ಕೇಂದ್ರ ಸರ್ಕಾರದ ರೈತ, ಕಾರ್ಮಿಕ ವಿರೋಧಿ ನೀತಿಗಳು ಮತ್ತು ಧೋರಣೆಗಳನ್ನು ಖಂಡಿಸಿ ರಾಯಚೂರು ನಗರದ ಡಾ. ಬಿ.ಆರ್ ಅಂಬೇಡ್ಕರ್ ವೃತ್ತದಲ್ಲಿ ಟ್ರೇಡ್ ಯೂನಿಯನ್ ಸೆಂಟರ್ ಆಫ್ ಇಂಡಿಯಾ ಹಾಗೂ ಕರ್ನಾಟಕ ರೈತ ಸಂಘದ ಕಾರ್ಯಕರ್ತರು ಪ್ರತಿಭಟನೆ ನಡೆಸಿದರು.
“ಕೇಂದ್ರದ ಬಿಜೆಪಿ ನೇತೃತ್ವದ ಎನ್‌ಡಿಎ ಸರ್ಕಾರದ ರೈತ ಮತ್ತು ಕಾರ್ಮಿಕ ವಿರೋಧಿ ನೀತಿಗಳ ವಿರುದ್ಧ ಸಂಯುಕ್ತ ಕಿಸಾನ್ ಮೋರ್ಚಾ(ಎಸ್‌ಕೆಎಂ) 10 ಕೇಂದ್ರ ಕಾರ್ಮಿಕ ಸಂಘಟನೆಗಳೊಂದಿಗೆ ಫೆಬ್ರವರಿ 16ರಂದು ದೇಶಾದ್ಯಂತ ಗ್ರಾಮೀಣ ಬಂದ್ ಮತ್ತು ಕೈಗಾರಿಕಾ ಮುಷ್ಕರಕ್ಕೆ ಎಸ್‌ಕೆಎಂ ಕರೆಯ ಭಾಗವಾಗಿ ಕರ್ನಾಟಕದಲ್ಲಿ 2024ರ ಫೆಬ್ರವರಿ 16 ರಂದು ಗ್ರಾಮೀಣ ಬಂದ್ ಜತೆಗೆ ಕೈಗಾರಿಕಾ ಮುಷ್ಕರ ನಡೆಸಲಾಗುವುದು” ಎಂದು ಸಂಘಟನಾಕಾರರು ಹೇಳಿದರು.
“ಪ್ರತಿ ವರ್ಷ ಎರಡು ಕೋಟಿ ಉದ್ಯೋಗ ಸೃಷ್ಟಿ, ಬಡವರ ಬ್ಯಾಂಕ್ ಖಾತೆಗಳಿಗೆ 15 ಲಕ್ಷ ರೂಪಾಯಿ ಜಮಾ ಮಾಡುವುದಾಗಿ ಜೋರಾಗಿ ಘೋಷಣೆ ಮಾಡಿದ ಬಿಜೆಪಿ ನೇತೃತ್ವದ ಸರ್ಕಾರದ ದಶಕದ ಆಡಳಿತದಲ್ಲಿ ಜನರ ಮೂಲಭೂತ ಸಮಸ್ಯೆಗಳಿಗೆ ಪರಿಹಾರ ಸಿಗದಿರುವುದು ವಾಸ್ತವದಲ್ಲಿ ಇಂತಹ ಭರವಸೆಗಳಿಗೆ ದ್ರೋಹ ಬಗೆದಂತಿದೆ. ಐವತ್ತು ವರ್ಷಗಳ ಹಿಂದೆ ಇದ್ದಂತೆ ನಿರುದ್ಯೋಗ ಇಂದು ಅತ್ಯಧಿಕವಾಗಿದೆ. ಕಳೆದ ಹತ್ತು ವರ್ಷಗಳಲ್ಲಿ “ಅಚ್ಚೇ ದಿನ್”, “ಹೊಳೆಯುತ್ತಿರುವ ಭಾರತ” ಎಂಬ ಮಾತುಗಳು ವಾಸ್ತವಿಕ ಸತ್ಯಗಳ ಬೆಳಕಿನಲ್ಲಿ ಕ್ರೂರ ಹಾಸ್ಯವಾಗಿ ಮಾರ್ಪಟ್ಟಿವೆ” ಎಂದರು.
