ರಾಜಸ್ಥಾನ ಸರ್ಕಾರದ ಗೋ ಸಂರಕ್ಷಣಾ ಯೋಜನೆಯಡಿ ಭಾರೀ ಅಕ್ರಮ ನಡೆದಿದ್ದು, ಮೃತ ಹಾಗೂ ಗೋಶಾಲೆಗಳಲ್ಲಿ ಇರದೇ ಇರುವ ಹಸುಗಳ ಹೆಸರಿನಲ್ಲಿ ಬರೋಬ್ಬರಿ 57 ಕೋಟಿ ರೂ.ಗೂ ಅಧಿಕ ಅನುದಾನವನ್ನು ಅಕ್ರಮವಾಗಿ ಪಡೆಯಲಾಗಿರುವ ಕಳವಳಕಾರಿ ಪ್ರಕರಣವನ್ನು ಸಿಎಜಿ (CAG) ವರದಿ ಇದೀಗ ಬಯಲಿಗೆಳೆದಿದೆ. ಸರ್ಕಾರದ ಪರಿಶೀಲನಾ ವ್ಯವಸ್ಥೆಯ ವೈಫಲ್ಯವನ್ನು ಇದು ಎತ್ತಿ ತೋರಿಸಿದೆ.
ರಾಜ್ಯದ 38 ಗೋಶಾಲೆಗಳು ವಾಸ್ತವಕ್ಕಿಂತ ಸುಮಾರು 1.31 ಲಕ್ಷಕ್ಕೂ ಹೆಚ್ಚು ಜಾನುವಾರುಗಳನ್ನು ತಮ್ಮ ಸುಳ್ಳು ದಾಖಲೆಗಳಲ್ಲಿ ಸೃಷ್ಟಿಸಿ 57.36 ಕೋಟಿ ರೂ. ಹೆಚ್ಚುವರಿ ಸಬ್ಸಿಡಿ ಪಡೆದಿವೆ. ಯೋಜನೆಯಡಿ ವಯಸ್ಕ ಹಸುವಿಗೆ ದಿನಕ್ಕೆ 40 ರೂ. ಹಾಗೂ ಕರುವಿಗೆ 20 ರೂ. ನೀಡಲಾಗುತ್ತದೆ. ಆದರೆ, ನೋಂದಾಯಿತ ಟ್ಯಾಗ್ ಇಲ್ಲದ, ನಿಷ್ಕ್ರಿಯಗೊಂಡ ಹಾಗೂ ಮೃತ ಹಸುಗಳ ಹೆಸರಿನಲ್ಲೂ ಮೇವು ಮತ್ತು ನೀರಿನ ಸಬ್ಸಿಡಿ ಪಡೆಯಲಾಗಿದೆ. ಜಾನುವಾರುಗಳ ದೈನಂದಿನ ದಾಖಲೆ ಮತ್ತು ಸರ್ಕಾರದ ‘ಭಾರತ್ ಪಶುಧನ್ ಆ್ಯಪ್’ನ ಮಾಹಿತಿಗೂ ಭಾರಿ ವ್ಯತ್ಯಾಸವಿದೆ ಎಂದು ವರದಿ ಹೇಳಿದೆ.
ಡೀಗ್ ಜಿಲ್ಲೆಯಲ್ಲಿರುವ ‘ಶ್ರೀ ಬ್ರಜ್ ಕಾಮದ್ ಸುರಭಿ ವನ್ ರಿಸರ್ಚ್ ಇನ್‌ಸ್ಟಿಟ್ಯೂಟ್’ ಅತಿ ಹೆಚ್ಚು, ಅಂದರೆ 16.36 ಕೋಟಿ ರೂ. ಹೆಚ್ಚುವರಿ ಅನುದಾನವನ್ನು ಅಕ್ರಮವಾಗಿ ಪಡೆದಿದೆ. ಜಾಲೋರ್ ಜಿಲ್ಲೆಯ ಪಥ್ಮೇಡ ಗೋಶಾಲೆ 10.95 ಕೋಟಿ ರೂ. ಪಡೆದಿದೆ. ಇವುಗಳ ಜೊತೆಗೆ, ಜೈಪುರದ ಪ್ರಸಿದ್ಧ ಪಿಂಜ್ರಾಪೋಲ್ (1.81 ಕೋಟಿ ರೂ.) ಮತ್ತು ಹಿಂಗೋನಿಯಾ (1.41 ಕೋಟಿ ರೂ.) ಗೋಶಾಲೆಗಳು, ಹಾಗೂ ಭರತ್‌ಪುರ, ಸೀಕರ್‌ನ ಹಲವು ಗೋಶಾಲೆಗಳು ಈ ಅಕ್ರಮದಲ್ಲಿ ಶಾಮೀಲಾಗಿವೆ.
