ಬೆಂಗಳೂರು ಗ್ರಾಮಾಂತರ ಜಿಲ್ಲೆಯಲ್ಲಿ ಭೂಮಿ ಕಂಪಿಸಿದ ಬೆನ್ನಲ್ಲೇ, ಇದೀಗ ಚಿಕ್ಕಬಳ್ಳಾಪುರ ಜಿಲ್ಲೆಯಲ್ಲೂ ಲಘು ಭೂಕಂಪನ ದಾಖಲಾಗಿದೆ. ಶನಿವಾರ (ಅ.24) ಮುಂಜಾನೆ 3.29ರ ಸುಮಾರಿಗೆ 2.9 ತೀವ್ರತೆಯ ಭೂಕಂಪ ಸಂಭವಿಸಿದ್ದು, ಸಾರ್ವಜನಿಕರು ಆತಂಕಪಡುವ ಅಗತ್ಯವಿಲ್ಲ ಎಂದು ಕರ್ನಾಟಕ ರಾಜ್ಯ ನೈಸರ್ಗಿಕ ವಿಕೋಪ ಉಸ್ತುವಾರಿ ಕೇಂದ್ರ (KSNDMC) ತಿಳಿಸಿದೆ.
ಭೂಕಂಪದ ತೀವ್ರತೆ ಕಡಿಮೆ ಇದ್ದು, ಸ್ಥಳೀಯವಾಗಿ ಕಂಪನದ ಅನುಭವವು ಭೂಕೇಂದ್ರದಿಂದ ಸುಮಾರು 20ರಿಂದ 30 ಕಿಲೋಮೀಟರ್ ವ್ಯಾಪ್ತಿಯಲ್ಲಿ ಕಂಡುಬರುವ ಸಾಧ್ಯತೆ ಇದೆ. ಈ ಕಂಪನದಿಂದ ಸ್ಥಳೀಯ ಜನಜೀವನಕ್ಕೆ ಹಾನಿಯಾಗುವ ನಿರೀಕ್ಷೆಯಿಲ್ಲ ಎಂದು ಕೇಂದ್ರ ತಿಳಿಸಿದೆ.
KSNDMC ನೀಡಿರುವ ಮಾಹಿತಿಯ ಪ್ರಕಾರ, ಚಿಕ್ಕಬಳ್ಳಾಪುರ ಜಿಲ್ಲೆಯ ಗೌರಿಬಿದನೂರು ತಾಲೂಕಿನ ತರಿದಾಳು ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಸೋಮಸೇಟಿಹಳ್ಳಿ ಗ್ರಾಮದ ಪೂರ್ವಕ್ಕೆ ಸುಮಾರು 2 ಕಿಲೋಮೀಟರ್ ದೂರದಲ್ಲಿ ಭೂಕಂಪದ ಕೇಂದ್ರಬಿಂದು ಪತ್ತೆಯಾಗಿದೆ. ಭೂಮಿಯ ಮೇಲ್ಮೈಯಿಂದ ಸುಮಾರು 5 ಕಿಲೋಮೀಟರ್ ಆಳದಲ್ಲಿ ಕಂಪನ ಸಂಭವಿಸಿದ್ದು, ಚಿಕ್ಕಬಳ್ಳಾಪುರ ನಗರದಿಂದ ಸುಮಾರು 33 ಕಿಲೋಮೀಟರ್ ವಾಯವ್ಯ ದಿಕ್ಕಿನಲ್ಲಿ ಭೂಕೇಂದ್ರವಿದೆ ಎಂದು ತಿಳಿಸಲಾಗಿದೆ.
