ಇನ್ಫೋಸಿಸ್‌ನ ಮಾಜಿ ಸಿಎಫ್‌ಒ ಮೋಹನ್‌ದಾಸ್‌ ಪೈ ಇತ್ತೀಚಿಗೆ ಬೆಂಗಳೂರಿನ ಸಂಚಾರಿ ಉಲ್ಲಂಘನೆಗೆ ನಗರ ಪೊಲೀಸರಿಗೆ ಒಂದು ಸಲಹೆಯನ್ನು ಸಾಮಾಜಿಕ ಮಾಧ್ಯಮದಲ್ಲಿ ಹಂಚಿಕೊಂಡಿದ್ದರು. ವಿಚಿತ್ರವಾದ ಸಲಹೆಗೆ ನೆಟ್ಟಿಗರು ವಿವಿಧ ರೀತಿಯಲ್ಲಿ ಪ್ರತಿಕ್ರಿಯೆ ನೀಡಿದ್ದಾರೆ.
“ಬೆಂಗಳೂರು ಪೊಲೀಸರು ಸಂಚಾರಿ ಉಲ್ಲಂಘನೆ ತಡೆಗೆ ವಿಯೆಟ್ನಾಂ ದೇಶದ ಹೊಸ ಪದ್ಧತಿ ಅಳವಡಿಸಿಕೊಳ್ಳಬೇಕು. ಸಂಚಾರಿ ಉಲ್ಲಂಘನೆಯನ್ನು ವರದಿ ಮಾಡುವ ನಾಗರಿಕರಿಗೆ ಬಹುಮಾನವನ್ನು ನೀಡಬೇಕು. ಸಂಚಾರಿ ಉಲ್ಲಂಘನೆ ಮಾಡುವ ಸವಾರರು ಪಾವತಿಸುವ ದಂಡದಲ್ಲಿ ಶೇ. 10ರಷ್ಟು ಹಣವನ್ನು ಉಲ್ಲಂಘನೆಯ ಮಾಹಿತಿ ನೀಡುವವರಿಗೆ ಬಹುಮಾನವಾಗಿ ನೀಡಬೇಕು ಎಂದಿದ್ದರು. ನಗರದಲ್ಲಿ ಇಂತಹ ನಿಯಮಗಳು ಅತ್ಯಗತ್ಯವಿದೆ” ಎಂದು ಮೋಹನ್‌ದಾಸ್‌ ಅವರು ಪೋಸ್ಟ್ ಮಾಡಿ ಗೃಹ ಸಚಿವ ಜಿ ಪರಮೇಶ್ವರ್‌ ಅವರಿಗೂ ಟ್ಯಾಗ್‌ ಮಾಡಿದ್ದರು.
ಮೋಹನ್‌ದಾಸ್‌ ಟ್ವೀಟ್‌ಗೆ ಕೆಲವು ನೆಟ್ಟಿಗರು ಗಂಭೀರ ಪ್ರತಿಕ್ರಿಯೆ ನೀಡಿದರೆ, ಇನ್ನೂ ಕೆಲವರು ತಮಾಷೆಯ ಉತ್ತರ ನೀಡಿದ್ದಾರೆ. ಮೋಹನ್‌ದಾಸ್‌ ಅವರ ಸಲಹೆ ಹೊರ ರಾಜ್ಯಗಳ ಸವಾರರನ್ನು ನೇರವಾಗಿ ಗುರಿ ಮಾಡುತ್ತದೆ. ಬಹುತೇಕ ಅವರುಗಳೆ ಸಂಚಾರಿ ನಿಯಮಗಳನ್ನು ಉಲ್ಲಂಘಿಸುತ್ತಾರೆ ಎಂದು ಒಂದಷ್ಟು ಮಂದಿ ಪ್ರತಿಕ್ರಿಯಿಸಿದ್ದಾರೆ.
ಈ ಸುದ್ದಿ ಓದಿದ್ದೀರಾ? ಈ ದಿನ ಸಂಪಾದಕೀಯ | ಕ್ರಿಕೆಟ್ ಕೇಸರಿಕರಣ, ಪರಿಶುದ್ಧ ಆಟ ಅಂತರ್ಧಾನ
“ಹೌದು, ನಮ್ಮಲ್ಲಿ ಅನೇಕ ನಿರುದ್ಯೋಗಿ ಯುವಕರಿದ್ದಾರೆ. ಈ ನೂತನ ಯೋಜನೆಯಿಂದ ಒಂದಷ್ಟು ಅನುಕೂಲವಾಗಲಿದೆ” ಎಂದಿದ್ದಾರೆ. “ಉಲ್ಲಂಘನೆ ವಿಷಯ ತಿಳಿಸುವ ವ್ಯಕ್ತಿ ಅಪರಿಚಿತನಾಗಿರಬೇಕು. ಆತನ ಹೆಸರನ್ನು ಗೌಪ್ಯವಾಗಿಡಬೇಕು” ಎಂದು ಪೋಸ್ಟ್ ಮಾಡಿದ್ದಾರೆ.
