ಜಗತ್ತನ್ನು ಕಾಡಬಹುದಾದ ಭವಿಷ್ಯದ ಸಾಂಕ್ರಾಮಿಕ ರೋಗಗಳನ್ನು ತಡೆಗಟ್ಟಲು ಮತ್ತು ವ್ಯಾಪಕ ಶ್ರೇಣಿಯ ವೈರಸ್‌ಗಳ ವಿರುದ್ಧ ರಕ್ಷಣೆ ನೀಡಲು ಕೃತಕ ಬುದ್ಧಿಮತ್ತೆ (AI) ಬಳಸಿ “ಸಂಪೂರ್ಣವಾಗಿ ಹೊಸ ಮಾದರಿಯ” ಲಸಿಕೆಯೊಂದನ್ನು ಅಭಿವೃದ್ಧಿಪಡಿಸಲಾಗಿದೆ ಎಂದು ಸಂಶೋಧಕರು ತಿಳಿಸಿರುವುದಾಗಿ BBC ವರದಿ ಮಾಡಿದೆ.
ಲಸಿಕೆಯೊಂದರ ಪ್ರಮುಖ ಘಟಕವನ್ನು ಸಂಪೂರ್ಣವಾಗಿ AI ಮೂಲಕ ವಿನ್ಯಾಸಗೊಳಿಸಿ, ಅದನ್ನು ಮನುಷ್ಯರ ಮೇಲೆ ಯಶಸ್ವಿಯಾಗಿ ಪ್ರಯೋಗ ನಡೆಸಿರುವುದು ಜಗತ್ತಿನಲ್ಲೇ ಇದೇ ಮೊದಲು ಎಂದು ಕೇಂಬ್ರಿಡ್ಜ್ ವಿಶ್ವವಿದ್ಯಾಲಯದ ವಿಜ್ಞಾನಿಗಳ ತಂಡ ಹೇಳಿದೆ.
ಇದು ಹೇಗೆ ಕೆಲಸ ಮಾಡುತ್ತದೆ?
ಸಾಮಾನ್ಯವಾಗಿ ಲಸಿಕೆಗಳನ್ನು ಪ್ರಸ್ತುತ ಚಾಲ್ತಿಯಲ್ಲಿರುವ ವೈರಸ್‌ನ ತಳಿಯನ್ನು ಆಧರಿಸಿ ಸಿದ್ಧಪಡಿಸಲಾಗುತ್ತದೆ. ಆದರೆ, ವೈರಸ್‌ಗಳು ನಿರಂತರವಾಗಿ ತಮ್ಮ ರೂಪವನ್ನು ಬದಲಾಯಿಸಿಕೊಳ್ಳುವುದರಿಂದ (ಮ್ಯುಟೇಶನ್), ಲಸಿಕೆಗಳು ಬೇಗನೆ ತಮ್ಮ ಪ್ರಭಾವ ಕಳೆದುಕೊಳ್ಳುತ್ತವೆ. ಇದಕ್ಕಾಗಿಯೇ ಕೋವಿಡ್ ಮತ್ತು ಜ್ವರದ ಲಸಿಕೆಗಳನ್ನು ಪದೇ ಪದೇ ನವೀಕರಿಸಬೇಕಾಗುತ್ತದೆ.
