ನಾಡಹಬ್ಬ ಮೈಸೂರು ದಸರಾ ಮತ್ತು ಜಿಲ್ಲಾವಾರು ದಸರಾ ಆಚರಣೆಗಳು ಸೇರಿದಂತೆ ಯಾವುದೇ ಸರ್ಕಾರಿ ಅಥವಾ ಖಾಸಗಿ ಸಂಭ್ರಮಾಚರಣೆಗಳಲ್ಲಿ ಜೀವಂತ ಆನೆಗಳ ಬಳಕೆಯನ್ನು ಸಂಪೂರ್ಣವಾಗಿ ನಿಷೇಧಿಸಬೇಕು ಎಂದು ಆಗ್ರಹಿಸಿ ಮೈಸೂರಿನ ಪ್ರಸಿದ್ಧ ಸರ್ಕಾರೇತರ ಸಂಸ್ಥೆಯಾದ ಒಡನಾಡಿ ಸೇವಾ ಸಂಸ್ಥೆಯ ಸಹ-ಸಂಸ್ಥಾಪಕ ಕೆ.ವಿ. ಸ್ಟಾನ್ಲಿ ಎಂಬವರು ಅವರು ರಾಜ್ಯ ಸರ್ಕಾರದ ಅರಣ್ಯ ಮತ್ತು ಪರಿಸರ ಸಚಿವ ರಾಮಲಿಂಗಾ ರೆಡ್ಡಿ ಅವರಿಗೆ ಅಧಿಕೃತ ಮನವಿ ಸಲ್ಲಿಸಿದ್ದಾರೆ.
ಕಳೆದ 2026ರ ಶಿವಮೊಗ್ಗ ದಸರಾ ಆಚರಣೆಯ ವೇಳೆ ಅಂಬಾರಿ ಹೊತ್ತ ಆನೆಯು ಬೆದರಿ ಅಡ್ಡಾದಿಡ್ಡಿ ಓಡಾಡಿ ಸಾರ್ವಜನಿಕರಲ್ಲಿ ಆತಂಕ ಸೃಷ್ಟಿಸಿತ್ತು. ಅಲ್ಲದೆ, ಹಿಂದಿನ ವರ್ಷಗಳಲ್ಲಿ ಮೈಸೂರು ಅರಮನೆ ಆವರಣದಲ್ಲೂ ಇದೇ ರೀತಿಯ ಘಟನೆಗಳು ಮರುಕಳಿಸಿರುವುದನ್ನು ಈ ಮನವಿಯಲ್ಲಿ ಗಂಭೀರವಾಗಿ ಪ್ರಸ್ತಾಪಿಸಲಾಗಿದೆ. ಪ್ರಾಣಿಗಳ ರಕ್ಷಣೆ ಮತ್ತು ಸಂವಿಧಾನಾತ್ಮಕ ಮತ್ತು ಕಾನೂನಾತ್ಮಕ ಅಂಶಗಳ ಆಧಾರದ ಮೇಲೆ ಈ ಮನವಿ ಸಲ್ಲಿಸಲಾಗಿದೆ.
ಇದನ್ನೂ ಓದಿ: ದಸರಾ ಉತ್ಸವ | ಮೊದಲ ಬಾರಿಗೆ ಮೈಸೂರಿನಲ್ಲಿ ಕಂಬಳ ಆಯೋಜಿಸಲು ಸಿದ್ಧತೆ
ಸಂವಿಧಾನದ ಅನುಚ್ಛೇದ 21ರ ಅಡಿಯಲ್ಲಿ ಸುಪ್ರೀಂ ಕೋರ್ಟ್ ತೀರ್ಪಿನ ಪ್ರಕಾರ ‘ಜೀವಿಸುವ ಹಕ್ಕು’ ಕೇವಲ ಮಾನವರಿಗೆ ಮಾತ್ರವಲ್ಲದೆ ಪ್ರಾಣಿಗಳಿಗೂ ಅನ್ವಯಿಸುತ್ತದೆ. ಗಂಟೆಗಟ್ಟಲೆ ಸರಪಳಿಯಲ್ಲಿ ಕಟ್ಟಿ, ಡೋಲು-ಬ್ಯಾಂಡ್‌ ಹಾಗೂ ಪಟಾಕಿ ಶಬ್ದದ ನಡುವೆ ಆನೆಗಳನ್ನು ನಿಲ್ಲಿಸುವುದು ಈ ಹಕ್ಕಿನ ಸ್ಪಷ್ಟ ಉಲ್ಲಂಘನೆಯಾಗಿದೆ ಎಂದು ತಿಳಿಸಲಾಗಿದೆ.