ಭೂಕಂಪದ ಕೇಂದ್ರಬಿಂದು ಇರುವ ಪ್ರದೇಶವು ಭೂಕಂಪ ವಲಯ-2ಕ್ಕೆ ಸೇರಿದೆ. ಈ ಪ್ರದೇಶದಲ್ಲಿ ಭೂವೈಜ್ಞಾನಿಕ ರಚನೆಯಲ್ಲಿ ದೊಡ್ಡ ಮಟ್ಟದ ಅಸಮತಲತೆಗಳು ಅಥವಾ ರಚನಾತ್ಮಕ ವ್ಯತ್ಯಾಸಗಳಿಲ್ಲ ಎಂದು KSNDMC ತಿಳಿಸಿದೆ. ಭೂಕಂಪದ ತೀವ್ರತೆ ಕಡಿಮೆ ಇರುವುದರಿಂದ ಯಾವುದೇ ಆತಂಕಕ್ಕೆ ಒಳಗಾಗುವ ಅಗತ್ಯವಿಲ್ಲ ಎಂದು ಕೇಂದ್ರ ಸಾರ್ವಜನಿಕರಿಗೆ ಭರವಸೆ ನೀಡಿದೆ.
ಅಕ್ಟೋಬರ್‌ 23ರಂದು ಶುಕ್ರವಾರ ಬೆಳಗ್ಗೆ 9.1ರ ಸುಮಾರಿಗೆ ಬೆಂಗಳೂರು ಗ್ರಾಮಾಂತರ ಜಿಲ್ಲೆಯ ದೊಡ್ಡಬಳ್ಳಾಪುರ ತಾಲೂಕಿನ ತಿಮ್ಮೋಜನಹಳ್ಳಿಯಲ್ಲಿ 3.0 ತೀವ್ರತೆಯ ಭೂಕಂಪ ದಾಖಲಾಗಿತ್ತು. ಇದರ ಬೆನ್ನಲ್ಲೇ ಚಿಕ್ಕಬಳ್ಳಾಪುರದಲ್ಲಿ ಮತ್ತೊಂದು ಲಘು ಭೂಕಂಪ ದಾಖಲಾಗಿರುವುದು ಆತಂಕ ಹುಟ್ಟಿಸಿದೆ. ಸದ್ಯದ ಮಾಹಿತಿಯ ಪ್ರಕಾರ, ಎರಡೂ ಕಂಪನಗಳ ತೀವ್ರತೆ ಕಡಿಮೆ ಇದ್ದು, ಸಾರ್ವಜನಿಕರು ವದಂತಿಗಳಿಗೆ ಕಿವಿಗೊಡದೆ ಅಧಿಕೃತ ಮಾಹಿತಿಯನ್ನು ಅನುಸರಿಸುವಂತೆ ಸೂಚಿಸಲಾಗಿದೆ.
ಇದನ್ನೂ ಓದಿ: ಮಣಿಪುರದಲ್ಲಿ 5.2 ತೀವ್ರತೆಯ ಭೂಕಂಪ
ಭೂಕಂಪನಶಾಸ್ತ್ರದ ಪ್ರಕಾರ, ಭಾರತವನ್ನು ಒಟ್ಟು ನಾಲ್ಕು ಭೂಕಂಪ ವಲಯಗಳಾಗಿ ವಿಂಗಡಿಸಲಾಗಿದೆ. ಇದರಲ್ಲಿ ‘ವಲಯ-2’ ಅತ್ಯಂತ ಕಡಿಮೆ ತೀವ್ರತೆಯ ಅಪಾಯವಿರುವ ಅತಿ ಸುರಕ್ಷಿತ ಪ್ರದೇಶವೆಂದು ಪರಿಗಣಿಸಲ್ಪಟ್ಟಿದೆ. ದಕ್ಷಿಣ ಭಾರತದ ಬಹುತೇಕ ಭಾಗಗಳು ಈ ಸ್ಥಿರವಾದ ‘ಪೆನಿನ್ಸುಲರ್ ಶೀಲ್ಡ್’ (Peninsular Shield) ಮೇಲಿವೆ. ಚಿಕ್ಕಬಳ್ಳಾಪುರದಲ್ಲಿ ಸಂಭವಿಸಿದ ಭೂಕಂಪದ ಕೇಂದ್ರಬಿಂದುವು ಕೇವಲ 5 ಕಿಲೋಮೀಟರ್ ಆಳದಲ್ಲಿದೆ. ಭೂಮಿಯ ಮೇಲ್ಮೈಗೆ ತೀರಾ ಹತ್ತಿರದಲ್ಲಿ ಇಂತಹ ಕಂಪನಗಳು ಸಂಭವಿಸಿದಾಗ, ಭೂಕಂಪನದ ತೀವ್ರತೆ ಕೇವಲ 2.9 ಅಥವಾ 3.0 ಇದ್ದರೂ, ಸ್ಫೋಟದ ಶಬ್ದ ಅಥವಾ ಮೇಲ್ಮೈ ಕಂಪನದ ಅನುಭವವು ಸ್ಥಳೀಯರಿಗೆ ತೀವ್ರವಾಗಿ ಗೋಚರಿಸುತ್ತದೆ.