“ನಮಗೆ ಇಂತಹ ನಿಯಮಗಳ ಅಗತ್ಯವಿದೆ. ಟ್ರಾಫಿಕ್ ಸಿಗ್ನಲ್‌ಗಳಲ್ಲಿ, ಜೀಬ್ರಾ ಕ್ರಾಸಿಂಗ್‌ಗಳಲ್ಲಿ ಹಾಗೂ ಮುಂತಾದ ಪ್ರಮುಖ ಸ್ಥಳಗಳಲ್ಲಿ” ಈ ನಿಯಮಗಳನ್ನು ಜಾರಿಗೊಳಿಸಬೇಕು ಎಂದು ಕೆಲವು ಟ್ವಿಟ್ಟಿಗರು ಪೋಸ್ಟ್ ಮಾಡಿದ್ದಾರೆ.
“ನಾವು ಹಲವು ಆಪ್‌ಗಳಿಂದ ಸಾಕಷ್ಟು ಗಣ ಗಳಿಸುತ್ತಿದ್ದೇವೆ. ಇಂತಹ ಯೋಜನೆಗಳಿಂದ ನಮ್ಮ ಜೇಬನ್ನು ಮತ್ತಷ್ಟು ಭರ್ತಿ ಮಾಡಿಕೊಳ್ಳುತ್ತೇವೆ. ಹಣ ಗಳಿಸುವ ಇಂತಹ ಹಲವು ನಿಯಮಗಳು ನಗರದ ಯುವಕರಿಗೆ ಅಗತ್ಯವಿದೆ” ಎಂದು ತಮಾಷೆ ರೀತಿಯಲ್ಲಿ ಉತ್ತರ ನೀಡಿದ್ದಾರೆ.
ವಿಯೆಟ್ನಾಂನಲ್ಲಿ ಟ್ರಾಫಿಕ್ ಉಲ್ಲಂಘನೆ ನಿಯಂತ್ರಿಸಲು, ನಿಯಮ ಪಾಲಿಸುವಂತೆ ಮಾಡಲು ಸ್ನಿಚ್ ನಿಯಮ ಜಾರಿಗೆ ತರಲಾಗಿದೆ. ಹೊಸ ವರ್ಷದ ಆರಂಭದಿಂದ ಹೊಸ ನಿಯಮ ಜಾರಿಗೆ ತರಲಾಗಿದೆ. ರಸ್ತೆ ಸುರಕ್ಷತೆ, ನಿಯಮ ಪಾಲನೆ, ಟ್ರಾಫಿಕ್ ನಿಯಮ ಉಲ್ಲಂಘನೆಗಳ ಸಮಸ್ಯೆಗೆ ಮುಕ್ತಿ ಹಾಡಲು ವಿಯೆಟ್ನಾಂ ಸ್ನಿಚ್ ಲಾ ಜಾರಿಗೆ ತಂದಿದೆ. ಈ ನಿಯಮದಲ್ಲಿ ಪ್ರತಿಯೊಬ್ಬರು ಹಣ ಗೆಲ್ಲುವ ಅವಕಾಶ ಪಡೆಯುತ್ತಾರೆ. ಈ ಟ್ರಾಫಿಕ್ ನಿಯಮ ಉಲ್ಲಂಘನೆ ಸೂಚನೆ ನೀಡಿದವರಿಗೆ 200 ಅಮೆರಿಕನ್ ಡಾಲರ್‌ವರೆಗೂ ಬಹುಮಾನದ ಹಣ ನೀಡಲಾಗುತ್ತದೆ.
ಜನವರಿ 1, 2025ರಿಂದ ಈ ಹೊಸ ನಿಯಮ ಜಾರಿಗೆ ಬಂದಿದೆ. ವಿಯೆಟ್ನಾಂನಲ್ಲಿ ಜಾರಿಗೊಳಿಸಿರುವ ನೂತನ ನಿಯಮದಿಂದ ಸಂಚಾರಿ ಸಮಸ್ಯೆ ಪರಿಹಾರವಾಗಿರುವ ಬಗ್ಗೆ ಹೆಚ್ಚಿನ ಮಾಹಿತಿ ಸಿಕ್ಕಿಲ್ಲ.
