ಉತ್ತರ ಪ್ರದೇಶದ ಕುಂದಾ ಕ್ಷೇತ್ರದ ‘ಜನಸತ್ತಾ ದಳ (ಲೋಕತಾಂತ್ರಿಕ)’ ಪಕ್ಷದ ಪ್ರಭಾವಿ ಶಾಸಕ ರಘುರಾಜ್ ಪ್ರತಾಪ್ ಸಿಂಗ್ ಅಲಿಯಾಸ್ ರಾಜಾ ಭಯ್ಯಾ ಅವರು ದಸರಾ ಹಬ್ಬದ ಪ್ರಯುಕ್ತ ಮಂಗಳವಾರ ಮಧ್ಯಾಹ್ನ ತಮ್ಮ ಪೂರ್ವಜರ ನಿವಾಸವಾದ ‘ಬೆಂಟಿ ಕೋಠಿ’ಯಲ್ಲಿ 500ಕ್ಕೂ ಹೆಚ್ಚು ಭಾರತೀಯ ಹಾಗೂ ವಿದೇಶಿ ನಿರ್ಮಿತ ಶಸ್ತ್ರಾಸ್ತ್ರಗಳನ್ನು ಪ್ರದರ್ಶಿಸಿ ಆಯುಧ ಪೂಜೆ ನೆರವೇರಿಸಿದರು. ಧೋತಿ-ಕುರ್ತಾ ಮತ್ತು ಕೇಸರಿ ಪೇಟ ಧರಿಸಿದ್ದ ಅವರೊಂದಿಗೆ ಅವಳಿ ಪುತ್ರರಾದ ಶಿವರಾಜ್ ಮತ್ತು ಬ್ರಿಜ್ರಾಜ್ ಕೂಡ ಪೂಜೆಯಲ್ಲಿ ಪಾಲ್ಗೊಂಡಿದ್ದರು.
ಆಚಾರ್ಯ ಅತುಲ್ ಜಿ ಮಹಾರಾಜ್ ಅವರ ನೇತೃತ್ವದಲ್ಲಿ ಸುಮಾರು ಎರಡು ಗಂಟೆಗಳ ಕಾಲ ಈ ವಿಶೇಷ ಪೂಜೆ, ಮಹಾ ಆರತಿ ಮತ್ತು ಪ್ರಸಾದ ವಿನಿಯೋಗ ನಡೆಯಿತು. ಕಾರ್ಯಕ್ರಮದಲ್ಲಿ ಬ್ಲಾಕ್ ಮುಖ್ಯಸ್ಥರು, ಜಿಲ್ಲಾ ಪಂಚಾಯಿತಿ ಪ್ರತಿನಿಧಿಗಳು ಹಾಗೂ ನೂರಾರು ಬೆಂಬಲಿಗರು ತಮ್ಮ ಶಸ್ತ್ರಾಸ್ತ್ರಗಳೊಂದಿಗೆ ಭಾಗವಹಿಸಿದ್ದರು. ಯಾವುದೇ ಗೊಂದಲವಾಗದಂತೆ ಪ್ರತಿಯೊಂದು ಆಯುಧದ ಪಕ್ಕದಲ್ಲೂ ಅವುಗಳ ಅಧಿಕೃತ ಪರವಾನಗಿ (ಲೈಸೆನ್ಸ್) ಹಾಗೂ ಮಾಲೀಕರ ಹೆಸರಿನ ಚೀಟಿಗಳನ್ನು ಇರಿಸಲಾಗಿತ್ತು.
ಈ ವೇಳೆ ಮಾತನಾಡಿದ ರಾಜಾ ಭಯ್ಯಾ, “ವಿಜಯದಶಮಿಯಂದು ಶಸ್ತ್ರಾಸ್ತ್ರಗಳನ್ನು ಪೂಜಿಸುವುದು ಭಾರತದ ಪ್ರಾಚೀನ ಹಾಗೂ ನಮ್ಮ ಕುಟುಂಬದ ಸುದೀರ್ಘ ಸಂಪ್ರದಾಯವಾಗಿದೆ. ಭಾರತದ ಭವ್ಯ ಪರಂಪರೆಯನ್ನು ಇಂದಿನ ಪೀಳಿಗೆಗೆ ಪರಿಚಯಿಸುವ ಅಗತ್ಯವಿದೆ. ಮರೆಯಾಗುತ್ತಿರುವ ಭಾರತೀಯ ಅಸ್ಮಿತೆಯನ್ನು ಉಳಿಸಲು ಯುವಜನತೆ ಕನಿಷ್ಠ ಹಬ್ಬಗಳ ಸಂದರ್ಭದಲ್ಲಾದರೂ ಧೋತಿ-ಕುರ್ತಾದಂತಹ ಸ್ವದೇಶಿ ಉಡುಪುಗಳನ್ನು ಧರಿಸಬೇಕು” ಎಂದು ಮನವಿ ಮಾಡಿದರು.
ಪತ್ನಿ ಭಾನ್ವಿ ಸಿಂಗ್ ಮಾಡಿದ್ದ ಗಂಭೀರ ಆರೋಪಗಳ ಹಿನ್ನೆಲೆಯಲ್ಲಿ ರಾಜಾ ಭಯ್ಯಾ ಸತತ ಎರಡನೇ ವರ್ಷ ಸಾರ್ವಜನಿಕವಾಗಿ ಆಯುಧ ಪೂಜೆ ನಡೆಸಿದ್ದಾರೆ. 2025ರ ಜೂನ್ 3ರಂದು ಪ್ರಧಾನಿ ಕಾರ್ಯಾಲಯಕ್ಕೆ (PMO) ಪತ್ರ ಬರೆದಿದ್ದ ಭಾನ್ವಿ ಸಿಂಗ್, ತಮ್ಮ ಪತಿಯ ಬಳಿ ಸಮೂಹ ನಾಶಕ ಸಾಮರ್ಥ್ಯದ ಅಕ್ರಮ ವಿದೇಶಿ ಶಸ್ತ್ರಾಸ್ತ್ರಗಳ ಸಂಗ್ರಹವಿದೆ ಎಂದು ಆರೋಪಿಸಿದ್ದರು. ಇದಕ್ಕೆ ಪ್ರತಿಯಾಗಿ ಕಳೆದ ದಸರಾದಿಂದ ಅವರು ಬಹಿರಂಗವಾಗಿಯೇ ಶಸ್ತ್ರಾಸ್ತ್ರ ಪ್ರದರ್ಶಿಸಿ ಪೂಜಿಸಲು ಆರಂಭಿಸಿದ್ದಾರೆ.
2020ರ ಸೆಪ್ಟೆಂಬರ್‌ನಿಂದ ಪತಿಯಿಂದ ಪ್ರತ್ಯೇಕವಾಗಿರುವ ಭಾನ್ವಿ ಸಿಂಗ್, ಕೌಟುಂಬಿಕ ದೌರ್ಜನ್ಯ, ಹಲ್ಲೆ ಹಾಗೂ ಅನೈತಿಕ ಸಂಬಂಧದ ಆರೋಪ ಹೊರಿಸಿ 2022ರ ನವೆಂಬರ್‌ನಲ್ಲಿ ದೆಹಲಿಯ ಸಾಕೇತ್ ನ್ಯಾಯಾಲಯದಲ್ಲಿ ವಿಚ್ಚೇದನಕ್ಕೆ ಅರ್ಜಿ ಸಲ್ಲಿಸಿದ್ದಾರೆ.
