ಭಾರತದಲ್ಲಿ ಉನ್ನತ ಶಿಕ್ಷಣ ಪಡೆದ ಯುವಕರ ಸಂಖ್ಯೆ ಹೆಚ್ಚುತ್ತಿದ್ದರೂ, ಅದಕ್ಕೆ ತಕ್ಕ ಉದ್ಯೋಗಗಳು ಸೃಷ್ಟಿಯಾಗುತ್ತಿಲ್ಲ. ಇತ್ತೀಚಿನ ದಿನಗಳಲ್ಲಿ ಇಂಜಿನಿಯರಿಂಗ್, ಎಂ.ಬಿ.ಎ, ಪಿಎಚ್‌ಡಿ ಪದವಿ ಪಡೆದವರು ಕಸಗುಡಿಸುವ (ಪೌರಕಾರ್ಮಿಕ) ಮತ್ತು ಅಟೆಂಡರ್ ಹುದ್ದೆಗಳಿಗೆ ಮುಗಿಬೀಳುತ್ತಿರುವುದು ದೇಶದ ಆರ್ಥಿಕತೆ ಹಾಗೂ ಉದ್ಯೋಗ ಮಾರುಕಟ್ಟೆಯ ಗಂಭೀರ ಪರಿಸ್ಥಿತಿಗೆ ಕನ್ನಡಿ ಹಿಡಿದಿದೆ.
ಇತ್ತೀಚೆಗೆ, ಸುಪ್ರೀಂಕೋರ್ಟ್ ಪ್ರಮುಖ ತೀರ್ಪೊಂದನ್ನು ನೀಡಿದೆ. “ಕಡಿಮೆ ಶೈಕ್ಷಣಿಕ ಅರ್ಹತೆ (ಉದಾಹರಣೆಗೆ 10ನೇ ತರಗತಿ) ನಿಗದಿಪಡಿಸಿರುವ ಸರ್ಕಾರಿ ಅಥವಾ ಬ್ಯಾಂಕ್ ಉದ್ಯೋಗಗಳನ್ನು ಪಡೆಯಲು, ಅಭ್ಯರ್ಥಿಗಳು ತಮ್ಮ ಉನ್ನತ ಶೈಕ್ಷಣಿಕ ಅರ್ಹತೆಯನ್ನು (ಪದವಿ) ಮರೆಮಾಚಿ ಅರ್ಜಿ ಸಲ್ಲಿಸುವಂತಿಲ್ಲ. ಪದವಿ ಮರೆ ಮಾಚುವುದರಿಂದ ಕಡಿಮೆ ಓದಿದ, ನಿಜವಾದ ಅರ್ಹ ಅಭ್ಯರ್ಥಿಗಳಿಗೆ ಸಿಗಬೇಕಾದ ನ್ಯಾಯಯುತ ಉದ್ಯೋಗದ ಅವಕಾಶ ಕೈತಪ್ಪುತ್ತದೆ” ಎಂದು ಸ್ಪಷ್ಟಪಡಿಸಿದೆ.
ನೇಮಕಾತಿ ನಿಯಮಗಳ ಪ್ರಕಾರ ಈ ತೀರ್ಪು ಸರಿಯಾಗಿದ್ದರೂ, ಇದು ದೇಶದ ಮುಂದಿಟ್ಟಿರುವ ಸಾಮಾಜಿಕ ಪ್ರಶ್ನೆ ಮಾತ್ರ ಅತ್ಯಂತ ಆತಂಕಕಾರಿ. ಯಾಕೆಂದರೆ, ʼಸ್ಟೇಟ್ ಆಫ್ ವರ್ಕಿಂಗ್ ಇಂಡಿಯಾʼ ವರದಿ ಹೇಳುವಂತೆ; ಭಾರತದಲ್ಲಿ 20 ರಿಂದ 29 ವರ್ಷದೊಳಗಿನ ನಿರುದ್ಯೋಗಿ ಯುವಜನರಲ್ಲಿ ಸುಮಾರು 67%ರಷ್ಟು ಮಂದಿ ಪದವೀಧರರಾಗಿದ್ದಾರೆ. ಅಟೆಂಡರ್, ಪೌರಕಾರ್ಮಿಕ ಅಥವಾ ಗ್ರೂಪ್-ಡಿ ಹುದ್ದೆಗಳಿಗೆ 5ರಿಂದ 10 ಲಕ್ಷಕ್ಕೂ ಹೆಚ್ಚು ಪದವೀಧರರು ಅರ್ಜಿ ಸಲ್ಲಿಸುತ್ತಿರುವುದನ್ನು ವರದಿ ಗಮನಿಸಿದೆ.
ಉನ್ನತ ಶಿಕ್ಷಣ ಪಡೆದ ಯುವಜನರು ಇಷ್ಟಪಟ್ಟು ಪೌರಕಾರ್ಮಿಕ ಅಥವಾ ಗ್ರೂಪ್-ಡಿ ಹುದ್ದೆಗಳಿಗೆ ಅರ್ಜಿ ಸಲ್ಲಿಸುತ್ತಿಲ್ಲ; ಬದಲಿಗೆ ಮಾರುಕಟ್ಟೆಯಲ್ಲಿ ತಮ್ಮ ಅರ್ಹತೆಗೆ ತಕ್ಕ ಉದ್ಯೋಗಗಳು ಇಲ್ಲದಿರುವ ಕಾರಣ ಕೇವಲ ಬದುಕಿನ ಅನಿವಾರ್ಯತೆಗಾಗಿ ಈ ಕೆಲಸಗಳಿಗೆ ಸಿದ್ಧರಾಗುತ್ತಿದ್ದಾರೆ ಎಂದು ವರದಿ ಹೇಳಿದೆ.
ಕಳೆದ ಒಂದು ದಶಕದಿಂದ ಭಾರತದಲ್ಲಿ, ‘ಡಿಗ್ರಿ ಇದ್ದರೆ ಸಾಕು ಜೀವನ ಸುಲಭವಾಗುತ್ತದೆ’ ಎಂಬ ನಂಬಿಕೆ ಸುಳ್ಳಾಗುತ್ತಿದ್ದು, ದೇಶದ ಯುವಶಕ್ತಿ ಇಂದು ತೀವ್ರ ಹತಾಶೆಯಲ್ಲಿದೆ.
ಸುಪ್ರೀಂಕೋರ್ಟ್ ನಿಯಮಾವಳಿಗಳನ್ನು ಎತ್ತಿಹಿಡಿದು ತೀರ್ಪು ನೀಡಬಹುದಾದರೂ, ಕೇವಲ ಹತ್ತನೇ ತರಗತಿ ಪಾಸ್ ಆದವರಿಗೆ ಮೀಸಲಾದ “ಅಟೆಂಡರ್” ಕೆಲಸಕ್ಕೂ ಇಂಜಿನಿಯರ್‌ಗಳು ಮತ್ತು ಪಿಎಚ್‌ಡಿ ಪದವೀಧರರು ಸ್ಪರ್ಧಿಸುವಂತಾಗಿರುವುದು ದೇಶದ ಉದ್ಯೋಗ ನೀತಿ ಮತ್ತು ಆರ್ಥಿಕ ಪ್ರಗತಿಯ ವೈಫಲ್ಯವನ್ನು ಎತ್ತಿ ತೋರಿಸುತ್ತದೆ.