ಲೆಕ್ಕಪರಿಶೋಧನಾ ವರದಿಯ ಬೆನ್ನಲ್ಲೇ ಎಚ್ಚೆತ್ತಿರುವ ರಾಜಸ್ಥಾನದ ‘ಗೋಪಾಲನ್ ಇಲಾಖೆ’ಯು, 2026ರ ಮೇ 29ರಂದು ಎಲ್ಲ 38 ಗೋಶಾಲೆಗಳಿಗೆ ಹಣ ಮರುಪಾವತಿಸುವಂತೆ ನೋಟಿಸ್ ಜಾರಿ ಮಾಡಿದೆ. ನಿಗದಿತ ಅವಧಿಯೊಳಗೆ ಹೆಚ್ಚುವರಿ ಮೊತ್ತವನ್ನು ಹಿಂದಿರುಗಿಸುವಂತೆ ಕಟ್ಟುನಿಟ್ಟಾಗಿ ಸೂಚಿಸಿದ್ದು, ತಪ್ಪಿದ್ದಲ್ಲಿ ಭವಿಷ್ಯದ ಆಡಳಿತಾತ್ಮಕ ಮತ್ತು ಆರ್ಥಿಕ ಅನುದಾನಗಳನ್ನು ತಡೆಹಿಡಿಯುವ ಎಚ್ಚರಿಕೆ ನೀಡಿದೆ. ಆದಾಗ್ಯೂ, ನೋಟಿಸ್‌ಗಳ ನಡುವೆಯೂ ಈವರೆಗೆ ಗಣನೀಯ ಮೊತ್ತ ವಸೂಲಿಯಾಗಿಲ್ಲ.
ಮತ್ತೊಂದೆಡೆ, ತಮ್ಮ ಮೇಲಿನ ಈ ವಂಚನೆಯ ಆರೋಪಗಳನ್ನು ಗೋಶಾಲಾ ನಿರ್ವಾಹಕರು ಸಂಪೂರ್ಣವಾಗಿ ತಳ್ಳಿಹಾಕಿದ್ದಾರೆ. “ಇದು ಸರ್ಕಾರಿ ಅನುದಾನ ಲಪಟಾಯಿಸಲು ಉದ್ದೇಶಪೂರ್ವಕವಾಗಿ ಮಾಡಿದ ವಂಚನೆಯಲ್ಲ, ಕೇವಲ ದಾಖಲಾತಿ ನಿರ್ವಹಣೆ ಮತ್ತು ತಾಂತ್ರಿಕ ದೋಷಗಳಿಂದಾದ ಪ್ರಮಾದವಷ್ಟೇ” ಎಂದು ಅವರು ಸಮರ್ಥಿಸಿಕೊಂಡಿದ್ದಾರೆ. ಪ್ರಸ್ತುತ ಈ ಒಟ್ಟು ವಿಷಯವನ್ನು ವಿಚಾರಣಾ ಸಮಿತಿಯ ಮುಂದಿಡಲಾಗಿದ್ದು, ಸಮಗ್ರ ತನಿಖೆಯ ನಂತರವಷ್ಟೇ ಅಕ್ರಮದ ಹಿಂದಿನ ನೈಜ ಸತ್ಯಾಂಶ ಸಂಪೂರ್ಣವಾಗಿ ಹೊರಬರಬೇಕಿದೆ.
