹಿಡಿದು, ಇಸ್ರೇಲ್‌ಗೆ ಅಮೆರಿಕ ಮಿಲಿಟರಿ ಸಹಾಯವನ್ನು ನಿಲ್ಲಿಸಬೇಕೆಂದು ಒತ್ತಾಯಿಸಿದರು.
ಬೆಳಗ್ಗೆ ಸುಮಾರು 6 ಗಂಟೆಗೆ ಬಂದರಿಗೆ ಆಗಮಿಸಿದ್ದ ಪ್ರತಿಭಟನಾಕಾರರ ಪೈಕಿ, ಮೂವರು ಹಡಗಿಗೆ ಹತ್ತುವ ಏಣಿಗೆ ತಮ್ಮನ್ನು ತಾವೇ ಲಾಕ್ ಮಾಡಿಕೊಂಡರು. ಇದರಿಂದಾಗಿ ಸುಮಾರು ಒಂಭತ್ತು ಗಂಟೆಗಳ ಕಾಲ ನೇತಾಡಿಕೊಂಡೇ ಇದ್ದರು. ಸ್ಥಳೀಯ ಪೊಲೀಸರು ಬಂದು ಮೂವರನ್ನು ವಶಕ್ಕೆ ಪಡೆದ ಬಳಿಕ ಹಡಗು ಬಂದರಿನಿಂದ ತೆರಳಿತು ಎಂದು ಮಾಧ್ಯಮಗಳು ವರದಿ ಮಾಡಿವೆ. ಪ್ರತಿಭಟನಾಕಾರರು ಶಾಂತಿಯುತವಾಗಿ ಪ್ರತಿಭಟಿಸಿದ್ದರಿಂದ ಅವರ ವಿರುದ್ಧ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿಲ್ಲ ಎಂದು ವರದಿಯಾಗಿದೆ.
ಈ ಹಿಂದೆ ಕೂಡ ಅಂದರೆ 2014 ಮತ್ತು 2021ರಲ್ಲೂ ಕೂಡ ಇದೇ ರೀತಿಯ ಪ್ರತಿಭಟನೆ ನಡೆಸಲಾಗಿತ್ತು. ಇಸ್ರೇಲಿನ ಕಾರ್ಗೋ ಹಡಗನ್ನು ತಡೆಯುವಲ್ಲಿ ಪ್ರತಿಭಟನಾಕಾರರು ಯಶಸ್ವಿಯಾಗಿದ್ದರು. ‘ಎಂವಿ ಕೇಪ್ ಓರ್‌ಲ್ಯಾಂಡೋ’ ಹಡಗು ಇರಾಕ್ ಮತ್ತು ಅಫ್ಘಾನಿಸ್ತಾನದಲ್ಲಿ ನಡೆದ ಯುದ್ಧದ ಸಂದರ್ಭದಲ್ಲೂ ಅಮೆರಿಕ ಬಳಸಿಕೊಂಡಿತ್ತು.
