ಬೆಳಗಾವಿ ತಾಲೂಕಿನ ಮಚ್ಛೆ ಗ್ರಾಮದ ಸ್ವಾತಿ ಶ್ರೀಧರ ಸನದಿ (ಸ್ವಾತಿ ಕೇದಾರಿ ಸನದಿ) ಎಂಬ ಯುವತಿ ಜುಲೈ 12ರಂದು ಬೆಂಗಳೂರಿನಲ್ಲಿ ಸಂಶಯಾಸ್ಪದವಾಗಿ ಸಾವನ್ನಪ್ಪಿದ ಘಟನೆ ಇದೀಗ ಕುತೂಹಲಕ್ಕೆ ಕಾರಣವಾಗಿದೆ.
ಮೃತ ಯುವತಿಯ ಮನೆಯವರು, ಇದು ಆತ್ಮಹತ್ಯೆಯಲ್ಲ, ಕೊಲೆ ಎಂದು ಆರೋಪಿಸಿ, ಇಂದು ಬೆಳಗಾವಿ ನಗರ ಪೊಲೀಸ್ ಆಯುಕ್ತರಿಗೆ ಮನವಿ ಸಲ್ಲಿಸಿದ್ದಾರೆ.
ಶಿಕ್ಷಣಕ್ಕೆ ವಿರೋಧ – ಕಿರುಕುಳ ಆರೋಪ
ಮೃತ ಸ್ವಾತಿ ಮದುವೆಯ ನಂತರ ಪತಿಯೊಂದಿಗೆ ಬೆಂಗಳೂರಿನಲ್ಲಿ ವಾಸವಾಗಿದ್ದಳು. ಕುಟುಂಬದವರ ಪ್ರಕಾರ, ಸ್ವಾತಿ ಮುಂದುವರಿದ ಶಿಕ್ಷಣ ಪಡೆಯಲು ಬಯಸುತ್ತಿದ್ದರೂ, ಪತಿ ಮನೆಯವರು ಪದೇ ಪದೇ ವಿರೋಧ ವ್ಯಕ್ತಪಡಿಸುತ್ತಿದ್ದರು. ಅಲ್ಲದೇ, ಆಕೆಗೆ ನಿರಂತರ ಕಿರುಕುಳ ನೀಡಲಾಗುತ್ತಿತ್ತೆಂದು ಆರೋಪಿಸಲಾಗಿದೆ.
ಜುಲೈ 12ರಂದು ಸ್ವಾತಿ ತನ್ನ ವಾಸಸ್ಥಳದ ಕಿಟಕಿಗೆ ನೇಣು ಹಾಕಿಕೊಂಡಿರುವ ಸ್ಥಿತಿಯಲ್ಲಿ ಪತ್ತೆಯಾಗಿದ್ದಾಳೆ. ಈ ಘಟನೆ ಆತ್ಮಹತ್ಯೆಯೇ ಅಥವಾ ಕೊಲೆಯೇ ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ.
ಪೊಲೀಸರ ವಿರುದ್ಧ ಕುಟುಂಬದವರ ಆಕ್ರೋಶ
ಯುವತಿಯ ಮನೆಯವರು, “ಸ್ವಾತಿ ಸಾವಿಗೆ ಪತಿ ಹಾಗೂ ಅವರ ಮನೆಯವರೇ ಕಾರಣ. ಆದರೆ ಪೊಲೀಸರು ಇದುವರೆಗೂ ಪ್ರಕರಣ ದಾಖಲಿಸಿಲ್ಲ,” ಎಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ಬಿಜೆಪಿ ಮಹಿಳಾ ಕಾರ್ಯಕರ್ತೆ ಡಾ. ಸೋನಾಲಿ ಸರನೋಬತ್ ಕೂಡ ಕುಟುಂಬದವರಿಗೆ ಬೆಂಬಲ ಸೂಚಿಸಿ, “ಈ ಘಟನೆ ಅನುಮಾನಾಸ್ಪದವಾಗಿದೆ. ಪೊಲೀಸರ ನಿರ್ಲಕ್ಷ್ಯ ತಕ್ಷಣ ಸರಿಯಬೇಕು ಮತ್ತು ಸ್ವಾತಿಗೆ ನ್ಯಾಯ ಸಿಗಬೇಕು,” ಎಂದು ಆಗ್ರಹಿಸಿದರು.
ಈ ಪ್ರಕರಣದಲ್ಲಿ ಪೊಲೀಸರು ಇನ್ನೂ ಅಧಿಕೃತವಾಗಿ ಎಫ್‌ಐಆರ್ ದಾಖಲಿಸಿಲ್ಲ. ಕುಟುಂಬದವರು ತಕ್ಷಣ ಕ್ರಮ ಕೈಗೊಳ್ಳಬೇಕೆಂದು ಒತ್ತಾಯಿಸಿದ್ದಾರೆ.