ಭೂವಿಜ್ಞಾನಿಗಳು ಮತ್ತು KSNDMC ತಜ್ಞರ ವಿಶ್ಲೇಷಣೆಯ ಪ್ರಕಾರ, ಈ ಭಾಗದಲ್ಲಿ ಪದೇಪೇದೆ ಭೂಮಿ ಕಂಪಿಸಲು ಕೆಲ ಪ್ರಮುಖ ಕಾರಣಗಳಿವೆ. ಭೂಮಿಯ ಒಳಗಿನ ಶಿಲಾಪದರಗಳಲ್ಲಿ ನಿರಂತರವಾಗಿ ನಡೆಯುವ ಒತ್ತಡ ಬಿಡುಗಡೆ ಮತ್ತು ಸಣ್ಣಪುಟ್ಟ ಹೊಂದಾಣಿಕೆಗಳು ಮುಖ್ಯವಾಗಿ ಕಾರಣವಾಗಬಹುದು. ವಿಜ್ಞಾನಿಗಳ ಪ್ರಕಾರ, ದಕ್ಷಿಣ ಭಾರತದ ಕೆಲವು ಗಟ್ಟಿಯಾದ ಬಂಡೆಗಳ ಪ್ರದೇಶಗಳಲ್ಲಿ ಅಂತರ್ಜಲ ಮಟ್ಟದಲ್ಲಿ ಆಗುವ ತೀವ್ರ ಬದಲಾವಣೆಗಳು (ಅಧಿಕ ಮಳೆ ಅಥವಾ ತೀವ್ರ ಬೇಸಿಗೆಯಿಂದ ಬಂಡೆಗಳ ಸಂಕೋಚನ ಮತ್ತು ವಿಸ್ತರಣೆ) ಕೂಡ ಮೇಲ್ಮೈ ಬಳಿಯ ಶಿಲೆಗಳಲ್ಲಿ ಸಣ್ಣ ಬಿರುಕುಗಳು ಮೂಡಲು ಅಥವಾ ಕಂಪನ ಉಂಟಾಗಲು ಕಾರಣವಾಗಬಹುದು. ಭೂಮಿಯ ಒಳಗೆ ಸದಾ ಕಾಲ ಸಂಗ್ರಹವಾಗುವ ಒತ್ತಡವು ಇಂತಹ ಸಣ್ಣಪುಟ್ಟ ಲಘು ಕಂಪನಗಳ ಮೂಲಕ ಆಗಾಗ್ಗೆ ಹೊರಹಾಕಲ್ಪಡುತ್ತದೆ. ಇದು ದೊಡ್ಡ ಮಟ್ಟದ ವಿನಾಶಕಾರಿ ಭೂಕಂಪನಗಳ ಅಪಾಯವನ್ನು ತಗ್ಗಿಸುವ ಒಂದು ನೈಸರ್ಗಿಕ ಪ್ರಕ್ರಿಯೆಯೂ ಹೌದು ಎಂದು ತಜ್ಞರು ಅಭಿಪ್ರಾಯಪಡುತ್ತಾರೆ.