ಆದರೆ ಈ ಹೊಸ ತಂತ್ರಜ್ಞಾನದಲ್ಲಿ ಕಣ್ಗಾವಲು ಕಾರ್ಯಕ್ರಮಗಳ ಮೂಲಕ ಪತ್ತೆಹಚ್ಚಲಾದ ವಿವಿಧ ಕೊರೊನಾ ವೈರಸ್‌ಗಳ ತಳಿಗಳ ಜೆನೆಟಿಕ್ ಕೋಡ್‌ಗಳನ್ನು ವಿಜ್ಞಾನಿಗಳು ಸಂಗ್ರಹಿಸಿದರು. ಈ ಕೋಡ್‌ಗಳನ್ನು ಕೃತಕ ಬುದ್ಧಿಮತ್ತೆಯು ಆಳವಾಗಿ ವಿಶ್ಲೇಷಿಸಿತು. ನಂತರ, ಇಡೀ ವೈರಸ್ ಕುಟುಂಬದ ವಿರುದ್ಧ ಹೋರಾಡಬಲ್ಲ ಒಂದು ʼಸೂಪರ್-ಆಂಟಿಜೆನ್ ಅನ್ನು AI ವಿನ್ಯಾಸಗೊಳಿಸಿತು. ವೈರಸ್ ರೂಪಾಂತರಗೊಂಡರೂ ಅಥವಾ ಪ್ರಾಣಿಗಳಿಂದ ಮನುಷ್ಯರಿಗೆ ಹೊಸ ಸೋಂಕು ಹರಡಿದರೂ, ಈ ಸೂಪರ್-ಆಂಟಿಜೆನ್ ಮನುಷ್ಯನ ರೋಗನಿರೋಧಕ ಶಕ್ತಿಯನ್ನು ಮುಂಚಿತವಾಗಿಯೇ ಸಜ್ಜುಗೊಳಿಸುತ್ತದೆ.
“ನಾವು ಯಾವಾಗಲೂ ವೈರಸ್‌ಗಳ ಹಿಂದೆ ಓಡುತ್ತಿದ್ದೇವೆ. ಆದರೆ ಈ ತಂತ್ರಜ್ಞಾನದ ಮೂಲಕ ನಾವು ವೈರಸ್‌ಗಳಿಗಿಂತ ಒಂದು ಹೆಜ್ಜೆ ಮುಂದೆ ಇರಲು ಪ್ರಯತ್ನಿಸುತ್ತಿದ್ದೇವೆ. ಇದು ಸಾಂಕ್ರಾಮಿಕ ರೋಗಗಳನ್ನು ಎದುರಿಸುವ ನಮ್ಮ ಸಿದ್ಧತೆಯಲ್ಲಿ ದೊಡ್ಡ ಬದಲಾವಣೆ ತರಲಿದೆ” ಎಂದು ಕೇಂಬ್ರಿಡ್ಜ್ ವಿಶ್ವವಿದ್ಯಾಲಯದ ಪ್ರೊ. ಜೊನಾಥನ್ ಹಿನಿ ಪ್ರತಿಕ್ರಿಯಿಸಿದ್ದಾರೆ.
ಈ ಲಸಿಕೆಯ ಸುರಕ್ಷತೆಯನ್ನು ಪರೀಕ್ಷಿಸಲು ಮೊದಲ ಹಂತದಲ್ಲಿ 39 ಜನರ ಮೇಲೆ ಪ್ರಯೋಗ ನಡೆಸಲಾಯಿತು. ಪ್ರಸ್ತುತ ಲಸಿಕೆಯು ಸುರಕ್ಷಿತವಾಗಿದೆ ಎಂದು ತಿಳಿದುಬಂದಿದ್ದು, ರೋಗನಿರೋಧಕ ಶಕ್ತಿಯ ಮೇಲಿನ ಇದರ ಪ್ರಭಾವವು “ಸಾಧಾರಣ” (Modest) ಮಟ್ಟದಲ್ಲಿದೆ ಎಂದು ‘ಜರ್ನಲ್ ಆಫ್ ಇನ್‌ಫೆಕ್ಷನ್’ ವರದಿ ಮಾಡಿದೆ. ಆದಾಗ್ಯೂ, ಇದು ವೈದ್ಯಕೀಯ ಜಗತ್ತಿನಲ್ಲಿ ಭಾರಿ ಸಂಚಲನ ಮೂಡಿಸಿದೆ.
ಇದನ್ನೂ ಓದಿ: ನಿಜವಾದ ಶಿಸ್ತಿನ ಪಕ್ಷ ಕಾಂಗ್ರೆಸ್ಸೋ? ಬಿಜೆಪಿಯೋ?