“ದುಡಿಯುವ ಜನಸಾಮಾನ್ಯರ ಅಸಲಿ ವೇತನವು ಶೇ.20 ರಷ್ಟು ಕುಸಿದಿದೆ. ಈ ಅವಧಿಯಲ್ಲಿ ಬೆಲೆ ಏರಿಕೆ ದುಪ್ಪಟ್ಟಾಗಿದೆ, ಕಾರ್ಮಿಕರ ವೇತನವನ್ನು ಕುಗ್ಗಿಸುವ ಸಾಧನವಾಗಿ, ಗುತ್ತಿಗೆ ಅಥವಾ ಹೊರಗುತ್ತಿಗೆಯ ಮೇಲೆ ಉದ್ಯೋಗವನ್ನು ರೂಢಿಗೊಳಿಸಲಾಗಿದೆ. ತಾತ್ಕಾಲಿಕ ಕಾರ್ಮಿಕರ ಖಾಸಗಿ ಮತ್ತು ಸಾರ್ವಜನಿಕ ವಲಯಗಳೆರಡರಲ್ಲಿನ ದುಡಿಮೆಯು ಖಾಯಂ ಉದ್ಯೋಗಿಗಳನ್ನು ಮೀರಿಸುತ್ತಿದೆ” ಎಂದು ಹೇಳಿದರು.
“ಕಾರ್ಮಿಕರನ್ನು ಸ್ವಯಂಪ್ರೇರಿತ, ಸ್ಕೀಮ್, ಗಿಗ್ ಇತ್ಯಾದಿ ಎಂದು ಕರೆಯುವ ಮೂಲಕ ಸ್ಥಾನಮಾನ ಮತ್ತು ವೇತನವನ್ನು ನಿರಾಕರಿಸಲಾಗಿದೆ. ಕಾರ್ಪೊರೇಟ್ ವಲಯದ ಸೇವೆಯಲ್ಲಿನ ನೀತಿಯಾಗಿ ಸಾರ್ವಜನಿಕ ವಲಯದ ಉದ್ಯಮಗಳ ಖಾಸಗೀಕರಣದೊಂದಿಗೆ ಕಾರ್ಮಿಕರ ಉದ್ಯೋಗವನ್ನು ಗುತ್ತಿಗೆ ಉದ್ಯೋಗ ಕಡೆಯ ಚಲನೆಯನ್ನು ಮತ್ತಷ್ಟು ತೀವ್ರಗೊಳಿಸಲಾಗುತ್ತಿದೆ” ಎಂದು ಹೇಳಿದರು.
“ಅಂತಸ್ತಿನ ವೇತನವನ್ನು ಪರಿಚಯಿಸುವ ವೇತನ ಸಂಹಿತೆಯ ಮೂಲಕ ಬಿಜೆಪಿ ಸರ್ಕಾರವು ಕನಿಷ್ಟ ವೇತನವನ್ನು ಮತ್ತಷ್ಟು ಕೆಳಮಟ್ಟಕ್ಕಿಳಿಸಲು ಪ್ರಯತ್ನಿಸುತ್ತಿದೆ. ಕಾರ್ಮಿಕರನ್ನು ಮತ್ತಷ್ಟು ಬಡತನಕ್ಕೆ ತಳ್ಳುತ್ತಲಿದೆ. “ನವರತ್ನಗಳು” ಸೇರಿದಂತೆ ಎಲ್ಲ ಪಿಎಸ್‌ಯುಗಳು, ಲಾಭದಾಯಕ ಘಟಕಗಳೆಂದು ಹಣಕಾಸು ಸಚಿವರು ಘೋಷಿಸಿದಾಗ ಬಿಜೆಪಿ ಸರ್ಕಾರವು ತನ್ನ ಉದ್ದೇಶವನ್ನು ಸ್ಪಷ್ಟಪಡಿಸಿದೆ. ಬೆರಳೆಣಿಕೆಯಷ್ಟು ಹೊರತುಪಡಿಸಿ ಖಾಸಗೀಕರಣಗೊಳಿಸಲಾಗುವುದು. ರಾಷ್ಟ್ರೀಕೃತ ಬ್ಯಾಂಕ್‌ಗಳೂ ಈ ನೀತಿಯ ಗುರಿಯಾಗಿವೆ. ಸರ್ಕಾರಿ ಸ್ವತ್ತುಗಳ ಹಣಗಳಿಕೆ ಖಾಸಗೀಕರಣಕ್ಕೆ ಮತ್ತೊಂದು ಹೆಸರಾಗಿದೆ” ಎಂದರು.
