ಬಳ್ಳಾರಿಯಲ್ಲಿರುವ ಕೇಂದ್ರ ಉಕ್ಕು ಸಚಿವಾಲಯದ ‘ರಾಷ್ಟ್ರೀಯ ಖನಿಜ ಅಭಿವೃದ್ಧಿ ನಿಗಮ(ಎನ್‌ಎಂಡಿಸಿ) ಒಡೆತನದ ʼಕುಮಾರಸ್ವಾಮಿ ಐರನ್ ಓರ್ ಮೈನ್ಸ್‌ನಲ್ಲಿ ಗಂಭೀರ ಶಾಸನಾತ್ಮಕ ಉಲ್ಲಂಘನೆಗಳು ನಡೆಯುತ್ತಿದ್ದು, ಗಣಿಗಾರಿಕೆಗೆ ನೀಡಿರುವ ಪರಿಸರ ಅನುಮೋದನೆ(ಇಸಿ) ಪ್ರಮಾಣ ಪತ್ರವನ್ನು ಕೂಡಲೇ ರದ್ದುಗೊಳಿಸಬೇಕು’ ಎಂದು ಸಮಾಜ ಪರಿವರ್ತನ ಸಮುದಾಯ(ಎಸ್‌ಪಿಎಸ್) ಮುಖ್ಯಸ್ಥ ಎಸ್ ಆರ್ ಹಿರೇಮಠ ಅವರು ಆಗ್ರಹಿಸಿದ್ದಾರೆ.
ಬಳ್ಳಾರಿಯಲ್ಲಿ ಸುದ್ದಿಗೋಷ್ಟಿ ಉದ್ದೇಶಿಸಿ ಮಾತನಾಡಿದ ಅವರು, “ಈ ಸಂಬಂಧ ಕೇಂದ್ರ ಸರ್ಕಾರದ ಪರಿಸರ, ಅರಣ್ಯ ಮತ್ತು ಹವಾಮಾನ ಬದಲಾವಣೆ ಸಚಿವಾಲಯಕ್ಕೆ ದೂರು ಸಲ್ಲಿಸಲಾಗಿದೆ. ಎನ್‌ಎಂಡಿಸಿಯಿಂದ ಆಗುತ್ತಿರುವ ಸಮಸ್ಯೆ ಮತ್ತು ಅದರ ವಿರುದ್ಧ ನಡೆಸಬೇಕಾದ ಹೋರಾಟಗಳ ಕುರಿತು ಚರ್ಚಿಸಲು ವೇಣಿವೀರಾಪುರದ ವೇಮನ ಪೀಠದ ಬಳಿ ಶುಕ್ರವಾರ(ಇಂದು) ಮಧ್ಯಾಹ್ನ ಗಣಿ ಬಾಧಿತ ಪರಿಸರದ ಜನರ ಸಭೆ ನಡೆಸಲಾಗುವುದು” ಎಂದು ತಿಳಿಸಿದ್ದಾರೆ.
“ಎನ್‌ಎಂಡಿಸಿ ಸಂಸ್ಥೆಯು ಷರತ್ತಿನಂತೆ ಕನ್‌ವೇಯರ್ ಬೆಲ್ಟ್ ಮೂಲಕ ಅದಿರು ಸಾಗಿಸದೆ, ನಿಯಮಗಳನ್ನು ಗಾಳಿಗೆ ತೂರಿ ಲಾರಿಗಳ ಮೂಲಕ ರವಾನಿಸಲಾಗುತ್ತಿದೆ. ರಣಜಿತ್ ಪುರ, ನರಸಿಂಘಪುರ ಹಾಗೂ ಸುಬ್ಬರಾಯನಹಳ್ಳಿ ಗ್ರಾಮಗಳ ಗ್ರಾಮೀಣ ರಸ್ತೆಗಳ ಮೇಲೆ ನಿರಂತರವಾಗಿ ಕಬ್ಬಿಣದ ಅದಿರನ್ನು ಸಾಗಿಸುತ್ತಿದೆ. ಇದರಿಂದಾಗಿ ಭಾರೀ ಪ್ರಮಾಣದ ಮಾಲಿನ್ಯ ಉಂಟಾಗುತ್ತಿದ್ದು, ಗ್ರಾಮೀಣ ಜನ ತೀವ್ರ ಆರೋಗ್ಯ ಸಮಸ್ಯೆ ಎದುರಿಸುತ್ತಿರುವುದಾಗಿ ಎಸ್‌ಪಿಎಸ್ ದೂರಿದೆ. 2021 ಮತ್ತು 2023ರ ಪರಿಸರ ಅನುಮೋದನೆಯ ಕಠಿಣ ಷರತ್ತುಗಳನ್ನು ಎನ್‌ಎಂಡಿಸಿ ಉದ್ದೇಶಪೂರ್ವಕವಾಗಿ ಉಲ್ಲಂಘಿಸುತ್ತಿದೆ ಮತ್ತು ಸುಳ್ಳು ಅನುಪಾಲನಾ ವರದಿಗಳನ್ನು ನೀಡುತ್ತಿದೆ” ಎಂದು ಆರೋಪಿಸಿದರು.
