ಕನ್ನಡ ಸಾಹಿತ್ಯ ಪರಿಷತ್ತಿನ ಅಖಂಡ ಬಳ್ಳಾರಿ ಜಿಲ್ಲಾ ಘಟಕದ ವತಿಯಿಂದ ನಗರದ ಕನ್ನಡ ಭವನದಲ್ಲಿ ಅಕ್ಟೋಬರ್ 18ರಂದು ಜಿಲ್ಲಾಧ್ಯಕ್ಷ ಡಾ.ನಿಷ್ಠಿ ರುದ್ರಪ್ಪ ಅವರ ಅಧ್ಯಕ್ಷತೆಯಲ್ಲಿ ನಡೆದ ಜಿಲ್ಲಾ ಕಾರ್ಯಕಾರಿ ಸಮಿತಿ ಸಭೆಯಲ್ಲಿ, ಬಳ್ಳಾರಿ ಜಿಲ್ಲಾ 23ನೇ ಕನ್ನಡ ಸಾಹಿತ್ಯ ಸಮ್ಮೇಳನದ ಅಧ್ಯಕ್ಷರಾಗಿ ಹಿರಿಯ ಪತ್ರಕರ್ತ, ಸಾಹಿತಿ ಚೇಳ್ಳಗುರ್ಕಿಯ ಸಿ.ಜಿ. ಹಂಪಣ್ಣ ಅವರನ್ನು ಸರ್ವಾನುಮತದಿಂದ ಆಯ್ಕೆ ಮಾಡಲಾಗಿದೆ.
ಸಭೆಯಲ್ಲಿ ಹಿರಿಯ ಪತ್ರಕರ್ತ, ಸಾಹಿತಿ, ಚಲನಚಿತ್ರ ಕಥೆಗಾರ, ನಿರ್ಮಾಪಕ ಹಾಗೂ ನಿರ್ದೇಶಕ ಸಿ.ಜಿ. ಹಂಪಣ್ಣ, ಹರಪನಹಳ್ಳಿಯ ಸಾಹಿತಿ ರಾಮನಮಲಿ, ಪತ್ರಕರ್ತ ಹಾಗೂ ಕವಿ ಪಿ.ಆರ್. ವೆಂಕಟೇಶ್ ಮತ್ತು ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯ ನಿವೃತ್ತ ಸಹಾಯಕ ನಿರ್ದೇಶಕ ಚೋರನೂರು ಟಿ. ಕೊಟ್ರಪ್ಪ ಅವರ ಹೆಸರುಗಳನ್ನು ಸದಸ್ಯರು ಪ್ರಸ್ತಾಪಿಸಿದರು. ಅಂತಿಮವಾಗಿ ಸಿ.ಜಿ.ಹಂಪಣ್ಣ ಅವರನ್ನು ಸಮ್ಮೇಳನಾಧ್ಯಕ್ಷರನ್ನಾಗಿ ಸರ್ವಾನುಮತದಿಂದ ಆಯ್ಕೆ ಮಾಡಲಾಯಿತು.
ಸಮ್ಮೇಳನವನ್ನು ನವೆಂಬರ್ 14 ಮತ್ತು 15ರಂದು ಎರಡು ದಿನಗಳ ಕಾಲ ಬಳ್ಳಾರಿಯಲ್ಲಿ ನಡೆಸಲು ಸಭೆ ತೀರ್ಮಾನಿಸಿದೆ ಎಂದು ಕನ್ನಡ ಸಾಹಿತ್ಯ ಪರಿಷತ್ತಿನ ಗೌರವ ಕಾರ್ಯದರ್ಶಿ ಡಾ.ಕೆ. ಶಿವಲಿಂಗಪ್ಪ ಹಂದಿಹಾಳು ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.
ಸಿ.ಜಿ.ಹಂಪಣ್ಣ ಪರಿಚಯ
ಆಂಧ್ರಪ್ರದೇಶದ ಗಡಿಗೆ ಹೊಂದಿಕೊಂಡಿರುವ ಬಳ್ಳಾರಿ ಜಿಲ್ಲೆಯ ಚೇಳ್ಳಗುರ್ಕಿಯಲ್ಲಿ 1938ರ ಆಗಸ್ಟ್ 27ರಂದು ಜನಿಸಿದ ಸಿ.ಜಿ. ಹಂಪಣ್ಣ ಅವರು 1958ರಲ್ಲಿ ಮದ್ರಾಸ್ ಇಂಟರ್‌ಮೀಡಿಯೇಟ್ ಪರೀಕ್ಷೆಯಲ್ಲಿ ಉತ್ತೀರ್ಣರಾದರು. ಸುಮಾರು 66 ವರ್ಷಗಳಿಂದ ಪತ್ರಿಕೋದ್ಯಮ ಕ್ಷೇತ್ರದಲ್ಲಿ ತೊಡಗಿಸಿಕೊಂಡಿರುವ ಅವರು ಸಾಹಿತ್ಯ ರಚನೆ, ಚಲನಚಿತ್ರ ನಿರ್ಮಾಣ, ವಿತರಣೆ ಹಾಗೂ ಪ್ರದರ್ಶನ ಸೇರಿದಂತೆ ವಿವಿಧ ಕ್ಷೇತ್ರಗಳಲ್ಲಿ ಗುರುತಿಸಿಕೊಂಡಿದ್ದಾರೆ.