“ಕಾರ್ಮಿಕ ವರ್ಗವನ್ನು ಮತ್ತಷ್ಟು ಶೋಷಣೆಗೈಯಲು ಮತ್ತು ಕಷ್ಟಪಟ್ಟು ಗೆದ್ದ ಹಕ್ಕುಗಳನ್ನು ಹತ್ತಿಕ್ಕಲು ಸರ್ಕಾರವು ದೇಶದ ಕಾರ್ಪೊರೇಟ್ ವಲಯ ಮತ್ತು ವಿದೇಶಿ ಬಂಡವಾಳದ ಲಾಭಕ್ಕಾಗಿ ನಾಲ್ಕು ಕಾರ್ಮಿಕ ಸಂಹಿತೆಗಳನ್ನು ತಂದಿದೆ. ಕಾರ್ಪೊರೇಟ್ ಲೂಟಿಗೆ ನೌಕರರ ಪಿಎಫ್ ಮುಕ್ತವಾಗಿದೆ. ಒಪಿಎಸ್‌ ಪುನಃಸ್ಥಾಪಿಸಲು ಸರ್ಕಾರ ನಿರಾಕರಿಸಿದೆ. ಸಿಪಿಎಸ್‌ ಬದಲಿಗೆ. ಈಗ ಸರ್ಕಾರವೂ ಇಸ್ರೇಲ್‌ಗೆ ಭಾರತೀಯ ಕಾರ್ಮಿಕರನ್ನು ನೇಮಕ ಮಾಡಿಕೊಳ್ಳಲು ಅವಕಾಶ ನೀಡುತ್ತಿದೆ. ಹೇಗಾದರೂ ಮಾಡಿ ನಿರುದ್ಯೋಗದಿಂದ ನಲುಗಿಹೋದ ಕಾರ್ಮಿಕರನ್ನು ಪ್ಯಾಲೆಸ್ತೀನ್ ಯುದ್ಧ ವಲಯಕ್ಕೆ ಕರೆದೊಯ್ಯಲು ಹವಣಿಸಲಾಗುತ್ತಿದೆ” ಎಂದು ಹೇಳಿದರು.
“ಕಳೆದ ಐದು ವರ್ಷಗಳಲ್ಲಿ ದೇಶದ ದೊಡ್ಡ ಬಂಡವಾಳಶಾಹಿಗಳ ಲಾಭವು ಶೇ.30ರಷ್ಟು ಏರಿಕೆಯಾಗಿದ್ದರೆ, ಜಾಗತಿಕ ಹಸಿವು ಸೂಚ್ಯಂಕದಲ್ಲಿ 125 ದೇಶಗಳಲ್ಲಿ ಭಾರತವು 111ನೇ ಸ್ಥಾನದಲ್ಲಿದೆ. 191 ದೇಶಗಳಲ್ಲಿ ಜಾಗತಿಕ ಮಾನವ ಅಭಿವೃದ್ಧಿ ಸೂಚ್ಯಂಕದಲ್ಲಿ “ಶೈನಿಂಗ್ ಇಂಡಿಯಾ” 132ನೇ ಸ್ಥಾನದಲ್ಲಿದೆ. ಪತ್ರಿಕಾ ಸ್ವಾತಂತ್ರ್ಯದ ವಿಷಯದಲ್ಲಿ ಭಾರತವು ಪ್ರಸ್ತುತ ಆಡಳಿತದಲ್ಲಿ ಕುಖ್ಯಾತವಾಗಿದೆ. 180 ದೇಶಗಳಲ್ಲಿ 161ನೇ ಸ್ಥಾನವನ್ನು ಗಳಿಸಿದೆ. ಭಾರತ ಪತ್ರಕರ್ತರಿಗೆ ಅಪಾಯಕಾರಿ ಎಂದು ಪರಿಗಣಿಸಲಾಗಿದೆ” ಎಂದರು.
