ದಾವಣಗೆರೆಯ ವಿಶ್ವವಿದ್ಯಾನಿಲಯದ ಇಂಗ್ಲಿಷ್ ಅಧ್ಯಯನ ವಿಭಾಗ ಹಾಗೂ ಭಾರತೀಯ ಭಾಷಾ ಕೇಂದ್ರ ಜಂಟಿಯಾಗಿ ಆಯೋಜಿಸಿರುವ ಕನ್ನಡ, ತೆಲುಗು, ಉರ್ದು ಸೇರಿದಂತೆ ಭಾರತೀಯ ಭಾಷೆಗಳ ಭಾಷಾಂತರ ಕೌಶಲ್ಯ ತರಬೇತಿ ಶಿಬಿರ ದಾವಣಗೆರೆ ವಿಶ್ವವಿದ್ಯಾಲಯದ ಸಮಾಜ ವಿಜ್ಞಾನ ಸಭಾಂಗಣದಲ್ಲಿ ಜರುಗಿತು.
ಶಿಬಿರವನ್ನು ಉದ್ಘಾಟಿಸಿದ ಲೇಖಕಿ ಹಾಗೂ ಅನುವಾದಕಿ ಡಾ. ಅನುರಾಧ ಪಿ ಎಂ ಅವರು ಅನುವಾದದ ಇತಿಹಾಸದ ಬಗ್ಗೆ ಮಾತನಾಡಿ, ಅನುವಾದದ ಸ್ವರೂಪ, ವ್ಯಾಪ್ತಿ ಹಾಗೂ ತೊಡಕುಗಳ ಕುರಿತು ಸಾಹಿತ್ಯದ ಉದಾಹರಣೆ ನೀಡಿ ವಿವರಿಸಿದರು.
ಸಂಪನ್ಮೂಲ ವ್ಯಕ್ತಿ ಪ್ರೊ. ಬಿ ಎಲ್ ರಾಜು ಮಾತನಾಡಿ, “ಅನುವಾದ ಕೇವಲ ಭಾಷೆಗಳ ಅನುವಾದ ಅಷ್ಟೇ ಅಲ್ಲದೆ, ಕಲ್ಚರಲ್ ಅನುವಾದವೂ ಕೂಡ ತಿಳಿದಿರಬೇಕು. ಭಾಷೆಗಳ ಜತೆಗೆ ಅನುವಾದಕರಿಗೆ ಎರಡು ಭಾಷೆಗಳ ಸಂಸ್ಕೃತಿ, ವಿಭಿನ್ನತೆ ಗೊತ್ತಿರಬೇಕು” ಎಂದು ಅನುವಾದದ ಅಗತ್ಯತೆ ಒತ್ತಿ ಹೇಳಿದರು.
ಭಾಷಾ ತಜ್ಞ ಪ್ರೊ. ಮೇಟಿ ಮಲ್ಲಿಕಾರ್ಜುನ, ಅನುವಾದದ ಪ್ರಮುಖ ಚಿಂತಕರಾದ ವಾಲ್ಟರ್ ಬೆಂಜಾಮಿನ್, ಜಾಕ್ ಧರಿದ, ಗಾಯತ್ರಿ ಸ್ಪೀವಾಕ್, ಹೊಮಿ ಕೆ ಬಾಬಾ, ಡಿ ಆರ್ ನಾಗರಾಜ್, ತೇಜಸ್ವಿನಿ ನಿರಂಜನ್ ಮುಂತಾದ ಚಿಂತಕರು ಅನುವಾದದ ಅಧ್ಯಯನಕ್ಕೆ ನೀಡಿದ ವಿಚಾರಗಳ ಬಗ್ಗೆ ಚರ್ಚಿಸಿದರು. ಭಾರತೀಯ ಅನುವಾದದ ಮಿಷನ್ನಿನ ಡಾ. ಉಷಾ ರಾಣಿ ಅವರು, ರಾಷ್ಟ್ರೀಯ ಅನುವಾದ ಮಿಷನ್ ಕಾರ್ಯಕ್ರಮಗಳು ಹಾಗೂ ಅವಕಾಶಗಳ ಬಗ್ಗೆ ವಿದ್ಯಾರ್ಥಿಗಳಿಗೆ ಮಾಹಿತಿ ನೀಡಿದರು. ವಿವಿಯ ಕುಲಪತಿ ಡಾ. ವೆಂಕಟೇಶ್ ಕೆ ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ್ದರು.
ಕಾರ್ಯಕ್ರಮದಲ್ಲಿ ಮುಖ್ಯ ಅತಿಥಿಗಳಾಗಿ ಕುಲಸಚಿವ ಎಸ್ ಬಿ ಘಂಟಿ, ಕಲಾ ನಿಕಾಯದ ಡೀನ್ ಪ್ರೊ. ಲೋಕೇಶ್ ಎಂ ಯು, ಇಂಗ್ಲಿಷ್ ವಿಭಾಗದ ಸಂಯೋಜನಾಧಿಕಾರಿ ಡಾ. ಫಕೀರೇಶ ಹಳ್ಳಳ್ಳಿ, ಡಾ ಯಜ್ಞಶ್ರೀ, ಇಂಗ್ಲಿಷ್ ವಿಭಾಗದ ಡಾ ರವಿಕುಮಾರ್ ಕುಂಬಾರ್, ಮದಕರಿ ನಾಯಕ ಹಾಗೂ ಶಿಬಿರಾರ್ಥಿಗಳು ಇದ್ದರು.
ಈ ಸುದ್ದಿ ಓದಿದ್ದೀರಾ? ಜಾಗತಿಕ ಚಿತ್ರರಂಗಕ್ಕೆ ‘ವಾಸ್ತವ’ದ ಹೊಸ ದೃಷ್ಟಿಕೋನ ನೀಡಿದ ಗ್ಲೌಬರ್ ರೋಚಾ ಸಿನೆಮಾಗಳು
ಕನ್ನಡ, ತೆಲುಗು, ಉರ್ದು ಸೇರಿದಂತೆ ಭಾರತೀಯ ಭಾಷೆಗಳ ಭಾಷಾಂತರ ಕೌಶಲ್ಯ ತರಬೇತಿ ಶಿಬಿರವನ್ನು ದಾವಣಗೆರೆಯ ವಿಶ್ವವಿದ್ಯಾನಿಲಯದ ಇಂಗ್ಲಿಷ್ ಅಧ್ಯಯನ ವಿಭಾಗ ಹಾಗೂ ಭಾರತೀಯ ಭಾಷಾ ಕೇಂದ್ರದ ಸಂಯುಕ್ತಾಶ್ರಯದಲ್ಲಿ ದಾವಣಗೆರೆ ವಿಶ್ವವಿದ್ಯಾಲಯದಲ್ಲಿ ಆಯೋಜಿಸಿದ್ದು ಜೂನ್ 2 ರಿಂದ 4ರವರೆಗೆ ಮೂರು ದಿನಗಳ ಕಾಲ ನಡೆಯಲಿದೆ.