ಮುಂದಿನ ಹಂತದಲ್ಲಿ, ಇದು ರೋಗನಿರೋಧಕ ವ್ಯವಸ್ಥೆಯನ್ನು ಎಷ್ಟು ಪರಿಣಾಮಕಾರಿಯಾಗಿ ತರಬೇತುಗೊಳಿಸುತ್ತದೆ ಎಂಬುದನ್ನು ತಿಳಿಯಲು ಸುಮಾರು 200 ಜನರ ಮೇಲೆ 2ನೇ ಹಂತದ ಅಧ್ಯಯನ ನಡೆಸಲಾಗುತ್ತಿದೆ.
ಕೋವಿಡ್ ಮಾತ್ರವಲ್ಲದೆ, ಇನ್ನೂ ಕೆಲವು ಮಾರಣಾಂತಿಕ ಕಾಯಿಲೆಗಳಿಗೆ ಈ ತಂತ್ರಜ್ಞಾನವನ್ನು ವಿಸ್ತರಿಸಲು ಕೇಂಬ್ರಿಡ್ಜ್ ತಂಡ ಮುಂದಾಗಿದೆ. ಅವುಗಳಲ್ಲಿ ಪ್ರತಿ ವರ್ಷ ಬದಲಾಯಿಸುವ ಅಗತ್ಯವಿಲ್ಲದ ಜ್ವರದ ಲಸಿಕೆಗಾಗಿ ಪ್ರಾಣಿಗಳ ಮೇಲೆ ಸಂಶೋಧನೆ ನಡೆಯುತ್ತಿದೆ. ಪ್ರಸ್ತುತ ಪಕ್ಷಿ ಸಂಕುಲವನ್ನು ಕಾಡುತ್ತಿರುವ ಹಕ್ಕಿ ಜ್ವರ (H5N1-Bird Flu) ವೈರಸ್ ಮನುಷ್ಯರಿಗೆ ಹರಡಿದರೆ ಎದುರಿಸಲು ಲಸಿಕೆ ಸಿದ್ಧಪಡಿಸಲಾಗುತ್ತಿದೆ. ಪ್ರಸ್ತುತ ಕಾಂಗೋ ಗಣರಾಜ್ಯದಲ್ಲಿ ಹರಡುತ್ತಿರುವ, ಲಸಿಕೆಯೇ ಇಲ್ಲದ ಎಬೋಲಾ ತಳಿಯ ವಿರುದ್ಧವೂ ಲಸಿಕೆ ರೂಪಿಸಲು ವಿಜ್ಞಾನಿಗಳು ಮುಂದಾಗಿದ್ದಾರೆ.
ಆಕ್ಸ್‌ಫರ್ಡ್ ವ್ಯಾಕ್ಸಿನ್ ಗ್ರೂಪ್‌ನ ನಿರ್ದೇಶಕ ಪ್ರೊ. ಆಂಡಿ ಪೋಲಾರ್ಡ್ ಮಾತನಾಡಿ, “ಪ್ರಾಣಿಗಳ ಮೇಲಿನ ಪ್ರಯೋಗದಲ್ಲಿ ಇದು ಅತ್ಯಂತ ಬಲವಾದ ಪುರಾವೆಗಳನ್ನು ನೀಡಿದೆ. ಕೃತಕ ಬುದ್ಧಿಮತ್ತೆಯು ಲಸಿಕೆ ಸಂಶೋಧನೆಯಲ್ಲಿ ಗೇಮ್ ಚೇಂಜರ್ ಆಗಲಿದ್ದು, ಮಾನವನ ರೋಗನಿರೋಧಕ ವ್ಯವಸ್ಥೆಯು ಲಸಿಕೆಗೆ ಹೇಗೆ ಪ್ರತಿಕ್ರಿಯಿಸುತ್ತದೆ ಎಂಬುದನ್ನು ಮುನ್ಸೂಚನೆ ನೀಡುವ ಮೂಲಕ ಭವಿಷ್ಯದಲ್ಲಿ ಕೋಟ್ಯಂತರ ಜೀವಗಳನ್ನು ಉಳಿಸಲಿದೆ” ಎಂದು ಆಶಾವಾದ ವ್ಯಕ್ತಪಡಿಸಿದ್ದಾರೆ.