ವನ್ಯಜೀವಿ ಸಂರಕ್ಷಣಾ ಕಾಯ್ದೆ, 1972ರ ಅನುಸೂಚಿ-1ರ ಪ್ರಕಾರ ಆನೆಗಳು ಅತಿ ಹೆಚ್ಚು ಸಂರಕ್ಷಿತ ಪ್ರಾಣಿಗಳಾಗಿದ್ದು, ದಸರಾ ಮೆರವಣಿಗೆಯಲ್ಲಿ 4ರಿಂದ 5 ಗಂಟೆಗಳ ಕಾಲ 750 ಕೆಜಿ ಗೂ ಹೆಚ್ಚು ತೂಕದ ಅಂಬಾರಿ ಹೊರಿಸುವುದು ಪ್ರಾಣಿಗಳ ಮೇಲಿನ ಕ್ರೌರ್ಯ ಪ್ರತಿಬಂಧಕ ಕಾಯ್ದೆ, 1960ರ ಉಲ್ಲಂಘನೆಯಾಗಿದೆ ಎಂದು ಮನವಿಯಲ್ಲಿ ಉಲ್ಲೇಖಿಸಲಾಗಿದೆ.
ಫಿರಂಗಿ ಸಿಡಿತ, 21 ಕುಶಾಲತೋಪುಗಳು ಮತ್ತು ಬಂದೂಕುಗಳ ಗುಂಡಿನ ಶಬ್ದವು 120-140 ಡೆಸಿಬಲ್ ದಾಟುತ್ತದೆ. ಆನೆಗಳ ಶ್ರವಣ ಶಕ್ತಿಯು ಮನುಷ್ಯನಿಗಿಂತ ಹಲವು ಪಟ್ಟು ಸೂಕ್ಷ್ಮವಾಗಿದ್ದು, ಈ ತೀವ್ರ ಶಬ್ದದಿಂದ ಆನೆಗಳಿಗೆ ‘Acoustic Trauma’ (ಧ್ವನಿಜನ್ಯ ಆಘಾತ), ತಾತ್ಕಾಲಿಕ ಕಿವುಡುತನ ಮತ್ತು ಹೃದಯಾಘಾತದಂತಹ ಸಮಸ್ಯೆಗಳು ಉಂಟಾಗುತ್ತವೆ. ಆನೆಗಳು ಬೆದರಿ ಓಡುವುದು ಅವುಗಳ ಪುಂಡತನವಲ್ಲ, ಬದಲಾಗಿ ಸಹಜ ಆತ್ಮರಕ್ಷಣೆ ಎಂದು ವರದಿಯಲ್ಲಿ ವಿವರಿಸಲಾಗಿದೆ.
ಹಾಗಾಗಿ ನಾಡಹಬ್ಬ ಮೈಸೂರು ದಸರಾ, ಎಲ್ಲಾ ಜಿಲ್ಲಾವಾರು ದಸರಾ ಉತ್ಸವಗಳು, ಜಾತ್ರೆ ಹಾಗೂ ಖಾಸಗಿ ಕಾರ್ಯಕ್ರಮಗಳಲ್ಲಿ ಜೀವಂತ ಆನೆಗಳ ಬಳಕೆಯನ್ನು ತಕ್ಷಣದಿಂದ ನಿಷೇಧಿಸಬೇಕು. ಕೇರಳದ ತ್ರಿಶೂರ್‌ನ ದೇವಸ್ಥಾನಗಳಲ್ಲಿ ಬಳಕೆಯಲ್ಲಿರುವಂತೆ, ಅಂಬಾರಿ ಹೊರಲು ಬ್ಯಾಟರಿ ಚಾಲಿತ ರೋಬೋಟಿಕ್/ಯಾಂತ್ರಿಕ ಆನೆಗಳನ್ನು ಬಳಸಬೇಕು. ಧ್ವನಿವರ್ಧಕ, ಲೇಸರ್ ಲೈಟ್ ಶೋ ವ್ಯವಸ್ಥೆ ಮಾಡಬೇಕು ಎಂದು ಆಗ್ರಹಿಸಲಾಗಿದೆ.
ಅರಣ್ಯ ಇಲಾಖೆಯಲ್ಲಿರುವ ಸಾಕಾನೆಗಳನ್ನು ಕೇವಲ ಕಾಡಂಚಿನ ಗ್ರಾಮಗಳಲ್ಲಿ ಬೆಳೆ ರಕ್ಷಣೆ, ಮಾನವ-ಆನೆ ಸಂಘರ್ಷ ತಡೆ ಹಾಗೂ ಗಾಯಗೊಂಡ ಆನೆಗಳ ಚಿಕಿತ್ಸೆಗೆ ಮಾತ್ರ ಬಳಸಬೇಕು. ರಾಜ್ಯದ ಖಾಸಗಿ ಮತ್ತು ಧಾರ್ಮಿಕ ಸಂಸ್ಥೆಗಳ ವಶದಲ್ಲಿರುವ ಆನೆಗಳ ಲೆಕ್ಕಪರಿಶೋಧನೆ ನಡೆಸಿ, ಅವುಗಳನ್ನು ವೈಜ್ಞಾನಿಕ ಪುನರ್ವಸತಿ ಕೇಂದ್ರಗಳಲ್ಲಿ ಮುಕ್ತವಾಗಿಡಲು ಕ್ರಮ ಕೈಗೊಳ್ಳಬೇಕು ಎಂದು ಆಗ್ರಹಿಸಿದೆ.
