ಕನ್ನಡದ ಪ್ರಸಿದ್ಧ ಕವಿ, ಅನುವಾದಕ, ಪರಿಸರ ಕಾರ್ಯಕರ್ತ ಹಾಗೂ ನೈಸರ್ಗಿಕ ಕೃಷಿಕರಾಗಿದ್ದ ಎಲ್ ಸಿ ನಾಗರಾಜ್ (63) ಅವರು ಜುಲೈ 23ರಂದು ಅನಾರೋಗ್ಯದಿಂದ ನಿಧನರಾಗಿದ್ದಾರೆ. ಬೆಂಗಳೂರು ಗ್ರಾಮಾಂತರ ಜಿಲ್ಲೆಯ ತಾವರೆಕೆರೆ ಸಮೀಪದ ಸೊಂಡೆಕೊಪ್ಪದಲ್ಲಿರುವ ತಮ್ಮ ತೋಟದ ಮನೆಯಲ್ಲಿ ಅವರು ಕೊನೆಯುಸಿರೆಳೆದರು.
ಈ ಬಗ್ಗೆ ಅವರದ್ದೇ ಫೇಸ್‌ಬುಕ್ ಖಾತೆಯಲ್ಲಿ ಕುಟುಂಬಸ್ಥರು ಪೋಸ್ಟ್ ಮಾಡಿದ್ದಾರೆ. “ತೀವ್ರ ದುಃಖದಿಂದ ತಿಳಿಸುತ್ತಿದ್ದೇವೆ, ನಮ್ಮ ಪ್ರೀತಿಯ. ಸ್ನೇಹಿತ ಎಲ್.ಸಿ ನಾಗರಾಜ್ ಇಂದು ವಿಧಿವಶರಾಗಿದ್ದಾರೆ. ಅವರ ಅಗಲಿಕೆಯಿಂದ ನಮ್ಮ ಕುಟುಂಬಕ್ಕೆ ತುಂಬಲಾರದ ನಷ್ಟವಾಗಿದೆ. ಅವರ ಆತ್ಮಕ್ಕೆ ಸದ್ಗತಿ ದೊರೆಯಲೆಂದು ಹಾಗೂ ನಮ್ಮ ಕುಟುಂಬಕ್ಕೆ ಈ ದುಃಖವನ್ನು ಭರಿಸುವ ಶಕ್ತಿಯನ್ನು ದೇವರು ಕರುಣಿಸಲೆಂದು ಪ್ರಾರ್ಥಿಸುತ್ತೇವೆ. ನಾಳೆ ಮಧ್ಯಾಹ್ನ 12.30 ನಂತರ ಮಂಟನಕುರ್ಚಿ ತೋಟದ ಮನೆಯಲ್ಲಿ ಅಂತಿಮ ಕಾರ್ಯವನ್ನು ನೆರವೇರಿಸಲಾಗುತ್ತದೆ” ಎಂದು ಮಾಹಿತಿ ನೀಡಿದ್ದಾರೆ.
ಎಲ್. ಸಿ. ನಾಗರಾಜ್ ಅವರು ಕನ್ನಡದ ಪ್ರಮುಖ ಕವಿ, ಲೇಖಕ ಮತ್ತು ಚಿಂತಕರಾಗಿದ್ದರು. ಇವರ ಕವಿತೆಗಳು ಮತ್ತು ಬರಹಗಳು ವಿವಿಧ ಸಾಹಿತ್ಯಿಕ ನಿಯತಕಾಲಿಕೆಗಳಲ್ಲಿ ಪ್ರಕಟವಾಗಿವೆ. ‘ಗಾಳಿಯ ದೈವಿಕ ಹಾಡುಗಳು’ ಅವರ ಪ್ರಸಿದ್ಧ ಅನುವಾದ ಕವಿತೆಗಳ ಸಂಕಲನವಾಗಿದೆ.
ಸ್ವಾತಂತ್ರ್ಯ ಹೋರಾಟಗಾರ ಎಲ್.ಸಿ.ಚಿಕ್ಕಬೈರಪ್ಪ-ಪುಟ್ಟಮ್ಮ ದಂಪತಿಯ ಏಳು ಮಕ್ಕಳಲ್ಲಿ ಮೂರನೆಯವರು ಎಲ್ ಸಿ ನಾಗರಾಜ್. ರಾಮನಗರದಲ್ಲಿ ಪ್ರಾಥಮಿಕ, ಪ್ರೌಢ ಶಿಕ್ಷಣ ಪಡೆದ ಅವರು, ಬೆಂಗಳೂರಿನಲ್ಲಿ ಎಂಜಿನಿಯರಿಂಗ್ ಡಿಪ್ಲೊಮಾ ಪೂರೈಸಿದ್ದಾರೆ.
ಕೈಗಾ ವಿರೋಧಿ ಚಳವಳಿಯಲ್ಲಿ ಪಾಲ್ಗೊಂಡಿದ್ದ ನಾಗರಾಜ್ ಅವರು ಸ್ವಯಂಸೇವಾ ಸಂಸ್ಥೆಗಳ ಕಾರ್ಯದಲ್ಲಿ ತಮ್ಮನ್ನು ತಾವು ತೊಡಗಿಸಿಕೊಂಡಿದ್ದಾರೆ. ಹಾಗೆಯೇ ತಮ್ಮ ತಾಯಿಯ ನಿಧನದ ಬಳಿಕ ತಮ್ಮ ತೋಟದಲ್ಲಿ ಏಕಾಂಗಿಯಾಗಿ ಉಳಿದು ನೈಸರ್ಗಿಕ ಕೃಷಿ ಚಟುವಟಿಕೆಯಲ್ಲಿ ತೊಡಗಿಕೊಂಡಿದ್ದರು.