“ಕೋಮುವಾದದ ವಿಭಜಕ ರಾಜಕಾರಣದ ಕ್ರೂರ ಕಲೆಯನ್ನು ಕರಗತ ಮಾಡಿಕೊಂಡಿರುವ ಬಿಜೆಪಿಯು ಬಹುಸಂಖ್ಯಾತ ಸಮುದಾಯವನ್ನು ಓಪಿಯೇಟ್ ಮಾಡಲು ಮತ್ತು ಆ ಮೂಲಕ ಅವರನ್ನು ನೈಜ ಸಮಸ್ಯೆಗಳಿಂದ ಬೇರೆಡೆಗೆ ತಿರುಗಿಸಲು ಮತ್ತು ಚುನಾವಣಾ ಲಾಭಕ್ಕಾಗಿ ಆಕ್ರಮಣಕಾರಿಯಾಗಿ ಹಿಂದುತ್ವ ಕಾರ್ಡ್ ಆಡುತ್ತಿದೆ. ಈ ಪರಿಸ್ಥಿತಿಗಳಲ್ಲಿ, ಕಾರ್ಮಿಕ ವರ್ಗವು ಈ ಕಾನೂನುಗಳನ್ನು ಹಿಂಪಡೆಯಲು ಮೋದಿ ಸರ್ಕಾರವನ್ನು ಒತ್ತಾಯಿಸಿದ ಮೂರು ಕೃಷಿ ಕಾನೂನುಗಳ ವಿರುದ್ಧ ರೈತರ ಇತ್ತೀಚಿನ ಸುದೀರ್ಘ ಹೋರಾಟದಿಂದ ಪಾಠಗಳನ್ನು ಕಲಿಯಬೇಕಿದೆ. ಚಳವಳಿಯ ನೇತೃತ್ವ ವಹಿಸಿದ್ದ ಎಸ್‌ಕೆಎಂ ಸರ್ಕಾರ ನೀಡಿದ ಭರವಸೆಗಳನ್ನು ಜಾರಿಗೆ ತರಲು ಒತ್ತಾಯಿಸುತ್ತಿದೆ” ಎಂದರು.
“ಪ್ರಸ್ತುತ ಅಪಾಯಕಾರಿ ರಾಜಕೀಯ ಸನ್ನಿವೇಶದಲ್ಲಿ, ಕಾರ್ಮಿಕ ವರ್ಗವು ಬಿಜೆಪಿ ಸರ್ಕಾರದ ಕಾರ್ಪೊರೇಟ್ ಪರ, ಜನವಿರೋಧಿ ನೀತಿಗಳ ವಿರುದ್ಧ ಒಂದೇ ಧ್ವನಿಯಲ್ಲಿ ಎದ್ದು ನಿಲ್ಲಬೇಕಾಗಿದೆ. ಈ ಕಾರ್ಯದ ಭಾಗವಾಗಿ ನಾವು ಫೆಬ್ರವರಿ 16ರಂದು ಕೈಗಾರಿಕಾ ಮುಷ್ಕರ ಮತ್ತು ಗ್ರಾಮೀಣ ಭಾರತ ಬಂದ್‌ನ ಭಾಗವಾಗಿ ಪ್ರತಿಭಟನೆ ಮೂಲಕ ಕೆಲವು ಹಕ್ಕೋತ್ತಾಯಗಳನ್ನು ಈಡೇರಿಸಬೇಕು” ಎಂದು ಒತ್ತಾಯಿಸಿದರು.
“ರೈತರ ಆದಾಯವನ್ನು ಕಾನೂನು ಬದ್ಧ ಖಾತರಿಯೊಂದಿಗೆ ದ್ವಿಗುಣಗೊಳಿಸಬೇಕು. ಬೀಜದ ಮೇಲಿನ ಸಬ್ಸಿಡಿಯನ್ನು ಶೇ.50ರಷ್ಟು ಹೆಚ್ಚಳ ಮಾಡಬೇಕು. ಉತ್ಪಾದನಾ ವೆಚ್ಚ ಕಡಿಮೆ ಮಾಡಲು ರಸಗೊಬ್ಬರ, ವಿದ್ಯುತ್ ಸಬ್ಸಿಡಿ ಒದಗಿಸಬೇಕು. ರಾಷ್ಟ್ರೀಯ ಕನಿಷ್ಠ ವೇತನ ತಿಂಗಳಿಗೆ ₹31,000 ನಿಗದಿಪಡಿಸಬೇಕು” ಎಂದು ಆಗ್ರಹಿಸಿದರು.
