ಸಿನಿಮಾ ಪ್ರಚಾರಕ್ಕೂ ಕಾಲಿಟ್ಟ ರಿಷಬ್‌ ಶೆಟ್ಟಿ
ಹೊಸ ಸಂಸ್ಥೆಗೆ ಹುಟ್ಟೂರಿನ ಹೆಸರಿಟ್ಟ ನಟ
ಕನ್ನಡದ ಖ್ಯಾತ ನಟ, ನಿರ್ದೇಶಕ ರಿಷಬ್‌ ಶೆಟ್ಟಿ ಹೊಸ ಸಾಹಸಕ್ಕೆ ಕೈ ಹಾಕಿದ್ದಾರೆ. ನಟನೆ, ನಿರ್ದೇಶನದ ಜೊತೆಗೆ ಚಿತ್ರ ನಿರ್ಮಾಣದಲ್ಲೂ ಸೈ ಎನ್ನಿಸಿಕೊಂಡಿರು ರಿಷಬ್‌ ಸದ್ಯ ತಮ್ಮದೇ ಒಡೆತನದ ʼಕೆರಾಡಿ ಸ್ಟುಡಿಯೋಸ್‌ʼ ಸಂಸ್ಥೆಯನ್ನು ಪ್ರಾರಂಭಿಸಿದ್ದಾರೆ. ತಮ್ಮ ಹೊಸ ಯೋಜನೆಯ ಬಗ್ಗೆ ಟ್ವಿಟರ್‌ನಲ್ಲಿ ಮಾಹಿತಿ ಹಂಚಿಕೊಂಡಿದ್ದಾರೆ.
ವಿಶೇಷ ವಿಡಿಯೋ ಮತ್ತು ಬಹಿರಂಗ ಪತ್ರದ ಮೂಲಕ ತಮ್ಮ ಕನಸಿನ ಯೋಜನೆಯ ಬಗ್ಗೆ ಮಾಹಿತಿ ನೀಡಿರುವ ರಿಷಬ್‌, “ಕಳೆದ ಕೆಲವು ವರ್ಷಗಳಲ್ಲಿ ಸಿನಿಮಾಗಳನ್ನು ನಿರ್ಮಾಣ ಮಾಡಿ, ಅದನ್ನು ಸೂಕ್ತ ಪ್ರಚಾರದ ಮೂಲಕ ಜನರಿಗೆ ತಲುಪಿಸಿದ ಅನುಭವದೊಂದಿಗೆ ಇಂದು ನಮ್ಮ ತಂಡ ಹೊಸ ಹೆಜ್ಜೆ ಇರಿಸುತ್ತಿದೆ. ʼಕೆರಾಡಿ ಸ್ಟುಡಿಯೋಸ್‌ʼ ಎಂಬ ವೇದಿಕೆಯ ಮೂಲಕ ಚಿತ್ರಗಳ ಮಾರ್ಕೇಟಿಂಗ್‌ ಪ್ರಚಾರ ಮತ್ತು ಇತರ ಸೇವೆಗಳನ್ನು ಪ್ರಾರಂಭಿಸಿದ್ದೇವೆ” ಎಂದಿದ್ದಾರೆ.
ʼಕೆರಾಡಿʼ, ರಿಷಬ್‌ ಅವರ ಹುಟ್ಟೂರು. ಹುಟ್ಟೂರಿಗೆ ಗೌರವ ಸೂಚಿಸುವ ಸಲುವಾಗಿ ತಮ್ಮ ಹೊಸ ಸಂಸ್ಥೆಗೆ ʼಕೆರಾಡಿ ಸ್ಟುಡಿಯೋಸ್‌ʼ ಎಂದು ಹೆಸರಿಟ್ಟಿರುವುದಾಗಿ ತಿಳಿಸಿದ್ದಾರೆ. ʼರಿಷಬ್‌ ಶೆಟ್ಟಿ ಫಿಲಂಸ್‌ʼ ಹೆಸರಿನ ಚಿತ್ರ ನಿರ್ಮಾಣ ಸಂಸ್ಥೆಯನ್ನು ಕೂಡ ಹೊಂದಿರುವ ರಿಷಬ್‌, ʼಸ.ಹಿ.ಪ್ರಾ ಶಾಲೆ ಕಾಸರಗೋಡುʼ, ʼಕಥಾಸಂಗಮʼ, ʼಹೀರೋʼ ಚಿತ್ರಗಳನ್ನು ಮತ್ತು ʼಪೆಡ್ರೋʼ ಹಾಗೂ ʼಶಿವಮ್ಮʼ ಕಿರುಚಿತ್ರಗಳನ್ನು ಕೂಡ ನಿರ್ಮಿಸಿದ್ದಾರೆ. ಈವರೆಗೆ ನಟನೆ, ನಿರ್ದೇಶನ ಮತ್ತು ಚಿತ್ರ ನಿರ್ಮಾಣಕ್ಕೆ ಸೀಮಿತವಾಗಿದ್ದ ಅವರು ಇದೀಗ ಸಿನಿಮಾಗಳ ಪ್ರಚಾರ ಮತ್ತು ವಿತರಣೆಯಲ್ಲೂ ತೊಡಗಿಕೊಳ್ಳುತ್ತಿದ್ದಾರೆ.
ಈ ಸುದ್ದಿ ಓದಿದ್ದೀರಾ? ಮಹಿಳಾ ಕುಸ್ತಿಪಟುಗಳು ರಸ್ತೆಗಿಳಿಯಲು ಮೋದಿ ಕಾರಣ : ಕಿಶೋರ್ ಕುಮಾರ್
ಗುಂಪುಗಾರಿಕೆಯ ಕಾರಣಕ್ಕೇ ಹೆಚ್ಚು ಟೀಕೆಗೆ ಗುರಿಯಾಗುವ ರಿಷಬ್‌ ಶೆಟ್ಟಿ ಬೇರೆಯವರ ಸಿನಿಮಾಗಳ ಪ್ರಚಾರ ಮತ್ತು ವಿತರಣೆಗೆ ತಮ್ಮ ವೇದಿಕೆಯಲ್ಲಿ ಎಷ್ಟು ಒತ್ತು ನೀಡಲಿದ್ದಾರೆ ಎಂಬುದನ್ನು ಕಾದು ನೋಡಬೇಕಿದೆ. ʼಕಾಂತಾರʼ ಸಿನಿಮಾದ ಯಶಸ್ಸಿನ ಬಳಿಕ ʼಕಾಂತಾರ-2ʼ ಚಿತ್ರವನ್ನು ಘೋಷಿಸಿದ್ದ ರಿಷಬ್‌ ಶೆಟ್ಟಿ ಸದ್ಯ ಚಿತ್ರದ ಪ್ರೀ ಪ್ರೊಡಕ್ಷನ್‌ ಕೆಲಸಗಳಲ್ಲಿ ತೊಡಗಿಕೊಂಡಿದ್ದಾರೆ.