“ಜನವರಿ 19ರಂದು ಎಸ್‌ಪಿಎಸ್ ನೀಡಿದ್ದ ದೂರನ್ನು ಆಧರಿಸಿ, ಪರಿಸರ ಸಚಿವಾಲಯದ ಬೆಂಗಳೂರು ಪ್ರಾದೇಶಿಕ ಕಚೇರಿಯ ವಿಜ್ಞಾನಿಗಳು ಜನವರಿ 27ರಂದು ಗಣಿ ಪ್ರದೇಶದಲ್ಲಿ ಕ್ಷೇತ್ರ ಪರಿಶೀಲನೆ ನಡೆಸಿದ್ದರು. ಈ ವರದಿಯಲ್ಲೂ ಕನ್‌ವೇಯರ್ ಬೆಲ್ಟ್ ಕೆಲಸ ಮಾಡದಿರುವುದು ಹಾಗೂ ಗ್ರಾಮೀಣ ರಸ್ತೆಗಳಲ್ಲಿ ಅದಿರು ಸಾಗಾಟವಾಗುತ್ತಿರುವುದು ದೃಢಪಟ್ಟಿದೆ. ಈ ಹಿಂದೆ ಕೇಂದ್ರ ಉನ್ನತಾಧಿಕಾರ ಸಮಿತಿ ಮತ್ತು ಮೇಲುಸ್ತುವಾರಿ ಪ್ರಾಧಿಕಾರದ ನ್ಯಾಯಮೂರ್ತಿ ಅವರು 2025ರ ಏಪ್ರಿಲ್‌ನಲ್ಲಿ ಈ ಲೋಪವನ್ನು ಎತ್ತಿ ತೋರಿಸಿದ್ದರು. ಬಳಿಕ ಕನ್‌ವೇಯರ್ ಬೆಲ್ಟ್ ತಾತ್ಕಾಲಿಕವಾಗಿ ಕಾರ್ಯನಿರ್ವಹಿಸಿದ್ದವು. ಆದರೆ ನಂತರ ಪರಿಸ್ಥಿತಿ ಮತ್ತೆ ಮರುಕಳಿಸಿದ್ದು, ಯಥಾ ಪ್ರಕಾರ ನಡೆಯುತ್ತಿದೆ” ಎಂದರು.
ಇದನ್ನೂ ಓದಿದ್ದೀರಾ? ಯಾದಗಿರಿ | ರೈತ ತರಬೇತಿ ಕೇಂದ್ರ ಉದ್ಘಾಟಿಸಿದ ನಿರ್ಮಲಾ ಸೀತಾರಾಮನ್
“ಗಣಿಬಾಧಿತ ಪರಿಸರ ಮತ್ತು ಸಾರ್ವಜನಿಕ ಹಿತರಕ್ಷಣೆಗಾಗಿ ಎನ್‌ಎಂಡಿಸಿ ತಕ್ಷಣವೇ ಗ್ರಾಮೀಣ ರಸ್ತೆಗಳ ಮೇಲೆ ಅದಿರು ಸಾಗಿಸುವುದನ್ನು ನಿಲ್ಲಿಸಬೇಕು. ಶಾಸನಾತ್ಮಕ ಷರತ್ತುಗಳನ್ನು ಉಲ್ಲಂಘಿಸಿರುವುದಕ್ಕೆ ಎನ್‌ಎಂಡಿಸಿಗೆ ಭಾರೀ ಮೊತ್ತದ ದಂಡ ವಿಧಿಸಬೇಕು ಮತ್ತು ಆ ಹಣವನ್ನು ಕೆಎಂಇಆರ್‌ಸಿಗೆ ಜಮೆ ಮಾಡಬೇಕು. ಸುಳ್ಳು ವರದಿ ನೀಡಿ ದಾರಿತಪ್ಪಿಸಿರುವ ಸಂಸ್ಥೆಗೆ ನೀಡಿರುವ ಪರಿಸರ ಅನುಮೋದನೆ(ಇಸಿ)ಯನ್ನು ತಕ್ಷಣವೇ ವಾಪಸ್ ಪಡೆಯಬೇಕು. ಸುಪ್ರೀಂ ಕೋರ್ಟ್ ನಿಗದಿಪಡಿಸಿರುವ 8.6 ಟನ್ ಗರಿಷ್ಠ ಅದಿರು ಉತ್ಪಾದನಾ ಮಿತಿಯನ್ನು ಮರುಪರಿಶೀಲಿಸಬೇಕು. ಗಣಿಬಾಧಿತ ಸಮುದಾಯಗಳ ಆರೋಗ್ಯ, ರಸ್ತೆ ಸುರಕ್ಷತೆ ಹಾಗೂ ಪರಿಸರ ಸಂರಕ್ಷಣೆಗಾಗಿ ಕೇಂದ್ರ ಪರಿಸರ ಸಚಿವಾಲಯವು ಕಾಲವಿಳಂಬ ಮಾಡದೆ ಕಠಿಣ ಕ್ರಮ ಕೈಗೊಳ್ಳಬೇಕು” ಎಂದು ಅವರು ಒತ್ತಾಯಿಸಿದರು.
ಸುದ್ದಿಗೋಷ್ಠಿಯಲ್ಲಿ ಜನಸಂಗ್ರಾಮ ಪರಿಷತ್‌ನ ಅಧ್ಯಕ್ಷ ಟಿ ಎಂ ಶಿವಕುಮಾರ್, ಹೋರಾಟಗಾರರಾದ ಮೂಲಿಮನಿ ಈರಣ್ಣ, ಗುಜ್ಜೂರ್‌ ಖಲೀಂ ಇದ್ದರು.