“ಕಾರ್ಮಿಕ ದ್ರೋಹಿ 4 ಕಾರ್ಮಿಕ ಸಂಹಿತೆಗಳನ್ನು ಹಿಂಪಡೆಯಬೇಕು. ಉದ್ಯೋಗ ಖಾತರಿ ಕಾರ್ಮಿಕರ ದಿನಗೂಲಿ ₹500 ಹಾಗೂ ವರ್ಷಪೂರ್ತಿ ಕೆಲಸ ಒದಗಿಸಬೇಕು. ಗುತ್ತಿಗೆ ಕಾರ್ಮಿಕ ಪದ್ಧತಿ ರದ್ದುಗೊಳಿಸಿ, ಖಾಯಂ ಕೆಲಸ ಒದಗಿಸಬೇಕು. ತೋಟ ಕಾರ್ಮಿಕರಿಗೆ ಸಾಮಾಜಿಕ ಭದ್ರತೆ, ಕೆಲಸದ ಸುರಕ್ಷತೆ ಒದಗಿಸಬೇಕು” ಎಂದು ಒತ್ತಾಯಿಸಿದರು.
“ಚಳವಳಿ ನಡೆಸುತ್ತಿರುವ ರೈತ ಕಾರ್ಮಿಕರನ್ನು ದೆಹಲಿ ಒಳಗಡೆ ಬಿಡಬೇಕು. ರೈತ ಕಾರ್ಮಿಕರು ಬರುವ ಹೆದ್ದಾರಿಗಳಿಗೆ ಮೊಳೆ ಹೊಡೆದು, ಹೊಗೆ ಬಾಂಬ್ ಸಿಡಿಸಿ, ರಬ್ಬರ್ ಗುಂಡುಗಳನ್ನು ಹೊಡೆದು, ದೌರ್ಜನ್ಯವೆಸಗುತ್ತಿರುವ ಕೇಂದ್ರ ಸರ್ಕಾರದ ಫ್ಯಾಸಿಸ್ಟ್ ಸರ್ಕಾರಿ ಭಯೋತ್ಪಾದನೆಯನ್ನು ನಿಯಂತ್ರಿಸಬೇಕು.
ಈ ಸುದ್ದಿ ಓದಿದ್ದೀರಾ? ದಾವಣಗೆರೆ | ಕೃಷಿಗಾಗಿ ರೂಢಿಗತ, ನಕಾಶೆಯಲ್ಲಿರುವ ದಾರಿ ಬಿಡಿಸಿಕೊಡುವಂತೆ ಡಿಸಿ ಸೂಚನೆ
“ಪ್ರಜಾಪ್ರಭುತ್ವ, ಮಾನವ ಹಕ್ಕುಗಳನ್ನು ನಾಶಗೊಳಿಸುತ್ತಿರುವ, ಸಂವಿಧಾನದ ಆಶಯಗಳನ್ನು ಗಾಳಿಗೆ ತೂರಿದ ಕೇಂದ್ರ ಸರ್ಕಾರವನ್ನು ಕೂಡಲೇ ವಿಸರ್ಜನೆಗೊಳಿಸಿ, ರಾಷ್ಟ್ರಪತಿ ಆಳ್ವಿಕೆಗೆ ಮುಂದಾಗಬೇಕು. 2020ರ ರೈತ ಚಳವಳಿಯಲ್ಲಿ ಮೃತರಾದ 780 ಮಂದಿ ರೈತ ಕುಟುಂಬಗಳಿಗೆ ಪರಿಹಾರ ನೀಡಬೇಕು. ಪೊಲೀಸ್ ಮಿಲಿಟರಿ ಪಡೆಗಳಿಂದ ಗಾಯಗೊಂಡ ರೈತ ಕಾರ್ಮಿಕರಿಗೆ ಸೂಕ್ತ ಪರಿಹಾರ ನೀಡಬೇಕು” ಎಂದರು.
ಜಿ ಅಮರೇಶ, ಅಜೀಜ್ ಜಾಗೀರದಾರ, ಮಲ್ಲಯ್ಯ ಕಟ್ಟಿಮನಿ, ಅಡಿವಿ ರಾವ್, ಸೈಯದ್ ಅಬ್ಬಾಸಲಿ, ಭಾಷಾ ಖಾನ್, ಲಕ್ಷ್ಮಣ್ ಇದ್ದರು.
