ಭಾರತೀಯ ಆಹಾರ ಸುರಕ್ಷತೆ ಮತ್ತು ಮಾನದಂಡಗಳ ಪ್ರಾಧಿಕಾರ (ಎಫ್‌ಎಸ್‌ಎಸ್‌ಎಐ) ಬೆಂಗಳೂರು ಮೂಲದ ಬ್ರಿಟಿಷ್ ಲೈಫ್‌ಸೈನ್ಸ್ ಪ್ರೈವೇಟ್ ಲಿಮಿಟೆಡ್ ವಿರುದ್ಧ ಕಠಿಣ ಕ್ರಮ ಕೈಗೊಂಡಿದೆ. ಶಿಶು ಆಹಾರ ಸುರಕ್ಷತೆಗೆ ಸಂಬಂಧಿಸಿದ ತಪಾಸಣೆಯಲ್ಲಿ ತಪ್ಪು ಬ್ರಾಂಡ್ ಮಾಡಿದ, ಅವಧಿ ಮೀರಿದ ಶಿಶು ಆಹಾರ ಉತ್ಪನ್ನಗಳು ಪತ್ತೆಯಾಗಿದ್ದು, ವಶಪಡಿಸಿಕೊಳ್ಳಲಾಗಿದೆ ಎಂದು ಎಫ್‌ಎಸ್‌ಎಸ್‌ಎಐ ತಿಳಿಸಿದೆ.
ಎಫ್‌ಎಸ್‌ಎಸ್‌ಎಐನ ಸಾಮಾಜಿಕ ಮಾಧ್ಯಮ ಪೋಸ್ಟ್‌ನಲ್ಲಿ, “ಬ್ರಿಟಿಷ್ ಲೈಫ್‌ಸೈನ್ಸ್ ಪ್ರೈ. ಲಿ., ಬೆಂಗಳೂರು ವಿರುದ್ಧ ಶಿಶು ಆಹಾರ ಸುರಕ್ಷತೆ ಮತ್ತು ಅನುಸರಣೆಗೆ ಕೇಂದ್ರೀಕರಿಸಿದ ತಪಾಸಣೆಗಳ ನಂತರ ಕಠಿಣ ನಿಯಂತ್ರಕ ಕ್ರಮಗಳನ್ನು ತೆಗೆದುಕೊಳ್ಳಲಾಗಿದೆ. ತಪಾಸಣೆಯ ಸಮಯದಲ್ಲಿ ಗಣನೀಯ ಪ್ರಮಾಣದ ತಪ್ಪು ಬ್ರಾಂಡ್ ಮಾಡಿದ ಶಿಶು ಆಹಾರ ಉತ್ಪನ್ನಗಳನ್ನು ಗುರುತಿಸಿ, ಎಫ್‌ಎಸ್‌ಎಸ್ ಕಾಯಿದೆ 2006ರ ನಿಬಂಧನೆಗಳ ಪ್ರಕಾರ ವಶಪಡಿಸಿಕೊಳ್ಳಲಾಗಿದೆ” ಎಂದು ತಿಳಿಸಲಾಗಿದೆ.
ಈ ಶಿಶು ಆಹಾರ ಉತ್ಪನ್ನಗಳಿಂದ ಚಿಕ್ಕ ಮಕ್ಕಳಿಗೆ ಉಂಟಾಗಬಹುದಾದ ಅಪಾಯವನ್ನು ಪರಿಗಣಿಸಿ, ಕಂಪನಿಯ ವಿರುದ್ಧ ಸೂಕ್ತ ಕಾನೂನು ಕ್ರಮಗಳನ್ನು ತೆಗೆದುಕೊಳ್ಳಲಾಗಿದೆ ಎಂದು ಪ್ರಾಧಿಕಾರ ಹೇಳಿದೆ.
ನ್ಯಾಯಾಲಯದ ನಿರ್ದೇಶನಗಳ ಪ್ರಕಾರ 3.7 ಮೆಟ್ರಿಕ್ ಟನ್ ಅವಧಿ ಮೀರಿದ ಶಿಶು ಆಹಾರ ಉತ್ಪನ್ನಗಳನ್ನು ನಾಶಪಡಿಸುವಂತೆ ಆದೇಶಿಸಲಾಗಿತ್ತು. ಈ ಅವಧಿ ಮೀರಿದ ಸ್ಟಾಕ್ ಅನ್ನು ಮತ್ತೆ ಬಳಸದಂತೆ, ಮರಳಿ ಮಾರುಕಟ್ಟೆ ಸೇರದಂತೆ ಸುರಕ್ಷಿತವಾಗಿ ನಾಶಪಡಿಸಲಾಗಿದೆ ಎಂದು ಎಫ್‌ಎಸ್‌ಎಸ್‌ಎಐ ಸ್ಪಷ್ಟಪಡಿಸಿದೆ.
ಬ್ರಿಟಿಷ್ ಲೈಫ್‌ಸೈನ್ಸ್ ಬ್ರಿಟಿಷ್ ಬಯೋಲಾಜಿಕಲ್ಸ್ ಗುಂಪಿನ ಭಾಗವಾಗಿದ್ದು, ತಾಯಿ ಮತ್ತು ಮಗುವಿನ ಪೋಷಣೆಗೆ ಸಂಬಂಧಿತ ಉತ್ಪನ್ನಗಳನ್ನು ತಯಾರಿಸುತ್ತದೆ. ಇದು ಎಂಎಂಎಸ್, ಎಂಎಂಎಸ್ ಗೋಲ್ಡ್, ನಾಸೆಂಟ್, ಆಪ್ಟಿಲೈಟ್ ಸೇರಿದಂತೆ ವಿವಿಧ ಶಿಶು ಫಾರ್ಮುಲಾಗಳನ್ನು ಮಾರಾಟ ಮಾಡುತ್ತದೆ.
ಈ ಕ್ರಮವು ಶಿಶುಗಳು ಮತ್ತು ಚಿಕ್ಕ ಮಕ್ಕಳ ಆರೋಗ್ಯ ಹಾಗೂ ಸುರಕ್ಷತೆಯನ್ನು ಕಾಪಾಡುವ ಎಫ್‌ಎಸ್‌ಎಸ್‌ಎಐನ ಬದ್ಧತೆಯನ್ನು ಮತ್ತೊಮ್ಮೆ ದೃಢಪಡಿಸುತ್ತದೆ ಎಂದು ಪ್ರಾಧಿಕಾರ ಹೇಳಿದೆ.
