2026-27ರ ಸಾಲಿಗೆ ಖಾಸಗಿ ಎಂಜಿನಿಯರಿಂಗ್ ಕಾಲೇಜುಗಳ ಸರ್ಕಾರಿ ಕೋಟದ ವಿದ್ಯಾರ್ಥಿಗಳ ಶುಲ್ಕವನ್ನು ಶೇಕಡ 7.5ರಷ್ಟು ಹೆಚ್ಚು ಮಾಡಿರುವ ರಾಜ್ಯ ಸರ್ಕಾರದ ನಿರ್ಧಾರವನ್ನು ಅಖಿಲ ಭಾರತ ಶಿಕ್ಷಣ ಉಳಿಸಿ ಸಮಿತಿಯ ರಾಜ್ಯ ಸಮಿತಿಯು (AISEC) ಖಂಡಿಸಿದೆ.
“ರಾಜ್ಯ ಸರ್ಕಾರವು ಖಾಸಗಿ ಆಡಳಿತ ಮಂಡಳಿಯವರ ಮನವಿಯ ಮೇರೆಗೆ ಶುಲ್ಕ ಏರಿಕೆಗೆ ನಿರ್ಧರಿಸಿದೆ. ವಿದ್ಯಾರ್ಥಿಗಳ ಹಾಗೂ ಪೋಷಕರ ಯಾವುದೇ ಅಹವಾಲುಗಳನ್ನು ಆಲಿಸದೆ ಶಿಕ್ಷಣದ ಗುಣಮಟ್ಟ ಮತ್ತು ಉದ್ಯೋಗ ಖಾತ್ರಿ ಅಂತಹ ಕ್ರಮಗಳ ಕಡೆಗೆ ಗಮನ ಕೊಡದೆ ಶುಲ್ಕ ಏರಿಸುವ ಈ ನಿರ್ಧಾರ ಅತ್ಯಂತ ಖಂಡನೀಯ” ಎಂದು ಸಮಿತಿ ಹೇಳಿದೆ.
ಇದನ್ನು ಓದಿದ್ದೀರಾ? ಶಾಲಾ ಶುಲ್ಕ ಹೆಚ್ಚಳ; ಬಿಸಿತುಪ್ಪವಾದ ಗುಣಮಟ್ಟದ ಶಿಕ್ಷಣ
“ಹಿಂದಿನ ಶೈಕ್ಷಣಿಕ ವರ್ಷದಲ್ಲಿ ಕೂಡ ಶೇಕಡ 5.0 ಶುಲ್ಕವನ್ನು ಏರಿಸಿ, ಆದೇಶ ಹೊರಡಿಸಿತ್ತು ಈ ರಾಜ್ಯ ಸರ್ಕಾರ. ಈ ಶುಲ್ಕದೊಂದಿಗೆ ಹೆಚ್ಚುವರಿಯಾಗಿ ವಿಶ್ವವಿದ್ಯಾಲಯದ ಶುಲ್ಕ ಮತ್ತು 20,000 ರೂಪಾಯಿವರೆಗಿನ ಹೆಚ್ಚಿನ ಶುಲ್ಕವನ್ನು ಸಂಗ್ರಹಿಸಲು ಖಾಸಗಿ ಕಾಲೇಜುಗಳಿಗೆ ಅನುಮತಿ ನೀಡಿರುವುದು ಸಹ ಹೆಚ್ಚಿನ ಹೊರೆಯಾಗುತ್ತದೆ” ಎಂದು AISEC ತಿಳಿಸಿದೆ.
“ಈಗಾಗಲೇ ಬೆಲೆ ಏರಿಕೆ ಹಣದುಬ್ಬರದಿಂದ ಕಂಗಾಲಾಗಿರುವ ಪೋಷಕರಿಗೆ ಈ ಶುಲ್ಕ ಏರಿಕೆಯೂ ಮತ್ತಷ್ಟು ಹೊರೆಯಾಗಲಿದೆ. ಪ್ರತಿ ವರ್ಷ ಖಾಸಗಿ ಎಂಜಿನಿಯರಿಂಗ್ ಕಾಲೇಜುಗಳ ಒತ್ತಡಕ್ಕೆ ಮಣಿದು ಸರ್ಕಾರ ಏಕಾಏಕಿ ಶುಲ್ಕ ಏರಿಕೆ ಮಾಡುತ್ತಿರುವುದು ಅತ್ಯಂತ ಖಂಡನಾರ್ಹ” ಎಂದಿದೆ.
“ಈ ಎಲ್ಲ ವಿಷಯಗಳನ್ನು ಗಮನದಲ್ಲಿಟ್ಟುಕೊಂಡು ಜವಾಬ್ದಾರಿಯುತ ಸರ್ಕಾರ ಈ ಕೂಡಲೇ ಶೇಕಡ 7.5 ರಷ್ಟು ಶುಲ್ಕ ಏರಿಕೆಯನ್ನು ಹಿಂತೆಗೆದುಕೊಂಡು ವಿದ್ಯಾರ್ಥಿ, ಪೋಷಕರ ಪರವಾದ ನಿಲುವನ್ನು ತೆಗೆದುಕೊಳ್ಳಬೇಕು” ಎಂದು AISEC ರಾಜ್ಯ ಸಮಿತಿ ಆಗ್ರಹಿಸಿದೆ.