ಬೆಂಗಳೂರಿನ ‘ಮಲೆನಾಡು’ ಮಾಸಪತ್ರಿಕೆಯ ಸಹಸಂಪಾದಕರಾಗಿ, ‘ಸಂಯುಕ್ತ ಕರ್ನಾಟಕ’ದ ಉಪಸಂಪಾದಕರಾಗಿ ಹಾಗೂ ‘ಈ ನಮ್ಮ ಕನ್ನಡನಾಡು’ ಪತ್ರಿಕೆಯ ಹಿರಿಯ ಉಪಸಂಪಾದಕರಾಗಿ ಸೇವೆ ಸಲ್ಲಿಸಿದ್ದಾರೆ. ಅನೇಕ ಯುವ ಪತ್ರಕರ್ತರಿಗೆ ಮಾರ್ಗದರ್ಶಕರಾಗಿಯೂ ಗುರುಗಳಾಗಿಯೂ ಕಾರ್ಯನಿರ್ವಹಿಸಿದ್ದಾರೆ. ‘ಬಳ್ಳಾರಿ ಜಿಲ್ಲಾ ಸಮಾಚಾರ’, ‘ಚಿತ್ರಸುಧಾ’, ‘ವಿಜಯನಗರ ಎಕ್ಸ್‌ಪ್ರೆಸ್’ ಮತ್ತು ‘ಕನ್ನಡ ಸಿಂಧೂರ’ ಪತ್ರಿಕೆಗಳನ್ನು ಸ್ವತಂತ್ರವಾಗಿ ನಡೆಸಿದ್ದಾರೆ.
‘ಕನ್ನಡ ನಾಡು ಸೊಬಗಿನ ಬೀಡು’, ‘ಪ್ರೇಮಪಾಶ’, ‘ದಾರಿದೀಪ’, ‘ವಿಧಿವಿಲಾಸ’, ‘ನಂದನವನ’, ‘ಕಾಣಿಕೆ’, ‘ಒಡೆಯಿತು ಒಲವಿನ ಕನ್ನಡಿ’ ಹಾಗೂ ‘ದೈವ ಸಂಕಲ್ಪ’ ಸೇರಿದಂತೆ ಹತ್ತೊಂಬತ್ತಕ್ಕೂ ಹೆಚ್ಚು ಸಾಹಿತ್ಯ ಕೃತಿಗಳನ್ನು ರಚಿಸಿದ್ದಾರೆ. 2011ರಲ್ಲಿ ‘ನೆನಪಿನಂಗಳ’ (ಆತ್ಮಕಥೆ–1) ಮತ್ತು ‘ಸವಿ ನೆನಪು’ (ಆತ್ಮಕಥೆ–2) ಎಂಬ ಆತ್ಮಕಥನ ಸೇರಿದಂತೆ 19ಕ್ಕೂ ಅಧಿಕ ಕೃತಿಗಳನ್ನು ಪ್ರಕಟಿಸಿದ್ದಾರೆ. ಅವರ ಸಾಧನೆ ಹಾಗೂ ಸೇವೆಯನ್ನು ಗುರುತಿಸಿ ‘ಉಡುಗೊರೆ’, ‘ಶ್ರಮಜೀವಿ’, ‘ಸವಿಜೇನು’ ಮತ್ತು ‘ಗಡಿನಾಡ ಕನ್ನಡಿಗ’ ಸೇರಿದಂತೆ ಅಭಿನಂದನಾ ಗ್ರಂಥಗಳನ್ನು ಸಮರ್ಪಿಸಲಾಗಿದೆ.
ಇದನ್ನೂ ಓದಿ : ಅವಳ ಕಣ್ಣೋಟ | ‘ಪ್ರೇಮದ ಊರಲಿ’ ಶೀಲದ ಟೆಸ್ಟ್!
ಕರ್ನಾಟಕ ಸರ್ಕಾರದ ಮಾಧ್ಯಮ ಅಕಾಡೆಮಿ ಪ್ರಶಸ್ತಿ, ಸಂಡೂರು ವಿರಕ್ತ ಮಠದ ‘ಬಸವ ಬೆಳಗು’ ಪ್ರಶಸ್ತಿ, ಇಳಕಲ್ ಮಠದ ‘ಮಹಾಂತ ಶ್ರೀ’ ಪ್ರಶಸ್ತಿ, ‘ಬಸವಸಿರಿ’ ಪ್ರಶಸ್ತಿ, ಬೆಂಗಳೂರು ಕರ್ನಾಟಕ ಪತ್ರಕರ್ತರ ಸಂಘದ ‘ಹೂಗಾರ ಪ್ರಶಸ್ತಿ’, ‘ಶ್ರೀಕೃಷ್ಣದೇವರಾಯ ಪ್ರಶಸ್ತಿ’, ಹೊಸಪೇಟೆಯ ಸಂಗೀತ ಭಾರತಿ ಸಂಸ್ಥೆಯ ‘ಶಂಕರ-ಭಾರ್ಗವ ಪ್ರಶಸ್ತಿ’ ಹಾಗೂ ‘ಡಾ. ಡಿ.ವಿ. ಗುಂಡಪ್ಪ ಪ್ರಶಸ್ತಿ’ ಸೇರಿದಂತೆ ಹಲವು ಗೌರವಗಳಿಗೆ ಸಿ.ಜಿ. ಹಂಪಣ್ಣ ಅವರು ಪಾತ್ರರಾಗಿದ್ದಾರೆ.
